HOLY WEEK READINGS

LIVE: ING DOMINGO NING PAMAYLASA NING GINU (DOMINGO DE RAMOS) |

Marso 28, 2021

1st: Isaias 50: 4-7

Tiru na ku ning GINUNG Dios nung nanu ing sukat kung sabyan,
Ban apasiknangan ku la ring mibabayatnan.
Dirinan na kung sikanan balang abak ban pakiramdaman itang ituru na kanaku.
Dirinan na kung pamanalastas ning
GINU at e ku linaban o ginulut keya.
Inarap ke ing gulut ku karetang mamatbat kanaku.
E ku la inambanganan inyang inumis da ku, inyang sepulyut do ring balbas ku at
pigluran ing lupa ku.
Dapot ing insultu ra e na ku ananu balang, uling ing GINUNG Dios ya ing kanaku babye
kasaupan.
Siniknangan ku ing lub ku ban apibata ku la. Balu ku king e ku milako dangalan.

DALIT: Dalit 22: 7-8, 16-17a, 18-19, 22-23b

"Dios ko, Dios ko, bakit pepayimburisan mu ku?"

2nd: Filipos 2: 6-11

Bagayan yu ing pamisip nang Kristo:
Bista man atyu keya ing panga-Dios makanyan man e na pinilit ing makipante king
Dios.
Bagkus linubas na ing keyang sarili king sablang kamalan; mekiwangis ya karing tau at
kinwa na ing aske ning metang a alipan.
At king pamakiwangis na karing tau, migpakumbaba yang maygit karing sabla at
meging pamamintu ya angga king kamatayan. angga man king kamatayan king krus.
Uli nita, ing Dios naman pepaygit neng e mu nanu at dininan neng lagyung mimigit
karing sablang lagyu.
Inya king lagyu nang Jesus, sukat lang siklaud ding sabla,
ding karin banwa, ding keti king yatu at ding king lalam na ning yatu.
At ding sabla sukat dang ipasyag king y Jesu-Kristo ya ing Ginu, king ikaligaya ning
Dios lbpa.

