LITURGI NON AYAT BAHASA BATAK (BAHASA SEHARIHARI)

LITURGI I : HINAULI NI JADIJADIAN NI DEBATA

I.1.________________________ : Molo hutatap angka dolok dohot rura, tano dohot laut,
molo huida langit rodi sude isi ni portibi on, longang do rohangku marnida saluhutnai Dang
targombarhon denggannai dohot ulinai sude nasa na adong di portibi on.

I.2. _______________________ : Olo amang. Ahu pe molo dung jumpang borngin na

holom, mansai las roha marnida sondang sian ginjang, na mangalehon hatiuron tu borngin na
holomi, ima sondang ni bintang nang bulan.

I.3.________________________ : Salpu borngin na holomi, ro ma muse manogot ni ari,

pintor lambok ma nihilala umbege pidong na marendeende, soara ni alogo na marngongos
dohot manuk na martahuak pabotohon tu jolma asa hehe manjalo ari na imbaru.

I.4.________________________ : Dungi ro ma muse sondang ni mata ni ari manondangi

portibi on, asa boi jolmai mangula ulaonna, asa mangolu nang angka suansuanan dohot
duhut-duhut. Saluhut maruli gogo sian sondang na tiuri.

I.5. ________________________ : Dang holan i portibi on uli ditompa Debata ale inang.
Ditompa Debata do muse jolma i tumiru rupana tudos tu pangaloha. Jolma ido tompaan ni
Debata na ummarga.

I.6. ________________________ : Ido tutu angka dongan. Angka na asing i ditompa sian
na so adong hian do, alai anggo jolma i sian tano do dibuat Debata, dungi diombushon hosa
hangoluan gabe mangolu ma.

I.7.________________________ : Asa holan hita jolma do na martondi sian nasa na

tinompa ni Debata, jala dilehon do mandat tu hita laho mangarajai, magusahai huhut
melestarikan nasa na tinompa ni Debata.

I.8. ________________________ : Ulinai tahe saluhutnai amang. Ise do na jumadihoni?

Ima napistar sian na umpistar, na gogo sian na gumogo. Ibana do Debata na tumompa
saluhutnai marhite huasoNa. Ibana do Debata naung adong sian mulani mulana.
I.9. ________________________ : Debata Jahowa do natumompa saluhutna i. Sian na so
adong hian gabe adong, ina na ginoaranna “Creatio ex nihilo”. Nda halonganan do i di
rohanta?

I.10. _______________________ : Olo tahe, tung so habilangan do jadijadian ni Debata.

Tung tarpatudos ma angka pambahenan ni Debata tu pambahenan ni jolma? Ai manghuling
Ibana gabe manjadi do, mandokkon Ibana jadi jongjong ma.

LITURGI II : HINAJORBUT NI DOSA DI PORTIBI ON

II.1. _____________________ : Sasintongna mansai uli do portibi on ditompa Debata.

Dang adong na hurang. Alai molo tabereng nuaeng, hira na mago do hinauli ni jadijadian ni
Debata i. Aha do ulaning mambahen i?

II.2. _____________________ : Oe……Mago ma tutu hinauli ni jadijadian ni Debata i

ala gok dosa do jolma i. Dao sian holong, holan hosom, late, pangiburuon, parbadaan, i do
dipaulaula.

II.3. _____________________ : Di tongatonga ni na markeluarga pe jorbut do dosai.

Ianakkon tu natuatua na marbadai, na marhahamaranggi, mariboto tong marbadai, dang boi
pajumpang. Didia nama damei?

II.4. _____________________ : So holan i amang, bangso pe marporang maralohon

bangso na asing, bahkan di negaranta sandiri masibunuan do sama-sama hita, mambaen bom
dohot teror, dohot angka na asing.

II.5. _____________________ : Na jumorbut dope angka dongan, di huria pe tong tubu

parsalisian. Nda sasintongan huria do mamboan dame? Hape sama-sama ruasna pe olo
marsoal. Aha ma sidohononta?

II.6. _____________________ : Dang holan tu jolma hita masihosoman, alai tabereng

ma godang ni angka bencana alam na parpudion di negaranta. Nda rajumanta sabagian siani
alani pambahenanta do?
II.7. _____________________ : Ima tutu. Dang taradoti be tano na nilehon ni Debata.
Godang do na manabai hau, ujungna gabe masa banjir dohot kabut asap songon na di
Kalimantan dohot Riau.

