PNO MALEPEAH UHAN BALOIK (HAJAT MERESMI NAMO ANAK)

WAKIL BAHADIR
Baginai lah kayo tuo tagane tumbutan kato…
Yang mano lah hajat diea anok batino pado ahai nan malang ineh. . .
lah kito kerjea kan busamo-samo dari awal sampe akhir. . .
Lah kito tutauk pulo dingan du’ou berkeak du’ou salamak. . .
Apo kok adea pahalo dari kajin bacou du’ou kito itoh tadoih
Samo kito padieahkan, untuk anok kamanakan kito yg bahu lahe toh. . .
Apo lah yang kito pinta kapadou ALLAH, syafaat kapado rasso. . .
Badon hendaklah sihat. . .
Umo mak nyo panjang. . .
Reskoi ndok lah nyo muhah…
Berbakti pulo kapado indok bapouk nyo
Bagunea pulo bagi nusa dan bangsa, serto agamou nyo…

Mano ulak dari sabalik itoh pulo kayo tuo tagane tumbutan kato. . .
Di atoih namo lek dingan bapungko, Kerjea bajunjeung, pado ahai nan malang ineh. . .
die anok batino toh
lah bakemban lapeak, lah bakemban tika. . .
lah bapiouk g’deang, lah batungkou jareang. . .
adea pulo manengahkan
nasai dingan sa-ibeak. . .
gule dingan batane
ayea dingan sageleah. . .
yg mano nasai lah mengenyangi bagi kamai
gule lah tentau pulo lemok dingan masen nyo
ayea lah malepeah aoh pulo bagi kamai. . .
yg mano lah atoih hidangan kayo toh tadoih. . .
ideak dapeak pulo, kamai toh mambaleh baik budi jasou kayo toh
kamai serah kan uge kapadou ALLAH SWT untuk mambaleh kan nyo. . .

ulak dari sabalik itoh pulo kayo tuo tagane tumbutan kato. . .
Mano kito carai gadoin yg ideak retak
Banyouk dikit tentau pulo adea retoknyo. . .
Mano kito carai manusio ngan ideak basalah
Banyouk dikit tentau adea saloh nyo. . .
Kok tadapeak kesalahan sarapeak kamai ngan bahadir. . .
Kantai selaku pa-uleah kato, panyambon lideah
 Ayan puyoh kinantan sucai
Pandea kukok baleh mambaleh. . .
Mintok kayo broi maoh dingan hati sucai
Serto muko ngan amat jerneah. . .

TAGANE
Baginai lah kayo wakil bahadir tumbutan kato. . .
Yang mano lah tentang pintak pinto kayo toh tadoih. . .
Ideak dapeak sakato elang
Karno adea burun garudea. . .
Ideak dapeak sakato kantai surang
Karno kamai tuo tagane adea dudeuk due batigea…
Manunggau kayo toh duleu. . . ( WB : suko )

TAGANE
Baginai lah kayo wakil bahadir tumbutan kato. . .
Kok babisik toh lah tadengea, ba imbea lah talampa pulo. . .
Yang mano lah tentang pintak pinto kayo toh tadoih. . .
Lah sudeah ugea kato papatah itoh ngato…
Tukan si uleah si pandok kakai
Terjeung kalauk nyelan mahkuto. . .
Muko jarneah hatai pun sucai
kamai broi maoh sarapeak kayo. . . ( WB : TERIMAKASIH )

WAKIL BAHADIR
ulak dari sabalik itoh pulo kayo tuo tagane tumbutan kato …
nampok nyo Bajaleang toh lah mboh nyo sampea ka bateh
balayoi toh lah mboh nyo sampe ka pula . . .
Ngan di ameang toh lah pecah
Kok maksauk toh lah sampea puloa . . .
apo kok nan kinai
bukeang karakak tumboh di payo
karakak tumboh di batu licain. . .
bukeang laen pintak pinto kamai ngusoi kayo
ngurak silo, ngajun langkah baloik ka umoh masaing-masaing. . .
 ayam puteh kinantan sucai
pande kukok baleh mambaleh
nyo takukok harai lah siang. . .
mintak kayo lpeah dingan hatai sucai
serto muko dingan amat jerneah
kamai broi maoh sarapek kayo pungko. . .