E: Marcos 14:1-15:47
N- Adwa na mung aldo at Piyesta na na ning Paskwa at ning Tinape Alang Lebadura.
Ding pamuntuk da ring saserdote at ding eskriba manintun lang paralan ban lihim deng
aparakap at apapate y Jesus. Ngara,
C -"E ta daraptan iti king aldo ning piyesta, magkang magulu Ia ring tau. "
N- Atyu kanita karin Betania y Jesus, king bale nang Simon a leproswan. Kabang
mamangan ya, dinatang ya ing metung a babaying magdalang metung a alabastrong
lulanan mitmung mal a pabanglu; dalise laru a ibat king tanaman a nardo. Biklat ne ing
alabastrong lulanan at tigtug na ing pabanglu king buntuk nang Jesus. Mimua Ia ring
mapilan a atyu karin at ngarang misabi-sabi,
C- "Sinayang na mu ing pabanglu. Nung pisali na yan, mika abli yang maygit atlung
dalan a denaryu, at ding ayabli na malyari nong ayibye karing pakakalulu. "
N- At migsalita lang e ustu king babayi. Dapot nganang Jesus karela,
J- Paburen ye! Bakit pakyalaman ye? Mayap ing depatan na kanaku. Maralas
akakayabe yu Ia ring pakakalulu, at araptanan yu lang mayap nanu mang oras a buri
yu. Dapot e yu ku malyaring akayabe kabang-kaba. niting babayi ing agyu na; e pa man
kiskusan na na kung pabanglu ban isadya ne ing katawan ku para king pangakutkut ku.
Tandanan yu iti: nu karin ya man mipanaral ing Mayap a Balita mabanggit munaman ing
depatan na niting babayi bilang kapigaganakan keya."
N- Kaybat na nita, y Judas iscariote, ing metung karing labing adwa, minta ya karing
pamuntuk ding saserdote ba neng ipanganyaya y Jesus. Tutu lang metula inyang
damdaman da iti at pengakuwanan deng dinan salapi. Manibat kanita menintun neng
paralan y Judas ban apanganyaya ne y Jesus.
King mumuna nang aldo ning Piyesta ning Tinape Alang Lebadura, aldo ning
pamakamate biserung tupa para king Paskwa, kitnan de y Jesus ding alagad,
C- "Nu karin mu buring isadya mi ing apunan para king Paskwa?"
N- Tiburan na lang Jesus ding adwa karing keyang alagad kambe na niting panabilin:
J-"Munta kayu king siyudad. Salubungan na kayu karin ning metung a taung magdalang
bangang danum. Tukyan ye king bale salangyan na, at sabyan yu king makibale,
'Pakutang na ning Maestro: nu ya karin ing kuarto a pipanganan mi ring kanakung
alagad king apunan ning Paskwa?' At ituru ne kekayu ing malwalas a kuarto babo,
maka-ayus ya at kumpleto gamit. Karin yu isadya ing apunan tamu."
N- Meko Ia ring alagad at minta Ia king siyudad, at ikit da ing sablang lerawan nang
Jesus karela. At sidya ra ing apunan na ning Paskwa.
Inyang bengi na, dinatang ya y Jesus, kayabe na Ia ring labing adwang alagad. At
kabang mamangan la, nganang migsalita,
J-"Ing katutwan sasabyan ku kekayu: ing metung kekayung kayabe kung mamangan
pagtaksilan na ku."
N- Melungkut ya ing metung at metung karela at kitnan de:
O- "Ako?"
N- Mekibat ya y Jesus,
J - "Metung ya kekayung labing adwa at kayabe ke mang titiltil tinape king sityo. Mate
ya ing Anak ning Tau agpang king misulat; dapot makalunus ya itang taung keya!
Mayap pa para keya ing e ne mibayit!"
N- Kabang mamangan la, kinangwa yang tinape y Jesus, pepasalamat ya king Dios.
Pemirasu ne ing tinape at binye ne karing keyang alagad. Ngana,
J - "Tanggapan ye iti; iti ya ing kanakung katawan."
N- Kaybat na nita, kinwa ne ing kopa, at pepasalamat ya king Dios. Binye ne ing kopa
karela at minum la ngan. Sinabi nang Jesus karela.
J- "Iti ya ing kanakung daya, ing daya na ning kasunduan, ing dayang mibubu para
karing dakal tau. Ing katutwan sasabyan ku kekayu. e na ku pasibayung minum kaniting
alak angga king aldo a inuman ku ing bayung alak king Kayarian na ning Dios."
N- At kaybat deng kinta ing metung a dalit, minta la king Bunduk da ring Olibo nganang
Jesus karela,
J- "Ikayu ngan payinggulutan yu ku, uling iti ya ing sasabyan ning kasulatan, 'Paten ke
ing pastul, at misalbag la ring tupa. Dapot kaybat kung sinubling mebie, muna kung
magbalik kekayu karin Galilea."
N- Nganang Pedro keya,
O- Payinggulutan da ka man ding sabla, aku e ra ka payinggulutan”
N- Nganang Jesus keya,
J - ”Pedro, pakatandanan mu ini, ngeni mu ring benging iti makatatlu mu ku ilingad bayu
ya tulauk makatadwa ing tatyo.”
N-Matimid nang sinabing Pedro,
O-"E ra ka ilingad agyang misan da ku paten kayabe mu!”
N- Makanyan ngan ing sinabi ra keya.
Miras la king Iugal a ausan dang Getsemani. Nganang Jesus karing keyang alagad,
J - Lukluk kayu pa ken kabang manalangin ku.”
N- Dapot tiki na la ri Pedro; Santiago at Juan. At migmula yang mebalisa at migkasakit
a pilub-luban. Sinabi na karela,
J -”Saskup ku salu uling mabayat ing panandaman ku malakwan ko ken at magbante
kayu."
N- Sinulung ya pang ditak at saka ya menalangin makasakab king gabun king e sa
daratang ing oras ning kasakitan na. Ngana,
J ”lbpa, o lbpa ko, ing sabla arapat mu. Idayu me kaku ing kasakitan a iti. Dapot aliwa
ing kaburyan ku, nune ing kekang kaburyan ya ing mipamintwan.”
N- Kaybat na nita, migbalik ya at disnan na lang matudtud ding atlung alagad, Ngana
kang Pedro,
J - ”Simon, matudtud ka? E mu arapat ing e ka matudtud metung mu mang oras?