II.8. _____________________ : Taida do muse dampak industri na mambahen polusi

udara, dohot polusi aek, ujungna godang ma angka sahit na imbaru na so hea binege jala gabe
godang angka dakdanak na cacat.

II.9. _____________________ : Songoni muse na tabege di televisi taringot tu angka

banjir, longsor, gunung na naeng meletus. Alanii torop halak na mengungsi jala menderita.
Nda ala ni dosantai do i?

II.10. ____________________ : Ima tutu. Nunga sude be mardosa. Jorbut ma nuaeng

berengon portibion. Alai dosa i nga dimulai sian jolma na parjolo i, ima si Adam dohot si
Hawa, Ujungna lam mangararati ma dosai.

LITURGI III : HALUAON NI JOLMA SIAN DOSA NA PINATUPA NI DEBATA

III.1. _____________________ : Nang pe nunga mangararati dosai, jala nang pe hona

uhum jolmai ala ni dosana, alai anggo holong ni roha ni Debata dang tarsirang sian jolmai.
Dang dipasombu Debata jolmai mate dibagasan dosana.

III.2. _____________________ : Ai gomos do ditiop rohangku: Ndang tarbahen sirang

hita sian holong ni roha ni Debata, na di bagasan Kristus Jesus Tuhanta i: Manang bahenon ni
hamatean manang hangoluan, nang bahenon ni angka surusuruan nang angka harajaon, nang
na masa nuaeng, nang na masa sogot, nang angka hagogoon pe, manang bahenon ni na di
ginjang nang na di toru, ro di nasa na tinompa pe.

III.3. _______________________ : Ai songonon do holong ni roha ni Debata di portibi on,

pola do AnakNa na Sasadai dilehon, asa unang mago ganup na porsea di Ibana, asa
hangoluan na salelenglelengna di ibana.

III.4. _______________________ : Asa ndang adong haluaon di bagasan manang ise na

asing; ai ndang adong goar na asing ditoru ni langit dilehon tu jolma, parhiteanta tu haluaon.
III.5. ______________________ : Ai ndang tarpauli ojahan na asing, dungkon ni naung
ojak i, i ma Jesus Kristus i. Ibana ma tutu ojahan ni haluaonta.

III.6. _____________________ : Jala ido na naeng pabotohonon ni Pesta Natal on tu hita.

Ai na ro do Tuhanta Jesus Kristus tu portibi on laho paluahon hamu dohot ahu, paluahon hita
sian dosanta, uhumta dohot ragam ni persoalanta.

III.7. _____________________ : Molo uhum hian jambarta ala ni dosai, nunga be digarar
Tuhanta. Singkat ni uhumi ro ma tu hita haluaon

III.8. _____________________ : Ima tutu, nunga malua hita alai ingkon ingotonta do,
ndada haluaon holan na di portibi on, dohot do haluaon sogot di banua ginjang.

III.9. ____________________ : Tabonai hape ate amang na mardebatahon Jesusi, ala

dijamin do haluaonta di portibi nang di banua ginjang. Dipaunsat do hita sian haholomon tu
hatiuron

III.10. ____________________ : Alanii, nunga gabe anak hatiuron be hita, angka anak
haluaon na so diparhatoban dosa. Nunga talu be dosaI di ngolunta ala ni Tuhan Jesus Sipalui.

LITURGI IV AHA DO LAPATANNI NA MARNATAL?

IV.1. ____________________ : Longang do roha nunga pola marjutajuta dakdanak

naung tubu di portibi on, alai dang dung dope hubege songon balga ni Pesta Hatutubu ni
Jesus i.

IV.2. _____________________ : Ido ate amang, di ganup taon di sude inganan, baik di
Negara maju dohot di Negara berkembang sude mamestahon ari hatutubu ni Jesus i.Pesta
Natal ima Pesta na umbalga di sandok portibi on.

IV.3______________________ : Hamu angka dongan hubege panindangion ni donganta,

jala sai hupingkiri ringkot situtu do tangkasanta lapatanni Natal di partingkianta saonari. Sian
pamerengan niba hira hasomalan sambing do.

