ASIL PENGELANDIK JARI NAMBAHKA PENATAI

PEMISI
Posted By : Randau Ruai
Date Posted : Tuesday 16-Aug-2016

PENGELANDIK jari baka ngaga pua kumbu, nganyam tikai, nganyam bidai enggau
mayuh utai bukai kitai Iban endang sigi udah jelai berita tanpak nama ukai semina di
menua tu tang nyau nyerarai ngagai menua luar nyeng-kaum menua orang putih.
Taja pan kitai Iban sereta bansa asal me-nua tu ke bukai semina nemu ngena
teknologi enti besebut ka zaman dunya moden kemaya hari diat, tang enti besebut
ke baka ni ngaga pua kumbu sereta mayuh asil pengelandik jari ke bukai temuai
ke datai mega tau tebelenga lilih.
Tang enti asil pengelandik jari nya semina dikemeranka kitai empu aja, nadai meh
nya guna. Mayuh mega kitai di menua ulu-ulu sungai ngembuan pengelandik jari,
tang na-dai endur mandangka pengelandik diri.
Ujung iya pengelandik jari nya semina luya ngapa. Lesi nadai orang nampung laban
en-da diturunka pengelandik sereta penemu nya ngagai bala anak tauka ucu.
Nasip diatu kitai bisi ngembuan Tun Jugah Fondation, di Kuching ti ngemeranka
sereta ngelatih raban sida ti indu ba pengawa betenun, ngerembaika sereta
ngerikod Jaku Iban enggau mayuh utai bukai.
Kelimpah ari nya bisi mega kitai meda tau-ka ninga raban sida ke Indu di menua
pesisir di rumah-rumah panjai betenun sereta dijual ngagai temui ti bisi datai tauka
dijual ngagai orang ti deka meli enggau mayuh sebedau dijual di pasar.
Tang lebuh kitai beratika pengawa ti baka nya agi bedau chukup. Patut agi mayuh
agi pengawa ti ngansak sida ke indu enggau ba pengawa pengelandik jari ngambika
pengawa ti baka nya ukai semina ngemeranka pengelandik tang tau mega nikika
tikas penatai pemisi sida ti diau di menua pesisir.
Kelimpah ari nya iya mega tau narit temuai datai sereta nyegangka dagang temuai
sereta ekonomi di menua tu.
Perintah mega selalu ngelalau orang dagang indu ke ngembuan pengelandik jari
patut nukar chara dagang ari ngereja pengawa nya ke semina rindu ati aja ngagai
pengawa komersial dikena ngulihka penguntung ba dagang entarabansa.
Pekara tu ti baka tu ulih nyadi nyata enti nyema orang dagang indu ke tama dalam
industri asil pengelandik jari ulih meratika dagang tu nengah kontek ti jauh sereta
besai agi lalu enda takut nguji.
Sarawak ngeluarka asil pengelandik jari ti bekualiti tinggi ti ngujungka bisi peminta
ke tinggi ari temuai ari menua bukai ke datai nemuai ngagai menua tu.
Indah enti nitih nadai salah perintah meransang pengawa ti baka tu ngena jalai
ngatur pekit tauka ngatur pengawa pemandang senentang asil pengelandik jari enda

ngira bansa Iban, Orang Ulu tauka bansa bukai ngambika iya tau ngerembaika
pengawa dagang asil pengelandik jari kitai di menua tu.
Semua pengawa mega beguna pengeransing ati sida ti ngereja pengawa nya. Lalu
iya disukung raban sida perintah kelebih agi ba pengawa promosi sereta
pemandang.
Diatu pengerembai pengawa dagang temuai udah meri ruang kena raban bansa kitai
ti bisi pengelandik ngaga asil jari ngambi peluang dalam industri nya.
Nya alai raban kitai bansa lebih agi sida ke indu, ti ngembuan pengelandik jari.
Chakahka agi ati enggau orang besemekih ba pengawa dagang asil pengelandik jari.
Pai mega wai nadai salah diatu enggau orang belajar nekan komputer bepeda ke
internet.
Kelimpah ari belajar sereta nambahke penemu, ngena internet mega ulih endur kita
ngerembai tauka mandangka asil pengelandik jari kita.
Semina enti semua pengawa tu ulih diatur enggau manah sereta mujur dipejalaika
nya baru juluk ati ti deka meda asil pengelandik jari kitai bansa bisi dijual ngagai
menua bukai lebih agi menua Eropah tau ulih nyadi nyata.