1

Om Swastyastu

PUPUH PANGKUR

1.    Pamurwaning atur tityang

 Agama Hindu bacakannya kepah trini
 Tatwa Susila kawuwus
 Miwah Upacara ika
 Sandang pisan pelajahin
 Mangda weruh
 Pang tan pemarginé ngawag
 Salah suduk kewastanin

PUPUH DANGDANG

2.     Upacara, pidartayang sané mangkin

Mangda sinah
Anggén ngelantarang
Atma Paramaatma nunggil
Papa lan klésa kalebur
Suci nirmala ka apti
Upakara jalarannya
Bebanten ketah kaucap
Tapakan Ida Bathara
Saksat wimba
Téja prabawan Hyang Widhi
Anggén mangulengang manah
 2

PUPUH GINADA

3.    Munggwing sranane tiyosan

Wantah toya sane ening
Odakem ika arannya
Palinggihan Bathara Wisnu
Yening wus kejaya-jaya
Kewastanin
Tirta muwah wasuh pada

PUPUH SINOM

4.    Geniné mangkin aturang

Né pinaka upasaksi
Dipania magawé terang
Kukusnia manyujur langit
Déwania Sang Hyang Agni
Saksat mukaning Déwata
Yan anutang ring payadnyan
Homa Yadnya kawastanin
Sida nglebur
Mala petakaning jagat

PUPUH DURMA

5.    Puspa warna
Nyihnayang kayuné bungah
Ring Kalpika kadagingin
Pragan Déwa Nawa Sanga
Genahnia manut warna
Anggén srana mangebakti
Utsahayang
Né kemombo ka ulati
 3

GINADA LINGGAR PETAK

6.    Sarwa patra kainggilang

Anggén srana banten suci
Busung slépan miwah lontar
Taler sekancan daun
Lan sarwa padang-padangan
Saha rininggit
Cihna Seni lan Budaya
  
SINOM WUG PAYANGAN

7.    Raka-raka ring bebanten

Sarwa palané ring bumi
Ring gaga muwah ring sawah
Anggén cihna rasa bakti
Yan ngaturang sané becik
Becik taler né kalungsur
Prasadem ika ngarannya
Pinaka amerta jati
Mangda patut
Tan kaucap mangan dosa

GINADA BASUR

8.    Upacara kagelarang
dawuh ayu manut indik
wénten abulan apisan
wénten taler né ngetahun
nitya Yadnya sané nyabran
ngenem sasih
ngemargiang  piodalan
 4

PUPUH SEMARANDANA

9.    Wénten né mabuat malih

Indik Panca Gita ika
Panca maarti lalima
Gita swara ané melah
Puja mantra sang Pandita
Genta prekasa kawuwus
Tegteg agungé tan pegat

10.  Lan sarwa Kidung Kekawin

Sekar alit pupuh macepat
Wewalén ring jaba tengah
Ringgit lan Topéng pajegan
Baris Péndet miwah Rejang
Semar pegulingan angklung
Gong gedé tabuh lelambatan

PUPUH GAMBUH

11.  Upacarané sampun puput

Panca sembah dabdabang durus
Asana nginkinang genah mangda becik
Pranayama uswasa iku
Kara sudana sudha angga

PUPUH GINANTI

12.  Acamana selantur ipun

Mersihang tangané kalih
Makekobok lan kekurah
Raris tangané asepin
Dupa astra ka astawa
Panca sembahé kawitin
 5

PUPUH GINADA

13.  Sembah puyung unggahang

Ngulengang kayun ring Widhi
Mangeningang heredaya
Puspa petak slantur ipun
Ngayat Hyang Siwa Raditya
Mangda ngaksi
Puja waliné kamargiang

SINOM LAWE

14.   Sembah sané kaping tiga

Maserana antuk kwangi
Sang Hyang Widhi ka astawa
Lan prabawan Ida sami
Sané ka aturin wali
Kaping pat kuwangi dulur
Ngayat  Déwa Samodaya
Nunas panugrahan sidi
Sembah puyung
Ngaturang prama suksma

PUPUH ADRI

15.  Raris dané jero mangku

Micayang wasuh pada
Sané suci mapasupati
Masesirat dané ping telu
Raris ping tiga kainum
Kausapang ring wunwunan
Maraup selantur ipun
Ngicalang mala ring raga
Mogi swasti paripurna
 6

WESANANING ATUR
PUPUH MIJIL

16.  Sampun prapta dawuh ngewatesin

Wantah amunika
Tityang sida nagingin pikayuné
Mogi nénten ngawénang geleng ati
Atur Prama Santhi
Om Santhi Santhi Santhi Om

Kasalin Olih :
I MADE BERATA / MD SOLMET
Jln. Nuri No.4 Br Jambe Belodan
Ds Dauh Peken - Tabanan