PHP

Situasi: Suasana rumah. Malam. A: (Bicara sendiri) Pigi nda eh di ibadah natal? Doh, malas le kwa mo bakudapa deng dia. Kage le tamang-tamang somo gara ini. Bagimana jo kang? A: (HP berbunyi BBM dari B) Eh, ada bbm (kemudian, baca BBM) A: Adoh, napa le anak satu so ba bbm. Goda-goda pa kita pi TO. Atau kita iyo jo kang supaya kalo dapa tanya kyapa nda pi ibadah natal, kita bilang da bajalang deng B noh. Hahaha. A: (balas BBM) Woy, parah ngana noh. Ada ibadah natal kong Cuma pangge pa kita pi TO. Mar kita mo iko noh deng ngana hahaha. Basinggah eh, kita so basiap kwa ini. Oke sip?! KIRIM. C & D: (pangge A) C: Mo pi ibadah toh? So jam 7 ini. Marijo. D: Iyo, so lat komang ini. A: Nda mo pigi sto kita noh D: Karna? C: So nda war-war le ini. A: Iyo, malas kwa. Sbantar le disana kage ta bakudapa deng dia kong tamang-tamang somo gara. Lebe bae ta kaluar pi mantos deng B. Napa dia da pangge, dia bilang ada film baru kata di TO C: Dia? Maksudnya? tu cewe yang da dekat-dekat deng ngana, somo amper jadi mar nyanda kote hahaha. Katu eh D: Oh, tu tamang-tamang da cerita tuhari di ibadah dang? A: odoh heboh skali kote itu? Ta so lebe malas tre mo pigi. Malas kwa mo lia depe muka. PHP skali. C: Apa le tu PHP? D: Haa? Hari bagini kong nintau PHP? Kasiang eh A: Pemberi harapan palsu, men Kemudian, B datang B: Woy tamang, so siap jo ini? A: Eh tuangali pe lama skali noh B: Maklum, da ba gaga dulu dang hahaha C: Mo pi mana ngoni? A: Tadi dang ta so bilang mo pi mantos D: Jadi nda mo pi ibadah natal dang? B: Nyanda, torang m gaul-gaul TO jo dulu. Ibadah natal kan tiap taon ada, kalo tu film Cuma brapa hari somo ta ganti film laeng

D: Film apa so itu? B: The Hunger Games dang. Yang so pernah kaluar waktu lalu, ini depe lanjutan noh. D: Ha? So ada dang? Aduh suka tre pi bauni. Kita da iko kwa depe cerita dari pertama. C: Woy ibadah woy. Ngoni ini dang eh D: (membujuk C) manjo kwa pi bauni deng dorang. Cuma skali-skali kwa, neh neh neh. C: Hii, kyapa so ngana B nemau pi ibadah natal? So pangge-pangge tre pa dorang dua pi TO. B: Malas kwa kita. C: Karna? So kurang sama jo ngana deng A. dia le kata malas noh. B: Masih saki hati kwa kita deng tu majelis kolom. Tuhari da ba janji mo berkunjung waktu kita pe ulang tahun, mar ta da tunggu-tunggu sampe malam dorang nda muncul. Ini komang tunggu-tunggu jo kalo kita mo muncul le. Kira sto Cuma dorang boleh ba PHP. Kita le boleh. C: Supaya sama dang? Adoh bukang main ngoni dua ini eh. Cuma karna tu hal-hal kecil sampe nda mo pi ibadah.. D: Cuma itu katu for ngana, mar kalo for dorang, barasa itu noh. A: Apalagi kita, ba bekas sampe di hati le. B: Kira kwa enak so orang ja PHP akang C: Maksudnya dang toh, somo natal bagini le ngoni masih mo simpan-simpan tu saki hati gara-gara dapa PHP. Coba kwa move on jo. Lagian torang mo pi ibadah natal kan for merayakan kelahiran Tuhan Yesus toh yang paling penting, masa torang pe sukacita Cuma ilang percuma karna saki hati? (tiba-tiba E datang) E: hey ngoni samua. Kyapa rupa lama mo sampe kang di tampa ibadah? Baru kita sendiri do e h tu pemuda disana. Hehehe.Eh, Ada apa dang ini rupa serius skali? C: Napa kwa dorang nda mo pi ibadah Cuma mo pi TO jo kata. E: karna kyapa nemau pi ibadah natal? C: Satu masih saki hati karna dapa PHP dari cewe dia da ser-ser, tu satu da dapa PHP dari majelis kolom, napa le ni satu so iko-iko karna film baru kata di TO. E: Astaga eh kasiang. Torang kan mo menyambut kelahiran Tuhan Yesus masa jadi malas pigi Cuma karna dapa PHP? C: toh, apa kwa kita bilang E: Kita Cuma mo kase inga ulang jo dang, ta yakin kwa ngoni so tau ini. Ngoni pe rasa saki hati karna dapa PHP itu wajar karna torang samua itu manusia. Cuma torang musti bersyukur karna torang pe Tuhan nda ja PHP akang pa torang. Di Alkitab dari sebelum Tuhan Yesus lahir nabi so bernubuat mo datang Juruselamat yang mo tebus torang samua. Dan buktinya memang Tuhan Yesus da lahir toh kong selamatkan pa torang bukang Cuma PHP? Jadi torang musti rayakan itu dengan sukacita.

B: iyo kang? Kyapa kita kong boleh lupa eh kalo kita punya Tuhan Yesus yang nda ja kase harapan palsu for kita. Buktinya biar majelis nda datang berkunjung, Tuhan tetap kase umur panjang deng kesehatan for kita. C: Bukang Cuma itu, yang paling penting Tuhan Yesus so kase keselamatan for torang samua asal torang percaya pa Dia. A: Ah, iyo. Butul itu. Berarti kita musti berharap pa Tuhan kalo Tuhan pasti kase jodoh yang terbaik for kita. Kalo kita nda jadi deng tu cewe berarti bukang dia tape tulang rusuk hehehe E: Nah, ta so feeling kwa pasti ngoni langsung mangarti tape maksud kata-kata tadi. Mantap memang. Jadi Tuhan Yesus itu bukang Pemberi Harapan Palsu mar Pemberi Harapan Pasti. Hahaha B: Asik skali tu kata-kata A: Quotes baru lagi ini. Pemberi Harapan Pasti. E: Oh jelas, supaya ngoni samua senang. Manjo dang pi ibadah neh, so lat skali ini C: Manjo dang D: yah, batal pi TO dang? C: adoh, nanti besok sore jo torang bajalang sama-sama pi TO. Masih ada kwa paling sampe besok. Skarang pi ibadah natal dulu, oke?!