CHERPEN 1 Pengerindu udah selatan.. by Kumangbaik..http://kumangbaikjue.blogspot.

com Pasal 1 Lebuh maya rerak tawas, bala burung bela terebai ngiga pemakai, dia indai Sendi nyau munyi jam pengerak, ngerak bala anak dara ia ke agi tinduk bebungkur enggau pua. Dani Mia! dani Lulu! dani Jelia! Tawas ari nadai indu dara balat laun dani baka kita tu, ko tudah tuai mutap meda ulah bala anak ia. Sida tiga menyadi bela jenak tinduk, enda ibuh ke gerak indai sida. Nyangka kelalu lelak ngetau kemari sida tiga ko runding indai Sendi. Maya nembiak cuti sekula dua minggu, bala anak iya ti benung dara bungas nyak ti di kenyadi nulung ngetau umai.Lebuh urung bulan tiga, urang ba rumah panjai sigi benung ngetau padi serta beduruk enggau pangan diri.Nyadi tudah indai Sendi sigi enda balat kiruh begiga ke urang enggau ia beduruk ngetau laban sida menyanak udah chukup tubuh ngetau umai ti semina setempap kera nyak.Meda anak dara ia enda dani digerak dia tudah indai Sendi lalu enda ibuh ke sida tiga agi. Nemu sida dani lagik ko runding tudah tuai. Ia nyapai genuk kena nyauk ai ba sungai baruh kaki bukit alai kebun lada sida.Udah tinggal Indai Sendi nurun nyauk ai dia anak tuai ia Lulu lalu dani. Lulu angkat lalu ke dapur serta ngidup ke api dapur kayu . udah ngidup ke api Lulu lalu manduk ai. Sambil nganti ai mansau ia duduk engketut bekindu. Enti lebuh maya pagi ari, sigi naka meh penyelap laban peninggi bukit serta agi mayuh pun kayu ba menua ulu sungai alai sida Lulu diau.Sebun pagi ngasuh tubuh balat nyengelap ia sampai ke tulang belakang. Lebuh ke bekindu dia Lulu dengut- dengut belagu merindang ati di pagi ari, lagu Linda. Terima kasih sulu ; Enggau sepenuh ati aku nyerah ke diri .. Ngagai nuan sulu ti disayau aku.. Enggau pengabis ati ku nusun sepuluh jari Ngagai nuan ambai ti di sayau aku.. Terima kasih sulu laban pengerindu nuan ku baka tuk Terima kasih ambai laban penyayau nuan ati nyamai.. Bakanyak ko sekeda leka lagu ti di lagu ke tudah Lulu, tauka nama amai iya, Cecelia Lulu anak Sindin. Apai bala sida Lulu, Mia enggau Jelia tuk sigi udah lama udah nadai ketegal sakit lempuang benanah, bai kelalu udu nginsap. Maya nyak , Jelia ke agi tubah biak amai baru manggai enam taun , Mia darjah dua, sembilan taun, lalu Lulu darjah enam. Diatu indai sida Sendi udah balu sepengelama lima taun ti udah. Sinu ngenang meh pengidup nadai beapai, idup merinsa sida menyanak sempama jaku laut kais pagi makan pagi, kais petang makan petang. Semadi meh indai Sendi sigi ngeransing diri nupi bala anak, nyengula ke bala sida, bekikis bulu betis, isa berutang sebelah urang, balas enggau tulang gawa ba umai,

ba kedun urang nadai begaji. Bakanyak meh pengidup sida menyanak sekumbang apai sida udah nadai, udah lesi. Pia dengut-dengut belagu, pia jari Lulu nyurung ke kayu api serta niup api ngena buluh. Peda buk tudah tuai nyau burak laban abu. Udah ia angat engkurak, Lulu ngambi gari utai kena ngangkat ke ketil ke nyau chelum ngeretum, pengelama udah dikena bepanduk ke ai ngena dapur kayu. Burit ketil ke bisi tembus mimit ditampal indai iya ngena timah ngambi ke enda tais. Udah tembu mancuh ai kopi Lulu lalu ngerak bala menyadi iya. Dani nah Mia, Jel..udah tawas amai ari tuk..anang malas malas.Tipan tempat peninduk nyak, ko tudah tuai, nyawa di perak ke iya mimit ngambi ke menyadi iya dua iku nyak begaut angkat.Mia laban ke takut agi ke aka iya Lulu lalu angkat serta betipan ke pua serta ngadu panggal.Jelia, menyadi indu ke paling biak ke sida menyadi sigi meruan engkutung, enda engkebut. Meda Jelia enda engkasak taja udah bendar di gerak gerak tudah Mia, enda liat ati Mia lalu ngulung Jelia ngena tilam. Udah nyak baru Jelia ngangkat ke diri serta muchau muchau ngumbai aka iya Mia ngachau iya tinduk. nya.. lapa enda nemu dani maya urang ngerak..balat ngelusu nuan nyak ko Mia nganu Jelia. Kepuas seduai betimbal enggau panggan diri, Lulu nyerarak seduai serta ngasuh seduai entudi indai sida ti nyauk ai. Ninga nyawa Lulu besai ngasuh seduai, Mia seduai Jelia badu betimbal enggau panggan diri, seduai lalu ngambi baldi siti siku.Mia lalu nyapai baka sabun mandi. Seduai lalu bejalai betunda udi nuju pendai. Taja ati sama rangsi ke pangan diri tang laban ke diri menyadi, api nyerambau mau jampat endar padam. Datai ba pendai alai sida menyadi selalu mandi, dia Jelia lalu ngagau ke indai iya, meda indai iya nadai dipeda ba pendai. Kangau iya sekali enda gak nyaut, kanggau kedua kali enda gak indai iya nyaut, kali ketiga ngagau baru indai Sendi nyaut serta pansut mari madang miding ke nisi jalai ke pendai sida. Jari kanan tudah tuai mai terung masam tiga igi, lalu jari kiba ngengam pucuk miding. Sigi gaya pengidup indu iban, ama dani pagi tulang sigi enda ngelusu terus ngiga utai kelauk. Sigi baka pengerajin indu iban enda ulih disema, sempama semut ngaga busut, sempama labah-labah ngaga pukat, besari sari gawa ke kebun, ke umai tang sigi enda kala madah lelak, enda kala nyebut ikak. Nama agi enti dipeda ari jalai pengidup sida, sema jaku enti agi beranak mit, besandik lebuh nurun ngetau tauka ngereja pengawa. Lebih agi indu ke benama Sendi. Endang sigi bejuluk endu Sendi,indu iban pegari rajin gawa. tuk aku dah.. nama ke mega di kanggau ke dik endun, ko indai Sendi serta nyapa seduai menyadi. Udah tembu nyauk ai serta empungas ke mua sida tiga sama beringkun raya, berangkut ke ai serta mai sayur ti di giga indai Sendi sebelah kebun sebelah babas tadi. Lulu sigi dah nganti sida tiga ba mua pintu pelabuh, serta ngulur ke jari nulung indai iya ke mai sayur miding enggau buah terung masam. Udah nyak sida menyanak lalu ngetu serta ngirup kupi, makai asi rendai ti digureng Lulu sepengelama sida ti ba pendai. Asi rendai naka penyamai taja semina digureng Lulu enggau mimit minyak masak serta ikan pusu ajak.

