SARINING DHARMA PEMACULAN

Ong Awignamastu,
Yening mekarya ring bangkete mangda mikolihang hasil sane becik patut
nganutin tata titi pemargi sane patut mekadi ring sor puniki: Ngendagin utawi
ngawit mekarya ring bangkete patut ngemargiang upakara bebanten canang
lengawangi buratwangi, wohwohan, base, don sulasih, miwah kembang
payas aturang ring sanggahe ring bangkete antuk puja:Ong Bhetari Sri, Sri wastu
ya namah swaha. Suksman ipun nunas pemargi ring ida bhetara sane nuwenang
genahe, mangda nenten sisip 
Mapag Toya, Indike puniki sampun lumbrah kemargiang ring ulun
empelan sane kelaksanayang olih ikrama Subak ritatkala ngawit ngunggahang
toya ring carike, meserana banten kadi patut.
Amaluku utawi ngawit metekap, Indik baktine anutang ring sasih
minekadi, Yening sasih Kasa, Jiyesta lan Sadha, baktine minekadi :  buah-buahan
lan sanganan mewarna putih, segehan nasi kepelan   mewarna putih, sekar sarwa
putih, sawen antuk carang pucuk putih, maturan majeng kangin katur ring  Sang
Hyang Iswara Guru.
Sasih Karo, Ketiga lan Kapat serana bebantenia: woh- wohan jangkep, jaja
warna barak, nasi kepelan barak   medaging lawar barak bebek lan siap, canang
raka sekar  sarwa barak, sawen antuk pucuk bang rejuna  katur majeng kelod katur
ring Ida Sang Hyang Brahma   Guru.
Sasih Kelima, Kenem lan Kepitu, meserana antuk banten   medaging woh-
wohan jangkep, sanganan mewarna  kuning, iwaknia lawar ayam utawi itik,
canang raka mesekar  sarwa kuning, mesawen wana kuning antuk taru, kayu ujan
mas, maturan majeng kauh ring Ida Sang Hyang Mahadewa Guru.
Sasih Kawulu, Kesanga lan Kedasa mebanten wohwohan lan sanganan
warna ireng, olahan lawar ayam utawi itik, canang raka mesekar ireng/pelung,
mesawen kayu temen, maturan majeng kaler ring Ida Sang Hyang Wisnu Guru.
Angurit utawi mewinih, Rikala pacang mewinih pantun patut kadulurin
antuk upakara bakti ; nasi akojong, iwaknia taluh medadar, udang megoreng,
sambel kecai, serondeng nyuh gading, sekar tigang kancuh, macem, genahang
ring pengalapan, kategepin antuk mantra : Ong Hyang Ibu Pertiwi, ulun aminta
nugraha, pakenani tanemaning ulun, empunen sida urip warasa, Ong Sri Sri
ya namah swaha. Sesampun sayaga pacang mewinih bulih punika mangda
kesapain antuk mantra : Ih si pari awod kawat, awit selaka, arondon mas,
awoh mirah, ong pasek-pasek ta kita saking petala, teka endusi Sang Hyang
Warsa, teka lēnga Sang Hyang Embun, teka ngempeti Sang Hyang
Bayu. wawu raris binihe sambehang ring peminiane.

1
 Ngabut bulih, Nenten nganggen serana bakti, nanging ulengang kayune
nunas kesidian antuk japa mantra: Om Sri wahya, Om Sri wahya Om Sri
wahya.
Ngetepin bulih, Yening jagi ngetep bulih patut mesesapan antuk mantra :
Om Bhetari Sri Ganapati
Nandur padi, Meserana antuk banten : nasi kepelan putih kuning meiwak
taluh, bubuh suyup 7 tanding, nasi kuning metatak-an don dapdap, me be tadah
sukla, canang genten, canang tubungan, lengawangi buratwangi, keaturang ring I
Rare Angon lan Bhatari Uma ring pengalapane. Taler ketegepin antuk banten
sesayut meterasi bang, canang sari, canang gantal, canang medaging nyahnyah
gringsing, gula bali, daksina asiki, baas akulak, lawe satukel.
Rikala nandur patut elingang sasihe, minekadi, yening sasih Jiyesta, Sada
lan Kasa, naga majeng kangin,  mewinih utawi nandur padi, metekap ngambekin,
mangda kelaksanayang madingang bantenge, nandur muter  ke kebot, taler
ketegepin bakti ;nasi putih mebe putih  taluh, sekar putih, pejungjungania carang
lemo utawi carang dapdap antuk mantra `Sang.
Karo, Ketiga, Kapat, naga majeng kelod, teler mewinih,   mlasah muter ke
kebot, ngangge serana banten nasi barak, meulam barak (gurami), sekar bang,
pejungjungania  tiing utawi carang temen antuk mantra `Bang’.
Kelima, Kenem, Kepitu, naga mejeng kauh baktine nasi kuning meulam
kuning taluh, sekar kuning, pajungjungan  ia (penyukjukan) tiing gading utawi
carang kayu mas  antuk mantra `Tang`.
Kaulu, Kesanga, Kedasa, naga majeng kaler serana pateh nanging ireng
warnania, kategepin antuk mantra `Ang`. Sehananing pekaryan ring carike
sampunang pisan   piwal ring genah Naga. Yen sampun wusan nandur padi patut
ngaturang banten cawu mumbul asiki ring Pura Bedugul, ring tengah carike
ngaturang cawu mumbul kekalih, cawu petik kekalih taler ring sabilang sisi carike
ngaturang cawu petik asiki.
Padi sampun metandur 12 rahina, ngaturang banten ; bubuh metatakan
cawu petang warna, bubuh suyup akehne nganutin urip dina, tulung 5, ketipat
pendawa 2, canang medaging nyahnyah gringsing, gula bali, mesawen antuk
carang dapdap.
Padi sampun metandur 17 rahina ngaturang banten; bubuh tabah 5 tanding
genahang nyatur desa lan ring tengah sawah. 
Sesampun meumur asasih, Ngaturang banten tipat dampulan, penek
pangkonan  putih kuning, nasi takilan, canang tubungan lan nasi mancawarna,
canang medaging nyahnyah gringsing.
Lintang ring asasih, Rikala rerahinan patut ngaturang banten; ketipat sari
medaging jaja gina, tulung urip, tulung sangkur.

