MAJELIS DESA ADAT ( MDA ) PROVINSI BALI

DESA ADAT PADANGBAI

KECAMATAN MANGGIS KABUPATEN KARANGASEM
Kantor : Balai Masyarakat Desa Adat Padangbai, Telp. 081999270900
Email : desaadatpadangbai@gmail.com

MURDHA WAKYA
Purwa Pengastungkaran tityang majeng ring krama Desa Adat
Padangbai ring buk padhan Ida Sang Hyang Widhi Wasa mase sangkan
paraning dumadi Bhatara-Bhatari sane malingga melinggih ring Pura utawi
Khayangan sami sane wenten ring sajeroning wawengkon Desa Adat
Padangbai. Riantukan malarapan Bhakti lan angayubagia saha asung kertha
wara nugrahan Ida Sang Hyang Widhi Wasa lan Sesuhunan ring Parhyangan
Penataran Agung, ikrama desa presidha mepupul sami iriki ring Balai Serba
guna utawi Balai Masyarakat, mangda setata jagra winungu eling ring sesanti
“Gilik-saguluk, Parasparo, Salunglung-Sabayantaka, Sarpanaya” ring sejroning
ngewantenang Pesamuhan Desa ring nemoning rahina mangkin : Redite
Umanis Astha Langkir, penanggal 14 sasih jiyestha icaka 1943, pinanggal
masehi : 25 April 2021.

Ida dane krama Desa Adat Padangbai sinareng sami sane sampun
melinggih ring pelataran Balai Masyarakat sane banget tresna sihin titiyang.
Sadurung titiyang side ngatur uningayang parindikan pakaryan utawi kegiatan
Desa Adat Padangbai duwene, lugrayang dumun titiyang ngaturang “Swasti
Prapta warsa caka anyar 1943 lan Rahajeng Rahina Jagad Galungan lan
Kuningan, dumogi Dharma setata ajeg ring sajroning kahuripan, asapunika
taler Ida Bhatara-Bathari setata mapaica wara nugraha ring iraga sinareng
sami.

Punika taler tan lempas titiyang ngaturang pengastungkara, puji pengastuti

malarapan panganjali :

Om Swastyastu, Om Awignamastu namo sidham

1. Linggih dane Jro mangku pinaka angga Pinandhita sinareng sami sane
banget suciang titiyang ring manah.

2. Angga Panglingsir Desa Adat Padangbai sane banget kasumayang

titiyang.
 3. Dane Perbekel pinaka murdhaning jagat ring kedinasan Padangbai sane
banget murdhayang titiyang.

4. Angga Prajuru Desa Adat Padangbai, Sabha Desa, Kertha Desa, rauhing
Pacalang pinaka pengabih desa sinareng sami sane banget wangiang
titiyang.

5. Angga Keliang Banjar Adat ketigang banjar lan Prajuru naler sane
wangiang titiyang.

6. Pemekas Ida Dane Krama Desa Adat Padangbai sinareng sami sane
nenten prasidha antuk titiyang nyarca siki kalih sane banget tresna sihing
titiyang.

Ring sajeroning kawentenan Pesamuhan Desa kadi mangkin tunas titiyang

pemilet sinareng sami mangda sidha ngamiletin ngantos puput lan trepti
pemargine, satmaka sampun iring titiyang ngaturang ayah mecikang desan
duwene mangda memargi becik labda karya lan sidhaning don.

Pengodar indik pakaryan utawi kegiatan Desa Adat Padangbai prasidha aturang
titiyang mapengawit saking pawilangan pinanggal masehi : 27 Septembr 2020
– 31 Maret 2021

Ida dane pamilet pesamuhan desa sinareng sami sane banget wangiang
titiyang.
Sampun tigang warsa lintang titiyang mapengayah dados Prajuru Desa Adat
Padangbai manut sekadi Lekita utawi Surat keputusan Majelis Madya Desa
Pakraman Kabupaten Karangasem Nomor : 95 / SK.MMDP.Kr.Asem / XI /
2017, Tanggal ; 26 Nopember 2017, mejanten sampun durung akeh sane
presidha antuk titiyang ngemargiang ayah-ayah ring swadharmaning titiyang
dados Prajuru Desa Adat Padangbai. Nanging ring sapemargin ayah-ayah
titiyang dados Prajuru Desa Adat manut ring daging Perda 4 2019 indik Desa
Adat ring Bali, Awig-awig, Pararem lan Catur Drestha , tan purun lempas ring
pemargi manut sekadi konsep “Tri Hita Karana” luwire; Sukerta tata
Parhyangan, Pawongan lan Palemahan.

