I.

PATUJOLO
Tama do hita mandok mauliate tu Debata, siala asi ni rohaNa dohot pangaramotionNa
umbaen tarbahen hita marhahipason sahat ro di ujung taon 2020 on, hipas do sude ruas dohot
parhalado ni hurinta atik pe taadopi pandemik covid-19. Mangihuthon data survey ni WHO,
220 negara ma di portibion na terdampak covid-19 termasuk ma negaranta Indonesia, 81 juta
halak na terinfeksi jala 1,7 juta halak namonding. Tahilalahon do denggan ni basaNa dohot
pasu-pasuNa, songon ruas ni Huria na mangolu marojahon tu Hata ni Debata jala na maniop
togu haporseaon tu Tuhanta marhite HataNa nabadia i. Ia ngolu ni partondionta manang ngolu
ni haporseaonta boi dohonon do songon ngolu ni halak na porsea dipadan na robi ima bangso
Israel na diparmudumudu Debata di sude langka dohot gulmit ni ngoluna. Songon hata ni
Debata na tarsurat di 2 Musa 13:21 “Jala Jahowa mardalan di jolonasida, ia arian marhitehite
ombun na marsijonjong manogihon nasida, asa tarbahen nasida di dalan i, ia bornginna i
marhitehite api na marsijonjong manulu nasida, asa tarbahen nasida mardalan arian dohot
borngin. Suang songon i do nang ngolu parhuriaonta di masa nuaeng on. Debata do naung
mardalan di jolonta margogoihon hita laho mangalehon hatiuron dohot mangurupi hita di sude
angka hamaolon ni ngolunta siganup ari. Sialani i tama do tahamauliatehon sahat rodi
partingkian on, dang adong ruas ni hurianta na namarmara, naterkonfirmasi terjangkit virus i.
Hinorhon ni pandemik covid-19 i, tarambat do angka parsaoran di hurianta on, Di
nasailaon mansai bidang do angka sihobasan di huria on, mamungka sian akhir Maret 2020
mansohot do angka kegiatan hombar tu rencana program ni hurinta. Sialani i do andorang so
tatinggalhon taon 2020 on, jumolo tatangkasi ma jolo ruji-ruji manang pardalanan ni hurianta
di bagasan na sataon bolon on.

II. PANGHOBASION NI HURIA

1. Parmingguon
Denggan do mardalan parmingguon di hurianta on sahat tu tanggal 22 Maret 2020. Alai
dunghon sahat surat Pastoral sian Praeses Distrik X Medan Aceh dohot Ompu Ephorus, per
tanggal 20 Maret 2020 perihal pembatasan kegiatan di gereja, mansohot ma sude parmingguon
di gereja on sahat tu tanggal 26 Juli 2020, ima nagabe tapatupa parmingguon di bagasta be
manang ibadah keluarga. Dunghon adong izin sian Gugus Tugas Covid-19 Kecamatan
Sunggal, mulai tanggal 2 Agustus 2020, tapatupa ma muse parmingguon hombar tu peraturan
protokol kesehatan sahat tu partingkian on.
Angka on ma parmingguon na hinobasan ni Hurianta di taon 2020:
1.1. Sekolah Minggu
Denggan do mardalan panghobasion tu dakdanak Sekolah Minggu sahat tu tanggal 22
Maret 2020. Dunghon ni i mansohot ma parmingguon nasida siala pandemik covid19 sahat tu
partingkian on. Marsiala ma i ala umur 0-15 tahun sangat rentan tertular virus i.
Parmingguon Singkola Minggu nasomal hian masuk mai jam 07.30 WIB, tamba torop do
ianakhonta naro tu parmingguon i dunghon tapatupa kendaraan mangantar jemput nasida, ima
rata rata 160 halak. Baoa mai 70 halak dohot borua 90 halak. Sipareahonta mai tu taon
nanaeng ro mangalului solusi asa boi tongtong angka ianakhonta marminggu, isarani live
steraming dohot lan na asing.
