NASEHAT UNTUK ANAK BATINO EPESODE 1

------------------------------------------------------
Assalamualaikum Wr. Wb
Alhamdulillah wabihi nastain ala umuriddunya waddin, as hadualla ila haillalloh wa as
haduanna muhammaddarrasullullah, amma badu

Bismillahirrohman nirrohim

Oii nak, nak gadis ayah, belahan nyawo ibu kandung, benih samato dek mamaknyo, gadih
nan ilok parasnyo, bungo pengilok rumah, penyamarak negeri alam lulo . Mari lah kemari
ado kato nak di sampaikan. Cubo dengarkan jleh-jleh simak nian nyato-nyato mak nyo jeleh
makna paham, sebab tiap kalimat bersasaran,setiap toto ditimbak ber alamat. Sepatah kato
di sebut, sehangok bicaro naik, dawai di hatey yang berdenting taucap jadiy nasehat,
wujudnyo nasehat ayah. Kok bisa membaco nan tasurat araif manyimak nan tasirat
nampaklah pulo nan tasurok, mako inssa alloh walau se ujung-ujung kuku kok di kembang
salueh alam, bie se gedang buah labu bumi dan langit ado didalam tandonyo uhang arif bijak
sana.

Memang betul nak, kalau di keleh di pembuluh di padang dalil yang nyato tentulah susah lah
uhang nak manarimo nasehat ayah ini, ragu tibo enggan pun datang patut tertegun
ditepian, kareno apo? Dek pancuran lapok batang buluh, balumut di lamun tanah ayah nan
bukan cerdik pandai, tapi cubo kleh tetesan air terjun nak, nan jernih bak mata kucing,
hulunyo di lubuk hati balabuh di hujung lidah, tiang dek anak menampungkan. kok untung
ilok lah itu, Terhadap nasehat yang ayah sampaikan di jadikan sitawa dan sidingin umpamo
kumpai dan cakraw pa ureh hidup lahir dan batin supayo isok idak tergamang nian.

Supayo senang hati ayah nak, pakaikan petang dan pagi, amalkan siang dan malam, nasehat
nan idak usah di lengahkan, saumpamo singkat pintak ayah, saciut napeh ka putus, sasintak
nyawo bercerai, hanya lah alloh yang taringat gufro na karobbana wa ilaikal masyir.

Manolah anak ayah, kalo di kleh pado nan lahir di pandang ka bangun tubuh, di hitung-
hitung pulo umur, sarato kiat dengan karenah, mako kau ko nak menjelang gadis, kini lah
masuk umur 15. Nan sa ibarat bungo julung kembang, manghijau pucuk pangarang, arai
kalupak mengelilinginyo, tangkai lemah tampuk bergetah, rupo ilok ilok, roman berkilat,
sedang di buai-buai angin, harum malinteh di sepanjang dusun, raut lantik permainan mato,
tertarik kumbang nan terbang, tertagun lebah sedang terbang, samo saniat sa kainginan,
hinggap sarto angan-angan.

Saumpamo lagi dalam kandang nak, duri tajam miang manggatal, tumbuh pun lagi
kalindungan, di situ letak nyo tuah, awak aman orang sentosa, bumi senang alam nyo sejuk,
tapi umpamo tumbuh pinggir jalan, nan rendahnyo jambo-jamboan, tingginyo jangkaw-
kangkawan, dahan rapuh batang meliuk, alamat di kisai orang lalu, hanyut serantaw lah kau
nak!, tanggunglah duso lahir batin, ayah di kujut penyesalan....

(bersambung NASEHAT UNTUK ANAK BATINO EPESODE 2)

NASEHAT UNTUK ANAK BATINO EPESODE 2
----------------------------------------------------------
Direntang-rentang dari hulu,
dikirai-kirai di taka Tatangguk ikan rayo,
diknang-kenang nan dahulu,
di urai-urai di papa di ulang carito lamo,
nan setetes idak do lupo, sebaris bapantang hilang,
kok pupoih dawet di karteh, tulisan di batin terkenang jugo.