2
 Umur padi kalih sasih, Mekarya sanggah kukungan munggah bakti:,
blayag 6, ketipat 2, asem/lunak, panca pala, klungah kasturi, ring sor sanggah ;
nasi takilan meulam tlengis, ketipat lepet, tipat ban don tiing, meulam nyalian lan
taluh, mesawen kelawasan, lidi 3 katih, jinah bolong 3 keteng, raris lidi punika
anggen pindayang nignig padi mangda jelih.
Lintang ring kalih sasih, Ngaturang bakti bajang colongan ring Pura
Bedugul sekadi bajang colongan rare, patut keastawayang oleh dane jero mangku
sane patut ring Bedugul.
Umur 3 bulan, Ngaturang banten; jerimpen asiki, woh-wohan jang-
kepkatur ring Pura Bedugul.
Lintang ring tigang sasih, Ngemargiang upacara ngiseh, Byukukung antuk
ngaturang tipat meulam ayam metunu. 
Padi sampun petang sasih, Ngaturang bakti sayut pengambyan, tadah
pawitra, karma subak patut ngaturang pengusaban ring Pura Bedugul sane
kewastanin upakara penyengseng tangluk, mecaru antuk asu bang bungkem.
Ngampung, Manyi, Yening jagi ngampung mangda urati ring dina sapta
wara, sri lan guru taler adungang, taler nuju purnama lan tilem, paruh gelap, paruh
terang, ngalapin 108 katih, baktine ; tulung 7 medaging nasi kuning meulam
kuning taluh mesekar kuning antuk japa mantra : Ong Sri Mahadewa ya namah.
Wawu raris ngawit ngampung antuk mantra: Ong Sri mider, Sri mandel,
mungguh Sri jagat raya namah. Ong Sang Pangukuhan, Sang Karung
Kalah, Sang Sandang Garba, Sang Katung Meraras, Sang Wretikan Dayun,
angro-wangana ani-ani, witana mandel.
Bakti sane patut katur rikala ngampung, yening Sri mangda ngangge cawu
6, Guru ngangge cawu 8, Rudra ngangge cawu 3, yening Kala ngangge cawu
asiki, punika sane patut kemargiang.
Pemargine, padi sane jagi keanggen Nini pinih pertamă patut keanyi saha
sampunang ngampung mapitungkas ring genah tenggek Sang Hyang Naga, prade
memurug, wastu ngawinang boros.
Ngunggahang padi ke lumbung, Banten sane katur : canang lengawangi
burat wangi, punika taler jagi nyimpen padi. Mantra : Ong Sri penuh, Ong Sri
mandel atata nama swaha.
Pemungkem merana Paksi, kedis, serana : don punyan samidaha pikpik,
ilehang ke kiwa, antuk mantra : Ong Kaki bungkem, nini bungkem, ambuh
basang sang manuk amangan parinira Bhetara Guru, pari maka pelalyanan,
teka bungkem.
Pemungkem merana Kedis kukugan, guak, Canang atanding medaging
nyahnyah gringsing antuk mantra : Ih brabu item, brabu rawa, eda baanga
sang gowak mangamah tetanduran Bhetara Guru, empu brabu item, brabu
rawa, empu tetanduran nira, poma, 3x.

