LITURGI I (Penciptaan)

1. ( 1 Musa 2 : 4 - 5 )
2:4 Songon i ma panjadijadi ni langit dohot tano, di na
tartompa angka i, di ari panompaon ni Debata Jahowa di
tano dohot langit.
2:5 Tagan so adong dope di tano on nasa ramba, jala tagan so
martumbur dope nasa bulungbulung di ladang, ai ndang
dope diparo Debata Jahowa udan tu tano on, jala ndang
adong dope jolma na mangula tano i.

LITURGI I (Penciptaan)

2. ( 1 Musa 2 : 6 - 7 )

2:6 Alai martimpul ma uap sian tano on, gabe dibornohi sandok
sisik ni tano on.
2:7 Dung i dijadihon Debata Jahowa ma jolma i sian orbuk ni
tano on jala diullushon tu bagasan bungbung ni igungna hosa
hangoluan i, gabe martondi na mangolu jolma i.
LITURGI I (Penciptaan)

3. ( Psalmen 19 : 2 - 4 )

19:2 Angka langit do mamaritahon hamuliaon ni Debata, jala

jadijadian ni tanganna do pinaboa ni na ratarata ni langit.
19:3 Masipaboaan do angka ari, jala masilehonan parbinotoan do
angka borngin.
19:4 Ndada barita manang hatahata na so binege soarana i di
bagasan.

LITURGI I (Penciptaan)

4. ( Psalmen 19 : 5 - 7 )

19:5 Tolhas tu liat portibi on tali pangungkurna, jala ro di

topi ni tano on do baritana. Dibahen do disi soposopo ni
mata ni ari.
19:6 Jadi songon bajo pangoli do ibana ruar sian bilutna; las do
rohana songon ulubalang na manopot sitopotonna.
19:7 Sian topi ni langit do habibinsarna, jala tolhas ro di
angka topina muse pangkusorna i, jala ndang adong na
buni maradophon mohopna i.
LITURGI I (Penciptaan)

5. ( Psalmen 89 : 12 - 13 )

89:12 Gok di Ho do angka banua ginjang, gok di Ho do dohot

tano on, nang portibi on ro di isina i, Ho do paojakkon
nasida.
89:13 Utara dohot dangsina. Ho do jumadihonsa, Tabor
dohot Hermon marolopolop mida goarmu.

LITURGI I (Penciptaan)

6. ( Psalmen 147 : 8 - 9 )

147:8 Ibana manghungkupi langit i marhitehite ombun, Ibana

paradehon udan tu tano on, Ibana patumbur duhutduhut
di angka dolok.
147:9 Ibana mangalehon tu pinahan gagatonnasida, nang tu
angka anak ni pidong sigak, angka na ngoakngoa
LITURGI I (Penciptaan)

7. ( Psalmen 92 : 5 - 6 )

92:5 Ai nunga dipalas Ho rohangku, ale Jahowa, marhitehite

angka pambahenanmu, marolopolop do ahu mida angka
jadijadian ni tanganmu.
92:6 Tung na balga do angka jadijadianmu, ale Jahowa, bagas
situtu do angka pingkiranmu.

LITURGI I (Penciptaan)

8. ( Psalmen 95 : 4 - 7 )

95:4 Di bagasan tanganna do angka ojahan ni tano on, jala guru

di Ibana do punsu ni angka dolok.
95:5 Guru di Ibana do laut, jala Ibana do tumompasa, jala
tanganna do jumadihon tano darat.
95:6 Beta hita manungkap dohot marsomba, marsinggang ma
hita tu jolo ni Jahowa, Sitompa hita.
95:7 Ai Ibana do Debatanta, jala hita bangso pinarmahanna,
jala birubiru ni tanganna. Sadarion, aut ditangihon hamu
nian soarana!
 LITURGI I (Penciptaan)

9. ( Rom 11 : 33 - 34 )

11:33 Bagasna i, antong, hamoraon, hapistaran dohot

parbinotoan ni Debata! Na so hasigatan do
angka uhumna jala na so habogasan do angka dalanna!
11:34 Ai ise dung umboto roha ni Tuhan i? Ise manuturi Ibana?

