KUDINGKING

Di pogulu po haro songulun tanak wagu pinungaran do i Kudingking. I Kudingking nopo nga
tulun mosikin om poingion isio doid iso kampung id doros do Nulu Kinabalu.

Insan tadau pomonsoi no i Kudingking do gado om pataano no dau id tuntu do nunuk.

Tamangai no dau i gado gisom nasadapan. Amu kopio osonong o nasip di Kudingking tu aiso o
tombolong do suminulung do gado dau.

Uli no i Kudingking miampai turos di oluyu kopio. Id tindalanon dau do muli, korubai no di
Kudingking o songulun tondu do molohing no kopio. Ponguhot no i molohing tondu kumaa di
Kudingking om posunudo no disio i sontob naantakan ngawi doid suang koposion dau.

Nosianan i molohing tondu dau om suhuo no dau i Kudingking mongoi hilo id walai dau.

Sunudai no dau i Kudingking do, ‘soira nopo korikot hilo walai ku poinumon no i tanak ku.
Alapas po ii om mongoi no wagu pokisuduon. Ogonop po i suduon om mongoi no kawagu doilo id
dumo. Mongupu no do tua’ di tawadak om mamanau no. Kada no pongkowili nung au ko po korikot
id walai nu.” Ka di molohing tondu.

Pamanau no i Kudingking gisom nokorikot isio doid walai di nga aiso i do tangaanak do
nokito dau. I nopo nokito dau nga piipiro tinan do kakanan om iso tangga poinponu do waig.
Tunguho no di Kudingking i kakanan miampai waig id suang do tangga.

Kalapas po isio minonuang di kakanan om ongoi no i Kudingking panganu do kayu noruyou

id talun. Laaso om wongkoso no dau i kayu om owito kuminaa hilo id walai di molohing tondu.

Panangkus no i Kudingkung do hilo dumo di molohing tondu di om pilio no dau i tua’

tawadak di olumis no kopio. Upuo om buntuto no di Kudingking o tua’ tawadak minuli hilo id walai
dau.

Korikot nopo i Kudingking hilo id suang do walai dau om pogkowili nogi i Kudingking.
Nokotigong tomod i Kudingking do nokokito di sumandak do olumis no kopio poingkakat doid
tolikudon dau. Uhoto no di Kudingking do isai o sumandak dii. Simbaro no di sumandak do isido
nopo nga sawo di Kudingking.

Totuong di lapako no di Kudingking i tua’ tawadak. Imbulai no o mogisuai-suai kakamot

mantaad do tua’ dii. Kakamot nopo ngawi dii minulai nga takanon, tayam, amas om ogumu po i
suusuai.

Mantad do tadau dii nadadi i Kudingking do songulun puawang id kampong dau. Sundung do
puawang i Kudingking nga kakal ii do mindahu om kumalaja id dumo dau. Sontob tulun di mosikin
id kampong dau nga sinokodung di Kudingking.