PITUAH MANJANANG

PANGKA : baliau datuek,datuek…….

UJUANG : manitah lah datuek,datuek…….
PANGKA : Ma nankadi pulangkan juo kabakeh datuek, iyo takana pulo dek ambo bak jannyo
rawi urang tuo-tuo bak umpamo pantun hadist melayu kanamonyo
Tuan katik mangarang malue
Malua takarang di umbuak pua
Urang latak di ateh tuduang
Lah hasia urang di dapue
Lah malimpah cando kalua
Lah patuk kolah di ansue ka ujuang
Sakiro itu nan ka di pulangkan kapado datuek…..

UJUANG: alah ukue sampai dek datuek ,datuek…….

PANGKA : bilang hinggo itu nyo mah datuek,datuek,,,,,,,
UJUANG : baliau datuek,datuek…….
PANGKA : manitah lah datuek,datuek…….
UJUANG : Jikok sapanjang panitahan datuek tadi bana pulo tumah datuek….

Biduek balabuah di muaro

Biduek kaciak kapa pincalang
Biduek nan dari tanah basa
Nangkodoh banamo satigamo
Sagadang gadang biduek bak kato nangkodoh
Sagadang gadang balai bak kato sibujang juaro
Gadang alek bak kato sipangkalan
Kami di ujuang kamanarimo salamek sajo komah datuek

PANGKA : alah ukue sampai dek datuek ,datuek…….

UJUANG : bilang hinggo itu nyo mah datuek,datuek,,,,,,,
PANGKA : baliau datuek,datuek…….
UJUANG : manitah lah datuek,datuek…….
PANGKA : Bana pulo tumah sapanjang panitahan datuek nan katangahkan tadi

Kalimpanang nan tumbueh di tabiang

Nak kaulu rang surian
Nak kadalam rimbo nangko
Tabu di bao urang kapakan
Katokan rajo janang kami ka tagak manatiang
Nan patuk dahulu kok takudiankan
Nan patuk kudian kok takadahulukan
Rila jo ma,af kami mintanan tanamo silang nan bapangka
Karajo nan bajunjung komahyo datuek…..
Kerapatan Adat Nagari Panyakalan seksi pelestarian adat dan budaya
UJUANG : alah ukue sampai dek datuek ,datuek…….
PANGKA : bilang hinggo itu nyo mah datuek,datuek,,,,,,,
UJUANG : baliau datuek,datuek…….
PANGKA : manitah lah datuek,datuek…….

UJUANG : Jikok sapanjang panitahan datuek tadi iyo pulo tumah datuek…..
Kalimpanang nan tumbueh di tabiang
Nak ka ulu rang surian
Nak ka dalam rimbo nangko
Kalimpanang rang papati
Katokan rajo janang datuek… katagak manatiang
Nan patuk dahulu kok takudiankan
Nan patuk kudian kok takadahulukan
Lai janang datuek nan kamamparatikan tumahnyo datuek…..

PANGKA : alah ukue sampai dek datuek ,datuek…….

UJUANG : bilang hinggo itu nyo mah datuek,datuek,,,,,,,
PANGKA : baliau datuek,datuek…….
UJUANG : manitah lah datuek,datuek…….

PANGKA : Babunyi tarompet di mahligai

Gadang di palu jo cumat cumat jo di tangah
Takajuk buruang ateh udaro
Ateh mahligai rajo batak
Itu perintah rajo kito
Zat banamo ampek ririk
Ririk banamo tigo pulo
Kinipun janang kami kakatangah
Ka mananpuah ririk katigonyo
Ado nan tahadok tabulakang
Rila jo maaf kami mintak
Adat baitu dahulunyo

UJUANG : alah ukue sampai dek datuek ,datuek…….

PANGKA : bilang hinggo itu nyo mah datuek,datuek,,,,,,,
UJUANG : baliau datuek,datuek…….
PANGKA : manitah lah datuek,datuek…….

UJUANG : jikok sapanjang panitahan datuek tadi bana pulo tu mah nyo datuek

Tarantang suto di kinamat

Di calut nak urang ampang gadang
Anjalai darai badarai
Badarai kadalam padi
Kerapatan Adat Nagari Panyakalan seksi pelestarian adat dan budaya
 Tajelo ateh pamatang
Sunat kato dek baulang
Pasa jalan dek baturuk
Buah panitahan datuek di anjuang tinggi di amba gadang
Lalukanlah datuek, datuek……..

PANGKA : alah ukue sampai dek datuek ,datuek…….

UJUANG : bilang hinggo itu nyo mah datuek,datuek,,,,,,,
PANGKA : baliau datuek,datuek…….
UJUANG : manitah lah datuek,datuek…….

PANGKA : Dang katolah dapek ambo bak ibarek ayie satitiek kato nan sapatah
Kok buleklah bulieh di goloangkan
Kok picaklah bulieh dilayangkan
Lah bakuasokan sajo kapado sirajo janang kito
Tumah datuek…...

UJUANG : baitu molah nyo datuek …….

Kerapatan Adat Nagari Panyakalan seksi pelestarian adat dan budaya