LITURGI I (Penciptaan)

10. ( Rom 11 : 35 : 36 )

11:35 Ise mangalehon parjolo tu Ibana, asa dibalos tusi?

11:36 Ai sian Ibana do saluhutna ro, marhitehite Ibana jala
marhapatean tu Ibana do sasudena i! Di Ibana ma
hasangapon salelenglelengna! Amen.
LITURGI II (Kejatuhan Manusia Ke Dalam Dosa)

1. ( 1 Musa 6 : 5 – 7 )

6:5 Alai dung diida Jahowa, nunga lam deak hajahaton ni jolma
di tano on, jala sai na jat na ma sude tubutubu dohot
pingkiran ni rohanasida gonop ari.
6:6 Jadi disolsoli Jahowa ma rohana, ala tinompana i jolma di
tano on, jala lungun rohana.
6:7 Dung i ninna Jahowa ma: Ripashononku ma sian tano on
jolma na hutompa i, ro di pinahan dohot na manjirir, ro di
pidong angka na martongatonga langit, ai nunga husolsoli
bagingku ala na hutompa i nasida.

LITURGI II (Kejatuhan Manusia Ke Dalam Dosa)

2. ( Rom 1 : 18 – 19 )

1:18 Ai dipapatar do sian ginjang rimas ni Debata dompak nasa

jolma, na so daulat jala na geduk roha, na mangambat
hasintongan i marhitehite hageduhon.
1:19 Tandap do nian di nasida pamotoan taringot tu Debata
dipatandap Debata.
LITURGI II (Kejatuhan Manusia Ke Dalam Dosa)
3. ( Rom 1 : 20 – 21 )

1:20 Ai dapot tarida do pangalaho ni Debata na buni hian,

timbangon ni roha, sian angka pambahenan ni Debata di
na tinompana i hasiangan on, i ma hagogoonna dohot
hadebataonna na manongtong i, asa unang adong
sidaliannasida.
1:21 Ai atik pe diboto nasida Debata, ndang dipasangap Ibana
songon na tama di Debata, jala ndang dipuji, gabe
dipaotooto angka pingkiranna do nasida, jala mangkolom
ma rohanasida na so mangarti i

LITURGI II (Kejatuhan Manusia Ke Dalam Dosa)

4. ( Rom 1 : 22 – 24 )

1:22 Dirimpu, na bisuk nasida, hape na loahon do!

1:23 Dipasambar do hasangapon ni Debata na manongtong i tu
gombaran na suman tu jolma na mangilas i, songon i tu
pidong dohot tu binatang ro di na manjirir i.
1:24 Dibahen i dipasahat Debata do nasida di bagasan
hisaphisap ni rohanasida tu hahodaron i, pola diparonsam
nasida dagingna sama nasida.
LITURGI II (Kejatuhan Manusia Ke Dalam Dosa)

5. ( Rom 1 : 29 – 30 )
1:29 Tung gok do nasida nasa hageduhon hajahaton, haroaon,
pangahution, latelate, bunubunu, badabada, ansiansi dohot
angkal bisuk.
1:30 Angka parmihimmihim, parhata tundal, sihosomi Debata,
angka na jungkat, siginjang roha, sideak hata, parpingkiran
na roa, na manoisi natorasna;

LITURGI II (Kejatuhan Manusia Ke Dalam Dosa)

6. ( Rom 1 : 31 – 32 )

1:31 na so marroha, siose padan, na so umboto holong dohot

asi ni roha.
1:32 Diboto nasida do nian uhum na pinatikkon ni Debata,
mandok na tama marutang hosa angka na mangulahon
sisongon i, hape tong do diula; lumobi tahe, lomo do
rohanasida mida angka na mangulahonsa.
LITURGI II (Kejatuhan Manusia Ke Dalam Dosa)
7. ( Rom 3 : 10 – 13 )

3:10 Hombar tu na tarsurat i: “Ndang adong na tigor nanggo

sada!”
3:11 “Ndang adong na marroha, na usouso di Debata.”
3:12 “Saluhut nasida nunga manimbil, tung sange do nasida
marroha mago; ndang adong sibahen na denggan nanggo
sada.”
3:13 “Tanoman na ngangang do aruarunasida, na paotootohon do
dilanasida; bisa ni ulok dari do ditoru ni bibirnasida.”