1. Sukerta Tata Parhyangan; Pujawali ring sajeroning Pura sejebag Desa

Adat Padangbai sampun presidha kemargian manut Ilakita utawi tika
pujawali sane sampun kasurat lan kasobyahan ring Manggala Desa lan
 Krama Desa. Taler sampun presidha puput kemargiang indik
ngayum/ngodak Pralinggan Ida Bathara ring Pura Pesamuan Agung
Ngelantur Pemelaspas lan Pemasupati sane kemargiang duk weraspati
kliwon warigadean penanggal 9 icaka 1942 nemuning Rahina Kajeng
Kliwon Enyitan, pinanggal masehi 27 Agustus 2020, Undagi saking gases
sesetan Dr. I Komang Indra wirawan, S.Sn M.Fil.H , Upacara Upakara
kapuput antuk Ida Pedanda Gede Bukit saking Griya Bukit Catu Manggis,
taler kemargiang wewangunan Candi , Penyengker jaba Pisan lan Bale
Kulkul ring Pura Penataran Agung antuk Prabea saking wantuan Bapak
Walikota Denpasar 500jt rupiah lan jagi Pacang Kelanturang Penyengker
ring jeroan lan sejangkep nyane. Sami sampun presidha memargi antar
labda karya lan sidhaning don sangkaning ayah-ayahan Ida dane sareng
sami.

2. Sukerta Tata Pawongan; Pemargi-pemargi indik tata Pawongan minakadi

Indik Rangkat utawi pawidhi widanan, Pawintenan Pemangku taler Sudi
wadani sampun memargi becik manut ring daging Awig-Awig lan dresta
sane sampun memargi. Indik Kelayuan sampun memargi becik manut
ring daging Awig-Awig lan dresta sane sampun memargi. Taler Sampun
Presidha Kemargiang Luire;
a. kemargiang diklat Prajuru, Pacalang, Krama Istri Desa Adat pinanggal
22 – 25 April 2019 sane kalaksanayang olih MDA Kabupaten
Karangasem ring Museum Lontar Dukuh Penaban.
b. Kemargiang Bulan Bahasa Bali Tingkat SD, daa Truna lan Krama istri
Desa Adat Padangbai pinanggal 8 – 10 Feb 2021.
c. Kemargiang Dilkat Virtual Prajuru Desa Adat
d. Kemargiang indik Punia, dudukan, utawi Sasabuan ngawit bulan Mei
2019 majeng ring Krama Tamiu sane jenek lan meduwe utsaha ring
wewidangan Desa Adat Padangbai manut Pararem Desa Adat
Padangbai sane sampun kasungkemin ring Paruman Agung , Redite
Umanis Langkir pinanggal 6 Januari 2019.

3. Sukerta Tata Palemahan; Pemargi – pemargi indik tata Palemahan taler

sampun presidha kemargiang indik mapretiyaksa palemahan sane
kadruwen antuk desa ngelantur kakaryanan sertifikat druwen Desa
nganut Program Pemerintah sane mewasta PTSL (Pendaftaran Tanah
Sistematis Langsung) mangdane Druwen-druwen Desa Adat presidha
Ajeg kepungkur wekasan.

PENYINEB
Ida dane pemilet Pesamuhan Desa sinareng sami sane banget wangiang
titiyang, rauh akadi puniki dumun sane prasidha atur uningayang tityang
indik pakaryan utawi kegiatan Desa Adat Padangbai manut permargin Tri
Hita Karana inggian punika :
1. Indik Parhyangan pinaka genah ngadisthana Ida Hyang Parama
Wisesa.
2. Indik Pawongan pinaka krama desa.
3. Indik Palemahan pinaka wewidangan wawengkon desa.

Sane mebantang antuk Preda No.4 Tahun 2019 tentang Desa Adat di
Bali, lekita Sastra miwah Agama, paswaran awig-awig, Catur dresta,
Pararem taler minekadi sane siosan sane manut ring pemargin Dharma
Agama kalih Dharma Negara, dumadak pemargi inucap preshida
kasidhan ngemangguhang kejagadhitan sekala nisakala.

Menawita wenten atur titiyang sane nenten manut ring sajeroning

kayun antuk ketambetan titiyang katun wimuda, ring tepengan kadi
mangkin nunas agung rena sinampura.

Om Anno bhadrah kratawwo yanthu wiswathah

(dumadak pikayun sane becik rauh ring sajroning pangider jagat)
Om Shantih, Shantih, Shantih Om

Padangbai, 25 April 2021

Prajuru Desa Adat Padangbai
Bandesa Adat,

I Komang Nuriada