IV.4. ______________________ : Molo di ahu, songon i do ra di deba dongan. Molo dung

manjonok Natal….patubu arsak ni roha do. Loja jala marsak do iba mamingkiri na ringkot tu
anakkonniba laho marpesta Natal. Paradeon ma bajubaju, sipatu, jala ingkon na imbaru. Molo
so boi ni tuhor na imbaru, ba maila iba marnida dongan.

V.5. _____________________ : Sintongnai na nidokmi inang, so holan manuhor baju

baru, dohot dope angka guguan natal di gareja, di singkola, di punguan marga. Ah tahe…. So
binoto sipata sian do be pahusoron.

IV.6. _____________________ : Olo tutu…amang, sipata tubu do roha na mandele molo

dung jumpang ari Natal, lumobi naniula pe dang gabe, harga ni kopi pe turun. Nunga
parbalanjoan ganup ari pe sompit, tamba muse gugu tu angka Pesta Natal, taon baru pe jonok.
Ah tahe…gabe arsak ni roha do na jumpang di ari Natal on.

IV.7. ___________________ : Patubu arsak??????????? Dao ma i. Molo do ahu Pesta

Natal ima kesempatan marsonang –sonang dohot patuduhon pahean na imbaru. Molo so
Natal sadihari be pangkeon jas na argaon?

IV.8. _____________________: Ido amang, Natal sada kesempatan patuduhon haulion

niba marhite na marsasak, mamangke kebaya na arga dohot perhiasan dohot angka na adong
di iba.Sadihari be berengon ni dongan na adong perhiasan niba molo so tingki Natal?

IV.9. ______________________ : Lojanai hamu angka dongan mamingkiri Pesta Natali.

Molo songon di ahu sibulus-bulus ima. Ndang pola sai ingkon paradeon pahean na imbaru,
manang angka pesta na pasudahon hepeng, pingkiran dohot tingki. Ai dang dijaha hamu
barita partubu ni ni Jesus ujui? Dibagasan hapogoson do, ndang adong pesta na bolon.
Lojanai hamu..!

IV.10. ____________________ : Pesta Natal ima pesta Parningotan Hatutubu ni Tuhanta

Jesus, na marlapatan: Debata gabe jolma, laho paluahon jolma sian dosa dohot hamatean,
tanda ni holong ni roha ni Debata tu sude jolma di portibi on. Jadi molo marpesta Natal hita
di tingki on: ima laho manghamauliatehon saluhut pambahenan ni Debata tu hita jolma
pardosa.

IV.11. _____________________ : Dibagasan pangantusion i ma hita tarjou mamangke

nasa na adong di hita mandok mauliate tu Debata, songon parmahani ro sian hapogosonna
marsomba tu jolo ni Jesus. Parroha sian purba i pe ro marsomba sian hasangapon, hamoraon,
hatongamon dohot hapistaran nasida di bagasan serep ni roha tu jolo ni Jesus, na imbaru tubu
i

IV.12. ____________________ : Ndang balga manang metmet ni pamestahonon di Pesta

Natal sihalonganghononhon, alai aha do na mangonjar rohanta dohot mamestahon Hatutubu
ni Jesus ganup taon. Alani tapature ma parrohaonta laho marpesta Natal ima laho
manghamauliatehon haluaon sian Debata huhut manjangkon Jesus di ngolunta.

LITURGI V : TAJANGKON MA HALUAONI MARHITE HAPORSEAON DOHOT

HAMUBAON NI ROHA

V.1. _____________________ : Unang sai longang be rohanta umbege hata haluaon na

sian Tuhan Jesus. Alai rap ma hita mangauhon i tu bagasan rohanta asa parsidohot hita di
haluaon na pinarade ni Tuhanta Jesus Kristus.

V.2. ______________________ : Holan haporseaon tu Jesus Kristus nama haluaon di

hita. Ai dang tuk be gogonta laho paluahon hita sian uhum dohot dosai. Alanii: Haporseai ma
Tuhan Jesus asa malua ho dohot isi ni bagasmi.

V.3. ______________________ : Marhite Pesta Natal sadarion rap ma hita mandok

songon na nidok ni si Josua di Padan na Robi i: Alai anggo ahu dohot donganhu sajabu,
ingkon Jahowa do oloan nami.