Kalau di ingat semaso itu, petang kamis malam jumat, pandang pnoh bulan lah naik, mako
di bakelah kaminyan puteh, asap membubuang ka angkasa, di iring niat dengan nazar,
apolah ka isi doa? Kok bulih pintak diberi, naknyo dapetlah anak batino, guno nyo anak
batino penyambung sko keturunan, ka benih tampang samato uhang tuo, nyampang
paumur di panjangkan, ka pambimbing badan nan lah tuo, ayah nan idak badunsanak. Doa
di anta air mato, naik mambubung masuk embun, terbang manyisek-myisek awan, terbang
ke langit tujuh tingkat tibo di aras nyo basarang, disitulah gantiang potoih liang lah tebuk,
pintak bulih kendak belakuw kau pun lahir kedunia.

Mendengar lengking pkek tangih anak, tasintak ayah dalam cmeh lalu maraup sujud sukur,
kamat lulu di bisikkan, Alloh hu akbar..! mahasuci engkau ya alloh, segalo puji bagi zat yang
pemurah dengan rahman nyo, mako lekatlah kewajiban pada uhang tuo, apolah jenis
kewajiaban pada nyo ayah?

Partamo mambao turun madiy, Yang kaduo memberi namo,
Yang katigo meng akikahkan

Semanjak sesudah itu, anak barangsur-ansur tumbuh, raso ditungkat nak nyo tinggi, raso di
keka nak nyo lueh, nak semarak rumah tangga, di hitung-hitung hari, di bilang-bilang bulan,
di himpun menjadi tahun, maka masuklah tahun yang ke tujuh, tibo pulo hutang pado ayah,
apolah jenis hutang pado ayah? iolah menyekolahkan dan mengajar mengaji, serta
menunjuk, mengajarkan.
Dek arok anak nak ka gde, ingin nak somo dengan orang, mako ayah pun marantau jauh di
kampung orang, tungang tunggit mencari rezki, siang paneh malam berembun, saket di
tanggung badang surang, dak ado orang yang peduli, sagalo caro lah di tempuh, berbagai
raso lah di cubo, tinggal duo yang belum diraso nak, pertamo mati kaduo kayo, model itulah
ayah menggedang kan kalian. Mako dari itu nak patutlah kito bersukur ke yang satu, walau
babaju sederhana, sepatu dari rombengan, bersubang perak bersepuh, kok gelang barang
imitasi. Namun nak, itulah hasil cucur peluh, upah tulang timbalan jerih, bukan lah dari hasil
tipu kicoh rampok rampeh dan curi maling, nauzubilla hi minzalik.. jauhlah ayah dari itu.

Itulah kironyo, alham dulillah puji sukur lah ta anta kalian gde, kini Sekolah 3 SLTA, entah
balajut entah idak itu nan dalam ilmu alloh, kito hanya bisa berusaho, namun menurut
syara yang mangato sepanjang adat yang memakai, tinggal satu tanggung jawab ayah
mencari jodoh bakal junjungan menikah dan mengawinkan, kok itu tasuo isok hutang lansai
pasang lah tanggeal, menantu sudah menggantikan.

(bersambung NASEHAT UNTUK ANAK BATINO EPESODE 3)

NASEHAT UNTUK ANAK BATINO EPESODE 3
----------------------------------------------------------

Meminta ampunlah kamiy kepado sekalian kaum ibu, kito singkaplah tareh dan nasib nyo,
disebut tareh nabi adam yang terlukis di dalam kitab, menjadi surah guru-guru. Bahwa pada
suatu hari, masuk lah setan ke surgo, lalu digodalah siti hawa memakan buah khuldi, buah
terlarang sejak dulunyo, ulah dek halus rayuannyo mulut manis mangandung racun, mako
ngoyanglah iman sitihawa, lupo tegah lupo pantangan hawa talanjur memakannyo di telan
habis idak basiso. Lalu adam di goda hawa pulo, didalam keadaan bimbang rayuan istri ta iyo
pulo, di sangko dak apo-apo dimakan pulo buah itu, tapi baru sekerat masok arang, sabateh
kunyah mangunyah, sekedar kinyam manginyam, beliau sadar sakatika teringat larangan
alloh yang terucap waktu dulu, namun ka di muntah raso dak mungkin, ka di telan purut dak
narimo, tersangkut di kerongkongan jadilah jakun sampai kini.