LITURGI II (Kejatuhan Manusia Ke Dalam Dosa)

8. ( Rom 3 : 14 – 18 )

3:14 “Gok burabura dohot hata podu pamangannasida.”

3:15 “Hirtap do patnasida mandurushon mudar.”
3:16 “Hamagoan dohot haporsuhon do di dalannasida.”
3:17 “Ia dalan hadameon i ndang diboto.”
3:18 “Ndang marhabiaran di Debata rohanasida.”
LITURGI II (Kejatuhan Manusia Ke Dalam Dosa)
9. ( Psalmen 94 : 3 – 4 )

94:3 Sadia leleng on angka parjahat i, ale Jahowa, sadia leleng

on marolopolop angka parjahat i?
94:4 Sai marbullakbullak do nasida mangkatahon hajungkaton,
sai teal do pangkuling ni sude angka siulahon hajahaton.

LITURGI II (Kejatuhan Manusia Ke Dalam Dosa)

10. ( Psalmen 94 : 5 – 6 )

94:5 Sai diparsipal nasida do bangsom, ale Jahowa, jala

diruparupa parjambaranmu.
94:6 Marragean do na mabalu dohot na buro dibahen
nasida, jala dibunui do angka na tading di lampin.
LITURGI III (Panggilan Untuk Bertobat)

1. ( Jesaya 40 : 3 – 5 )

40:3 Soara ni na joujou di halongonan: Pauli hamu dalan di

Jahowa; patigor hamu di adaran dalan balobung di
Debatanta.
40:4 Ingkon gohan do nasa rura, jala parejeton nasa dolok dohot
buntulbuntul, jala gabe na hornop do na marnangkok tuat,
jala gabe rura tanggurung ni dolok.
40:5 Jadi patar ma hamuliaon ni Jahowa, jala sange nasa
sibuk marnidasa, ai pamangan ni Jahowa do mandok.

LITURGI III (Panggilan Untuk Bertobat)

2. ( Jesaya 43 : 18 – 19 )

43:18 Unang be paingotingot hamu angka na masa

najolo, jala unang be pingkiri hamu angka na robi:
43:19 Ida ma: Bahenonku ma na imbaru, nunga pola
martumbur nuaeng; tung so tandaonmuna ma i?
Songon do tahe, bahenonku ma dalan di
halongonan, angka batang aek di tano
bangkalbangkal.
LITURGI III (Panggilan Untuk Bertobat)
3. ( Hesekiel 18 : 21 – 23 )

18:21 Alai tung sura ditundalhon roha ni parjahat i

saluhut dosana, angka na niulana na sai laon, jala
diradoti saluhut angka patikki, jala diulahon uhum
dohot hatigoran, tongon do ingkon mangolu
ibana, ndang jadi mate.
18:22 Saluhut hajahaton angka na niulana na sai laon,
ndang jadi jujuran tu ibana, hatigoran na
niulahonna i do hangoluhononna.
18:23 Tung tagamon marlomo ni roha ma ahu mida
hamatean ni parjahat i, ninna Tuhan Jahowa; nda
tagonan nian, molo muba rohana i sian dalanna
angka na sai laon, asa mangolu ibana.

LITURGI III (Panggilan Untuk Bertobat)

4. ( Jesaya 1 : 27 – 28 )

1:27 Tartobus do sogot Sion marhitehite habonaron,

jala angka na mulak tu ibana marhitehite hatigoran.
1:28 Alai hinamago ni angka pangalaosi dohot pardosa
sahali ro do, jala siap do sogot angka na
manadingkon Jahowa.
LITURGI III (Panggilan Untuk Bertobat)
5. ( Jeremia 31 : 31 – 32 )

31:31 Ida ma, na ro do angka ari sogot, ninna Jahowa,

pungkaonku ma padan na imbaru tu pinompar ni si Israel
dohot tu pinompar ni si Juda.
31:32 Ndada songon padan na hubahen i na jolo tu
ompunasida, uju na hutangkup tangannasida i
laho manogihon nasida ruar sian tano Misir, hape
diose nasida do padan na hubahen i, atik pe ahu
harajaannasida nian, ninna Jahowa.

