Bahan Sermon Epistel (XVII Dob Trinitatis) Teks: 2 Raja-raja 5:1-14

Minggu, 9 Oktober 2022 Usul Doding: Hal No. 407:1-2

Haporsayaon Na Paluahkon
Parlobeini
Halak na ibagas parnaboritan tontu mangarap do bani hamalumon (Ind. kesembuhan). Bani piga-piga
pahara, pitah mandalankon syarat-syarat tertentu pe domma boi malum humbani parnaboritan. Anggo
sanggah batuk, syarat umum na maningon ihorjahon pasti ma ulang lobei manginum bah na mangilu,
mangan sipanganon na marminak, marsigaret, ampa maningon mangan tambar tolu hali sadari. Ibagas
“tuntutan” na sisonai, dong pangarapan boi jumpahan hamalumon sanggah ra mandalankon ai. Age das
hubani ambilanta on, dong do homa sahalak tokoh na lagi ibagas parnaboritan. Naboritni lang batuk, pilek,
borit binongei, tapi humparah humbani haganupan ai, ia aima sahalak na gadamon (Ind. menderita kusta).
Boi sobuton, halak na gadamon bani panorang ijia lang “ijalo” i tongah-tongahni masyarakat. Na gadamon
gati mandompakkon diskriminasi marhitei na ipapulig atap ipasobih humbani halak na mabuei.
Hatorangan Nas
Mungkah ambilan on pabotohkon banta pasal sada tokoh utama na margoran Naeman. Ia aima
sahalak puanglima (pambobaini bala) tantara halak Aram. Aram aima sada kota na sonari margoran Siria atap
Suriah. Naeman boi sobuton sahalak puanglima na gogoh anjaha tarsiar halani kesuksesanni bani parporang.
Bahkan isobut do marhitei ambilan on bahasa marmulia tumang do ia halani itumpakki Jahowa piga-piga
hamonanganni (5:1). Ase memang bani sada sisi, sangap do hajongjonganni Naeman janah halak na ponting
do ia i Aram. Tapi bani sisi na legan, ia aima sahalak na gadamon—sada parnaboritan na ihagigihon itongah-
tongahni masyarakat. Sada panorang goranni tarmurmur, tapi panorang mardalan sihol ma ia gabe bahan
sihagigihon itongah-tongahni masyarakat.
Dob honsi monang humbani parporangan, sada hasomalon do bani panorang ijia mamboan hasil
rampasan. Janah sahali sanggah monang porang hun tanoh Israel, halak Aram mamboan naboru na etek-etek
Israel, bahen suruh-suruhanni parinangonni Naeman (5:2). Mungkin halani dob manangar barita humbani
parinangonni Naeman, ipabotohkon juak-juak ai ma hubani sidea bahasa dong do nabini Naibata i Samaria na
boi pamalumkon na gadamon. Juak-juak ai pe mambere penawaran nasehat hubani Naeman age
parinangonni ase misir manjumpahkon nabini Naibata ai (5:3). Lang dong namin hak suruh-suruhan
mambere nasehat hubani keluarga puanglima raja, tapi justru marhitei ambilan on, sorani halak na etek
itangihon Naeman do. Dobni mangindo surat ijin ma Naeman hubani rajani halak Aram ase boi borhat hu
tanoh Israel janah itongos raja ai do surat hubani Raja Israel ase ulang ilanglangi atap ibunuh munsuh
puanglima ai i tongah dalan (5:4, 5).
Banggal tumang do holong uhurni raja Aram hubani Naeman ase hobas ia padaskon surat hubani Raja
Israel. Isini surat tongosan ai tangkas: ase jumpahan hamalumon puanglima ai hun bani gadamni (5:6). Raja
setuju Naeman misir hu tanohni munsuh laho manjumpahkon pangurupion. Lang pitah mandapotkon
delegasi (surat persetujuan), Naeman pe ipaborhat mamboan siluah tangan. Sapuluh talenta pirak, onom ribu
sekel omas, ampa sapuluh baju na maharga gabe galangan pardamaion. Tapi raja Israel sompat do hape salah
pangarusion sanggah na mambasa surat in. Raja Israel panik! Ia mangagan songon na adong do maksud
politis bani parrohni puanglima halak Aram ai hu tanoh Israel. Dobni raja Israel manrigati pakeianni, irik
tarsongon mangkatahon “ahu lang Naibata, na boi pamateihon atap pagoluhkon” (5:7). Mambogei na
hinorjahon raja Israel in, iparentah Elisa ma suruhanni hubani raja ase manjalo puanglima halak Aram ai
janah marsuruh ia roh hubani nabini Naibata in (5:8).
Na menarik, roh ma si Naeman rap pakon hudani ampa garetani, anjaha marsaran ilobeini labahni
Elisa (5:9). Elisa lang manjumpahkon puanglima halak Aram ai, tapi justru mamarentah suruhanni use
padaskon hatani. Boi ma tarbayangkon hita, halak na domma mardalan daoh anjaha pinaima-ima itambari
humbani parnaboritanni, tapi justru lang manjumpahkon “doktorni” pitah perwakilan hata. Hata humbani
Elisa manobut, “Laho maridi pitu hali i Bah Jordan” (5:10). Lang heran, Naeman dobni manringis (5:11).
Naeman mambahen perbandingan bahasa dearan do Bah Abana pakon Parpar na dong i Damaskus
marimbang ganup bah na dong i Israel (5:12). Tapi lagi-lagi, sahalak “halak na etek” padaskon pangarusion na
sintong ampa nasehat hubani Naeman, aima juak-juakni sandiri. Ielekkon ma puanglima halak Aram ai ase
totap maridi i Bah Jordan, anjaha jumpahni ma hamalumon in (5:13, 14).
Panutup
Anggo mangihutkon pingkiran, buei do pahara bani goluh on songon lang tarjalo akal. Lobih ma ai
soal hamalumon-naborit, pangkei ma banta bahasa pangurupion na humbani Naibata lang gati songon na
ibagas pingkiranta. Haluahon ibagas hamalumon in lang songon na mambalikkon telapak tangan, cepat-kilat!
Ihaporluhon do paruntungan ampa haporsayaon. Haduasi teruji sanggah hita jolma mandompakkon
sitaronon (parnaboritan). Ai nini do bani Heber 11:1, “Ia haporsayaon, ai ma tenger ni uhur bani
siarapkononkon, ampa na mambahen torang pasal na so nididah.” Halani gok bani haporsayaon na sintong
do sasahalak bani ujungni mandapotkon haluahon marhitei hamalumon. Hargai ma tiap proses bani goluh on
gok ibagas haondoson ampa haporsayaon hubani Kristus Tuhan in. Marlajar humbani kesalahan na binahen
Naeman, haluahon lang pitah jumpah humbani sinadongan. Arta aima harga na salah bani haluahon in. Lang
humbani pirak, omas, baju na maharga Naeman manjumpahkon haluahon in, tapi justru humbani halak na
etek-etek na gabe parhiteianni Naibata do, na paingatkon-si ase porsaya bani hamalumon dirini sandiri.
Haluahon in domma itobus ibagas darohni Kristus. Halani ai dingat ma, haporsayaon do na paluahkon!