Nama : I Wayan Windu Adriarta

No : 17

Kelas : VIIF

Tema Pelestarian Hutan

Pembalakan Liar

Matur suksma ring pangenter acara, indik galah sane sampun kapica.

Para manggala sane singgihang titiang. Guru Wisesa pinaka murdaning jagad
Guru pangajian pinaka pengentas kawidhi sastra sane wangiang titiang.
Taler, Semeton sinamian sane tresnain titiang.

Malarapan galahe puniki, ledangang titiang ngaturang pidarta, ring nyanggra Hari
Lingkungan Hidup warsane mangkin. Raris, napi sane jagi aturang titiang, dumogi
prasida anggen umimba majeng ring semeton sinamian.

Nanging sadurung titiang nglantur matur, ngiring sinareng sami ngaturang

pangastungkara, majeng ring Ida Sanghyang Widhi. Mapan wantah antuk kaledangan
lan pasuecan Ida, iraga sareng sami prasida seger oger, tan kirang punapa punapi,
malarapan panganjali, Om Swastyastu.

Ratu Ida Dane Sareng Sami.

Nyabran rahina iraga mireng wiadin miragi orti ring televisi, taler ring koran-koran,
indik penebangan liar utawi penebangan taru ring alase sane nenten anut ring tata titi
pelestarian lingkungan hidup utamaning pelestarian hutan. Hutan inggih punika alas
utawi wana, kayune kaebah utawi kapungkatang olih jadma duratmaka sane nenten
sutindih tur rungu tekening kelestarian lingkungan. Titiang newek merasa sebet miragi
ortine punika. Mapan pilaku-pilaku sane nenten nganut ring Tri Hita Karana,
nguber bisnis komanten, nanging nenten ngitungang indik kalestarian wanane.

Sampun makudang-kudang bantang sane sampun kapunggel. Kudang kubik sane

sampun telas. Nika sane ngawinang tanahe dados kritis, mapan wanane sampun ligir,
gundul raos mangkine. Entik-entikane sampun telas kaabas. Wana sane gundul punika
satmaka ngeranayang bencana, utamane banjir lan tanah longsor. Bencana punika
pastika jaga rauh yening iraga nenten saking mangkin nincapang uratian iraga sareng
sami. .

Pamiarsa sareng sami.

Titiang nangiang indike punika ring ajeng semeton sareng sami. Mangda saking
mangkin iraga sareng sami urati lan mautsaha. Asapunapi antuk wana wiadin alas
druene prasida lestari, wana sane ligir mangda prasida katanemin entik-entikan malih. .

Silih sinunggil iraga suud mapilaku ngusak asik wiadin nguwug wana utami alase.
Munggel punyan kayu sane nenten anut tata titi kelestarian, sane kabaos penebangan
liar lan pembabatan hutan sane ngamentingang kuub bisnis komanten, tanpa urati ring
kelestarian lingkungan.

Lingkungan, gunung, wana, lan danune yening prasida lestari nika pinaka pangastutin
iraga sareng sami majeng ring Ida Sanghyang Widhi, utamaning Ida meraga Sanghyang
Parama Kawi. Samalihne iraga prasida mapaica waris ring pianak putu iraga makejang,
antuk jagad utawi palemahan sane asri lan lestari. Yening palemahane asri lan lestari,
sinah pianak putune bencang prasida nugtugang urip ring jagate, nemu rahayu, rahajeng
tanpa nemu ala bancana ring selantang tuwuhnyane. .

Ainggih, wantah asapunika titiang prasida ngawedar indik kautamaan ngalestariang

palemahan, utamane alas utawi wanane. Dumogi wenten pikenoh sane prasida kaambil,
tur katindakin raris mangdane napi sane kaapti sareng sami indik palemahan druene
prasida kapanggih. .

Panguntat, puputang titiang antuk parama santhi. Om Santhi, Santhi, Santhi, Om.