Udah tembu makai sida menyanak lalu beradu deka nurun ke umai ba tinting sepiak kebun lada sida. Nyambung abi ketau sida kemari. Pasal 2 Richad Admond siku bujang ke balat rangsing ati lebuh ngereja pengawa. Lebuh maya mesyuarat pagi tadi macham macham penanggul ti di aum bala Board of Director. Bisi ka angat angat mimit mega suasana lebuh maya baum pagi tadi, ngasuh pala Admond nyau sebening . Iya nuduk ke diri sambil micit micit pala.talipon bebunyi di lak ke iya ajak..calling ari maria marina, tunang iya di lak ke iya ajak laban iya enggai ninga nyawa indu nyak lagi tentu deka komplen macham macham utai. lapa darling enda ibuh ke aku.. lapa enda mesej aku sebedau tinduk demalam lapa enda tu tu. Admond nyau boring udah ngelayan ulah tunang iya nyak kelalu mayuh leman.. bedau jadi udah nunjuk perangai macham-macham ko dalam ruding Admond. Dah nyadi bini, parai kena queen control. Enti nitih ati Admond, marina nyak sigi ukai indu dipilih ati iya tang laban disabung apai indai jadi enggau indu dikedeka sida. Manah agi ngambi anak bakih diri ari jadi enggau indu ke nadai ditemu bisi pemisi serta enda sekula tinggi. Enda setaraf ko sida apai sida indai Admond. Admond enda ulih mantah jaku apai indai ketegal penyiru meda urang ti udah ngada serta ngemasai ke iya ari mit. Semua utai dipinta Admond endang diturut ke semua, sigi nadai pengurang ba iya.kak sekula sampai ngambi phd sigi endang disagi, dipelanja sida apai iya belajar ke luar negeri. Nya diatu udah abis belajar, kerja nyadi pengarah perancangan dan pembangunan ba company apai iya empu. Admond bujang tuk sigi lelaki ti selalu nyadi ke buah ati sida ke indu. Nadai siku enda muji, taja pan semina dalam ati enti meda penyigat gamal iya. Nyeling nyeling belalai urang indu ama bepansa meda penyigat gamal urang bujang siku nyak, mata bundar, idung manchung, kuyu belesung pipit lebuh ketawa, tubuh naka penegap sempama keling. Aiehhh.. bujang sigat ngasuh tulang urang indu lemi.. Makai enda kenyang, tinduk enda jenak ngayam mua bujang asi dalam mimpi.. Beraie sinu ati urang indu meda mua manja wai bujang.. Asai ka dibai jadi ambi ke laki nuan sulu asi.. Aiehhh lelaki tampun puji bau minyak wangi tubuh nuan ngasuh ati indu ngenang nuan berari naka meh deh wai bujang nyema nuan nyium enggau mulut penuh ngancham.. sempama laja pengering gamal nuan bujang ba perekuh nuan wai bujang endun deka diau sampai mati..

baka nyak meh ke ramban ati bala urang indu enti meda penyigat bujang ke benama Richad Admond ensumbar nama bujang aji tampun puji dara berari.Tang taja pia kitai mensia enda siku ti kelalu menyana, sempama siti leka jaku selalu dikena, disebut ti nerang ke reti nobody perfect iya nyak leka jaku sigat bajik gamal, bau meh tai iya. Nyangka ngasai kediri sigat serta nyadi ayam mata urang indu nyak ke ngasuh Admond nyadi pencinta urang indu tauka pengindu. Sulu betukar ganti ninting bulan sempama ke nukar baju. Nadai siku indu ti besulu enggau iya udah ulih narit ati bujang siku nyak amai amai. Semua dikedeka iya semina menuh ke koleksi indu iya ajak. Semua indu ke nyadi sulu iya enda ukai urang sebarang, pemajik naka ia..indu modeling meh nyak.. pramugari meh nyak. Sigi ngasuh ati urang bujang gidan berari deh dara bajik ke sulu ati.Jessica, indu bajik kumang menua ti nyadi modeling, tubuh cukup pengerumpas, cukup seksi, mua bajik, kulit burak sempama tayak. Selalu ngasuh ati admond balat gidan berari.. seduai betemu maya ba party ari pengada bakih admond bulan nyin kemari, betukar nombor, bemesej lalu bejanji betemu madu pengerindu. Wenni, indu pramugari dulu agi betemu enggau admond ketegal ke besatup jari ka meli buku ti sama ba siti kedai buku.Meda pemajik gamal urang indu nadai endur mantah ngasuh admond enda ngelepas peluang nguntik wenni. Enda ngasai ke diri udah betunang, admond majak kediri rindu bertukar tukar sulu begulai enggau urang indu. Taja pia, enggau naka ulih meh tudah admond ngelamun bangkai gajah ngambi ke enda disium bau. Enggau naka pengelandik ngatur strategi bepangan enggau kedua- dua indu nyak temasuk tunang iya empu. Bendar iya nyaga temberang ngambi ke resia diri empu enda pecah. Jessica enggau Wenni sigi enda nemu diri diayah ke bujang sigat ti selalu madah sayau berambis ati. Tunang iya maria nyangka nemu tang ngaga diri enda laban sigi sayau ko dalam ati tudah. Enda pia udah meh diempu iya.. nyangka nyak kini peragam ati tudah tuai, taja ati selalu begeremai nyimpan cemburu serta dendam ngagai ulah admond bakanyak. Nyangka nyak ti ngasuh siku nyak kelalu nangi serta mengada-ngada enggau admond. Nyima meh ati enti nemu tunang diri bisi beambai enggau urang bukai di belakang iya. Sayau nempap jari sepiak meh tudah maria laban admond betunang enggau iya ketegal asuh apai indai. Ketegal pengerindu segitiga, segiempat ke di gaga kediri selalu mega ngasuh pala admond sebening.. mikir cara nyimpan rasia. Tambah ke mega tanggungjawab iya ba pengawa ngatur projek pemansang , mesai ke ladang sawit ba menua ulu bahagian Sri Aman. Iya sebening pala nyedia ke proposal projek nyak ngambi ke diterima ba board of director. kati enda diterima deh, enti idea bernas ti keluar ari untak aku tuk ko runding ati iya meransang diri. Malam tuk Admond ngatur program ka ngelantang ati bekau ke udah enda ulih keluar sepengelama ngadu ke proposal iya dua minggu ti udah lepas. Iya ngambi talipaun binching iya lalu nekan ke lumur bakih rapat iya Gopal.. macha.. let go to the planet of the world today.. its long time we never dancing with hot bebeh there.. see u around 8pm Ill get u before that .ok. ko Admond ok macha, no problem, ko saut Gopal ba talipaun. Program seduai ke pub malam nyak udah dirancang

enggau manah. Bakanyak meh pengidup urang bujang baka tudah Admond. Ka bejalai nadai urang nagang. Pulai laun ari pub bemalam malam, nadai urang nganu. indai enggau apai iya endang sigi urang ti tebuka, enda nagang pengawa anak iya sengapa. Asal meh anak mending ke jaku sida ti ngasuh jadi enggau anak bakih rapat apai iya, dato Gilbert adah ngasuh ati seduai gaga. Pengeraja dato gilbert nyak beguna endar kena neguh ke Pemandang Dunya sdh.berhad ti diempu tuan Richi apai Admond. Kira jadi kena danji bisness meh bala anak seduai nyak. Danji lama sida suba. Udah mandi, bekena ke baju, nyugu buk, bujang sigat lalu nyapai kunci kereta Ferrari enggau talipaun binching iya. Sambil ngensung iya nyetat enjin kereta lalu deriba mai kereta iya nuju rumah bakih iya, bujang tambi ba kondominium, Sepang. Datai ba rumah bakih iya, Gopal sigi udah nganti ba mua pintu enggau mua ti rising rising. Sereta betemu seduai bela meri hi5 ngagai pangan diri. Bakanyak meh gaya sekeda pengidup Admond ba negeri ti penuh enggau macham-macham pemerindang. Ba KL, siang malam sigi nadai beza, 24 jam ragak belama pengidup mensia ke diau dia. Enti siang bala mensia ragak enggau ngepun ke diri enggau pengawa, malam sida ngeragak diri ngerindu ati ba macham-macham tempat alai ngelantang ke ati.Planet of the World nyak sigi siti pub ke selalu endur Admond merindang ati iya ti sunyi sereta beraie. Begulai bekendit- kendit ,betanda , ngirup ai peram bisa, nyak tau ngasuh ati tudah tuai rindang enda lama sebedau datai panchar panas ari siti. bertampung..END