Mako marah lah alloh swt, terdengar putusan perintahnyo, turun lah kalian ke bumi..!
sehelai benang jangan di bao..!, mako adam terkiwat ke tasriki tapisah di rimbo tak bertuan
yaitu di tanah alam hindustani, hawa di kiwat ke magribi itulah di alam tanah syam lalu di
ambik daun kayu penutup aurat yang terbuka. Berbilang musim kalamonyo, baratus tahun
saling mencari, setelah tobat ditarimo mako basuboklah mereka dipadang tak berumput,
dilungkung batuw dengan pase, banamo padang arafah yaitu padang pertemuan itulah yang
di jelaskan dalam quran injil dan taurat jugo menerangkan.

Oleh orang bani israel kaum yahudi yang terkutuk, mako di salahkanlah kaum perempuan,
kalaulah idak karna sitihawa laki-laki sudah hidup senang di surgo, itulah sebab akibatnya
perempuan di kutuk setiap bulan kato mereka, perempuan di hukum tiap bulan membawa
darah haid darah kotor yaitu sapah duso yang masuk tubuh, namun yang laki-laki menurut
mereka sekerat yang berdosa sekerat pulo yang di hukum, disunat rasul namonyo.

Menurut syara adopun adam dan hawa dinikahkan di surgo, alloh nian yang jadi wali, jibril
menjadi saksi, syahadat jadi maharnyo, mako ketahuilah nak tuduhan zina ke nabi alloh
merupakan simbol ke ingkaran, patut kehinaan ditimpakan kepada makhluk paling sombong
yakni kaum yahudi,

Lain yahudi lain pulo nasrani, karno inyo pangikut jesus, kareno itu kito sansaro perempuan
yang menah gawe, adam yang kno getahnyo begitulah konon tuduhan nyo, mungkin itulah
alasannyo mako pastur bapantang kawin, paus dilarang punyo biniy, uskup marando tagang,
artinyo kalau nak selamat dunia akhirat, jauhi perempuan, begitu petuah agama nyo.

Tau kah kamu nak, dahulu dari eropa dan yunani sampai ke romawi, perempuan di hino di
cameehkan, dijual di jadi komoditi, yang cantik pemainan sutan, yang buruk di jual tongkol
pangameh nan buruk nan busuk ahiang. Dulu caritonyo di arab kalo lahir anak perempuan di
cekik di kubur mati. Kalau kito kleh pulo di tiongkok kalau amoy yang baru lahir di agih rantai
besi bilo nak kawin baru di buka sangajo di pasang besi supayo lumpuh dak bisa keluar
rumah, guno nyo perempuan hanyolah untuk di dapur, disumur dan dikasur. Kalau dilihat
pulo di india, apa bila suami meninggal mako sewaktu pembakaran manyat suami istri ikut
pulo terjun ke api tando setia ke suami. Di afrika perempuan di jadi kan tumbal, kok ado
dewa yang marah di bujuk dengan perempuan supayo dewa senang hatinyo, meletus
gunung dek orang hutan, bajir malando idak jadi. Di jawah ado pepatah, apolah bunyi
pepatahnyo nang swargo manut, nang noroko nunut artinyo perempuan menurut kemana
pergi, ke surga ikut kenerako dak mau tinggal, walau disuruh ke yang buruk di perintah ke
yang sesat perempuan pantang membantah, menurut kato orang situ.

Sungguh banyak kisah yang meremehkan drajat perempuan, hanya lah agama islam yang
mengankat derajat perempuan, bagaimana ukurannyo? 1 untuk laki-laki 3 untuk
perempuan, begitu nian tinnginya nilai perempuan dalam islam. Oleh karena itunak jagolah
derajat yang sudah diangkat tersebut, bagaimano caro menjangonyo? Ya itu dengan berbudi
baik, itulah wujud perempuan yang hidup di alam lulo, budi baik baso katuju, mulut manih
tebu di bibir, sopan santun, mudah tersenyum. akhlak istilah islamnyo, etika kato orang
barat, toto kromo bahaso orang jawa.