TAGANE
Baginai lah kayo wakil bahadir tumbutan kato. . .
Sebelum kamai malepeh kayo toh ndok mangurakkan silo . . .
ngajun langkah, baloik ka umoh masaing-masaing . . .
Atoih namo kamai tuo tagane
adea pulo ndok nyampe kato agak sapatah duea. . .
Adot mahkuto raje dingan make
Karan satio jadi pangikat nyo. . .
Syarak ngan ngato adeak ngan make
Segala sesuatu tentau adea sbot nyo. . .
Sbeak di apo, mpo toh manimpo
bagureuh lalau, gajeah nempoh, antain patah , enggang terbeang…
Sbeak dek apo, sarapek kito manunggoh bakumpo
Pado umoh die anok batino, pado ahai nan malang ineh. . .
Kamai toh niang, ngan dateang baserau. . .
Kamai toh niang, ngan dateang ba imbea…
Satibou nyo kayo toh di sinoi
Ideak pulo kamai toh sio-sio…
kadaton kayo, lah kamai tantek
Tgouk kayo, lah kamai sapo
Kaduduk kayo, lah kamai mulyo kan pulo…
Ideak pulo lupo kamai manengahkan
Adot pusko umah ngan di tindeh…
Lah kamai katengah kan
ukok dingan sabateang, ganti siheah dingan sakapo…
nampok nyo ukok itoh lah tapuntong
sireh toh lah marak pulo…
daheah kayo toh lah tenang
penak kayo toh lepeah. . .
TAGANE
Baru lah kamai manyampekan hajat dan maksud die anok batino…
Yang mano lah hajat die anok batino pado ahai ngan malang ineh. . .
lah kito kerjea kan busamo-samo dari awal sampe akhir. . .
Lah kito tutauk pulo dingan du’ou berkeak du’ou salamak. . .
Apo kok adea pahalo dari kajin bacou du’ou kito itoh tadoih
Samo kito padieahkan, untuk anok kamanakan kito yg bahu lahe toh. . .
Apo lah yang kito pinta kapadou ALLAH, syafaat kapado rasso. . .
Badon hendaklah sihat. . .
Umo mak nyo panjang. . .
Reskoi ndok lah nyo muhah…
Berbakti pulo kapado indok bapouk nyo
Bagunea pulo bagi nusa dan bangsa, serto agamou nyo…

Mano ulak dari sabalik itoh pulo kayo wakil behadir tumbutan kato. . .
Di atoih namo lek dingan bapungko
Kerjea bajunjeung pado ahai nan malang ineh. . .
die anok batino toh
lah bakemban lapeak, lah bakemban tika. . .
lah bapiouk g’deang, lah batungkou jareang. . .
lah manengahkan
nasai dingan sa-ibeak. . .
gule dingan batane
ayea dingan sageleah. . .
yang mano lah atoih hidangan kamai toh tadoih
bapintah ba uhan banyeak lah namo nyo . . .
ntah adea salah ajun
salah letok ngan ideak pado tempek nyo. . .
basuo dalon ayea , bajumpea dalon makanan, ngan ideak menyenangi bagi kayo toh. . .
Sudeah ugea papatoh toh ngato . . .
Mano kito carai gadoing ngan ideak retak
Banyouk dikit tentau adea retok nyo. . .
Mano dicarai manusio ngan ideak basalah
Banyouk dikit tentau adea saloh nyo. . .
Kok tadapeak kesalahan atas sarapek kamai
lek ngan bapungko, kerjea ngan bajunjeung pado ahai ngan malang ineh. . .
Kantai salaku pa-uleh kato, panyambon lideah. . .
 Ayan puyoh kinantan sucai
pande kukok baleh mambaleh. . .
Mntak kayo broi maoh dengan hatoi sucai
serto mukoa ngan amat jerneah. . .

WAKIL BAHADIR
Baginai lah kayo toh tuo tagane tumbutan kato. . .
Ngan mano lah atoih pinta pinto kayoa toh tadoih. . .
Lah sudeah ugea bak kato papatoh toh dingan ngato. . .
Bsoi toh lah talantak di papang
daweak lah talukaih di bateu. . .
Ideak dapeak kantai bakato surang
Ba undoing ba-ineak kamai duleu. . .
manunggau kayo duleu . . . ( TG : suko )

WAKIL BAHADIR
Baginai lah kayo toh tuo tagane tumbutan kato. . .
Nunggau toh tibea dikayoa , baundoing ba ineak puloa tibea sarapek kamai. . .
Ngan manolah atoih pinta pinto kayo toh tadoih. . .
Lah sudeah ugea bak kato papatoh toh dingan ngato. . .
jernoih ayi danou nyo kincai
Tempek putai mandai batimboa. . .
Muko jernoih, hatai pun sacai
Kamai broi maoh sarapek kayo pungko. . . (TG : TERIMAKASIH)

TAGANE
Ulak sabalik itoh pulo kayo wakil behadir tumbutan kato. . .
nampok nyo Bajaleang toh lah mboh nyo sampea ka bateh
balayoi toh lah mboh nyo sampe ka pula . . .
Ngan di ameang toh lah pecah
Kok maksauk toh lah sampea puloa. . .
Yang mano lah atoih pinta pinto kayo toh tadoih
bukeang karakak tumboh dipayo
karakak tumboh di batu licain. . .
mano lah atoih pinta pinto kayo, pado kamai pungko
ndok ngurak silo , ngajun langkah baloik ka umoh masaing masaing. . .
Sungguh pun sendo itoh kayo wakil bahadir tumbutan kato. . .
Jangeang talumpak kito tuju ngan tinggai
Jangeang tasuhok kito tuju ngan ndah . . .
Walaupun putauh sakato kantai
Putauh kato dek musyawarah. . .
Manunggau kayo toh duleu. . . ( WB : suko )

TAGANE
Baginai lah kayo wakil behadir tumbutan kato. . .
Atoih pinta pinto kayoa toh tadoih
Kok babisik toh lah tadengea
Baimbea toh lah talampa puloa. . .
Ilea barakoik ka baton harai
Trauh ka ulak laman tapiang. . .
Kmai lpeh dengan hatoi sucai, serto muko ngan amat jernoih
Maninggang kan tmpek kamai spangka, broi maoh kantai lboih dan kurang. . .

WAKIL BAHADIR
ASSALLAMUALLAIKUM WR. WB