LITURGI III (Panggilan Untuk Bertobat)

6. ( Jeremia 31 : 33 – 34 )

31:33 Ai on do padan sibahenonku tu pinompar ni si

Israel, dung salpu angka ari on, ninna Jahowa:
Lehononku ma patikku tu bagasan ateatenasida
jala surathononku do i tu bagasan rohanasida,
asa ahu gabe Debatanasida, jala nasida gabe bangsongku.
31:34 Jadi ndang pe podaan ni sahalak donganna,
manang dohononna tu hahaanggina i songon on:
Tanda hamu ma Jahowa! Ai tung saluhut nasida
tumanda ahu sogot, tole na metmet, tole na
magodang sian nasida, ninna Jahowa, ai
marpamuati do sogot rohangku mida hajahatonnasida i,
jala ndang be ingotonku dosanasida i.
LITURGI III (Panggilan Untuk Bertobat)
7. ( Jesaya 46 : 12 – 13 )

46:12 Tangihon ma ahu hamu ale angka na tangkang marroha,

hamu angka na holang sian hatigoran.
46:13 Nunga pola hupajonok hatigoranku, ndang be
mandaodao, jala ndang marbenda hatuaonku, jala
lehononku do di Sion hatuaon, jala hamuliaonku di Israel.

LITURGI III (Panggilan Untuk Bertobat)

8. ( Jesaya 1 : 16 – 17 )

1:16 Marburi ma hamu, urasi hamu dirimuna, paholang

hamu ma hinaroa ni pambahenanmuna sian jolo ni
matangku, pasohot hamu ma manjahati.
1:17 Guruhon hamu ma mambahen na denggan, lulu i
hamu ma uhum, pintori hamu na nirupa,
patingkos hamu ma uhum tu nasopot so marama,
ondingi hamu angka na mabalu.
LITURGI III (Panggilan Untuk Bertobat)
9. ( Jesaya 1 : 18 – 20 )

1:18 Dung i sai ro ma hamu, asa mardabudabu hita, ninna

Jahowa. Tung sura rara dosamuna songon abit bunga
dapdap, bontar do bahenonku songon itak; nang pe rara
songon abit hasumba, gabe songon hapas do muse.
1:19 Molo ringgas hamu tumangihon dohot mangihuthon,
sai panganonmuna do hinadenggan ni gogo ni tano i.
1:20 Alai molo manjua hamu jala mangalo, sai na panganon ni
podang do hamu sogot, ai pamangan ni Jahowa do
palumbahon.

LITURGI IV(Janji Tentang Kedatangan Juruselamat)

1. ( Johannes 3 : 16 – 17 )

3:16 Ai songon on do holong ni roha ni Debata di portibi on, pola

do Anakna na sasada i dilehon, asa unang mago ganup na
porsea di Ibana, asa hangoluan na salelenglelengna di ibana.
3:17 Ai ndang na disuru Debata Anakna i tu portibi on, asa
uhumanna; naeng paluaonna portibi on tahe, umbahen na
disuru.
LITURGI IV(Janji Tentang Kedatangan Juruselamat)
2. ( Jesaya 9 : 1 + 5 )
9:1 Bangso na mardalani di bagasan haholomon marnida
sada panondang na bolon. Binsar do sada panondang di
angka na mangingani tano linggoman ni hamatean.
9:5 Ai nunga tubu di hita sada posoposo dilehon tu hita sada
Anak, pampe tu abarana do sogot harajaon,jala bahenonna
goarna: Sipartahi Halongangan, siulubalang ni Debata,
Ama saleleng ni lelengna, Raja ni hadameon.

LITURGI IV(JanjiTentang Kedatangan Juruselamat)

3. ( Jesaya 60 : 1 – 3 )

60:1 Hehe ma ho! Marsinondang ma ho! Ai na ro ma

panondangmu, jala hamuliaon ni Jahowa binsar diatasmu.
60:2 Ai ida ma, haholomon do manghungkupi tano on, jala
hagolapon angka bangso; alai na binsar ne ma Jahowa di
atasmu, jala marsinondang hamuliaonna di atasmu.
60:3 Jadi dapothonon ni angka bangso parbegu ma panondangmu
panondangmu dohot angka raja mandapothon sinondang
naung binsar di ho.
LITURGI IV(Janji Tentang Kedatangan Juruselamat)
4. ( Jesaya 61 : 1 – 2 )

61:1 Songgop do tu ahu tondi ni Tuhan Jahowa, ala naung

miniahan ni Jahowa ahu mamaritahon barita na uli tu halak
na dangol, marsuru ahu pauliuli halak parroha na bojok,
maningtingkon haluaon tu halak na tarhurung dohot tu
halak na tarrante buha ni hurungan.
61:2 Maningtingkon taon parasinirohaon sian Jahowa,
dohot ari partubolan ni Debatanta mangapuli
saluhut halak na marsak roha.

