BAHAN SERMON JAMITA ADVENT I, MINGGU 2 DESEMBER 2018

SARESORT HUTAGURGUR

Topik Minggu : Managam haroro ni Sipalua (Pengharapan akan datangnya Mesias)

Ev: 4 Musa 24:15-17

I. Patujolo

Digoari do buku 4 Musa on Nummeri manang pamilangan na manaringoti parngoluon ni

Bangso ni Debata na tongon dipardalanan laho mamasuki tano Kanaan. Nang pe godang
mangadopi angka hamaolon bangso i, alai totong do Debata mangaramoti nasida. Pangaramotion
ni Debata tu nasida di paandar do di turpuk on marhite naposoNa si Bileam. Turpuk jamita on
ima taringot pasupasu ni Debata tu halak Israel marhite panurirangon ni Bileam anak ni si Beor,
na sian huta Petor. Bangso Israel na tongon marsaro di angka adaran ni Moab, di bariba ni Jordan
jala naung manaluhon halak Amori. Mambahen gabe godoron situtu ma si Balas raja ni Moab,
jala tahuhuton marnida halak Israel. Di bagasan roha biar i ma di jo si Balas raja ni Moab asa di
burai Bangso Israel. Ala di haposreai si Balas do molo nunga hona hata bura bangso Israel sian si
Bileam sai na tutu do saut i tu bangso i. Hape baliksa do namasa sianpangidoan ni raja i, gabe
hata pasupasu do napinasahat si Bileam tu bangso i.

II. Hatorangan ni Turpuk

Ayat 15-16 ima pangukapon ni si Bileam, pandohan naung tongor matana, tontu sahali ndang
apala simalolong pardagingon na naeng dohononna disi alai marhite simalolong partondion
dilehon Debata hatuaon tu jolma na tinodoNa laho marnida, mangatusi dohot mangalapati
pambahenan dohot nanaeng si pamasaon Debata. Dipatau Debata si Bileam di bagasan
haporseaon umboto parbinotoan dohot hadirion ni Debata. Satimbotimbo parbinotoan ni jolma
tung soadong do na tuk mandungdung parbinotoan dohot hadirion ni Debata.

Ayat 17 ima taringot tu panurirangon, panurirangon ni si Bileam di jolo ni raja Balas

taringot tu nanaeng pamasaon ni Debata tu bangso israel “Sai na idaonku do Ibana, alai ndang
dope anggo tung jonok” pandohan on martudutudu tu haroro ni Mesias na gabe si palua i. Ingkon
sipaimaon ni bangso Israel dope di tingki halehetanna homar tu hatontuon dohot sangkap
haluaon na sian Debata. Porsea si tutu do si Bileam na ingkon masa do sada partingkian na sian
Debata na mangalehon haluaon tu bangsoNa nang pe ndang apala di ngoluna. “ Binsar do sogot
sada bintang sian si jakob jala hehe do sada tungkot harajaon sian Israel” hata “sogot” dison dos
do ondolanna dohot pandohan “ndang dope nuaeng” alai sada tingki na binuhul ni Debata. Na
pasti sipeopon nasida tongoson ni Debata do na gabe Mesias sipalua nasida. Ingkon rade do
managam haroro ni sipaluai. Taringot tu bintang Jakob ima sada gombaran sondang di borngin
na marlapatan binsar do sada panondang na manondangi pardalanan asa mardalan di na tiur ima
Mesias sipalua i. Jala taringot tungkot martudutudu do tu harajoan naso mansohot (ro di
salelenglelengna).

III. Panimpuli

Masuk ma hita tu minggu advent I, ima managam haroro ni siapaluai. Na maima ima do hita
di haroro ni sipalua i, di paingot do hita asa totong hobas managam harorona. Ingkon hobas do
saluhtna. Hobas na marlapatan unang marnalemba di roha haportibion alai ingkon hobas
pauliulihon parange nang haporseaon maradophon Sipaula i. Naeng ma dengga jala mardame
sonang di managam haroro Sipalua i unang ma juppang angka roha nang pangalaho na so
hinalomohon Debata alai ingkon marpangoloion di hata ni Debata songon si Bileam na
pasahaton hata pasu pasu ndada hata bura. Naeng ma totong taparade rohata managam haroro ni
Tuhan i jala taulahon ma pararathon barita haluaon na sian Debata. Amen.