Magpuyat kayu.”
N- Ngana karela,
J- ”At manalangin ban e na kayu dayigan ning tuksu. Ing espiritu makasadya ya, dapot
ing laman mayna ya.”
N-Pasibayu na lang likwan at menalangin ya, At inulit na ing kayadwanan na. Belikan
na Ia ring alagad na at disnan namang matud-tud, uling pilit lang mipipyak ding mata ra.
E ra balu nung nanu ing sabyan da keya. King katlung pamag-balik na, sinabi na karela,
J-"Angga ngeni matudtud ko pa at magpaynawa? Migising na kayu! Dinatang na ing
oras! Ing Anak ning Tau miyabie ne karing gamat da ring makasalanan. Mibangun na
kayu, at tara na. Oyni na ing magtaksil kanaku!"
N-Magsalita ya pa y Jesus inyang y Judas, ing metung karing labing adwang alagad,
dinatang ya; kayabe no ring dakal a taung magdalang espada at palupalu. Deti tubud
lang ibat karing pamuntuk da ring sasedote, karing eskriba, at karing makatwa ning
balen. Minye yang senyas ing taksil karela:
O-"Itang uman ku ya ing kekayung kaylangan. Dakpan ye at ituki, dapot banten yeng
miyamasamas.
N-Karas nang Judas agad neng lepitan y Jesus at ngana,
O-"Maestro!"
N- At inuma ne. Inya dekapan de y Jesus at telanan deng matalik. Ing metung karetang
atyu karin begut ne ing espada na at tebak ne ing ipus ning matas a saserdote at
atigpas ne balugbug. At nganang Jesus karela,
J- "Tulisan ku wari? Kaylangan pa wari ing datang kayung paka espada at paka
palupalu para dakpan yu ku? Tuturu ku aldo-aldo king Templo at atyu kayu naman
karin, dapot e yu ku dekapan. Dapot kaylangan ping matupad ing sasabyan da ring
kasulatan!"
N- Likwan de ring alagad na; at tinakas Ia ngan.
At tikyan ne ning metung a bayintaung makabalabal mung linen. Dekapan diya naman,
dapot meka kalabyus ya at milayi yang lubas, melakwan ya king gamat da ing balabal
na.
N-At dela re y Jesus king bale ning Matas a Saserdote. Karin Ia makatipun ding sablang
pamuntuk ding saserdote, ding makatwa ning balen, at ding eskriba. Tikyan neng Pedro
y Jesus, dapot makarayung bagya. Tinaglus ya angga king patio ning bale ning Matas a
Saserdote. Linukluk ya karin y Pedro lele ning dapug at migsalab yang kayabe ra ding
guardya. Pilit lang manintun ebidensya ring Pamuntuk da ring Saserdote at ing
kabilugan a Sanhedrin laban kang Jesus ba reng apapate. Dapot ala lang ikit nanu
man. Dakal lang saksi ring memingawang patutu laban keya, dapot e
miyagpangagpang ing karelang deklarasyun.
Ating mapilan a saksi laban keya at ngarang migsalitang kalaraman,
C- "Dimdam ming sinabi na, 'Lasakan ke iting templong gewang tau, at kilub da ring
atlung aldo mitalakad kung aliwa a e ra gawa ring tau!"'
N- Makanyan man, e mu rin miyagpangagpang ing karelang patutu.
Tinalakad ya ing Matas a Saserdote king arapan ning kapulungan, at kitnan ne y Jesus,
O-"Nanu ing asabi mu king bibintang da keka? Baket e ka makibat?"
N- E bitasang mekibat y Jesus; menatili yang alang bulad. Nganang kinutang pasibayu
ning Matas a Saserdote,
O- "lka ing Kristo, ing Anak ning Dios?"
N- Nganang mekibat Jesus,
J - "Aku pin. At ikayu akit ye ing Anak ning Tau a makaluk-luk king dane nang wanan
ning Mayupaya. Akit yeng daratang kayabe da ring biga banwa!"
N- Ginabak ning Matas a Saserdote ing sarili nang imalan, at ngana,
O-"Nanan ta la pa ring saksi! Ikayu mismu dimdam yu ing kalapastanganan na king
Dios. Nanu ing desisyun yu?"
N-At ding mapilan pigluran de, tikpan de lupa at penumbuk.
C-"Ulan mu na mo nung ninu ing menumbuk keka?"
N- Ngarang sinabi keya. At penampaling de ring guardya.
N-Atyu pa lalam y Pedro, king patio, inyang dinatang ya ing metung karing ipus ning
Matas e Saserdote. Panakit ning babaying ita kang Pedro a magsalab king dapug,
linawe neng maratna.
O-"Ika man,"
N- Ngana kang Pedro,
O-"Kayabe na kang Jesus a tubu Nazaret!"
N- Dapot pepayalian nang Pedro iti.
O- "E ku balu, ni e ku ayintindyan ing buri mung sabyan,"
N- Nganang mekibat. At minta ya king pasilyung palual king pasbul banda king pasbul
dalan. (at tinulauk ya ing tatyo). Ikit ne naman ning ipus a babayi at sinabi na
karetang atyu karin,
O-"Ing taung iti metung ya karela!"
N- Dapot pepayalian na namang Pedro iti.
Kalabas ning mapilan a penandit, ding taung atyu karin sinabi ra naman kang Pedro,
C- "Talagang metung ka karela, uling tau ka naman Galilea. "
N-Sinumpa ya y Pedro,
O-"Talagang e ke akikilala ing taung yan!"
N-Kanita neman tinulauk kadwa ing manuk at aganaka nang Pedro ing sinabi nang
Jesus keya, "llingad mu kung makatatlung ulit bayu ya makatadwang tulauk ing tatyo."
At menangis ya.
N- Kabukasan, abak a maranun, mipulung Ia ring pamuntuk ding saserdote; ding
makatwa ning balen, at ing kabilugan a Sanhedrin. Pepagapus de y Jesus at dela re
kang Pilato.
O-"lka pin ing Ari ring Judio?"
N- Nganang kinutang keyang Pilato
J - "Ika mismu sasabyan mu,"
N- Ngana namang mekibat Jesus.
Dakal ing sumbung a inarap da ring Pamuntuk ding Saserdote laban kang Jesus, inya
kitnan neng pasibayung Pilato,
O- "Ala kang ipakibat karela? Lawan mu, tutu lang dakal a susumbung laban keka!"
N- Dapot e bitasang mekibat y Jesus, inya mengapamulala ya y Pilato.