(bersambung NASEHAT UNTUK ANAK BATINO EPESODE 4)



NASEHAT UNTUK ANAK BATINO EPESODE 4
----------------------------------------------------------
Assalamualaikum wr wb
Oi nak kandung anak nyo ayah, dengar lah pantun mangatokan:

Si rumpun si sirih-sirih
Di simpan dalam carano
Di susun di pilih-pilih
Di ulang carito lamo

Kalau di adat lulo, anak perempuan sangatlah di tuah di muliakan, kareno mereka
merupakan penerus keturunan di bidang materi sawah, ladang, hutan dan gurun warisnyo
ado hak perempuan kato adat mengatokan perempuan hak pakai, lelaki hak kanano,
maksudnyo anak batino yang memakai dan anak laki-laki yang manjagonyo, kalok ado
jiluang yang taranjak, kok ado lantak yang ba pindah, mako anak laki-laki yang membelanyo,
mengembalikan ke posisi semulo, itu hak anak batino secara lahir nyo nak, anak batino tidak
boleh di terlantarkan.

Kemudian di bidang moral rohani, hino atau mulya suatu kaum tergantung pada akhlak
perempuan, kalaulah perang bisa berdamai, tikam bunuh di beri maaf, rampok rampeh bisa
di bangun. Tapi kalau anak batino di beri malu, jando di bao urang lari, perempuan menjerit
di dalam semak, mako tertutup segalo pintu damai, tasintak segalo kaum, jago depati
seluruh kalbuw, bangun dubalang, disini yang cerdik ka parkaro, yang bagak memper
alahkan, yang kayo terjun dengan hartonyo, singkatnyo malu harus di bangun, singkatnyo di
mano hanyut di situ di pinteh walau kedalam laut basa, di mano hilang di situ dicari biar
kesudut-sudut bumi.

Tak lalu dandang di air
Digurun kan di panjat kan
Kok dak mungkin secaro lahir
Dengan batin di palalu kan

Begi nian mahalnyo hargo anak batino yang hidup di alam lulu, maka ujud kato hasil
rundingan nak, nilai kalian anak batino di alam lulo se ibarat batu permata nilai kalian adalah
intan, berlian seribu cahanyo, timbalan zamrud dan marjan, nah ikat nyo tentulah emas
padu, jangan kurang dari seratus bahaso nyo duapuluh empat.

Nah hiasan wanita alam lulo adalah budi, budi nak. Mulut manih tebu di bibir, sopan santun,
tersenyum mudah, itulah akhlakul karimah istilah islamnyo, etika bahasa modern nyo, toto
kromo kato orang jawa. di alam lulu dak ado nyan indah dari baso dan ado yang baik dari
budi, di bagak orang dak takut, di kayo orang tak arok, di cerdik orang tak segan, di gagah
orang tak ingin. Bak pantuk mangatokan:

Ba kilok ba pilin-pilin
Di capo tumbuh lah padiy
Di ilok orang tak ingin
Di kayo orang tak sudi
Nanmun setentang dengan itu nak, tidak segalo yang lahir itu mencerminkan apo yang ado
dibatin, ado kalo nyo batuto manih tapi hati maung pendirian cair, pangguntinga dalam
lipatan, panohok kawan seiring. Kadang-kadang ilok bahasonyo, melihat laku dengan
perbuatan nyo, nyatolah siang dengan malam, pepat di luar rencong didalam.

(bersambung NASEHAT UNTUK ANAK BATINO EPESODE 5)

NASEHAT UNTUK ANAK BATINO EPISODE 5
____________________________________

TUJUH TANDA ORANG BERBUDI

Menurut orang cerdik pandai, ado lah tujuh tando-tado orang berbudi, bermartabat. Adopun yang
pertamo adalah kalau berkato berhikmah, berpikir apo yang patut dikatokan tapi pantang
mengatokan apo yang ta terpikir, tutur kato lemak idak menyinggung, kato bulih mamaliharo, kok
benar idak tabanding, kok keras idak ta lawan jadi penawar untuk orang banyak.

Yang ka duo, kalau menolong idak ria. Suko memberi bersedekah , panyantun ke uhang idak, pa ibo
bkeh si banset. Tapi memberi kerena alloh bukan mengharap pembalasan atau pujian dapat
sanjuang apolagi mengunkit menceritokan.

