BAHAN SERMON EPISTEL MINGGU INVOCAVIT 10 MARET 2019

SARESSORT IMMANUEL HUTAGURGUR

Turpuk : Galatia 1:11-18

I. Patujolo

Surat ni Apostel Paulus tu huria Galatia di tongos do siaan Krontius taon 57-58 M, dohot
tujuan lao patingkoshon poda haporseaon na sintong dibagasan Kristus Jesus mangalo poda
haliluon na binoan ni golongan Jahudi fanatik (judaisme). Holan dibagsan Kristus Jesus do
dapot haluaon dohot hangoluon na tutu situtu. Laho patotahon haapostelonna,dipatorang si
Paulus ma hadirionna (pangalahona) na jolo dohot hadirionna dung di jou Tuhan Jesus. Uju
di bagasan hajahudion ibana najolo, gasagasaon do ibana mangalelei huria i. Alai dung dijou
Tuhan Jesus ibana hailaon do di etong ibana pangalaho nai najolo alai dung dijou Tuhan
Jesus adong hamubaon ni pangalaho sian silele na porsea di Jesus gabe na rade manaon na
porsuk

II. Hatorangan

Panindangion ni Apostel Paulus taringot tu hadirionna, ndada gabe hadirionna i ojahon

dinalaho mangulahon barita na uli Molo sian hadirion na sambing dang patut jala dang
tama si Paulus gabe parbarita nauli ni Kristus i. Tung asi ni roha ni Debata dibagasan Kristus
do na mamarar ibana gabe parbarita na uli. Tuhan Jesus sandiri do manjaou ibana sian asi ni
roha ni Debata Jahowa gabe parbarita nauli, ndada jolma mangalehon Haapostelon i tu si
Paulus. Laos sian pengalaman peribadi ni si paulus on ma muse na gabe ojahan mandok
ndang usaha ni jolma asa sahat tu haluaon alai holan ala asi ni roha ni Debata sambing do.
On do nagabe ojahan ni haporseaon i; asa dang dibagasan ginjang ni roha na mangalusi
panjouon dohot pamulikhon na pinatupa ni roha Debata, baliksa ingkon di bagasan haserepon
dohot muliate ni roha. Ai namangolu, mangula jala malua do hita dibagsan asi ni roha ni
Tuhan Jesus kristus.

Ai ndada manguruhon sian hajolmaon Barita na Uli i hubaritahon, sian pangukapon ni Tuhan
Jesus Kristus do, ai dung tarjou si Paulus marhite Tuhan Jesus ndang pitor borhat ibana
mandapothon angka apostel na asing manguruhon barita na uli alai pitor humalaput do ibana
mamaritahon Barita na uli ni Kristus i lumobi tu halak si pelebegu (non Jahudi) naeng
dohonon na disi dang pangajarion dohot panolopion hajolmaon na jumolo dijalahi ibana alai
pangungkapon ni Kristus, pasauthon panjouonNa.

III. Panimpuli

Alusan ni Debata do hita marguru tu asi ni rohaNa ndada marguru tu hadirion ni jolma,
ingkon marsitutu do mangulahon panjouon marbarita nauli ni Kristus i, mian jala mangolu
dibagasan Kristus i. Ai Ibana do napatauhon jala namargogoihon hita laho pasauthon
panjouonNa dohot mamparbuehon parbue na hinalomohon ni rohaNa, di Ibana ma
hasangapon ro di saleleng ni lelengna. Amen.