Balang daratang ing Piyesta ning Paskwa, y Pilato mibubulus yang metung a preso,
ninumang adwan ding tau. Makasukul ya kanita ing metung a lalaking ausan dang
Barabas, kayabe re ding aliwang rebeldeng mekamate tau king milabas a rebulusyun.
Linapit Ia ring tau at inawad da kang Pilato king daptan na na ing sadya nano pamibulus
metung a preso. Kitang na karela,
O "Buri yeng ibulus ku ing Ari da ring Judio?"
N-Dapot ding pamuntuk da ring saserdote sitsutan da Ia ring tau ban adwan da king y
Barabas yang ipabulus na. Nganang Pilato,
O-"Nung makanyan, nanu ing daptan ku kaniting ausan yung Ari da ring Judio?"
C - "Ipaku ya king krus!"
N- Ngarang kinulisak ding dakal a tau.
O-"Baket, nanung pamikasalang depat na?"
N- Nganang kinutang Pilato,
Lalu rang pekasikan ing kulisak,
O-"Ipaku ya king krus!"
N- King kapagnasan nang apamatulan nong Pilato ring tau, pepabulus ne y Barabas;
pepabarug neng latiku y Jesus at kaybat binye ne karela ban ipaku re king krus.
N- Dela re ring sundalus y Jesus king patio kilub ning pretoryu (ing palasyung
tuknangan ning gobernador), at inaus da Ia ring abe rang sundalus. Belabalan de y
Jesus king metung a malutung imalan; ginawa lang koronang suksuk at pinutung de
keya. Pisunu-sunu reng sasaludwan ngara,
C-"Luid ya ing Ari da ring Judio!"
N-Pemukpuk de buntuk king kapirasung timbu, pigluran de, siniklaud Ia arapan na, at
pisunu-sunu reng pupugayan. Kaybat deng gewang pikailyan; likas de keya ing
pepasulud dang malutung imalan at sinulud deng pasibayu keya ing sarili nang imalan.
N- Kaybat, linwal de ban ipaku king krus.
Ating metung a lalaking lalabas ibat king baryu. Pinilit de ring sundalus ban papusan
keya ing krus nang Jesus. Simon ing lagyu na; tau ya Cirene, tata re di Alejandro at
Rufo. at dela re y Jesus king lugal a ausan dang Golgota - ing kabaldugan na "lugal
ning bungu "
N- Dininan deng alak a semutanan mira, dapot e na ininum. Pinaku re king krus at
pirakerake ra ding sundalus ing keyang imalan. Mipagsapalaran Ia ban abalu ra nung
isanung dake ing mangayintulid king balang metung. Alas nuebe na ning abak anyang
ipaku re king krus. Sinulat de babo ning krus ing dalum laban keya: "Ing Ari ring Judio."
Kayagnan na lang mipakung Jesus ding adwang tulisan, ing metung king banda nang
wanan at ing metung king banda nang kayli. (Makanyan yang metupad ing sasabyan
ning kasulatan: "Binilang de karing kriminal. ")
Piglibak de ring Ialabas at pipiling-piling do ring buntuk da, ngara,
C-"Aha! Ika ing makalasak king templo at italakad me kilub ding atlung aldo? Iligtas mu
ngeni ing sarili mu! Kuldas ka keng krus!"
N- Pituya-tuya riya naman ding pamuntuk ding saserdote at ding eskriba. Ngara king
metung at metung,
C-"Linigtas na Ia ring aliwa, dapot e na aligtas ing sarili na! Paburen yeng kuldas ngeni
king krus ing Kristo, ing Ari ning Israel! Nung akit mi yang kuldas maniwala ke keya. "
N- Libakan diya naman ding tulisan a makapaku mingatba keya.
N- At meralumdum king mabilug a labwad manibat king kaugtuan aldo anggang alas
tres ning gatpanapun. Inyang alas tres na, kinulisak ya y Jesus, ngana,
J - "Eloi, Eloi, lema sabachthani?"
N- Ngana wari, "Dios ko, Dios ko, baket pepaimburisan mu ku?"
Dimdam de ring mapilan a taung atyu karin, ngara,
C-"Lawan yu, ausan ne y Elias!"
N- Milayi ya ing metung karela, sinoso neng aslam ing metung a espongha at tinali ne
king punta ning metung a timbu ban pasipsip ne kang Jesus. At nganang sinabi,
O- "Lawan tamu nung tipa ya pin y Elias ba neng ikuldas!"
N- At kinulisak yang masikan y Jesus at mepatad ya inawa.
Megabak ya ing tabing ning Templo manibat babo angga lalam. Panakit na ning kapitan
ding sundalus a makatalakad tulid ning krus nung makananu yang mepatlud a inawa y
Jesus, sinabi na,
O- "Tune ping ing taung iti Anak ne ning Dios!"
N-Ating mapilan a babayi a magumasid king marayu. Kayabe ya kareti y Maria
Magdalena, y Salome, at y Mariang Ima ra di Santiagong anak at Jose. Deti tikyan de at
siywan y Jesus inyang atyu Galilea; at atilu naman karin ding aliwa pang babayi a tinuki
keya king Jerusalem.
N- Inyang mabibengi na dinatang ya y Jose a tau Arimatea. Metung yang gagalangan a
miyembru ning Sanhedrin a manaya king panyatang ning Kayarian ning Dios. Uling aldo
na kanita ning Pamegsadya, (ngana wari, aldo bayu ing Sabbath) migmasikan yang lub
mekikit kang Pilato at pekisabi ne keya ing bangke nang Jesus. Mipamulala ya y Pilato
inyang damdaman nang mete ne y Jesus. Pepayaus neng Pilato ing kapitan at kitang
na keya nung mete ne pin y Jesus. Inyang sinabi ning kapitan ing mete ne pin y Jesus,
tinulut neng Pilato ing bangke kang Jose at sinali yang telang linen kang Jose para
pamalut king bangke. Inyang akuldas na ne ing bangke, binalut ne king tela at binili ne
king metung a kutkutan a linukib king batu. Kaybat na nita, peparulang ne ing maragul a
batu king pasbul ning kut-kutan. Magumasid Ia ri Maria Magdalena at y Mariang ima
nang Jose, at ikit de ing lugal a nung nu ya mikut-kut y Jesus.