V.4. ______________________ : Ai upa tinuhor ni dosa do hamatean, alai basa-basa ni

Debata do hangoluan salelengnilelengna di bagasan Kristus Jesus. Antong tajangkon ma
basa-basa ni Debatai tu rohanta nang tu keluarganta ganup.

V.5. ______________________ : Antong tanda naung dohot hita malua, taoloi ma

Debata, taalo ma sibolis asa maporus sibolis sian hita. Ima parbue ni Pesta Natalta sadarion.

V.6. _____________________ : Ima tutu amang. Hamu pe unang be losok hamu

marguru tu Ebenezer, asa ido hape sada dalan di hita manghamauliatehon basa ni Tuhani.

V.7. ___________________ : Sintong mai angka dongan, asa songon parmahan i ma

hita tutu dibagasan las ni roha ro marsomba tu Jesus, songoni ma hita dibagasan las ni roha
marguru sahali saminggu dalanta marsomba tu Jesus.
V.8. ___________________ : Hita pe angka inang, tahobasi ma angka amanta on jala
lam ringgas ma hita manjujui nasida laho marguru, jala tapaborhat ma dibagasan dame dohot
las ni roha.

V.9. __________________ : Molo Parroha sian purbai dipelehon do sere,miak na hushus

dohot haminjon, hita angka ama Ebenezer tapelehon ma dirinta, suaranta dohot endenta si
ganup minggu tu Jesus, Sipaluai.

V.10. ___________________ : Natal on ma tutu gabe pahehehon hita saluhutna muse

manghaporseai Jesus jala marsomba tu Ibana sian sandok ngolunta dohot gogonta.

LITURGI VI : TAPAUBA MA ROHANTA GABE PARHOLONG ROHA

VI.1. _____________________ : Boha Amang, Inang, hita saluhut angka na pungu

dison? Olo do hita manjangkon haroro ni Sipaluai? Olo do hita manjangkon holong ni roha ni
Debata di ngolunta, di rohanta, di jabunta nang di punguanta on?

VI.2. ____________________ : Molo olo do hita manjangkon holong ni roha ni Debata i

marhite Pesta Natalta on, tabolongkon ma roha pangiburuon, hosom, late dohot
parbadabadaan sian ngolunta.

VI.3. ___________________: Unang be adong sian hita na sapunguan on na

masihataan, masihosoman, ai marisuang do Pesta Natal nang endenta ganup Minggu molo so
adong hoong di hita.

VI.4. ___________________ : Sibunu jolma do ganup na hosom roha di donganna; jala

diboto hamu do, na so mian hangoluan salelenglelengna di nasa dibunu jolma.

VI.5. ____________________ : Sian on do tatanda haholongon ni roha: Sian ibana na

mangalehon hosana humongkop hita. Hita pe, tama do talehon hosanta humongkop donganta.

VI.6. ___________________ : Molo adong paradongan di tano on, ia diida hurangan

donganna, gabe dihinsu ateatena maradophon halak i, tung songon dia ma mian holong ni
roha ni Debata di bagasan ibana?

VI.7. ___________________ : Hamu angka anaha, unang ma hatanta dohot dilanta

mangkaholongi; naeng ma marhitehite pambahenan dohot hasintongan.
VI.8. ___________________ : Sihaholonganmu do Tuhan Debatam sian nasa ateatem,
sian nasa hosam dohot sian nasa roham! I do patik raja jala parjolo.

VI.9. ___________________ : Alai dos do arga ni na paduahon on: Sihaholonganmu

do donganmi doshon dirim! Patik na dua on do mangkangkam nasa patik dohot hata ni
panurirang.

VI.10. ___________________ : Tutu do i dongan. Tahaholongi ma Debata, ala nunga

jumolo Ibana manghaholongi hita. Alai pargabus do halak na mandok: Holong rohana di
Debata, hape dihosomi donganna.

VI.11. __________________ : Ai na so manghaholongi donganna na niidana, tung

songon dia ma haholonganna Debata na so niidana?

IX.12. _________________ : Antong, marhite Natalta sadarion, gabe parroha holong ma hita. Na
manghaholongi Debata, ima na manghaholongi nang donganna. Selamat Hari Natal ma di hita!