1.2. Minggu Pagi Berbahasa Indonesia
Parmingguon napinatupa ni hurianta namarhata Indonesia siganup minggu na masuk
pukul 07.30 WIB, denggan do mardalan ulaon i sahat tu tanggal 22 Maret 2020. Dung
mansohot mulai tanggal 29 Maret 2020 sahat tu tanggal 26 Juli 2020 ima nagabe tapatupa
parmingguon / ibadah keluarga, tapungka do muse Minggu Pagi, masuk pukul 08.00 WIB
gabe marbahasa Batak, alani pembagian Sektor namarninggu pagi dohot siang hombar tu
menaati aturan protokol kesehatan.
1
 1.3. Minggu Siang Berbahasa Batak
Parmingguon Minggu Siang na masuk pukul 10.00 WIB di hurianta martupa do sahat tu
tanggal 22 Maret 2020, alai mansohot ma muse mulai tanggal 29 Maret 2020 sahat tu tanggal
26 Juli 2020 ima nagabe tapatupa ibadah keluarga. Mulai tanggal 2 Agustus 2020 tapungka do
muse parmingguon siang alai marganti soring ma na 2 group marminggu manogot dohot
marminggu siang, 1 group adong 4 sektor. Group I ima sektor I, II, IV dohot VI. Group II ima
sektor III, V, VII dohot VIII.
1.4. Parmingguon di huta
Dipatupa hurianta do Parmingguon di huta molo adong ruas na marujung ngolu, molo
boho mamolus minggu nanihobasan ni Sintua Wijk jala nanidohotan ni ruas naadong di Wijk i.
Alai dunghon bulan April sahat tu partingkian on, mansohot ma ulaon on siala pandemik
covid-19.
2. Partangiangan
Di taon 2020 on, angka on ma Partangiangan nanihobasan ni hurianta:
2.1. Partangiangan Wijk
Denggan mardalan partangiangan Wijk di VIII sektor nadipatupa setiap hari Rabu malam
jam 20.00 WIB, na di pungka di bulan Pebruari 2020 sahat tu tanggal 18 Maret 2020,
dunghon i mansohot ma siala pandemik covid-19. Alai melalui cetakan warta jemaat tabaen do
turpuk sijahaon ganup ari, anggiat marhite namanjaha turpuk siganup ari i dang mansohot ruas
ni hurianta manjaha hata ni Debata songon singkat ni partangiangan natapatu i.
2.2. Partangiangan Khusus
Holan partangiangan Pamuhai Bona Taon dohot Ujung Taon 2020, Partangiangan
Mamasuhi Bagas, ido nadipatupa hurianta di bagasan taon on. Partangiangan khusus isarani:
Partangiangan Passion, Partangiangan buha-buha Ijuk mansohot do siala pandemik covid-19.
3. Ulaon Sakramen
Dua do sakramen na tinonahon ni Tuhan Jesus Kristus siulahonon ni Huria, i ma:
Pandidion Nabadia dohot Parpadanan na badia. Denggan do dipatupa Hurianta Sakramen na
dua i di taon 2020 on:
3. 1. Pandidion Na Badia.
Di taon 2020 on, sahali do dihobasi hurianta Pandidion na Badia tu ruas ni hurianta. Ima
di tanggal 8 November 2020, godangna 7 halak: 5 baoa dohot 2 borua.
3.2. Parpadanan Nabadia.
Di bagasan taon 2020 on sahali do dihobasi hurianta mar-Ulaon Nabadia. Ima na di
tanggal 25 Desember 2020 tingki Pesta Natal I / Parningotan Ari Hatutubu ni Tuhan Jesus.
Jala dipatupa hurianta do muse marulaon nabadia tu ruas ni hurianta molo dipangidohon nasida
manang siala ni parsahiton naposa asa boi masisean dosa tu keluarga tarlumobi tu Tuhan i.
4. Kunjungan Sosial
Mardalan do panghobasion on tu ruas ni hurianta marhite na manopot nasida tu bagasna
be uju marsahit dohot tingki marsitaonon. Alai dang dope maksimal dope ulaon i ala hurang
rentana Parhalado dohot ruas ro manopot manang patoguhon nasida. Alani tujoloanon renta
ma nian sude parhalado dohot ruas asa lam tu ulina tutu panghobasion on ditonga-tonga ni
hurianta. Sipahinsaton jala sipahembangon ni hurianta do panghobasionon tu angka taon
namangihut asa lam togu jala pita haporseaon ni ruas ni Hurianta tu Debata uju mangadopi
angka sitaonon manang hamaolon.