PDM
"Ginu, pakayapan me ing kekang balayan."

LIVE: LUNES SANTO | Marso 29, 2021

1st: Isaias 42:1-7
Nganang sasabi ning Ginu, “Oyni ing kakung talasuyung kakung pasiknangan; ya ing
kakung pinili at bina kung matula. Kitmuan ke king kakung upaya at king balang bansa
idala na ing hustisia. Eya kulisak o itas man ing siwala na o magsalitang masikan king
dalan. Ing mebalbal a timbu e ne pakliyan, at ing undap- undap a sulu e ne patdan;
karing sabla ibie ne ing hustisya king yatu. Ing turu na panayan da ring bansang atyu
king marayu.
Lelangan na la ning Dios ding banwa at layun lid-lad na; inubug ne ing yatu at ding
sablang bage karin mabibie; dininan na lang bie at pangsinawa ring sablang tau. At
ngeni ing Ginung Dios sasabyan na king talasuyu na “Aku ing Ginu, ing minaus at
minye upaya keka ban kekang pagsikapan king yatu matupad ing hustisya.
Kapamilatan mu gawa kung kasunduan karing sablang tau; king kapamilatan mu karing
bansa sala ibie ku. Ding mata da ring bulag keka lang ibuklat at ibulus ding atyu
pakalukluk karing sukulan a maralumdum.

DALIT: Dalit 27: 1,2,3, 13-14 Pak-1

“Ing Ginu ya ing kakung sulu at kaligtasan.”

E: JUAN 12: 1-11

Anam a aldo bayu ing Piyesta ning Pamaglagpus, minta ya y Jesus Betania, ing balen
ng Lazaro a pepasublian nang mebie. Pigsadya reng apunan karin. Sinaup yang
migsilbi y Marta at metung ya y Lazaro karing kasalu nang Jesus king lamesa. Y Maria
naman kinangwa yang kapitnang litrung mal a pabanglu purung nardo. Kiskusan ne
bitis y Jesus at pinulis nala deti king buak na. Sinalingal-ngal ing banglu king kabilugan
a bale.
Dapot y Judas Iscariote, ing metung karing alagad nang Jesus, itang magtaksil keya,
sinabi na, “Bakit e mipisaling atlung dalan a salaping pilak iting pabanglu at mipamye la
sa ring abli karing pakakalulu?” Sinabi na iti e uling atin yang malasakit karing
pakakalulu, nune uling mapanako ya; ya ing tesorero da at kukupit ya karing salaping
ingatan na. Dapot nganang Jesus, “E ye pakyalaman! Paburen yung daptan na iti para
king aldo na ning kanakung pangakutkut. Kayabe yula kabang panaun ding pakakalulu,
dapot e kabang panaun ing kayabe yu ku.”
Abalitan da ring dakal a Judio king atyu ya Betania y Jesus, inya minta la karin, e mu
king uli na, nune ban akit diya naman y Lazaro a pepasublyan nang mebie. Binalak da
ring pamuntuk ding pari king papate riya naman y Lazaro uling king uli na dakal la ring
Judiong kakawani karela at maniwala kang Jesus.