Aku endang seruran ingat malam nya malam hari Enam, keterubah tua betemu, ati aku berasai bendar gaga laban nuan orang ti keterubah bekelala enggau aku. Maya nya tua betemu ba pengerami betunang pangan aku ke benama Lina Lee enggau petunggal nuan. Pengerami nya mih ti meri peluang ngujungka tua ulih bekelala enggau pangan diri. Tua betukar lumur talipaun binching. Lebuh nuan ti nanyaka nama aku, malu-malu aku madahka nama diri Rennee. Kangau aja Reen pia ku aku. Nuan pan madahka nama diri Abel. Laban ti agi biak sigi meruan aku kenang pengingat tua ti besulu suba. Laban bai ati ti sama bela keran ke pangan diri asaika dunya tu semina tua aja ti empu. Tang enda disangka pengerindu tua diketuka enda lama ketegal aku anak orang ti kurang reta tengkira sereta enda tebilang. Meruan aku ingatka jaku bala kaban belayan nuan lebih agi ari bala petunggal sepiak indai nuan madahka tua enda patut begulai sejalai laban aku indu ti enda tentu menuku. Tua disemaka sida baka pipit enggau kenyalang. Naka mih pemalu asai ati aku ditempayaka orang baka nya nyentukka sida sanggup begigaka beliau ti bisi penemu menchi orang, ambika nuan enda ingatka aku agi. Nama penyalah aku? Tang maya nya nuan sigi enda bedulika jaku tagang apai indai nuan. Nuan sanggup ninggalka rumah ari ti beserara enggau aku. Ku nuan biar mati ditanggam sulu lalu sanggup nujah api penguji enggau aku. Tang taja pia, laban ke ngasika jaku apai indai, tua enda betemu agi. Ati ke lelengau ditatka pia aja. Tang nuan sigi seruran di ati belama Enda berasai pengingat lama ngundang baru. Setengah taun udah nya, asaika diambi mimpi. Maya nya lemai hari minggu, aku meda iya datai ngagai rumah kami. Enda disangka iya datai laban nadai madah dulu ke penatai diri. Aku nyangka apai ti ngasuh iya datai laban aku agi ingat bisi meri lumur talipaun iya ngagai apai. Tekenyit aku meda iya datai. Kiruh indai nyendia ai sirap rian belanda. Dinahka iya kachang guring chukup pemanah, chukup pemansau enda retung. Aku ngambi sebutul ai mineral chelap, changkir dua iti laban nemu iya enda ulih tinggal air irup. Duduk ke atas tu Jang. Nya mih bedau lama udah datai ari kebun kami dua indai iya tadi. Ambika nuan nemu nama kebuah aku ti mai nuan betunga mua baka tu, perundingka manah tanya aku tu. Ngelama tu aku meda seduai Endu Reen nyau baka belangkas. Aku deka nanya kati baka runding nuan pasal kaul seduai tu? ku apai sambil ngelangak ai sirap rian belanda. Jelan pemanis gaga indai. Abel nyintak seput panjai sebedau nimbal apai. Bepeluh mimit kening iya taja hari enda ga kelalu angat .Aku duduk nyendi indai enda bemunyi. Indai pan nadai mansutka jaku. Tambah mega iya endang orang ke enda tentu pejaku. Sebedau betemu enggau apai, iya diambi orang ngajar ba sekula besai tuai. Ketawa aku ninga mayuh cherita iya maya ke gawa menya. Sekeda enda nemu megai pinsil. Bisi mega tunsang pegai. Pengawa nyadi pengajar kelas malam nya semina tiga taun aja. Semadi enggau kami sebilik indai bisi didinga bejaku tang enti temuai datai jarang bendar ninga nyawa iya. Apai kami ti pejaku agi engka laban

pengawa iya ke nyadi pengajar. Diatu taja pan udah pinsin gawa nyau deka lima taun udah, apai agi regas amat. Iya pinsin lima puluh lima taun. Dikena iya ngambiska hari, pengawa iya ngemansangka tanah tiga ekar dibeli iya suba ari pengajar Dominic. Apai endang bisi ngembuan pengerindu ba pengawa betanam ari menya. Diatu enti musin buah nadai meli ari pasar. Buah mutan, buah empelam nadai ulih empa kami sebilik rindu meda bala anak petunggal bejulukka buah enti maya musin. Dominic tu bansa Bidayuh ari jalai Puncak Borneo. Iya bakih amat enggau apai. Enti orang bukai pelaba aku enggai iya nyual tanah nya. Nyau kelama baru Abel nimbal jaku apai. Abel duduk betunga mua enggau apai. Keketap ati aku . Kati enda ku saut iya lagi. Baka orang ke benung interview ulah seduai, ketawa mimit ga ati aku . Perening aku mua iya. Sekali tu tak baka orang ke macha bup aku meratika gamal iya. Sekumbang begulai enggau aku, enda kala iya ngena jaku bebunga. Nama nya ku ati, endang terus nya mih disebut iya. Aya, ibu aku meri terima kasih laban ulih betemu mua enggau seduai. Nyadi pasal kami duai Reen endang lama udah bepangan . Patut seduai ibu irau pasal kami duai. Aku sayau amat ke Reen tang maya ke diatu bedau bisi berundingka maya ti patut kami duai ngikat tali semaya. Aku diatu ibu ,aya benung negapka pengawa bisnes ke baru ditumbuhka pun taun tu, tang taja pia aku besemaya enda beduan iya, ku Abel. Ninga jaku Abel munyi nya, tak enda berasai aku angkat ari penuduk aku lalu nyilakka daun pintu bilik peninduk. Tup ! Semetup pintu ditambit baru. Diempaska anak tubuh diri atas katil. Ai mata pansut. Duduk . Mutap kediri. Ba peragam ati aku, Abel enda bebendar naburka leka bungai semaya iya ba laman ati aku. Enda berasai aku kekisi nyabak sedan-sedan. Benung sempuling runding aku tusut, aku ngasaika tandan bau aku dipegai jari orang. Berumban aku malik ke belakang. Entah kemaya Abel datai ngimbai bediri tegir-tegir ba tisi aku. Lapa dek Reen. Did I say anything wrong? Anything wrong ku nuan! Ngaga diri enda nemu nuan, nih! Nama jaku dek lain amat ba mua apai. Aku meda enda lantang amai gamal indai ninga jaku nuan nya. Nama dek enda sayau ke aku? Tajam perening aku ngagai mua iya. Tachar perening mata iya berasai angat sangkai ba mua ba mua aku. Lama kami duai besabung perening. Abel duduk ngimbai aku lalu megai jari aku. Reen! Sekumbang tua ti bela muai hari muar madu pengerindu, nadai kala arus pengerindu aku jauh tepejuh ke bukai. Ngelama tu nuan aja mih intan sereta emas dalam pengidup aku. Nuan mih senawah bulan ti seruran nampakka ruang ati aku. Nuan mih pemantup runding enggau penyayau aku. Nadai ati aku ngayahka nuan, Reen! Eeeee., gidan aku meda nuan tu! Ngesalka ati aku nuan. Aku angkat ngenyit lalu tuchum lelegup