5. Parguru Malua / Manghatindanghon Haporseaon
Siala pandemik Covid19, mansohot do parguru malua sian bulan Maret sahat tu bulan Juli
2020. Mulai ma dipatupa parguruon setiap hari Minggu sore di bulan Agustus sahat tu bulan
Desember 2020 laho manjalo parsiajaran partondion, pembinaan parbinotoan di hata ni
2
Debata, pangantusion taringot tu Huria, pembinaan Mental, Moral dohot Etika. Nadi tanggal
26 Desember 2020 i nunga be Manghatindanghon Haporseaon nasida, godangna 55 halak,
baoa 27 halak dohot borua 28 halak.
6. Partumpolon / Pamasumasuon Pardongansaripeon
Di taon on, dipatupa hurianta do panghobasion partumpolon dohot pamasumasuhon tu
anak dohot boru ni hurianta. Namartumpol di hurianta godangna 8 pasang calon penganten jala
na tarpasupasu godangna 3 pasang. Andorang so tarpasu-pasu dipatupa hurianta do Konseling
Pranikah. Denggan do mardalan ulaon i.
7. Sermon Parhalado
Mardalan do Sermon Parhalado dihurianta na dibagasan nasataon on, ima na di patupa di
ganup ari Jumat pukul 20.00 WIB s/d selesai di Ruang Konsistori. Alai siala mansohot
partangiangan sektor dang pola dipatupa panangkasion turpuk jamita partangiangan, holan
marsagi ulaon panghobasian nanaeng siulahonon dibagasan na saminggu i do dohot pasahat
angka laporan sektor, asa i pe muse diuduti ma manghatai manang manaringoti angka na
ringkot siulahonon manang siputushonon na berhubungan tu ulaon panghobasion ni hurianta.
8. Pesta Huria
Dengan do mardalan angka pesta di hurianta on songon naung ni aturhon ni Hatopan
HKBP di Almanak i. Pesta Parningotan Hamamate Ni Tuhan Jesus, Pesta I Parningotan
Haheheon Ni Tuhan Jesus, Pesta Parningotan Hananaek Ni Tuhan Jesus, Pesta I & II
Parningotan Hatutubu Ni Tuhan Jesus, Pesta Gotilon dohot Pesta Lilin. Alai Pesta II ari
Haheheon Ni Tuhan Jesus dohot Pesta Ulaon Zending dang dipatupa hurianta siala ni
pandemik covid-19.
8.1. Pesta Gotilon
Dalan laho mandok mauliate tu Debata, ala nunga tajalo pasupasu sian Ibana marhite sian
sinur na pinahan dohot gabe na taula. Hipas pardalandalan dohot mangomo angka partigatiga,
ro di angka ulaon na marragam i, tarajumi parhitean ni Debata do i mamasumasu hita. Hombar
tusi, dalan mandok mauliate tu Tuhan marhite angka pasupasu na tajalo sian ulaon na
marragami tapatupa do acara Pesta Gotilon nadi tanggal 8 November 2020 i jala denggan do
mardalan uloan i.
8.2. Pesta Tahun Ulaon Zending
Tahun 2020 on, ditotophon do tahun Ulaon Zending HKBP. Hombar tu rencana program
ni hurianta patupaon ni hurianta hian do ulaon on dinalaho manumpahi Kas Operasional Huria
dohot Ressort, jala nunga terbentuk kepanitiaan, alai siala pandemik covid-19, tertunda ma
ulaon on.
8.4. Pesta Lilin
Tongtong do tapatupa Pesta Lilin di taon 2020 on dalanta laho manumpahi dana
operasional ni hurianta. Denggando mardalan ulaon i, marhite
8.5. Pesta Natal
Songon nasomal diangka tahun naung salpu, dipatupa hurianta do angka pesta natal seksi
kategorial, ima sikola minggu, remaja, naposobulung, ina dohot ama. Alai di taon 2020 on,
masohot do sude pesta natal kategorial, da holan natal keluarga, parpunguan bodari, pesta natal
I dohot II do napinatupa ni hurianta, siala pandemik covid-19.