LITURGI IV(Janji Tentang Kedatangan Juruselamat)

5. ( Jesaya 5 : 3 – 4 )

5:3 Antong hamu isi ni Jerusalem, jala hamu baoa sian Juda, ua
uhum hamu ahu dohot porlak anggurhu.
5:4 Tung aha dope sibahenon nian tu porlak anggurhu, na so
hubahen tusi? Boasa sai hupaimaima parbuehononna
parbue na tonggi, hape na asom do diparbuehon.
LITURGI IV(Janji Tentang Kedatangan Juruselamat)
6. ( Mika 5 : 1 – 3 )

5:1 Alai anggo ho, ale Betlehem Eprata, mametmethu do ho nian

anggo tung pola jujuron tu angka huta marriburibu di
Juda; hape sian ho do haroroan ni na gabe panggomgomi
di Israel, jala angka sian na nahinan, sian angka ari na robi
salelenglelengna.
5:2 Dibahen i pasahatonna ma nasida sahat ro di tingki
pangintubuan ni na manubuhon, jala mulak pasipasi ni angka
hahaanggina tu angka anak ni Israel.
5:3 Alai jongjong anggo ibana, jala marmahan mangasahon gogo
ni Jahowa, marhitehite hamuliaon ni goar ni Jahowa
Debatana; jadi maringan ma nasida, ai timbul ma ibana disi
ro di angka ujung ni tano on.

LITURGI IV(Janji Tentang Kedatangan Juruselamat)

7. ( Jesaya 7 : 14 )

7:14 Dibahen i apala Tuhan i sandiri ma mangalehon sada tanda

di hamu: Ida ma, gabegabean ma sada namarbaju, jala
tumubuhon sada anak, jala bahenonna ma goarna:
Immanuel.
LITURGI V (Kelahiran Juruselamat)

1. ( Lukas 2 : 1 – 5 )

2:1 Dung i ro ma uju i parenta sian Kesar Augustus, ingkon

suratan nasa jolma di gomgomanna.
2:2 Pamilangon parjolo ma i, uju digomgomi si Kirenius tano Siria.
2:3 Jadi borhat ma sasude, asa disurati, ganup tu bona ni
pinasana.
2:4 Borhat ma nang si Josep, na sian Galilea, sian Nasaret,
nangkok tu luat Judea, tu huta ni si Daud, na margoar
Betlehem, ala sian pomparan jala marga ni si Daud ibana,
2:5 pasurathon dirina rap dohot si Maria, oroanna i, naung
gabegabean.

LITURGI V (Kelahiran Juruselamat)

2. ( Lukas 2 : 6 – 9 )

2:6 Jadi di na disini nasida, gok ma ari ni hangoluanna.

2:7 Ditubuhon ma anak buhabajuna, diborhos ma, dipeakkon
ma tu bagasan panggagatan, ala so adong inganan na
asing di parmianannasida.
2:8 Jadi adong ma marborngin di ladang na disini angka
parmahan, mangingani pinahannasida.
2:9 Jadi didapothon sada surusuruan ma nasida, jala
marsinondang ma sangap ni Tuhan i humaliang nasida, gabe
mabiar situtu ma.
LITURGI V (Kelahiran Juruselamat)
3. ( Lukas 2 : 10 – 12 )
2:10 Alai didok surusuruan i ma tu nasida: Unang mabiar hamu;
ai barita halalas ni roha godang do huboan tu hamuna,
parsaulian ni sandok bangso i.
2:11 Ai naung tubu do di hamu saborngin on, di huta ni si Daud,
Sipalua i, i ma Kristus, Tuhan i!
2:12 On ma partinandaan di hamu: posoposo do dapotonmuna,
Na binorhos peak di panggagatan.