PDM
“Ganakan mu kami Ginu, king kekang kayarian.”
LIVE: MARTES SANTO | Marso 30, 2021

1st: Isaias 49: 1-6

Makiramdam kayu kanaku, ikong bansang marayu, ikong taung manuknangan king
marayu! Bayu ku pa mibayit, pinili na na ku ning Ginu at tildwan maging keyang
talasuyu. Gewa na kung anti ing paslu, matilusa at makasadyang mibugnus. Ngana
kaku “Israel, ika ing kakung talasuyu; uli mu, puryan da ku ring tau.”
Mekibat ku, “Megobra ku, dapot meging alang kabaldugan! Gisan ku ing kakung
sikanan, dapot ala kung arapat nanuman.” Makanyan man, ing Ginu kaku yang
apanaligan; ipagdipensa nang kakung daraptan at dinan na kung ablas king kakung
gawan.
Bayu ku pa mibait, tildwan na na ku ning Ginu; gewa na kung talasuyu na ban ibalik ku
la ring taung pinili na, ban ibalik ku la ring mikalat nang memalen ning Israel. Ing Ginu
yang kaku babye dangalan; ya ing panibatan ning kakung sikanan.
Ngana kaku ning Ginu, “ Kakung talasuyu atin kung mas maragul a paobra keka; e mu
ing ibalik mu ing dangalan ding mitagan a memalen ning Israel, nune gawan da ka
namang sulu para karing sablang bansa, ban ing mabilug a yatu miligtas ya.”

DALIT: Dalit 71: 1-2, 3-4, 5-6, 15. 17 Pak- 15

"Idalit ku ing pigkalub mung kaligtasan."

E: Juan 13: 21- 33, 36-38

King panaun a ita, melingasngas ya pilubluban y Jesus at nganang migtapat,
“Ing katutwan sasabyan ku kekayu: pagtaksilan na ku ning metumg kekayu.”
Mipaglalawe la ring alagad at e ra balu nung ninu ing amanwan na. Makahilig yang
malapit kang Jesus ing pakamalan nang dili karing alagad na. Sininyalan neng Simon
Pedro at ngana, “ Ikutang mu na mo keya nung ninu ing amanwan na?”
Inya linapit ya kang Jesus at kitang na, “Ginu, ninu ing amanwan mu?” Pekibat nang
Jesus “Isoso ke ing tinape at ing dinan ku kaniti, ya pin ita.” At niyang asoso ne ing
tinape, inabut ne kang Judas, ing anak nang Simon Iscariote. Inyang atanggap na neng
Judas ing tinape, linub ya keya y Satanas. Nganang Jesus “Daptan mu nang agad ing
sukat mung daptan.” Dapot alang makibalu metung man karing kasulu na nung bakit
sinabi na iti. Uling y Judas ya ing talayingat karing salapi ra, ating minisip king
pasaliwan neng Jesus king kaylangan da para king piyesta o parinan na lang limus ding
pakakalulu.
Inyang apangan na neng Judas ing tinape, agad neng meko. Bengi na kanita. Nganang
Jesus, kalako nang Judas
“Ngeni mipaligayan ne ing Anak ning Tau at king kapamilatan na mipaligayan ya ing
Dios, ing Dios naman paligayan neng agad ing Anak ning Tau. Anak ko, ditak nang
panaun ing akayabe yu ku. Panintunan yu ku dapot sasabyan ku kekayu ngeni itang
sinabi ku karing Judio, ‘E kayu makapunta king puntalan ku.’”
Ngang kinutang Simon Pedro. “Ginu, nu ka munta?”
Mekibat ya y Jesus, “E ka makatuki ngeni kanaku ketang puntalan ku, oneng kaybat
makatuki ka.” Nganang pasibayung kinutang Pedro, “Ginu, obat e ku makatuki keka
ngeni? Idame ku ing bie ku para keka!”
Mekibat ya y Jesus, “ Idame mu ing bie mu kanako? Inga katutwan sasabyan ku keka:
“Alingad mu na kung mekatatlu bayu ya tulauk ing tatyo.”

