BAHAN SERMON PARHALADO HKBP SIBOLGA JULU

RESSORT SIBOLGA I
Epistel: 2 Kronika 9: 1-8

“Manghobasi Dibagasan Holong”

I. Patujolo
Suman tu ngolu ni halak porsea ingkon do diboto martangiang, alana ngolu ni halak porsea ima
tangiang. Tudos tusi dung monding raja David di todo ma si Salomo na manggantihon posisina gabe
panggomgomi di bangso Israel. Na parjolo di ulahon si Salomo dung hundul di harajaonna dang jumolo
dipature ibana angka aturan suman tu dipangido rohana. Alai jumolo do ibana laho manangkok tu sada
dolok ima dolok Gibeon laho asa mamelehon pelean situtungon dompak Debata jala lomo roha ni
Debata laos didok tu raja Salomo “Pangido ma manang aha silehononku tu ho” (1 Raja-raja 3:5)
Tarida ma disi na jongjong si Salomo gabe panggomgomi di bangso Israel, dang na naeng roha
hadagingon dibaenna laho manggomgomi di bangso Isarael, disadari ibana do na pajongjonghon ibana
gabe raja dang jolma alai Debata sambing do. Jala na dipangido si Salomo dang ginjang ni umur,
hamoraon, hosa ni angka musuna, alai na dipangido si Salomo tu Debata ima roha na tumimbang uhum
manang bisuk na sian Debata do (1 Raja-raja 3: 11-13). Jala on ma na gabe sada kelebihan si Salomo
marimbangkon angka raja na asing. Dibaheni ala pangidoan ni Salomo i, dilehon Debata do naso
pinangidona jala on do na naing pinaandar di turpuk sadarion.
II. Hatorangan
Dung simpul patupahon pelean situtungan dompak Debata si Salomo di dolok Gibeon, pittor
adong ma dua borua naso suman pangalahona marsoal alani ianakhon nasida. Jala di situasi on dipangke
si Salomo do bisuk na sian Debata laos dibaen raja i ma sada haputuson na mansai denggan jala
mambaen longang angka jolma na umbege haputusan i (1 Raja-raja 3: 28). Dungi tarbarita ma habisukon
ni raja Salomo sahat tu bangso Saba alani i, ro do raja boruboru ni bangso i mandapothon luat Israel laho
mamastihon barita naung binege na i.
Ayat 1-2; dina ro raja boruboru ni bangso Saba mandapothon Jerusalem naeng masiujian huhut
do diboan parangan na mansai tongam, unto, hushus na marragam, sere dohot mata intan. Laos dipaboa
ma na adong na naing sinungkun raja boru-boru Saba i na dibagasan rohana dompak Raja Salomo. Alani
habisukon ni Raja Salomon dang adong na buni nanggo sada sian roha ni si Salomo. Lapatanna na
sinungkun ni raja boruboru i tu Raja Salomo boi do dipatorang ibana laos taralusi do sude sungkun-
sungkun nanggo sada pe dang adong na lipe sian na pinatorang ni si Salomo.
Ayat 3-6: dung simpul panggomgomi ni na dua luat i manghatai, dina so porsea raja boru-boru i
angka hata naung dibegena sian halak, ido umbahen pola didapothon raja i luat Jerusalem laho
mamastihon barita naung dibegena i. Jala dung sahat nasida tu luat Jerusalem dang holan di raja Salomo
hape habisukon i dibaen na. Alai tarida do dipangaturon ni raja Salomo tu angka na manamue tamu
suang songoni pangaturon ni parhundulni angka naposo ni Raja Salomo (ay. 4). Na ingkon do tarida
dang holan tu diri sandiri hape angka pasu-pasu ni Tuhan ni binaen, alai ingkon do manghorhon tu angka
humaliang, molo so boi humaliang na godang setidaknya tarida ma i binaen tu angka halak na adong na
pangisi bagas i sandiri.
Siala ni ido dang holan hata-hata hape naung binege ni Raja boru-boru i taringot hapistaran ni
raja Salomo, alai sian naung binege nai mangihuthon naung di dalani raja Saba i huta Jerusalem tangkas
do di ida Raja i, dang sahat dope satonga naung binege nai sian hapistaran ni si Salomo didapotna.
Ayat 7-8: Marhite angka fakta naung di ida ni raja Saba i hapistaran ni si Salomo pola do
manghorhon tu pangatur ni pangisi ni harajaan ni si Salomo tarlongang situtu do raja Saba i, jala didok
raja i do tu angka pangisi harajaan i “martua ma halak angka parhaladom”. Dison ma hape na didok
molo targoar do nampuna bagas i sahalak na tarpasupasu dang holan nampuna bagas i sonang jala
marlasniroha alai saluhut halak na adong dibagas i ingkon do taruli pasu-pasu naung didapotna. Dang
holan i, marhite naung taruli pasu-pasu ndang jadi hape baenon gabe dalan laho mamparsangap diri alai
molo lomo pe rohani halak na asing marnidasa ingkon mulak doi tu na mangalehonsa ima Debata.
III. Hahonaan
1. Marhite turpuk on tangkas do dina ro panggomgomi luat Saba pajumpang dohot Raja Salomo
ala adong binegena barita taringot tu hapistaran ni Raja Salomo, jala naing mamastihon
hasintonganna tutu do manang daong. Alai diluar jangkauan ni Raja Saba i do hape barita
naung binege na i dung pajumpang. Bahkan longang situtu do raja i dang adong dope satonga
barita na binege nai taringot tu hapistaran ni si Salomo.
2. Angka pasu-pasu na pinasahat ni Debata tu hita ingkon do boi taruli angka humaliang
marhite pasu-pasu i, unang holan dihomol-homol holan tu diri sandiri. Alana dang boi tardok
 tarpasupasu halak alai dang tarida dampakna tu humaliang, jala manghorhon do i tu ginjang
ni rohana jala madabu ma tu dosa.
3. Raja salomo do tarpasu-pasu marhite pangidoanna tu Debata, alai sahat do hata na martua tu
angka naposo ni Rajai na marhalado di harajaanna. Nang hita pe na marhalado di bagas joro
ni Debata, molo naeng didok martua hita ingkon taloas do nampuna bagas i mangarajai roha
nang pingkiranta asa Ibana na mangaturhon martua hita na marhalado hasangapon ma di
Debata nampuna bagas joro i.
4. Molo manghobasi tontu ingkon ro do sian ias ni roha, tontu songoni do nang angka naposo ni
Raja Salomo manghobasi di na ro tamu ni Raja i. Molo dang jumpang roha na unduk tontu
raja i pe maila jala muruk tu angka parhalado na. nang hita angka na dilehon Debata laho
manghobasi di bagas joro i, panghobasion ingkon do sian roha na ias jala dang mambuat
paruntungan. Alana ingkon do tagamon pasu-pasu ni Debata dipasahat tu hita ngolunta
marhite panghobasionta dibagasan holong.