Manyuruah alek 2 mamulangkan siriah & Mintak Tukuak

Alek 1 : Ruponyo nan kamanjadi buah bana dek ambo bakeh sutan, nan batuah di tanah moka,daratan
bagunuang tenggi. Lah sapakek lauwik jo darek, lah sakato alam minangkabau, itam lah lakek ka
kudarang, merah lah tapasang di kasumbo, tembak lah tibo di alamat, tantangan bangkalai nan ka
mangguntiang, batenggang sutan tantang itu. Iko bana dipulangkan kabakeh sutan..

Alek 2 : Ruponyo nan kamanjadi bana dek sutan madok kabadan diri ambo itulah kato sabananyo. Tapi
samantangpun baitu, pihak dek badan diri ambo bak umpamo kapa ketek. Balayia manapi napi,
katanggah takuik dek riak jo galombang,jikok salorong biduak ambo ko, buatan tukang kasa kakok,
rapek nan indak ba ambalau, jikok dietong pati paragatnyo, indaklah loyang timah putiah, hanyo
ambalau namo patinyo, sakali ambo maambalau lah tangga patinyo sampan, kalalu pandayuang
patah, kasuruik pidoman ilang. (rancak disutan tarabiknyo)

Alek 1: Ruponyo antaro ambo jo sutan indak ka baramuak batikam karih, rumik bamain pisau tajam, tajam
nan galik malukoi. Rancak dikaji malang jo mujua, kok kamujuran tibo di ambo, dapek wakatu
bungo kambang, anjuang balayia di musimnyo, layia talantang badai tibo, gayuang basabuang kiri
kanan, salamat kapa ka palayaran, baranti tantang palabuhan. Kok kamalangan tibo di ambo,layia
tabantang badai tibo, ombang manggapuang kiri kanan, tampaklah kilek barapi rapi, sinan babunyi
patuih tungga, biduak pacah pincolang rorak, nan kodoh mati di haluan, anak dagang baserak berai,
ibo jo rusuah lai kababujuak, jatuah tagamang lai ka bajawek. Iko bana nan marusuah dek ambo
kabakeh sutan.

Alek 2: Ruponyo nan kamanjadi bana dek sutan madok kabadan diri ambo itulah kato sabananyo. Makanan
tanuang jo panggana, itulah dek pandai agak, tau di awal dengan akhir, alamat tuah dengan elok,
indak cacek muaro malintang. Tapi samantangpun nan baitu, jan sutan rusuah bana, pikiran jan
dipamabuak, angan angan tu namonyo. Jikok dipandang kami dari sinyak,angin tanang riak salasai,
sampan batulak ka lawutan, hari baiak katiko elok, tarang bak bulan ampek baleh, eloklah kini
dilayiakan, palalu sajolah dek sutan didalam itu kami basamo, alah ka sanang hati sutan?

Alek 1: dek ambo yo muluik sapatah tu nan ambo nanti.........................................................................

 Malatak Kato

Alek : Ruponyo sapanjang kato sutan nan katangah, elok lamak ganggamnyo sadang, data bak lantai papan,
licin bak dindiang kaco, kaateh lah nyato tatamun jantan, kabawah lah nyato takasiak bulan, tarang
bak bagai lampu tagantuang, janiah bak paneh sudah hujan. Tapi samantangpun nan baitu, kato
talatak dalam barih, bana tasimpan di limbago, ikolah bana dipulangkan kabakeh sutan.

Pangka: Ruponyo sapanjang kato sutan nan katangah madok kabadan diri ambo itulah kato sabananyo. Nan
kajadi sauik jo sarupo tumbuah sarupo iko kini, alah dek adat nan balogam, pusako nan bakotak,
sakotak tunangan adat, saliliak korong jo kampuang, salingka barih jo balabeh, cupak pakai pakaian
kito, gantang tatap pusako lamo, warisan bodi caniago adat datuak parpatiah nan sabatang, ado
papatah dikatokannyo, katigo kato pusako, kaampek kato kamudian, sairiang adat jo pusako,
supakat kami mambanakan, baoklah rundiang jo baiyo, rundianglah kato jo mufakat, bak ambo
pakai sifat mananti.