PDM
“Ginu, pakiramdaman mu ing panalangin mi.”

LIVE: MIYERKULES SANTO | Marso 31, 2021

1st: Isaias 50: 4-9a

Tiru na ku ning Ginung Dios nung nanu ing sukat kung sabyan ban apasiknangan ku la
ring mibabayatnan. Dirinan na kung sikanan balang abak ban itang turu na kaku kakung
pakiramdaman. Dininan nakung pamanalastas ning Ginung Dios at eku linaban o
ginulut king Ginu. Inarap ke ing gulut ku karetang mamatbat kaku. E ku la sebatan
inyang ininsultu da ku inyang sepulyut da ing balbas ku at pigluran ing lupa ku. Dapot
ing insultu ra e na ku a nanu balang, uling ing Ginung Dios yang kaku babye kasaupan.
Siniknangan ku ing lub ku ban apibata ku la. Balu ku king e milako ing kakung
dangalan, uling ing Dios malapit ya at patunayan na king ala kung pamikasala. Ating
masikan a lub bisang mandalum kanako? Paburen yung munta kami king husgadu!
Pabustan yung karin misampang demanda! Ing Ginung Dios ya ing mismung
magdipensa kaku, ninu ngeni ing makapatune king mikasala ku?

DALIT:Dalit 69: 7-9, 20-21, 30, 32-33 Pak-13

“Ginu, uli ning maragul a lugud mu, pakibatan mu ku.”
E: Mateo 26: 14- 25
Kanita ing metung karing labing- adwa, itang milagyuan Judas Iscariote, mekikit ya
karing pamuntuk da ring pari. Nganang kinutang karela, “Nanung ibie yu kanaku nung
saupan da kayung makarakap kang Jesus?” Beyaranan deng atlung pulung salaping
pilak. Manibat na kanita menintun neng oportunidad y Judas ban apagtaksilan ne y
Jesus.
King mumuna nang aldo ning Piyesta ning Tinape alang Lebadura, linapit la ring alagad
nang Jesus at ngarang kinutang, “Nukarin mu buring isadya mi para keka ing Apunan
na ning Pamaglagpus?”
Nganang mekibat karela, “Puntalan ye itang metung a tau king siyudad, at sabyan yu
keya, ‘Ing Maestro sasabyan na ing oras ku miras na. Buri kung pagselebran ing
Pamaglagpus king bale mu a kayabe ring alagad ku.”
Depat da ring alagad ing penabilin nang Jesus karela at sidia ra ing apunan para king
Pamaglagpus.
Inyang mebengi na, linukluk yang mengan y Jesus a kasulu da ring labing- adwa.
Ngang Jesus kabang mamapun la “Ing katutwan sasabyan ku kekayu: pagtaksilan na
ku ning metung metung kekayu.”
Mebalisa la lub ding alagad kaniting sinabi nang Jesus. Ing metung at metung karela
kitang na, “ Gino, ako?”
Mekibat ya y Jesus, “Ing mitiltil king tinape na king pinggan abe ku, ita ya ing magtaksil
kanaku. Arapan na ning Anak ning Tau ing kamatayan na, antimong ing sasabyan ding
kasulatan, dapot makalunus ne itang taung maging kasangkapan na ning pamagtaksil
king Anak ning Tau! Mayap pa ing e ne mibayit!”
Kanita y Judas, ing magtaksil kang Jesus, migsalita ya, “Aku galang ing amanwan mo,
Maestro?”
Mekibat ya y Jesus, “ Ika na mismu ing sinabi.”

PDM
“Ganakan mu kami Ginu, king kekang kayarian.”