III. PANGHOBASION NI DEWAN

1. Dewan Koinonia
Dewan Koinonia ima dewan na pinajongjong laho manghobasi jala maniroi angka
kategorial na adong di hurianta. Denggan do mardalan panghobasion naniuluhon ni Amanta St
JA Bintang laho maniroi angka kategorial i.
3
1.1. Seksi Sekolah Minggu
Tongtong do mauliate dohonon di haradeon ni angka Guru Sekolah Minggu
namangalehon rohana laho mangajari angka anggi nasida sekolah Minggu sahat tu bulan Maret
2020 i, torop nasida 10 halak na tiniroan ni amanta St H Butarbutar. Mansohot do sude angka
program nasida dunghon pandemik covid-19 on, alai tongtong ma nisosoan asa dibahen nasida
program kerja alternative asa unang vakum kegiatan ni angka ianakhonta sikola minggu tu
taon nanaeng ro.
1.2. Seksi Remaja
Sidukungonta do punguan remaja marhite Punguan koor Remaja di hurianta on, ai
termasuk do nasida songon generasi penerus. Denggan do parsaoran nasida marhite na tiniroan
ni Inanta St W br Nababan dohot pangajari Amanta R Simanungkalit. Dipatubegehon nasida
do ende koor di parmingguon siganup minggu pagi tingki so ro sorimago covid-19 i.
Parguruan nasida dipatupa setiap ari Sabtu bodarina, pukul 19.00 WIB di Gedung Sekolah
Minggu gabe tong do mansohot mulai bulan April 2020 i. Alai tongtong ma nisosoan asa
dibahen nasida program kerja alternative asa unang vakum kegiatan ni angka ianakhonta
remaja.
1.3. Seksi Naposo Bulung
Tarajumi do ia Naposobulung ima Bunga bunga na hushus na paangurhon goar ni huria i,
suang songon goarnai las do roha marnida punguan on ai parsidohot do nasida di angka
parendeon siganup minggu natiniroan ni Seksi NHKBP inanta St L br Simamora dohot Guru
Pangajari ima Amanta St TJ Siagian.
Asa lam tu hembangna punguan naposobulung tongtong ma nisosoan asa dibahen nasida
program kerja alternative asa unang vakum kegiatan ni angka ianakhonta naposobulung
Parguruan nadipatupa 2 hali saminggu, Malam Minggu jam 20.00 WIB di Gedung Konsistori
dohot ari Minggu jam 12.00 WIB di gereja on tong do mansohot dung pandemik covid-19 i.
1.4. Seksi Ina
Seksi Parompuan ni hurianta natiniroan ni Inanta St D br Togatorop, marguru koor do
nasida di ari Jumat jam 18.00 WIB jala laos dipatubegehon nasida do ende koor di
parmingguon siganup minggu siang, alai mansohot mai dung pandemik covid-19 i.
Ala tongtong do nirajuman nasida songon anggi ni parhalado di angka ulaon
parasinirohaon isarani na mandulo namarsahit, mangapuli tu namonding, suang songoni
manggohi angka gokhon dohot jou jou (Undangan) molo adong pesta sian luar ni hurianta,
laho mandohoti angka parguruan dohot angka ulaon huria, lam tamba ma haringgason di
nasida hahipason nang ganjang ni umur. Margogo ma pangajari Inanta Ny Pakpahan br
Gultom nang angka pangurus laho padimundimun punguan on. Molo tung pe sialani pandemik
covid-19 on, tongtong ma nisosoan asa dibahen nasida program kerja alternative asa unang
vakum kegiatan ni angka ina ni hurianta on.
1.5. Seksi Ama
Dos do peranan ni Ama dohot Ina di hurinta on, marhite punguan Koor Ama dohot Koor
Ina. Tu paniroi Ama ima Amanta St R Hutabalian dohot pangajari St TJ Siagian, tongtong ma
nisosoan asa dibahen nasida program kerja alternative asa unang vakum kegiatan ni angka ama
ni hurianta on. Namarguru hian setiap ari kamis bodarina jam 20.00 WIB di bagas ni anggota
punguan i gabe tong do mansohot dung pandemik covid-19 i.