Yang katigo, bakato idak sombong. Kok roda sedang di ateh, kok tampuk sedang bergetah, sombong
terkebur ba jauhkan, sebab nyo sadar dengan sunatullah, bumi beredar pado sumbunyo alam
beredar dengan iradat, kini basah isok kok kring, yang di ateh musti ke bawah di situ hikmah
bapilihkan.

Yang ke empat, kalo berberbantah idak pendendam, kok tumbuh basilang kato, salisih paham dalam
rapat, batuka padandang somo gdang nyo bamuko manih jugo, runding babateh bahinggoan, dapet
di rimbo ilang di semak yang batin pandang merenggang.

Yang kalimo, kok susah idak tergaman. kalaulah cobaan yang manimpo, awak banset panyakitan
pulo, dunsanak jadi uhang lain, nan sayang lah lari pulo, nyo beriman teguh jugo, pantang nyo
mengupat-ngupat, menyesal naseb untung badan diri. Atau hidup menyisih-nyisih rendah diri ke
samo gedang, raso minder kato uhang kini.

Yang ke enam, kalau di tegur idak tersinggung, kok ado yang tuo memberi nasehat, datang kritik dari
kawan, tibo bandingan kiri-kanan, dengan suko hati di tarimo. Bukan marabo marajuk-rajuk, emosi
nak menang surang, orang sayang disangko benci,, bukan. Kok talangkah nyo surot, kok ta dorong
nyo babalik.

Yang ketujuh, kok bergaul idak plet, kalau melihat kantey jatuh asap, rejeki nan sedang tegak taley,
haram dek nyo plet, sukur terucap dari mulut nyo gilo memuji dan bersukur terpancar dalam
paruman nyo, berbagi rasa bahasa halusnyo.
Begitulah nak laku karenah yang menunjuk banyangan budi dari dalam, ambik dan pelajarilah dek
kau nak, sebagai anak batino alam lulo, supayo bisa membaco budi orang lain.
(bersambung NASEHAT UNTUK ANAK BATINO EPESODE 6)

NASEHAT UNTUK ANAK BATINO EPISODE 6
____________________________________

Oi nak ayah, kanlah ayah caritokan 7 tando orang berbudi, episode 5 nan lalu. Namun selampih dari
pado itu, sungguh lah banyak pantun dan ibarat, gurindam, syair dan bidaran jadi amanah uhang
dulu sampai kini tapakai jugo.
Cubolah anak dengar satu-satu, nak ayah sebut yang taringat, ambik kan iktibar tuk pengajaran.
Yaitu:
Dek ribut rebah lah padiy
Dicupak datuk tumenggung
Kok hidup idak berbudi
Duduk tegak kamari canggung

Kuat rumah kareno sendi
Rusak sendi tiang binaso
Kuat baso kerno budi
Rusak budi hancur lah baso

Kalau lah pandai bertaman umbi
Pancang balirik batang bilah
Kalau lah pandai bermain budi
Dalam dalam ayik badan tak basah

Langgundi di sawah rawang
Rumput nan idak berbungo lagi
Kalau budi dapat di uhang
Hidup nan idak baguno lagi

Kamudik biduk talenggang
Karucut dengan tali duri
Dalam rumit pandai bertenggang
Tado bermain akal budi

Pulau pandan jauh di tengah
gunung kunyit di hadang jugo
Hancur badan di kandung tanah
Budi baik di di lupo tido

Pisang emeh di bao berlayar
Pisang lidi di dalam peti
Hutang emeh dapat dibayar
Hutang budi di bao mati

Berdentang carano kini Berderai carano kaco
Labuh nan samo Uhang ladangkan
Rangang karno budi bercerai karno baso
Itu nan samo uhang pantang kan
(bersambung NASEHAT UNTUK ANAK BATINO EPESODE 7)
NASEHAT UNTUK ANAK BATINO EPISODE 7
____________________________________

8 Kato Suroh Menurut Orang Cerdik pandai:

Selain nan dari pado itu nak dengar kan pulo kato suruh susunan orang cerdik pandai, salapan pulo
bilangan nyo. Dengar kan nian jleh-jleh ambik kan jadi timbang ka pedoman, jangan tasorong
langkah di yang kelam, usah di tasanduang di nan datar selamat lah badan keseberang. Apo kato
petuah nyo?