meratika mua Abel. Enda berasai ai mata aku labuh laban kelalu gaga. Tempap aku iya lalu beberap mih kami duai lalu besemaya enda ngayahka pangan diri. Asaika bemimpi ga aku ninga sada leka semaya nuan nya, Bel. Badas mih nya. Aku arapka pengerindu tua ila enda puntan baka menasan jalai jelu, enda labah baka buah merunjau ulu. Sama besampi ngagai Petara mih tua, Reen. Minta Iya ngemataka pejalai perau pengerindu tua. Anang nangi tua nengah umbak tasik api penguji. Udah ninga pengeran ati Abel, aku enda irau agi, taja aku nemu apai indai enggau kaban belayan iya enda setuju enggau penemu ti mutus ati deka ngambi aku nyadi bini. Ketungkah ti deka mupuk, apai bisi nibarka jaku lalau. Jang diatu udah mih aku nemu runding nuan. Tang anang kelalu laun ga nuan meri jaku pemutus. Laban kaban belayan kitai sama bela mayuh. Enda manah ga dipeda orang bukai seduai begulai kiba kanan tang nadai tali pengikat. Aku arapka nuan ulih madah ngagai apai indai nuan lalu nanyaka runding ari seduai iya, ku apai sambil ngiring Jang ngagai pintu pagar rumah kami laban kerita Abel ke parking ba luar. Ujan memesi ba luar lalu lemai pan berengkah besabung petang besiring kuning. Tiga bulan udah nya kami duai netapka hari maya kami duai deka nirika ruang bilik idup selawang ba ujung taun nyerumba hari krismas. Naka mih pengaga ati aku laban nadai utai ti dikenangi agi. Kami duai ditikah ba gerija. Lemai nya pengerami melah pinang kami duai diintu ba rumah kami aja. Agi ingat bendar ke jaku apai sebedau iya ngaga kad kangau tikah suba. Kitai mayuh kaban. Enti ba hotel nyangka mayuh bala kitai ari menua enda datai. Lebuh maya pengerami nikah Ben menyadi tuai kami suba mayuh mija puang. Nya ti ngasuh apai jera. Nyau hari ke pengabis nya baru madah enda ulih datai madah benung kiruh. Tang ke bendar jangka aku nya ukai ketegal sida enda ulih datai. Apai nesau semua kaban belayan iya ke jauh enggau ke semak . Iya ke jauh ngena talipaun, bala ke semak disadung enggau kad. Sinu aku meda tudah apai enggau aya Ringkai bejalai besadung ka kad enggau nyendia utai bukai ti patut . Enti sida ari sepiak Jang enda kiruh ke pengawa seduai tu, enda ngawa ga Endu. Nyangka nadai hari mih sida. Kitai enda tau mejal orang ngereja pengawa. pia ku apai.

Apai, endang siku orang ti chukup penyabar. Nelap. Enti bejaku ngena chara subuk. Ba pengawa gerija iya endang taluk bendar. Nya mih Ben selalu nundi apai ngela iya paderi. Tuchum apai. Nya kebuah lebuh nyadi kepala pengajar sayau amat bala staf ke iya. Iya puh ngereja utai. Enda sebarang. Maya makai lemai, bala ari sepiak sida Abel enda mayuh datai mina dua buah kerita nya pan muti sida sebilik aja. Penatai apai indai iya enda dipeda gaga. Sebedau mupuk pagi nya aku meda apai Abel nyuaka kunchi ngagai Abel. Randau seduai enda mega aku ninga enggau silik laban nyau tengelam laban nyawa bala orang ke agi duduk berami. Nya baru aku nemu Abel diberi kunchi sebuah rumah dua tingkat lalu diberi jaku lalau enda ngasuh mai aku pulai ke rumah. Iya mega mesan enda ngasuh diau ba rumah kami. Nama kebuah enda mih aku nemu. Kira seminggu udah nya kami duai pan lalu pindah ngagai rumah kami duai empu. Rumah corner dua tingkat chat mirah jambu manding bendar dipeda ari luar. Rengka dalam rumah nadai ke nadai . Airkon, peti ais, rengka dapur bisi magang. Kami duai muti pindah mai beg aja. Nadai pemedis ba apai iya meri sebuah rumah ngagai kami duai. Apai Abel kelimpah ari ti bempu GTG Company sebuah kompeni ngaga rumah, serikat nyual motor RZ Enterprise sebuah budget hotel D Farm enggau sebuah pusat ngelantangka ati Rozelo Pub n Lounge. Indai Abel siku ari orang indu kitai bansa ke udah maju dalam pengawa dagang . Kelimpah ari ti bempu sebuah butik iya mega lalu bisi sebuah restoran pemakai. Kelia tusah amat pengidup sida. Taja pan apai indai iya bakanya Abel endang tetap anak sida iya kelimpah ti udah dianjung belajar di menua tasik dalam pelajar Bachelor in Accountancy enggau Master in Businnes Administration. Abel tu endang diasi apai iya ngambi ulih nulung dalam dagang iya. Dikena meri peneleba ngambika jinak enggau dunya bedagang iya diberi apai megai sebuah kompeni ti nyadung rengka opis baka keretas, pinsil enggau ti bukai ngagai mayuh bengkah sekula enggau opis perintah di menua tu. Aku agi gawa ba Anna beauty saloon taja pan udah jadi enggau Abel. Pengawa tu dikembuan aku udah ke tembu form 5. Dikena aku ngenalamka agi pelajar dalam bidang ngias diri aku meranika diri empu belatih ba Clara Insitute di kuala Lumpur. Institut tu tebilang bendar alai orang ke ngembuan pengerindu dalam pengawa tu. Kira dua bulan udah kami duai niri ruang bilik, Abel enda ngasuh aku kereja agi laban ku iya duit ti diulih iya chukup di kena kami duai ngidupka diri. Laban ti enggai beserekang penemu enggau Abel dia aku lalu ngetu ari pengawa aku nya taja pan pengawa nya chukup ngerinduka ati. Kelimpah ari ulih betemu enggau mayuh leman orang, mayuh mega peneleba ti diulih ari randau sereta perati orang indu tau ngemajikka gamal diri meri pengeransing ngagai sida ke bempu tubuh. Tang taja pia, penanggul

sekumbang ti kereja endang bisi. Enda semua orang puas ati enggau servis ti diberi. Bisi sekali siku indu enda puas ati lalu ngejemika mua ngagai aku. Nyau deka mantul asai anak ati. Sabar ajalah Reen. Dalam dunia kecantikan memang banyak cabaran, ku Fifah, pangan sama kereja lama udah bekelala enggau aku. Iya mih balat meransang aku ngambi latih di Kuala Lumpur taja pan aku jauh ari sida apai indai. Kira setaun setengah udah kami duai ti begulai melaki bini, perangai Abel nyau jauh bisi berubah ari ke dulu. Iya suah pansut malam nyau lalu enda tentu ibuh ke ruang bilik kami duai agi. Enti pansut malam suah enda nemu maya mulaika diri, nyau deka engkukuk manuk baru ayas iya bisi dipeda ba rumah. Bisi mega dua tiga kali iya enda pulai ke rumah. Aku enggai malu didinga orang selalu belaya lalu diau diri aja. Ku ati aku, dini bisi ruang bilik ke enda kala pansa biau balai. Kenu ku orang, indah batu tungku ga nemu besengki. Maya aku nanyaka penunga iya, iya semina diau diri lalu ngaga diri enda ninga. Aku semampai rungguk-rungguk kediri aja diau ba rumah. Nyau tuyu asai nadai mensia enggau bejaku. Mamau pendiau nadai orang enggau berandau. .Nama nanyaka pejalai penunga aku? Enda chukup pemakai perengka rumah? Nama agi utai ke nadai tua? ku iya mutap pagi nya sebedau nurun ngagai tempat kereja. Nuan ga laki aku. Enti nuan orang bukai kapa aku kiruh, ku timbal aku nyau enda ulih tat ka ati. Tegal ti alah laban pengerindu enggau penyayau ke Abel aku balat nyabar diri ambika ati iya chelap.Tang nyangka nya mih ngasuh perangai iya nyau majak balat agi. Iya selalu ringat. Ketegal penanggul nya aku nyau ngenyemakka diri ngagai jalai Allah Taala. Abel enda mantah aku ninting minggu ngagai gereja minta Allah Taala nyaup aku ngasuh pengidup kami likun. Menya jarang amat kaki tu ngindik utai ti nama gereja anang ke agi besebutka nama Allah Taala. Lebuh aku benung betubuh bisi Abel enda tentu ibuhka aku. Pemerinsa ditanggung aku kediri. Nasit ga, tegal ari sukung apai indai aku enggau bala bakih ari gerija, aku mujur nujah duri penguji nya. Bala kaban belayan sereta bakih sinu amat meda aku. Mua amat baka ti gaga tang makai belaukka ai mata. Pulai ke rumah sida apai nuan. Ditu merinsa amat aku meda nuan, ku ibu Chamik. Aku enda nimbal tang semina tak ninga aja. Chukup bulan maya beranak, aku ngadaka anak indu ti naka pemajik gamal. Mua mata iya bekabih bendar enggau jang Abel, ku indai. Anak indu nya diberi aku nama Emelia. Maya betal indai mih ngibun aku. Bisi mega sekali dua Abel