LIVE: HUWEBES SANTO (ING MISA NING TAULING APUNAN NING GINU) | Abril
1, 2021

1st: Exodo 12: 1-8, 11-14

Migsalita ya ing Ginu kang Moises at kang Aaron karin bansang Ehipto. Ngana karela,
“Iti ya ing sukat maging mumunang diling bulan ning pabanwa para kekayu. Ipayabut yu
la reting panabilin king kabilugan a balen ning Israel: King kapulung aldo niting bulan
ing balang lalaki mamili yang metung a biserung tupa o kaya biserung kambing para
karing katubale na. Nung tutu yang malati ing pamilya na at e ne agyung gisanan ing
kabilugan a animal, ya ampon ing kasiping nang bale malyari reng pirakayan ing
metung a animal, agpang king bilang da ring tau ampon king agyu nang kanan ning
balang katau. Malyari kayung mamiling metung a tupa o kaya metung a kambing, dapot
kaylangan ing lalaki ya at pabanwa ya tua at ala yang kapansanan. Kaybat sesen yu la
angga king sisilim na ning kalabing apat a aldo ning bulan at paten na la ning mabilug a
balen ning israel deting mesabing animal. Kaylangan lang kumang ditak king daya at
ikaskas da karing amba at babo ring pasbul da ring bale nung nu la mapangan deting
animal. King benging ita sukat minangnang ing laman at mapangan kambe da ring
mangapayit a gule at tinape alang lebadura. Malagwa yeng kanan. Miblas kayu para
king makabang lakaran, makasulud na la ring sandalyas yu at talnan ye king metung a
gamat ing tukud yu. Iti ing pamagselebra king Pamaglagpus bilang parangal kanaku,
ing Ginu. King benging ita, lumabas ku king mabilug a Ehipto; pamaten ku la ring
sabalang anak dang pangane lalaki ring tau at animal; pagpaku ing parusa karing
sablang Dios na ning Ehipto. Aku ing Ginu. Maging palatandanan ya karing pibale-bale
yu ing daya karing amba da ring pasbul. Lalagpasan da kayu potang akit ku ing daya, at
e kayu midame potang pagpa ku ing parusa king bansang Ehipto. Sukat yeng
pagselebran ing aldong iti bilang piyestang parangal king Ginu ban e yu kalingwan ing
depatan ku, ing Ginu. Pagselebran ye king kapilan pa man.”

DALIT: Dalit 116: 12-13, 15-16, 17-18 Pak-1 Cor 10:16

“Ing kopa ning kanwanan metung yang pamisulu-sulu king daya nang Kristo.”

2nd: 1 Corinto 11: 23- 26

Ing turu a binye ku kekayu tinggap ku naman king Ginu: king ing Ginung Jesus,
kanitang benging mipagtaksilan ya, kinwa ne ing tinape, pepasalamat ya king Dios,
pemirasu ne ing tinape at ngana, “Iti ya ing katawan ku a miyain para kekayu. Daptan
yu iti bilang kapigaganakan kanaku.” Anti mu rin, kaybat dang mengan, kinwa ne ing
kopa at ngana, “Iting kopa ya ing bayung kasunduan ning Dios a patibayan na ning
kanakung daya. Balang minum kayu kaniti, daptan yu bilang kapigaganakan kanaku.
Uling balang mangan kayu kaniting tinape at minum kaniting kopa, babalita yu ing
kamatayan ning Ginu angga king datang ya."

E: Juan 13: 1- 15
Besperas na kanita ning Piyesta na ning Pamaglagpus. Balu nang Jesus king dinatang
na ing oras na ban mako ya keti king yatu at mibalik ne king Ibpa. Kaluguran na la ring
bandi na a atyu king yatu at liguran na la angga king kawakasan.
Kasulu na lang Jesus ding alagad na king apunan. Alulan na na ning diablo king isip
nang Judas Iscariote a anak nang Simon ing pamagtaksil kang Jesus. Balu nang Jesus
king ing sablang upaya binye na ning Ibpa keya at king ibat ya king Dios at papunta ya
king Dios. Tinalakad ya y Jesus, likas ne ing piblas na at bebatan na ing sarili na king
tualya. Kaybat, mitugtug yang danum king palanggana at pegumpisan na lang inos a
bitis ding alagad. At pilisan na la king tualyang makababat king kayang awakan.
Nganang Simon Pedro inyang lapitan neng Jesus, “Ginu, ikang manos karing bitis ko?”
Pekibat nang Jesus, “E mu pa ayitindyan ing daraptan ku ngeni, dapot bandang tauli
ayintindyan mu.”
Sinabi nang Pedro, “ E ku la malyaring paos ding bitis ku keka!”
Pekibat nang Jesus, “ Nung e ka paos bitis kanaku, ala kang pangatayid kanaku.”
Sinabi nang Simon Pedro, “Ginu, nung makanyan, e mu ring bitis ku ilang wasan mu
nune pati na ring gamat ku at ing buntuk ku!”
Nganang Jesus keya, “ E ne kaylangan manos ing mindilu na, subali karing bitis na,
uling malinis ne mabilug a katawan. At malinis na kayu, dapot e ikayu ngan.” ( Uling
balu nang Jesus nung ninu ing magtaksil keya; inya sinabi na, “ E ikayu ngan malinis na
kayu.”)
Inyang aos na na la bitis at asulud na nang pasibayu ing piblas na migbalik ya king
lamesa. Nganang kinutang karela, “ Aytindyan yu ing depat ku kekayo? Ausan yu kung
Maestro at Ginu at tinud kayu; uling makanyan ku pin. Nung akung kekayung Ginu at
Maestro inos da kayu bitis, ikayu man sukat kayung mipapanos bitis. Dininan da kayung
alimbawa ban daptan yu naman ing anti ing depat ku kekayu.

PDM
“Ginu, mikakalugud ke sana antimo nung makananu mu keng liguran.”