2. Dewan Marturia
Dewan Marturia Ima dewan na manghobasi ulaon marbarita nauli (bersaksi) marhite
musik nang ende dohot pekabaran injil (zending).
2.1. Seksi Zending ( Perkabaran Injil )
Di taon 2020 mansohot do program kerja ni Seksi Zending siala pandemik covid-19.
Nunga terbentuk hian Kepanitiaan Ulaon Pekabaran Injil ( Taon Zending 2020) alai sundat do
4
tapatupa ulaon i. Seksi Zending ima naniuluhon ni Amanta St SP Hutagalung, tongtong ma
nisosoan asa dibahen nasida program kerja alternative asa unang vakum kegiatan ni seksi
zending tu taon naro on.
2.2. Seksi Musik
Musik dang boi tarsirang sian ibadah ganup minggu, ai olo do tubu ungut-ungut manang
moru hahomion ni parmingguon molo so pas parendeon ni song leader dohot organ, apalagi
ma molo dang ro parorgan naung martugas hian jala dang mangolu soundsystem. Marhite i
pinangido tu namanghobasi di seksi musik, Amanta St A Simanjuntak asa tutu adong haradeon
ni roha dohot pingkiran nasida laho manghobasi ibadah Minggu.
Secara umum denggan do nian parendeon na diiringi style musik sian keyboard naadong
di gerejanta on. Jala tu angka petugas parorgan asa diharingkothon ma latihan dohot Song
Leader, asa pas seirama parendeonta. Molo tung adong petugas naberhalangan manang
tarlambat pe, sahatopna ma diinformasihon tu seksi musik asa boi hatop dilului pangganti
nasida. Manang diupayahon ma mambuat Musik Box molo so boi adong parorgan, tarlumobi
di acara partumpolon dohot parbogason.
3. Dewan Diakonia
Mardalan do ulaon Diakonia di tonga ni hurianta di bagasan taon on, na patuduhon
hasadaon ni roha di saluhut las ni roha dohot arsak ni roha, ima: Parhalado, ruas, dohot Seksi
Sosial naniuluhon ni Inanta St H br Marbun BSc, CSt S Pakpahan dohot St M br Lumban
Gaol, dibagasan harentaon dohot hasadaon ni roha laho mandulo ruas na tongon di bagasan
parsahiton, manungkoli haporseaon ni ruasna marsitaonon. Dipatupa hurianta do mangelehon
dana sosial tu ruas ni Huria, na marsahasit, na berduka, marhite natapatupa Amplop Dana
Sosial di ganup Minggu paduahon. Na di bulan April dohot Agustus dipatupa hurianta do
dompet peduli dohot pasahat bantuan sosial (beras 10 kg, sembako sian distrik dohot masker),
dalanta mangurupi ruas naterdampak siala ni pandemik covid-19. Jala nadi tingki Pesta Natal I,
dipatupa nasida do Bakti Natal tu namabalu, nasakit menahun dohot ianakhonta na yatim piatu.
IV. PANGHOBASION NI PARHALADO
Di hamauliatehon roha do haradeon ni angka dongan Sintua mangurupi Uluan ni Huria di
angka sihobasan. Jala sahat tu tingki on nunga adong 25 halak Sintua jala 2 halak Calon
Sintua. Sipareahanta do tu angka taon na naeng ro, asa lam ringgas hita mandohoti sermon
Ressort dohot sermon Huria, disiplin waktu, haringgason tu partangiangan dohot parmingguon.
Anggiat ma tu joloan on, lam di tambai Tuhanta haporseaon dohot gogo, hiras ni roha dohot
las ni roha, habisuhon dohot hasadaon, lumobi ringgas ni roha mangulahon ulaon
haparhaladoonna be.
V. ADMINISTRASI DOHOT STATISTIK
Tongtong do dihobasi Amanta St DJ Hutabarat SPd selaku Sekretaris Hurianta penataan
Administrasi, anggiat lam tu dengganna asa boi mendukung tu panghobasion ni Hurianta, ima
na marpardomuan tu database haruason, warta jemaat, acara kebaktian minggu pagi, siang
dohot angka acara partangiangan dohot pesta huria, laporan parhepengon setiap minggu dohot
setiap bulan, surat menyurat dohot angka lan naasing.