ngayanka pengerindu iya ngagai anak kami duai. Rengka enggau pekakas anak mit endang chukup, enda pungkang diberi Abel. Tegal ti seruran kiruh enggau anak, enda ga aku kelalu udu berundingka penyinu ati diri. Tang maya umur anak kami duai manggai tiga bulan nya baru aku nemu pengawa Abel ba belakang aku ngelama tu. Maya nya aku enggau orang gaji ti benama Sopia ari Pontianak deka bebelika rengka anak aku, enda mukai-mukai aku tepedaka ayas Abel pansut ari kerita enggau siku indu bebuk panjai bechuk mirah redam. Umbas amai ga pemajik gamal iya. Silik perening sereta perati aku ngagai mua indu nya, enggaika tak salah sangka ngapa. Tusah enggaika saru orang laban ba nengeri besai mayuh orang sebaka gamal. Endang enda salah peda aku, kerita kami duai Toyota Rush bechura chelum belakang tekura. Sapa mih indu nya kini ? Petunggal iya kini? Seketari iya kini? Klien iya kini? . Lama aku berunding ke pekara tu. Enda aku arap laki aku ngereja pengawa baka nya. Nyau temati kutu aku . Enda aku sangka penguji datai ngagai pengidup aku balat bakatu.Enda berasai kaki aku tak lalu nyingkang belanda nuju pintu mini supermarket Top Sprint.Tubuh aku penat magang,runding aku majak tusut.Pintu tebuka Aku belanda ukui nuju jalai besai. Aku bediri tegi-tegi,nadai runding agi.Tup..! Kerita Toyota Rav4 ti dipejalaika siku orang ti gawa pasal computer grafik, ngelantak aku. Udah nya aku enda nemu nama penyadi. Sekali aku menchelakka mata peda aku apai .Apai enda tentu bemunyi . Ben enggau bini iya bediri nyendi apai. Harren menyadi biak aku ke belajar ba form tiga sikuk sikuk nyabak semak katil muak ari kanan aku ti gali. Dini aku tu dih? Nama kebuah kita ngelingi aku? Dini Emi? tanya aku enggau sabak-sabak. Bisi ba rumah, selamat diibun indai, pia ku apai. Apai lalu nusui semua pekara enggau silik nama ti nyadi ba aku sehari nya. Apai sambil ti nyerita seruran ngendas ai mata iya. mmmm Perening aku nachar ngagai Abel ke bediri ba punggang katil. Pala iya nensam enda bejaku. Mua iya nyau puchat-kelat, nyangka kesal sereta takut. Ati aku balat telih sereta enseriban meda ulah iya ngeyai nya. Dalam ati aku din, nyamai agi mati ari neruska pengidup ti penaggul enggau penguji. Siku pan nadai mih bala kaban entua ngabas aku taja pan sida iya nemu rita aku ti bebadi. Udah nya sida apai lalu ninggalka aku kediri enggau Abel. Abel nyabak megai jari aku. Honey, Im so.. sorry. Bendar amat iya minta ampun ketegal penyalah diri ti udah balat beduan aku. Aku enda nemu bejaku mayuh agi tang madahka iya pengidup aku udah diserah ngagai petara ti ngatur. Laban endang nadai dua tiga, aku nadai penanggul ngampun semua penyalah ti udah tekelanjur dikereja Abel.

Ngagarapka petara ngampunka penyalah nuan sulu, ku aku sambil megai jari Abel. Enti enggau kuasa diri empu endang enda ulih aku nerima Abel pulai baru laban ati aku chukup telih. Nyau pandak cherita kitai udah penusah ti balat nuntung ruang bilik kami duai pengidup kami duai Abel jauh berubah manah ari selama. Abel mega badau agi segau-segau.Iya Abel baka keterubah betemu enggau aku suba .Asaika baru tedani ari mimpi rawan. Maya pengerami ngintu pengada anak kami duai Emilia chukup tiga taun,chukup betuah-belimpah.Tak enda aku sangka bala entua aku bisi sampal datai taja pan ngelama tu sida ngelaungka kami sebilik. Rami amat kami nya. Enda berasai ai mata aku pansut nelusur kuyu lalu labuh beteritik ninggang selepak luak dada enggi aku.Aku nyabak sekali tu ukai ketegal penusahtang nyabak ketegal ati ti kelalu gaga . Sida entua aku diatu nyau rindu lalu ulih nerima aku nyadi menantu. Aku endang nadai bisi ati dua tiga enggau sida.Entua aku ke indu mega nyau enggai jauh ari uchu iya Emil.Nya baru aku nemu pemesai kuasa Petara ti nentuka semua pengidup mensia.Terima kasihPetara .END