3
 Pemungkem merana Bojog,  seranaia: nasi takilan me be taluh
siapabungkul, canang, aon lenga wangi buratwangi aturang ring sawah antuk
japa :  Dewa Ratu sira medrue gumine deriki, puniki  titiang ngaturang ganjaran,
nasi takilan iwaknia taluh  ayam, raris sambehang aone ping tiga meilwan ke
kebot.
Pemungkem merana Jero Ketut, Bikul, Serana : bubuh pirata talepokan,
canang lengawangi buratwangi aturang ring sawah, beten Mantra: Sang tikus
meneng, away mangan parin ingsun 
Lelabaan bikul: jeroan pengarga aketeng jinah bolong   dauhin/kauikin
ibikul antuk niru suaran nyane ping tiga (ciit), serana pengusirne : pamor bubuk
metatakan don medori 5 bidang, genahang nyatur lan ring tengah. Mantra  : Ong
meng putih, ula putih, lamun wani ki tikus putih, tumoning meng putih, ula
putih, wani ki tikus amangan Bhetari Sri, lamun tan wani ki tikus putih
tumonin meng putih, ula putih, tan wani ki tikus putih amangan Bhetari
Sricangkem sira bungkem, 3x.
Pemungkem merana Balang Sangit, Serana : entip meemem, genahang
ring payuk anyare, Muncuk dapdap tetiga tegul antuk benang tridatu, campur
antuk aon otpesak, gumpang raris tekepin, bakta kesawah ketisang maileh ke
kebot ping tigang ilehan. Mantra : muncrat mutering bhumi, mas ratna mutering
jagat, I  warahi Ni Sarini.
Pemungkem merana Padi bekung, Serana Be ilak metanem sebilang bucu,
raris simbuh antuk tri ketuka (bawang, kesuna, jangu) ping tiga. Mantra : Ong uler
singgat luwa, joh paranta, garuda putihKahidep sidhi mandi mantranku.                
Pemungkem merana Padi kuning kadi puun, Serana : tain belek, punyan
kayu sisih, tri ketuka sami meincuk raris sambehang ring temuku/penyaungan
toyane.
Pemungkem merana Merana Lanas, Serana : liligundi meincuk lan cuka,
ketisang ring padine.
Pemungkem merana Wereng, Serana : punyan kecicang maincuk, ketisang
ring padine, miwah kebesan punyan nyuh sander kilap genahang akidik ring
pengalapane. Mantra : Ong kamanira Bhetara Manu, sumamburat mena di ta
sira lanas, menadi ta sira mereng, menadi ta sira mati busung, apan aku
anaking bhetara guru, anambĕnin sira mundura sira, klod kauh
pangunduran sira, syah.
Selantur ipun taler indikan pengundang amerta pinaka serana mangda Ida
Bhetari Sri, mangda kengin Ida jenek kepatutane medasar antuk mereresik ngawit
saking merajan, jero ngantos ke lebuh saha setata ngastiti meyadnya ring Ida,
ngawit saking umah rikala :

4
 Soma Umanis Tolu, Bhetari Sri tedun ring lumbung ngeranjing ring pulu,
nika mawinan patut maturan ajengan megulung, maulam jeroan bawi antuk basa,
mica lan jinten, katur ring  Ida Bhetari Sri Nagati
Bhuda Umanis Julungwangi, Bhetari Sri tedun kewangunan jero,
ngeranjing ring pesarean nika mawinan patut maturan : nasi metatakan celemik
kekalih katur ring Bhetari Sri Lulut Hati.
Sukra Umanis Langkir, Bhetari Sri tedun ring semer, ngadeg ring sanggah
semerĕ, iriki katuran tadah sukla, katur ring Ida Bhetari Sri Dewagati.
Redite Umanis Merakih, Bhetari Sri tedun ring tukade, ngeranjing ring
toya inem, mawinan katur bakti : nasi mecampur kacang ijo, nyuh mesisir tipis-
tipis, maulam taluh ayam, katur ring Ida Bhetari Sri Gati.
Anggara Umanis Uye, Ida Bhetari Sri tedun ke pekarangan umah,
ngeranjing ring kandang, mawinan maturan canang sari sejangkepnyane, katur
ring Ida Bhetari Sri Kumarasari.
Wraspati Umanis Ugu, Bhetari Sri tedun ke sawah, ngeranjing ring
lumbung padi rikala punika patut maturan bakti sarwa pawitra katur ring Ida
Bhetari Srigati.                    
Saniscara Umanis Watugunung, Bhetari Sri tedun ke perantenan,
melinggih ring pelangkiran perantenan, patut ngaturang banten sarwa barak,
katur ring Ida Bhetari Sri Brahmagati.
Mawinang presida inih, nenten kekirangan beras wiadin jinah, nenten
kelugra : Nyampatang natah rikala wengi, nguu baas rikala wengi, Ngadol baas
rikala wengi, Ngedasin entip rikala wengi, Nyusut kukusan, payuk rikala wengi,
Muyungin jeding rikala wengi, Ngenahang ntip, sengauk ring pulune kala wengi,
Ngadukang nasi lan palawija seosan ring pulune rikala wengi, Pradĕ mamurug
jagi kepastu olih Ida Bhetari Sri. Tlas //Ki Penidha Tuha//