ACARA PAKELING HUT STT TAINSIAT

Ring dina Saniscara Umanis Wuku Taulu, truna-truni Banjar Tainsiat mapupul di Bale
Banjare, jagi ngwentenang pasangkepan. Sami sampun malinggih di balene, ngantosang
krama pengurus Sekaa Truna Truni Banjar Tainsiat. Sampun jam 7 wengi, krama penguruse
ngawitang pesangkepane. Manggala STT-ne nyanggra para truna-trunine sami.

Gus De : “Om Swastyastu, rahajeng wengi timpal-timpal sareng sami”

Krama STT : “Om Swastyastu”

Gus De : “Punapi gatrane?”

Krama STT : “Becik!” (truna-trunine masaut makasami)

Gus De : “Suksma antuk sapengrauh timpal-timpal sareng sami ring pesangkepan iraga
kadi mangkin. Sadurung iraga maatur-atur, ngiring iraga nyakupang kalih
ngaturang puja pangastuti majeng ring Ida Sang Hyang Widhi Wasa, duaning
asung kerta wara nugraha Ida, iraga prasida mapupul ring galahe sane becik
puniki, jagi nyangkepang acara pakeling wanti warsa STT Tainsiat sane kaping
salikur. Agenda sangkepan iraga kadi mangkin jagi ngebaosang indik acara
pakeling wanti warsa STT sane jagi kalaksanayang, bhoga utawi konsumsi,
genah miwah galah acara, prabea sane jagi saratang, lan atiti sane lakar
kaundang”.

Gus De : “Acara pakeling wanti warsa STT jagi kalaksanayang ring dina Saniscara Wage,
Wuku Julungwangi. Acarane magenah ring Taman Kota Puputan, jam 6 wengi,
selantur ngaturang Puja Trisandhya. Acara puniki marupa Pesta Rakyat. Atiti
sane jagi kaundang inggih punika Prebekel Desa Dangin Puri Kaja, Bendesa
Adat Dangin Puri Kaja, Kelihan Banjar Tainsiat, krama Banjar Tainsiat, miwah
timpal-timpal STT Tainsiat. Antuk prabea sane kaangge kaambil saking kas STT
Tainsiat miwah sponsor sane sampun kapupulang. Antuk dudonan acara jagi
kauningayang olih Sie Acara”.

Ratih : “Suksma antuk galah sane kapaica ring titiang. Manggala STT miwah krama STT
sane wangiang titiang, titiang pinaka perwakilan Sie Acara pacang
nguningayang dudonan acara sane jagi kamargiang. Pesta Rakyat puniki
mamurda “Truna-truni Tainsiat Nyobyahang Kabagiaan”. Dudonan acarane
inggih punika; pamahbah, Tari Panyambrama, sambrama wacana saking
Prebekel Desa Dangin Puri Kaja, sambrama wacana saking Bendesa Adat
Dangin Puri Kaja, sambrama wacana saking Kelihan Banjar Tainsiat, sambrama
wacana miwah atur piuning saking Manggala STT Tainsiat, Tari Belibis,
Pemotongan Tumpeng HUT STT Tainsiat, Pentas Seni olih STT Tainsiat, Modern
Dance olih alit-alit Banjar Tainsiat, lantas kapuput antuk joget. STT Tainsiat jagi
 ngaturang pertunjukan tari kreasi lan musik inovatif. Asapunika manten
dudonan acarane, antukang titiang antuk Gus De (manggala STT).

Gus De : “Suksma Ratih sampun nguningayang indik dudonan acara. Timpal-timpal

sareng sami, selanturnyane durusang titiang nguningayang indik prabea miwah
konsumsine”.

Gek Lia : “Suksma Gus De antuk galah sane kapaica ring titiang. Rahajeng wengi timpal-
timpal sinamian, titiang Gek Lia pinaka bendahara jagi nguningayang indik
prabea miwah sira manten sane dados sponsor ring acara iraga puniki. Panelas
sangu antuk 200 atiti Rp. 4,000,000,-, prabea dekorasi Rp. 2,000,000,-, prabea
sane lianan sakadi sarana lan prasarana, sound system, nelasang Rp.
3,000,000,-Sponsor ring acara puniki inggih punika saking BPD Renon, Salon
Jegeg, BPR Parasari, Toko Buku Pradnya, miwah Kopdit Bahtera. Asapunika
manten sane jagi aturang titiang, selanturnyane antukang titiang ring Gus De
(Manggala STT)”.

Gus De : “Suksma antuk Gek Lia sampun mradartayang indik konsumsi miwah prabea.
Asapunika manten sane jagi kabaos indik acara iraga sane jagi kalaksanayang.
Yening timpal-timpal wenten madue penampen, durusang titiang”.

Gus Putra : “Om Swastyastu Gus De miwah semeton STT sareng sami. Titiang Gus Putra,
jagi metaken antuk Modern Dance sane jagi kaatur olih alit-alit Banjare. Adin
tiange Luh Ayu jagi sareng ring pertunjukan Modern Dance alit-alit Banjare. Sira
sane patut takenin tiang?”

Gus De : “Suksma Gus Putra. Antuk pertunjukan punika, durusang dikoordinasikan ring
panitia Sie Acara, wenten Ratih, Putu Rama, Gung Arya, miwah Gek Diah
nggih”.

Gus Putra : “Nggih, suksma informasine”

Gus De : “Wenten timpal-timpal sane madue usul indik acara iraga?”

Luh Tantri : “Om Swastyastu Gus De miwah timpal-timpal sinamian. Tiang wenten usulan
niki indik konsumsi acara sane jagi kalaksanayang. Yening ten pelih,
konsumsine nganggen nasi kotak nike nggih? Budget per atitine 10,000.
Sapunapi yening wenten stand-stand ajengan pinaka konsumsine? Sane dados
koordinator stand ajengan nika para yoanane. Mangda akidik antuk penelas
sangu miwah iraga malajah mawirausaha”.

Gus De : “Nggih, suksma Luh Tantri antuk usulan sane becik. Sapunapi nika timpal-
timpal? Wenten sane madue pendapat?”

Ayu : “Tiang setuju nika Gus De. Dadosne timpal-timpal STT lianan sane tusing milu
ngaturang pentas seni malih terlibat ring acara puniki”.
Raka : “Tiang lan timpal-timpal setuju taler ring usulan Luh Tantri indik stand ajengan
punika. Tiang lan timpal-timpal jagi sareng dados koordinator”.

Gus De : “Nggih timpal-timpal. Suksma antuk respon sane becik puniki. Antuk usulan Luh
Tantri jagi tiang rembugang dumun sareng timpal-timpal pengurus miwah
panitia. Antuk keputusan jagi kauningayang ring sangkepan selanturnyane”.

Gus De : “Wenten timpal-timpal sane madue usul utawi penampen sane lianan?”

Krama STT-ne makasami tan masaut

Gus De : “Nggih, yening ten wenten, titiang puputang sangkepan iraga kadi mangkin.
Antuk informasi sangkep selanturnyane jagi kauningayang ring Grup Whatsapp
STT nggih. Puputang titiang antuk Paramashanti, Om Shanti, Shanti, Shanti,
Om”.

Kasurat olih Made Revalina Ardika

SMAN 1 Kuta Utara, XI MIPA 10/23