LITURGI V (Kelahiran Juruselamat)

4. ( Lukas 2 : 13 – 15 )

2:13 Jala tompu ma adong dongan ni surusuruan i torop angka

parangan parbanua ginjang, dipuji nasida do Debata,
mandok:
2:14 Hasangapon ma di Debata di ginjang, dame ma di tano on,
di angka jolma halomoan i.
2:15 Jala di na laho i angka surusuruan i sian nasida dompak
ginjang, masipandohan ma angka parmahan i: Beta ma hita
tu Betlehem, taida ma na masa on, na pinabotohon ni Tuhan
i tu hita!
LITURGI V (Kelahiran Juruselamat)
5. ( Lukas 2 : 16 – 18 )

2:16 Jadi hatop ma nasida laho tusi, gabe jumpangsa si Maria

dohot si Josep dohot Posoposo i, na peak di panggagatan i.
2:17 Asa dung diida, dibaritahon nasida ma boaboa, naung
dihatahon tu nasida taringot tu Dakdanak i.
2:18 Jadi sude na umbegesa, longang be do siala na hinatahon ni
angka parmahan i tu nasida

LITURGI V (Kelahiran Juruselamat)

6. ( Lukas 2 : 19 – 20 )

2:19 Ia si Maria, dipeop do hata i sudena jala dipahusorhusor di

bagasan rohana.
2:20 Mulak do angka parmahan i, dipasangap jala dipapujipuji do
Debata ala ni sasude na binege jala na niidanasida, songon
naung dihatahon i tu nasida.
LITURGI V (Kelahiran Juruselamat)
7. ( Mateus 2 : 1 – 2 )

2:1 Asa dung tubu Jesus di huta Betlehem, di luat Judea, uju
hinarajahon ni si Herodes, ro ma angka parhapistaran sian
purba tu huta Jerusalem,
2:2 angka ninna ma: Didia do Raja na imbaru tubu i? Naung
huida hami do bintangna di tano habinsaran; ala ni i ro do
hami sumomba Ibana!

LITURGI V (Kelahiran Juruselamat)

8. ( Mateus 2 : 3 – 5 )

2:3 Alai disi dibege raja Herodes hata i, tarsonggot ma ibana ro

di sude pangisi ni huta Jerusalem.
2:4 Jadi dipapungu ma angka sintua ni malim ro di sibotosurat
ni bangso i, dipamanat ma tu nasida huta hatubuan ni
Kristus i.
2:5 Jadi didok nasida ma tu ibana: Huta Betlehem na di luat
Judea do, ai songon on do pandok ni panurirang i:
LITURGI V (Kelahiran Juruselamat)

9. ( Mateus 2 : 6 – 8 )

2:6 “Ia ho, huta Betlehem, apala tung na ummetmet ho di

tongatonga ni angka huta na di luat Judea, ai ho do huta
haroroan ni Raja i, na marmahan Israel, bangsongki!”
2:7 Dung i marhusip ma si Herodes manjou angka
parhapistaran i tu jolona disihirsihiri ma tu nasida
lelengna, dung tarida bintang i.
2:8 Dung i disuru ma nasida tu huta Betlehem, ninna ma:
Laho ma hamu, tangkas ma diori hamu Dakdanak i! Ia dung
jumpang, paboa hamu ma tu ahu, asa dohot ahu ro
marsomba tu Ibana.

LITURGI V (Kelahiran Juruselamat)

10.( Mateus 2 : 9 – 11 )

2:9 Asa dung dibege nasida hata ni raja i, laho ma nasida. Anggo
bintang i, naung niidanasida hian di tano habinsaran i, sai di
ginjangnasida do muse, rasirasa sahat tingkos di ginjang ni
inganan ni Dakdanak i.
2:10 Marnida bintang i, mansai las situtu ma rohanasida.
2:11 Laos dibongoti ma bagas i, gabe diida ma Dakdanak i dohot
si Maria, inana i. Dung i manungkap ma nasida marsomba
tu Dakdanak i, dirungkari ma artanasida: Sere, haminjon
dohot angka na angur, parsombanasida tu Ibana.