Torop ni ruasta sahat tu tingkion ima: 1.367 halak, 332 kepala keluarga. Ama: 277
halak, Ina: 317 halak, Naposo Baoa: 181 halak, Naposo Borua: 154 halak, Remaja Baoa: 102
halak, Remaja Borua: 81 halak, Anak Sekolah Mingggu, Baoa: 128 halak, borua: 127 halak.
Lansia: Ama: 41 halak, Ina: 46 halak. Namabalu: Ama: 6 halak, Ina: 46 halak.
Namonding 11 halak, ruas napindah dohot naso gabe ruasta siala pindah so marboaboa: 8
keluarga, na hona RPP: 7 halak, ruas natamba: 3 keluarga

5
VI. PEMBANGUNAN
Di taon 2020 on tasangkapi hian do dinalaho mambangun Menara / Palaspalas marhite
naung tapatupa guguan toktok ripe Rp 500.000/ KK. Nunga rade hian kesiapan ni Panitia
Pembangunan, alai siala pandemik covid-19, tatunda do pembangunan i. Tu taon 2021 tatinjau
pe muse laho manguduti pembangunan Menara / Palaspalas i.
Taringot tu Rumah Dinas Huria siala naeng paroonta nama Pangula Gok Tingki manang
Pandita, nunga tarehab rumah dinas i. Saonari kondisina nunga 95%. Guguan toktokripe
Rumah Dinas Ressort, Rumah Dinas Huria dohot Angka kewajibanta di tingki Pesta Ulang
tahun napa-25 hon ni hurianta, sahat ro di tingki on, adong dope hita ruas ni huria naso
mambayar i, pinangido ma dohot gomos tu sude hita ruas ni huria marhite barita jujur taon on
asa talunasi ma angka kewajibanta namardomuan tu Pembangunan ni hurianta on. Jala annon
begeonta dope Laporan Keuangan ni hurianta.
VII. PANIMPULI
Songoni ma Barita jujur taon ni hurianta na boi tarpajojor hami. Di angka naung boi
dihobasi hurianta di taon 2020, tapuji ma Tuhanta siala pandonganion dohot denggan ni
basaNa do umbahen na boi tulus i. Di angka program na so boi mardalan dohot denggan, sai
dipargogoi Tuhanta ma Parhalado rap dohot ruas ni HuriaNa patulushon i tu taon na naeng ro,
asa lam jumpang angka panghobasion na ummuli di hurianta, lam majuna hurianta di
partondion nang di pembangunan fisik pe jala tongtong taboan di ganup tangiangta anggiat
tumibu salpu pandemik covid-19 on.
Pasahaton nami ma mauliate godang tu sude ruas ni Huria, Dewan dohot Seksi, na sai
tongtong mangalehon rohana di nasa panghobasion on marhite tangiang sumbangan pemikiran,
nang sipatupaon laho patulushon nasa na ringkot di Huria on. Gabe pelean na hushus jala
na badia ma i di adopan ni Debata, taingot jala tahaporseai ma: Sian Tuhan Debata Pardenggan
Basa jala Parasi Roha i do jaloonta balos ni i marlimpat ganda marhite angka ulaonta siganup
ari na so maralo tu lomo ni rohaNa, nang marhite parianakhononta dohot tu
saluhut pinomparta pe.
Na parpudi....
Naeng salpuhononta ma taon 2020 on, bongotanta ma sada taon na imbaru, ima taon
2021. Tuhanta ma na mandongani hita. Di bagasan haporseaon dohot pos ni roha ma hita
saluhut parhalado nang ruas ni huria pe, di taon 2021 jaloonta angka na dumenggan di hurianta
on nang di tongatonga ni bagasta pe. Syalom.... Horas.....

Hami na manurathon
Uluan Huria HKBP Parsaulian

St. Carles Sihombing

Pendeta Ressort
HKBP Immanuel Sei Semayang

Pdt EE Siringoringo SmTh