KETUA PEMUDA HUT STAM 35

SAMBRAMA PAKELING WANTI WARSA

SEKAA TERUNA TERUNI ASTI MANDALA

Suksma antuk galah sane katiba ring titiang ...

Pinih ajeng, lugrayang titiang ngaturang angayubagia lan puji pangarastiti majeng ring IDA SANG
HYANG WIDI WASA, utamannyane Batara-Batari sami sane melingga-melinggih ring Pura Khayangan
Tiga duaning ASUNG KERTA WARA NUGRAHA ida, iraga makesamian makumpul ring rahine sane
becik puniki malarapan antuk panganjali umat

“OM SWASTYASTU”.

1. Sane Suciang titiang JRO MANGKU Pura Khayangan Tiga Desa Pekraman Bangunliman
2. Ibu NI LUH YUNIATI pinaka tokoh masyarakat, sane wangiang titiang
3. Ibu NI MADE RATNADI pinaka tokoh masyarakat, sane wangiang titiang
4. Bapak perbekel Desa Buruan, Pinaka murdaning jagat buruan Sane Dahat kesumayang titiang.
5. Sane wangiang Titiang Bapak Ketua BPD Desa Buruan
6. Sane wangiang titiang Babinsa lan Babinkamtibmas Desa Buruan
7. Jro BENDESA lan kesarengin antuk angganin prajuru Desa Pakraman Bangunliman, Sane Dahat
Wangiang titiang
8. Sane wangiang titiang Kelihan Adat lan Kelihan Dinas Desa Pakraman Bangunliman
9. Sane Wangiang titiang Sesepuh Sekaa Teruna Asti Mandala
10. Sane wangiang titiang ketua pecalang desa pakraman bangunliman
11. Taler krama Sekaa Teruna Asti Mandala Desa Prakaman Bangunliman lan Ratu ida dane sareng
sami sane sampun prasida ngerauhin Wanti Warsa Sekaa Teruna Asti Mandala

Para Uleman sami sane dahat wangiang titiang,

Ring galahe becik puniki, Titiang ngaturang suksmaning manah mantuka ring Panitia lan krama
Sekaa teruna sami lanang wiadin istri, duaning sampun presida ngemargiang Parikrama Pakeling Wanti
Warsa lan Pangadegan Prajuru Anyar Sekaa Teruna Asti Mandala puniki, saking ngerincikan ngantos
mangkin parikrama puniki preside memargi antar, lan nenten pikobet sane kapanggih. Dumogi Ida
Sanghyang Widi Wasa Ngicenin pemargi sane becik, ngemolihin kerahayuan lan kerahajengan, labda
karya sida sidaning don ring sajeroning ayah-ayahan irage sareng sami ring Desa Pakraman Bangunliman.
 Punika taler ring ratu ida dane sareng sami, pamekasne ring palingsir Desa Pakraman Bangunliman,
titiang nenten surut-surut nunas pawarah-warah, tuntunan-tuntunan lan piteket-piteket duaning titiang kari
muda, yadian pangincep ring sajeroning sastra, agama lan budaya, ritatkala titiang ngayah dados Prajuru
Sekaa Teruna Asti Mandala.

Krama Sekaa Teruna-Teruni sane Tresnasihin titiang...

Titiang ngaturan suksmaning manah antuk kapercayaan idadane sareng sami, nanging antuk
kedepannyane, titiang nenten lakar menjanji akeh. Asiki pinunas titiang Ngiring sareng-sareng aktif tedun
lan ngayah membangun masyarakat, sawireh iraga sane kabaos Generasi Perubahan, sane ngewarisin
budaya ring desa puniki. irage sareng sami sampun sepatutnyane ngajegan lan ngelestarian budaya sane
wenten ring desa puniki mangda nenten pudar olih zaman, napi malih Sekaa Teruna Asti Mandala puniki
teladan sane patut kacingakin, utawi kacontoh olih para sisia sane kari alit. Sane kaping ungkur, ngiring
tincapan malih rasagilik saguluk, paras paros sarpanaya, salunglung sebayantaka mangdane irage iriki ring
Sekaa Teruna puniki tetep raket, ngemolihin kerahayuan lan kerahajengan.

Para Uleman lan Ratu Ida dane sareng sami sane dahat wangiang titiang…

Wantah kadi asapunika sambrana sane atur titiang ring wengine kadi mangkin, sekadi kabaos “TAN
HANA WONG SWASTI NULUS RING PRAJA”, Duaning titiang kalintang tuna ring paribasa. Prade
wenten atur titiang sane nenten manut ring arsa mangde ledang idadane ngampurayang. puputang titiang
antuk nguncarang parama santih,

Om Santih, Santih, Santih Om