BAHAN SERMON JAMITA TU ARI MINGGU, 29 OKTOBER 2023
EV: 1 TESSALONIK 2 : 1 – 8 EP: 5 MUSA 34 : 7 – 12 TOPIK: MARHIRAS NI ROHA MANGHATAHON BARITA NA ULI MANGASAHON DEBATA (KEBERANIAN MEMBERITAKAN INJIL KARENA PERTOLONGAN ALLAH) I. Patujolo Surat parjolo na tinongos ni Aposstel Paulus tu huria Tessalonik disurathon laho patoguhon haporseaon ni hura Tessalonik na tongon mangadopi sitaonon na bernit. Mandok mauliate do Paulus tu huria i ala denggan dihangoluhon nasida asi ni roha dohot holong ni roha nang panghirimonnasida di Debata. Dung i, dipasahat Paulus do tu huria i taringot tu parrohaonna tu huria i. II. Turpuk on naeng patoranghon tu hita Sian nasa roha ni Apostel Paulus, diparhatopot ibana do ia harorona dohot Silas nang Timoteus ndang magopo. Marhite on naeng dipataridahon Paulus tu huria Tessalonik, na ro do nasida marhite sangkap na denggan dohot ulaon na denggan di bagasan hasintongan. Marhiras ni roha do Paulus dung ditaon ibana ragam ni sitaonon di Pilippi. Na binaritahon nasida ndang angka hata na marisuang alai taringot tu hasintongan jala boi ibana gabe sitiruan tu angka parbarita na uli. Ndang hata gabus manang hata na roa na binoan ni Paulus alai Barita na Uli do. Dapotan hiras ni roha do Paulus. Di saluhut sitaonon na ditaon ibana di na mamaritahon Barita na Uli ibana dohot paraloanna naung diadopi ibana di huria Pilippi songon naung tangkas diboto huria Tessalonik, ndang gabe gale panghilalaanna. Dung malua ibana sian sitaonon i, ro do ibana tu Tessalonik di bagasan hiras ni roha. Ndang gabe moru haringgasonna laho mamaritahon Barita na Uli. Marragam do hamaolon na diadopi Paulus laho mamaritahon Barita na Uli alai ndang gabe mabiar ibana laho manguduti panghobasionna. Mamboan Barita na Uli di bagasan roha na ias. On ma na manambai gogo di Paulus. Tangkas diboto ibana, Barita na Uli do na diboan ibana, ndang haliluon, ndang na mangansi jala ndang na marangkal. Dipatupa ibana pe songon i, ndang na laho pajongjong sada houm na imbaru alai naeng mamodai huria Tessalonik asa sintong parsombaonnasida tu Debata. Ias jala sintong do Hata ni Debata. Ndang boi sasahalak pasahathon Hata ni Debata alai gabe na asing na tinujuna. Patar tarida dasor ni na mamaritahon Barita na Uli. Dipasahat Paulus do dasor laho mamaritahon Barita na Uli, i ma ala nunga tau ibana di roha ni Debata. On ma gombaran ni parhobas na satia. Ndang Paulus na marnampunahon Barita na Uli i alai Debata do. Ndang boi sega manang lilu Barita na Uli i. Na tinuju ni halak na mamboan Barita na Uli i ma gabe halomoan ni Debata. Barita na Uli i ndang dipahombar tu pamingkirion ni jolma jala ndang dipangke laho mambuat roha ni jolma. Sude na diula ni na pasahathon Barita na Uli i tangkas diboto Debata ai Debata do na manigati roha. Ias ni roha ni Paulus laho mamaritahon Barita na Uli dipataridahon ibana marhite na so marhata lemeslemes jala ndang marbisukbisuk laho mambuat arta. Ndang olo Paulus mamangke Barita na Uli laho mangahut tu dirina marhite na manjalahi sangap sian jolma. Ndang dipatimbo ibana halak pardosa. Ndang olo Paulus pamorahon dirina sandiri marhite na dibaritahon ibana Barita na Uli. Ndang adong dihirim Paulus asa tumimbo hadirionna sian halak na asing. Boi do saluhutna i dibahen Paulus alai ndang na olo ibana mangulahon i. Pataridahon habasaron dohot holong tu na humaliang. Ndang dihalomohon Paulus pamujion tu dirina jala dipaserep ibana do dirina tu saluhut halak. Tarida do i marhite na pataridahon holongna songon inaina na pauliuli gellengna. On ma na dumenggan sian na pasahathon Barita na Uli marhite hata na koras. Margogo do Barita na Uli i laho paubahon jolma. Dihaholongi Paulus do nasida marhite na pasahathon Barita na Uli. Ndang artanasida na dilului Paulus alai asa malua tondinasida sian dosanasida pola na dipasahat Paulus dirina tu huria i. III. Panimpuli Gabe parsidohot do hita gabe naposo ni Debata di na naung gabe parbarita na uli hita. Nunga dipasahat Debata tu hita ulaon di huria. Ala ni i, unang ma talului sipujion sian jolma. Songon Apostel Paulus naung marsitutu laho mamaritahon Barita na Uli i, songon i ma nang hita di saluhut panghobasionta. Nunga dipatau Debata hita laho mamaritahon Barita na Uli i jala nunga dilehon Debata gogo dohot pangurupion di hita mamolus ragam ni angka na porsuk di tongatonga ni huria. Ala ni i, marhiras ni roha ma hita manghatahon Barita na Uli mangasahon Debata.