Jaku Berambai Betimbal Ujung 1

Jaku Lalau Nuju Adi ...

Udah pagi hari tu, adi.

Dani, badu agi nuan gali,
Berus ngeli lalu mandi
Awakka tubuh nuan enda bedaki.

Udah nya, adi, empaka ruti, tauka asi,

Irupka sechangkir MILO tauka kupi.
Ngambika nuan kenyang sereta regas agi,
Maya belajar nuan deka ransing agi.

Di sekula, lagi, adi,

Dinga ke bala pengajar ke ngajar ‘dik,
Kurangka bebuti tauka betundi,
Anang bekeringik, anang beli-beli.

Maya nuan ngaga kereja lagi adi,

Gaga manah, enti salah, anang enda nyeleti,
Minta tunjukka chara ke ngena, adi,
Laban ari nya lagi, nuan deka mereti agi.

Pulai nuan ari sekula,

Anang belanda-landa, anang beduju-duju,
Takutka kita abis teterap, enggaika tepangka,
Bejalai lelubah, iya ke dulu, kapa iya enda dulu.

Datai nuan di rumah, tilik ga beg sekula,

Laban pengajar tentu bisi meri nuan kereja.
Gaga dulu sampai tembu tulis, kira enggau bacha,
Udah nya baru nuan tau bemain nitihka bakih sama sekula.

Pulai nuan bemain anang kelalu laun, adi,

Pulai ke rumah apin sabung petang, tumbuh nyang,
Mandi, begari lalu nyendiaka diri,
Laban kitai sebilik deka ngintu diri – makai enggau ati lantang.

Tinduk nuan lagi anang kelalu jauh malam,

Laban nembiak rambau nuan tinduk 8 – 10 jam,
Tubuh nuan agi mansang, enggaika tasal,
Enggaika kitai tinggal ba pengawa belajar.
© RBJTimban