Pulang Anting
(Al-Ustadz H. Ma Mun Bahiruts Tsawab)
Lyrik: Dari Syiir Para Wali
Terjemahan Putra Putu Pangeran
Parung Cianjur
Pulang anting – Pulang anting
Ti beurang reujeung ti peuting
Ti beurang ngagidig ngencling
Peuting indit ngagilincing
Mapay jagat sakuriling
Atawa hirup teh cicing
Geunah manah henang hening
Teu aya pisan kapusing
Reff :
Datang ajal mapag umur
Terusna digotong batur
Mawa awak ngan sakujur
Asupna ka jero kubur
Cing sebut saha nu iwal
Anu teu keuna ku ajal
Cing saha nu dipigusti
Anu teu keuna ku pati
Anging dzat nu maha agung
Anu langgeng taya tungtung
Nu wujud teu keuna suwung
Alloh nu maha agung
Lailahaillalloh - Lailahaillalloh
Muhammadur Rosululloh
Luhur kuta gede dunya
Hirup jadi raja kaya
Dihormat ku balarea
Ku deungeun jeung ku baraya
Atawa pinuh ku elmu
Jeung ulung dina panemu
Amal sholeh pada timu
Budi pekertina nyemu…Reff
Kasep tandang peretentang
Gebeg kerenceng jeung tampang
Gandang ginding tambah tandang
Ku balarea dipandang
Jangkung leutik budi manis
Nu kasebut istri geulis
Andalemi awis-awis
Mingit diri tapi laris…Reff
Bedegul bade aduan
Bosongot bade amprotan
Budi Hangit katungian
Sora cowong handaruan
Cewe jumenil jalingkak
Agul dumeh boga kotak
Seuri centil balakatak
Budi pekertina ruksak…Reff
Hirup gumede takabur
Ieu aing pinter masyhur
Datangna ka lingkung lembur
Gawena ngadukeun batur
Carita ngabuih sombong
Harus cara lodong kosong
Ceuk nu bodo sora meong
Padahal mah meong lemong…Reff
Cing saha nu rek maturan
Jeung saha nu rek nulungan
Hirup di kubur sorangan
Pajauh jeung babaturan
Harta banda - Pamajikan
Anak incu ditinggalkeun
Jauh reujeung sandang pangan
Sedeng henteu bebekelan
Reff :
Ari anu rek maturan
Eta amal perbuatan
Mun soleh eta ganjaran
Mun goreng eta siksaan
Coba kumaha rasana
Upama soleh amalna
Reujeung kumaha rasana
Upama goreng amalna
Lailahaillalloh – Lailahaillalloh
Muhammadur Rosululloh