SUMBER ASAL : WEBSITE_BAHASA IBAN (http://bhsiban.wordpress.com/jomsambung-cerpen/) Enam taun udah nya, Jawai datai baru ke rumah panjai nya. Beterauh rerenggai kukuk manuk baka ke ngampan penatai iya. Dua tiga iku anak chauk beteridun ngelingi iya, baka ke agi ngelala indu dara bajik nya. Suah iya malik ngagai sebatang andau tebelian ti nyentang nunga batang Sungai Mukah nya. Dia endur iya selalu duduk. Dia sida sepangan serambau suah berandau nyentuk ke silau-silau manuk. Jampat mega mata iya malik ba tengah laman. Sida mega kala bemain asin ba ruang lapang nya. Pengingat begulai enggau bala kaban belayan agi teguh dalam kenang iya datai ke sehari tu. Mawat diatu nya agi bujang baka dulu suba mega, semampai tuchum-tuchum rerinyik. Iya agi nelap sereta gauk taja pan kami baru betemu sepengudah enam taun enda bepeda. Semina tubuh iya kurus mimit. Buk iya panjai enda diintu sereta disugu. Mawat mai aku ngirup kopi di dapur, nunga ujung bilik. Kami makai buah empasa rebus enggau pisang guring. Maya nya aku melutka mata, tepedaka jalai umai ti repa di belakang rumah panjai. Nadai dipeda agi langkau manuk baka suba. Pia mega, nadai agi batas sayur ti berintai dia. Di menua bukai suah iya meda rumah panjai bukai benung mansang sereta maju, tang rumah panjai ti endur iya ada dulu suba udah nyelai amai. Kada enda bisi penyarut rumah panjai tu? Sayau, enti bala kaban belayan aku ditu nyau bebagi ati, enda segulai sejalai agi. Tu baru diri serumah, semina tiga puluh pintu aja. Enda tentu datai tiga ratus iku bansa Iban diau ba rumah tu suba. Semina tiga ratus iku aja enda ulih begempung, enda ulih beserakup? Nama kebuah tuai rumah enda tegempungka bala nembiak iya, kini? Kada enda baka nya ga ba endur bukai? Nya baru ba sebuah rumah. Apin agi nyebut ba sebatang sungai. Apin agi bejaku pasal serakup seraban bansa aja. Kada enda tusah agi enti deka begempung diri senengeri, beserakup diri semenua? Makin irau ati Jawai tekenangka pasal penyerakup bansa iya. Ngingatka cherita lama rumah panjai tu suba, asai ke dalam mimpi iya meda utai ti udah nyadi. Asai ke ngabas tembawai lama iya. Rumah panjai sida dia suba, ukai semina jelai rita tang ngembuan cherita lama ti tebilang kediri empu. Enam taun ti udah ngejang, rumah panjai sida Jawai betampung panjai. Sehari tu iya udah bepapung, putus dua tiga. Ba sekeda endur nyau repa disengkabung babas. Nama kebuah? Jawai nanya Mawat. Ngelama tu bisi ga iya ninga berita angin ti tau ngasuh ati gidan ngerimbas daun pending iya. Tang iya sengaja enggai pechayaka berita ti sebebu ngapa nya. Iya enda puas ati laban enda nemu pun ujung. Maya nya mega iya suah tegepang diempaska gelumbang kemayang ti nyelai sereta charut. Ketegal pengarap animisme, agama adat aki ini kitai kelia menya? Ketegal adat miring maya Gawai Dayak? Nama kebuah sida ke Kristian muchau laban enggai kena pansa biau manuk atas pala maya ngabang? Nadai kebuah kitai ke udah ngelekaka pengarap lama nya enggai dibatak miring? Kala ga aku meda bala pengari rayat tauka bala menteri ke bepengarap Kristian enggau Islam diasuh bala Iban miring

maya sida niki rumah panjai Iban, enda ga sida nya mantah. Nadai nanggul ku sida, laban ukai kitai empu bepengarap ba adat nya. Anggap utai nya nyadi daya idup kitai bansa aja. Iya tau nyadi adat kena bebasaka pengabang enggau temuai. Iya tau nyadi modal, kena narit ati temuai ke datai ari menua tasik. Rindu amat sida meda daya idup baka nya, laban di menua sida nadai agi utai baka nya. Pama mih, icha ulih nyaup perintah kitai ngemansangka industri temuai. Kada enda tegal tradisyen lama enggau moden betembung lalu dipesi rachun penyarut? Nya endang sigi baka trend daya idup mensia. Tiap-tiap raban mensia mesti muji daya idup diri empu manah, enggi orang jai. Kada enda tegal politik sekeda raban bansa kitai bepechah-belah? Jawai majak nanya diri empu. Keterubah, tegal agama, ku Mawat berengkah muka cherita lama. Sida ke enggai bai tuai rumah kitai masuk Kristian suba, majak enggai mih, Wai. Mayuh pengawa ti dikereja kitai ke Kristian mali ku sida. Nya kebuah sekeda ari sida pindah, laban enggai ngelaban penti pemali. Nya mih, ari suba sida nya sigi enda senang ati meda kitai. Sida agi kih bendar deka ngetanka agama adat aki ini kitai kelia. Enda sida nemu adat adat Kristian ulih ngubah pikir bansa kitai? Ba aku enda ga salah enti sida nya agi talukka agama adat aki ini kitai kelia, engka apin maya sida ngelala Allah Taala. Engka Petara kitai empai negu ati sida. Tang anang ga sida mantah daya idup kitai ke baru nya. Aku enda kala bejai sereta mantah agama adat sida nya. Ku tua munyi nya mih. Tang sapa ti sanggup meri sida nya penemu, Wai? Kala aku nguji mantaika penemu ba sida nya, tang baka ti nyiuhka ai ke lubang ga aku. Anang putus pengarap, Wat. Ila tua nguji baru. Kasih ga bala petunggal sereta kaban belayan tua nya. Bisi ga aku kala ninga berita angin, Wat. Tegal pekara bukai? Ukai. Tegal agama mega. Bisi orang ari menua bukai ngerembaika agama Kristian ti nyelai ari adat Kristian kitai. Amat nya, Wat? Amat. Kekadang tau mechahka kitai Kristian ga sida nya, laban sida madah mayuh utai salah ba adat Kristian kitai. Sida madah enda tau sembiang nungkun dian. Sida enda tau kena pesi ai kudus. Gambar Jesus pan enda tau digantung ba dinding, ku sida nya. Tanduk rusa pan enda tau digantung ba didnding baka suba. Kada enda ajar Kristian tesat sida nya, Wai. Irau aku meda bala kitai serumah ke alah kena bai sida tu! Kada sida nya nemu, adat Kristian nya sigi sebengkah ari chara orang ari menua tasik mechahka bansa kitai? Sabar, Wat. Udah sida nemu diri tesat, lama laun sida nya deka enggau kita mega. Nya mih, enti bala kitai deka mai orang nya nitihka kitai, kitai empu mesti mandangka ulah ti manah ngagai sida. Anang belaya enggau sida. Sema sida kala ngangauka nuan sembiang begulai enggau sida, anang enggai datai.

Ukai datai mantah chara sida, tang datai begulai sejalai enggau sida nyenbah Alalh Taala mega, ku timbal Jawai baru, mantaika penemu diri. Makin sinu ati iya. Kedua, laban Gawai Antu, ku Mawat becherita baru. Jawai tegenung laban enda tentu pechaya. Patut tauka enda, pekara Gawai Antu tu ngasuh sebuah rumah panjai pechah belah lalu ngasuh mensia beserara enggau kaban belayani? Enda ga Gawai Antu tu sebengkah daya idup asal bansa kitai? Sekeda bala kitai serumah ke udah megai pengarap Kristian enggai enggau berami. Sekeda terus terang mantah pengerami Gawai Antu nya dirami ba rumah kitai tu, lalu sida deka pindah berumah kediri, ku Mawat nyambung cherita iya. Enti nitihka adat Kristian, sigi enda tau ga sida nirika Gawai Antu, Wat. Tang enda ga sida tau mantah orang ke deka nirika gawai nya. Aku udah seratus peratus nyadi orang Kristian, lalu nadai megai penti pemali agi. Nadai pemali enggau orang berami Gawai Antu, ku Jawai mantaika penemu diri. Ku tua munyi nya mih, wai, tang sida ke pabu penemu ba agama, ukai munyi penemu tua tu, timbal Mawat baru. Jawai berasai sinu. Agama patut ulih ngempung bansa kitai, ukai mechah. Tegal agam penyerakup kaban belayan tau lela baka sabun enda ulih meku baru? Sanggup sida ninggalka reta tengkira diri empu, ninggalka rumah panjai lalu berumah nyemuah? Sida ke udah tebuka ati nerima pengarap baru, patut ngembuan pikir ti baru sereta tebuka mega. Nama kebuah sida nya enggai ngerak pikir bala sida ke empai dani? Nadai kebuah sida nya enda ulih nengau arus jalai sida ti agi bejalai dalam petang tegayam. Patut sida nya ulih mechahka tradisyen ti enda releven agi ba pengidup bansa kitai. Amat tusah bala kitai ba rumah panjai tu nerima ubah pikir diri? Jawai nanya diri empu baru. Kasih iya ngenang bala sida serumah ke agi diau ba baruh tachu baka pama. Asai ke gesak darah iya ninga penerang ari Mawat tadi. Kitai serumah diatu, ukai baka suba, Wai, ku Mawat nampung cherita iya baru, mandangka diri enda senang ati meda Jawai lama tegenung. Jawai nagunka pala sambil meratika mua Mawat. Pansut ari bilik dapur, seduai bebai pangan diri duduk ba ruai. Nadai dipeda senaya kemayang orang. Amat sengian. Sepengelama seduai berandau, baru bisi dua tiga iku mensia mansutka diri tang sida iya mega kisuk enggau pengawa diri empu. Tujuh pintu ke kiba mega sunyi, baka nya mega bilik ti muak ke kanan, sama sunyi. Ba ruai dua belas pintu endur kami duduk ulih diitung ngena tunjuk orang ke pansut ke ruai. Angin deras ti bepuput di luar rembus tama ke ruai nengah selepak dinding. Ketiga, tegal politik. Kitai serumah agi charut pikir pasal politik. Sida ke enda sekula mudah amat dibalut penemu politik ti tepawah, enda niti menasan ti betul. Sida mudah dirachun buah jaku parti pemangkang, sambung Mawat majak becherita ngagai Jawai. Jawai mega agi ingat, dulu suba kala apai iya Janting semak deka bibat diri sebilik enggau apai Mawat tegal parti politik. Janting nyukung parti pemangkang, apai Mawat nyukung parti BN. Bebandir rekung

Janting mai sida serumah ngundi parti pemangkang. Ku iya pengari rayat sida ti bediri minta pilih ari parti BN, enda ulih mutarka penanggul sida serumah ti agi miskin. Pengari rayat sida ke diatu patut diganti enggau orang ke baru. Pengari rayat sida ukai deka nulung rayat, tang deka munuh rayat, deka ngambi tanah rayat. Ku iya, mayuh orang madah, pengari rayat ari BN enda teaduka penyarut tanah rayat. Apai Mawat, mantah penemu ipar nya nya. Iya enggai limpang ari penemu tuai rumah sida. Jai manah, penemu tuai rumah mih guna. Betul tauka salah arus jalai ti ditebas tuai mih ditengah. Tuai rumah madah, sida serumah enda tau enda ngundi parti BN, laban nya parti perintah ti megai menua Malaysia diatu. Ngundi BN, nya tanda kitai sebansa ulih beserakup enggau pangan diri. Tang nya cherita lama. Jawai nemu, penyarut politik sida serumah ulih diputarka Tuai Rumah Sawing. Kaul iya enggau pengari rayat menua nya seruran terit tanchang. Kelimpah ari injin api, diatu rumah panjai sida udah datai jalai raya. Taja empai ditar, tang ulih ga ditengah sekeda kerita. Suba sida serumah semina bepanggai ba perau enggau injin sepit. Tang diatu, injin sepit semina dikena ngangkut padi aja. Sida serumah enda agi ngena moto ai ngalu ke pasar Selangau. Pengari rayat sida di menua nya majak ngansak bansa kitai ngubah pikir. Daya idup enggau chara pengidup ti lama udah dibalut babas repa anang nguna agi, enti iya nadai mai penguntung. Buai sekeda pengawa enggau adat ti tau ngenataika pengerugi. Enda ibuh disimpan agi pengaruh aki ini kitai kelia. Bansa kitai enda ngayau baka kelia. Mensia beperang ukai nguna duku agi, tang nguna pengelandik teknologi moden. Asai ke agi gegetar pending Jawai ninga jaku lalau ari pengari rayat menua sida nya. Pelaba aku agi bisi orang di menua tu empu agi bebendar deka mechahka bansa kitai, Wai. Mawat nampung cherita iya baru. Jawai ngaru pala sambil nyeling mua petunggal iya nya enda lama. Iya enda nyangka Mawat kala mikirka utai ti baka nya. Dini iya tu bulih penemu baka nya? Engka ari orang ti bekereja begulai enggau iya, kini? Lama Jawai bepikir. Enda iya nyangka pikir Mawat datai dia. Mechah baka ni, Wat? Agi tekuing ati Jawai ngabas penalam pikir Mawat. Betul tauka enda pikir Mawat datai ba pekara ti suah nyadi buah mulut bansa kitai diatu? Ku tuai opis kami, diatu makin mayuh semut dalam pua bansa kitai. Makin mayuh munsang bebulu manuk udah mujur masuk kandang menua kitai. Sida majak nguna taktik Rajah Brooke ti numbangka kuta Libau Rentap ba Bukit Sadok kelia menya. Amat ga, bansa kitai ke dibai Rajah Brooke ngayau ngagai Bukit Sadok kelia semina gaji makai aja, enti bisi. Ku sida, mudah amai meli bansa kitai, seiku semina berega RM20 RM50 aja. Apuu parai kitai, Wai. Kumbai sida baka nya memagang tiap-tiap iku kitai. Bansa kitai mudah pechah belah laban parti politik. Peda aku amat, Wai. Nya baka apai tua suba, tegal politik mih seduai kempang ati belaya diri sebilik. Tuai opis kami nya mega kala ngasuh aku madahka kitai serumah tu, anang alah achuk jarum mit bansa bukai. Bansa kitai patut begempung ba sebuah parti politik, baka sida Melayu. Amat penemu nya, Wai?

Nya mih utai ti deka dipadahka aku ngagai kitai serumah. Sigi amat nya, Wat. Tang, sapa tua tu? Orang ti kaya raja sereta tinggi pangkat ari tua pan agi ulih mabuk kena tubai duit ringgit. Taja pia, aku tetap sabar, Wat. Ila aku nguji berandau enggau kitai serumah pasal pekara tu. Di menua bukai bansa kitai udah berengkah nemu diri lama udah dikemeli sereta disabung orang belaya enggau pangan diri lalu dipechahka orang. Sida ke udah tesat menasan runding, mayuh udah berengkah mulaika diri ngagai pun jalai baru. Ukai semina ba parti politik aja, tang bansa kitai nyau nemu deka begempung ba serakup SNDU, SIDS, SADIA, SIWA, SPIS enggau ti bukai. Nya mih sebengkah tanda bansa kitai ulih begempung, Wat. Manah mih nya, Wai. Aku arapka utai ti kala dipeda sereta didinga nuan nya nyadi nyata ba rumah panjai kitai tu, ku Mawat. Apai Lipai pansut ari bilik lalu ngusung seduai ti duduk jenuh di ruai. Apai Balang duduk betunga enggau Jawai lalu Apai Balang duduk sepiak Mawat. Sida sama-sama enda engkeretik. Sida nangika randau diri didinga orang bukai. Jawai sengaja nyapai kutak segerit Apai Lipai Ka nginsap nuan, endu? tanya Apai Lipai. Jawai ngilikka pala. Iya semina bayam lalu meratika leka jaku enggau ayat ti ditulis ba kutak segerit nya. Maya nya uduk nyalak. Entah ari babas ni? Pia mega bisi didinga rengung injin sepit mudik ke ulu sungai. Munyi burung ti belalai dalam babas, endang pemerindang ti semampai kekuchau enda ngira siang tauka malam. Kala apai iya Janting madahka iya, sekeda bunyi burung ulih madahka tanda ti jai ngagai mensia ti agi nguan menua nya. Jawai tuchum aja ingatka tangkan apai iya nya. Bunyi burung nadai bisi besangkut paut enggau nasit mensia. Nya sistem komunikasyen sida empu, kitai mensia mega bisi sistem diri empu. Anang ibuhka sistem sida. Jawai enda teguyat ati ninga pekara nya. Jawai agi beratika ayat jaku English enggau jaku Melayu ti ditulis ba kutak segerit nya. Apai Balang agi meratika mua Jawai, baka ke nganti diri ti deka nuchul insap ba mulut Jawai. Berapa bungkus umbas insap nuan sehari, aya, ku Jawai enda berasai mansutka jaku ba mua Apai Lipai. Sebuti umbas dua bungkus, endu. Lama Jawai meratika mua Apai Lipai, tang enda ga iya kempang masutka jaku agi. Apai Balang enda tetilap meratika mua Jawai. Mawat agi enda memunyi baka ke benung ngenang utai ti udah nyadi ba sida serumah panjai sida nya. Apai Lipai nyapai sebatang agi segerit lalu nuchul iya. Igat, baka ni randau kita pasal ramu sida ke pindah nya, dih? ku Apai Lipai nanya Mawat. Jawai malik ngagai Mawat, tang Mawat enda merening orang ti nanya iya nya baka ke enda bebasaka tanya Apai Lipai nya. Nitihka jaku semua orang mayuh mih, aya. Mesti ditunu ambis lengis, timbal Mawat baka ke pedis ati. Manah mih nya, Wat. Nya sigi patut. Enti lama-lama ramu sida nya enda dibai sida pindah, makin

mayuh penusah datai ba rumah kitai tu. Rumah tau nyadi angat-seangat. Sida ke pindah nya pan patut nyua genselan, patut nyua ukum. Enti enda pia rumah kitai tu tau kena tuntung penusah ngenyit,saut Apai Balang. Jawai malik ke kiba, malik ke kanan meratika mua seduai ke betimbal jaku nya. Enda ga Jawai kempang nanya Apai Balang, pasal pemali pindah. Iya agi irau ati. Taja udah nyadi orang Kristian, Apai Balang agi ga pechayaka utai mali. Keempat, pemarai dua iku kitai serumah ti beturut bulan. Ujung bulan Jun nyin suba anak mit ti baru ada. Bulan Julai tu kemari, Aki Manang, jampat Mawat ngemanjaika agi jerita lama ti nyadi penyarut lalu mechahka rumah panjai sida. Apai Lipai enggau Apai Balang sama-sama ngagunka pala, tanda nyukung penerang Mawat. Rumah kitai makin angat, endu. Nya kebuah kitai serumah baum lalu nirika gawai, minta ampun ngagai Petara. Tang sekeda enda setuju, ku Apai Lipai. Sekeda enggai begawai. Sida deka nguna adat Kristian. Ukai ulih nguna chara nya penti pemali, endun, ku tambah Apai Lipai. Pemarai mensia!!! Jawai tegepang sereta enda tentu pechaya. Bisi agi ga pekara nyelai ti nyadi pemechah penyerakup mensia. Kati pemarai mensia tau ngasuh rumah kitai tu suba pechah. Nadai mensia enda parai. Taun, bulan, hari enggau jam sigi enda sebaka. Kekadang betangkan taun, betangkan bulan, betangkan hari, betangkan jam. Mensia ni ulih nentuka pemarai sida empu. Pemarai mega ukai utai ti dikedeka Nya amat,endu. Tang enda mih patut nyau beturut bulan. Ulit nyau betinggang-tinggang, saut Apai Balang. Mawat meratika mua Jawai, baka ke nganti Jawai bejaku baru. Ba pikir aku, nya pekara mit. Manah enti deka minta ampun ngagai Petara, engka kitai serumah amat udah mayuh penyalah ti digaga kaki jari, gaga pikir diri, ku timbal Jawai. Tang sekeda kitai serumah enggai begawai sereta miring, endu. Baka ni deka ngintu rumah enti enggai miring? Apai Lipai nyukung penemu Apai Balang. Sida ke udah megai pengarap Kristian, endang patut ga sida enggai begawai ngena piring. Pengawa nya enda diasuh Alllah Taala. Tang sida nya tau ngintu rumah diri ngena adat Kristian mega. Enti bala kitai ke agi megai pengarap lama minta ampun ngagai Petara ngena piring enggau darah babi, orang Kristian minta ampun ngena sembiang, ai kudus enggau kayu regang, ku timbal Jawai. Apai Lipai enggau Apai Balang beperening pangan diri, tang sengian enda lama meratika mua Jawai. Minta ampun ngena ai kudus enggau kayu regang? tanya Apai Balang reranggap baka orang ke baru dani tinduk. Kati enda ngena piring ading enggau darah babi? tambah Apai Lipai. Kapa piring enggau darah babi? ku Jawai merening mua Apai Lipai enggau Apai Balang ti agi telenga lilih merening mua iya.

Aki ini kitai kelia madah, piring enggau darah babi nya diserah ngagai antu ke ngachau rumah kitai. Nya mih chara kitai nundukka antu, endu, ku terang Apai Balang. Enti kitai udah megai pengarap Kristian, enda ibuh baka nya, aya. Anang nunduk sereta bepangan enggau antu, aya. Pangan kitai orang Kristian nya Allah Taala enggau Jesus. Kitai ulih ngintu rumah kitai ngena adat sembiang lalu minta tulung ari Allah Taala, ku Jawai. Makin berani iya meri peransang pengidup chara moden ngagai Apai Balang enggau Apai Lipai. Seduai sebakih nya majak beperening pangan diri. Enti ulih ngintu rumah kitai enda ibuh munuh babi, manah agi ga pelaba aku. Enda kiruh kitai begigaka babi sebelah orang, ku Apai Lipai. Amat mudah agi enti baka nya. Kitai enda mayuh begunaka duit ringgit. Suba ukai main pengiruh kitai serumah tu, enti deka begawai ngintu rumah panjai. Tang ku tambah Apai Balang. Iya baka ke agi belala bejaku nusui penelaba diri. Mawat matak seput lalu ngesuhka angin karbon dioksida nya ngena mulut. Jawai agi besabung perening enggau Apai Lipai seduai Apai Balang. Besai asai pengarap seduai ba Jawai. Apai Balang majak deka becherita tang nyau tebatuk-batuk laban asap sigerit ti salah sirutka iya. Jawai murus belakang Apai Balang, ngichaka iya liat ati agi lalu enda ingatka pekara lama ti udah ngeruga tasik pengidup sida serumah dulu suba. Sekeda bala kitai ba rumah panjai tu gila, endu, ku Apai Balang, tebatuk-batuk baru. Mawat nyapai kutak insap Apai Balang lalu nungkun sebatang. Baru aku meda Mawat nuntum batang segerit. Gila, gila. Udu amat belaya enggau pangan diri. Jai agi ari apai nuan ti gila nyamah nuan dulu suba. Nuan tentu enda pechaya, endu! Tusah aku mikirka mensia ti ngembuan untak ti landik sekula tang pikir enggau penemu sida pabu amat. Raban tu ngetanka penemu adat, pengaruh sereta reta daya idup sida. Seraban agi, mutus ati muai abis lengis chara lama peturun aki ini tang kekadang mantah chara raban baru ti bukai. Seraban agi nya ngembuan ati tengah hari, tang enggai tentu mantaika serabana diri. Sida tu semampai nyaga ati bala pangan sida. Sida tu orang ti sebaka enggau penemu seduai Mawat, ku Apai Lipai mantaika serabana diri. Tu semina randau kitai empat aja. Lemai tu legi aku nusui semua cherita ngagai nuan. Wai. Pagi ila kitai sama-sama nguji muai semua rumput penanggul ti agi malut rumah panjai kitai ditu, ku Mawat lalu merening Jawai. Apai Lipai enggau Apai Balang sengian baru. Mawat tetuchum baru. Jawai semina tuchum lelegup. Meda orang bukai nyau mayuh semayuh pansut ke ruai, sida sama mulaika diri ngagai ruai diri empu. Kenu ku jaku, bisi randau ruai besai deka diatur lemai nya, sebedau sebengkah pengawa berat deka dipejalaika sida tumu pagi ila.