Pertamo : nak lurus rentangkan tali, artinyo berjalan lah di alur adet, bakato lah di ateh
udangan, kalau memahat di tentang baris, manggabuang tibo mangukur, di alur
rusuk manjaliau, di kasau lekat kan atap. Maknanyo: letak kan sesuatu pado tempat
nyo, pado tempat yang wajar, usah di buat-buat. Kadang-kadang dek lemak rayuan
tukang jual, gedang batuka dengan yang kecik, kain genih yang di tawar orang
marekan ka jadi pengganti nyo, jangan..!. iklas-iklas kalau memberi, jujur-jujur kalau
menolong, adil-adil kalau menghukum. Usah lemak kareno santan jangan kuning
kareno kunyit, dek sanjung lupo yang benar. Setiap kato yang disebut setiap kerjo
yang kan dilakukan betulkan niat nawaitu, tanyokan hati nurani, naik kan katimbang
raso cupak dan gantang dalam batin, apokah ini dengan izin Alloh, kalau lah itu lah
dilaksanakan nak, ka rawa kau dak keno lintah, ka rimbo kau dak kno miang, balik
batimbo baji dimakan ateh bawah ayunan kapak yang benar disebut jugo. Itu yang
pertamo.

Yang keduo : Nak tinggi rendahkan hati, kalau berkato dibawah-bawah, manyaok di hilir-hilir,
memengang di ujung-ujung, tau diri bahaso kini nyo. Usah penyonsong kato orang,
usah pemahal dengan pujian, yang tuo di anjuang-anjunag yang kecil di sayang-
sayang, nan banset sapo dahulu, insa alloh nak tinggi pandangan orang kek awak
datang kaseh naik martabat, tuah kan tibo dengan sendirinyo.

Yang Ketigo : Nak mulya tepati janji, bakato usah berbohong, berjanji usah mungkir, di beri
amanat jangan khianat, kok janji idak di tepati kok ikrar idak di teguhi, bakato
teranjak-anjak runding nan urak-urak mungkai, alamat kan jatuh hargo diri, uhang
nan idak percayo lagi. Dek mujur sepanjang hari dek malang sekejap mato, niat yang
belum kesampaian mako pakaikan pepatah uhang tuo, apolah bunyi pepatahnyo?
kato dahulu di tepati kato kudian samo dicari artinyo nak temui bermuko-muko,
kabarkan aral rintangannyo di situ di buat janji baru, usah menghilang hilang tumo
nak, tibo nyo tampak muko tapi perginyo idak tampak punggung bukanlah sifat
orang terpuji.

Yang Keempat : Nak teguh paham di kunci artinyo bakato siang melihat-lihat, barunding malam
menghagak-agak, usah taluah bak katidiang jangan berserak bak anjalai, longgar
pasak renggang pengikat samo dengan lukah idak ba inggep. Bulih lah awak
mangasihaninyo tapi usah sayang ta puntoang ntah lah isok ka jadiy lawan, kok
benciy alahkadarnyo usah di kato di ungkapkan entah lah isok kan jadiy kawan. Samo
dengan kato uhang tuo-tuo berikanlah yang segenggam tapi tinggal kan lah yang
sebiji, cabik lah yang patut di cabik tapi sehelai benang tinggalkan jugo untuk ka
serap penggantungan.



Sambungan 8 kato suruh

Yang Kelimo : Selanjutnyo nak labo jangan takut rugi, berjarih mako babulih, barugiy mako balabo
itulah undang cerdik pandai, kok memancing tentu dengan umpan, menembak tentu
dengan peluru, kok manggaleh nyato ba pokok itulah kaji dilahir nyo nak, kalo di bao
kebatinnyo hormatilah orang terlebih dahulu baru lah awak di hargai, sebuah biji di
tanam, setandan lebat kan jadi buah. Coba perhatikan nak dalam tertib membaca
doa baca patihah dulu baru baca doa, maksudnyo apo? puji dulu baru memintak.

Yang ke Enam : Nak Kayo usah berhutang. Ketahuilah nak ukurang kayo sebenarnyo bukan lah nilai
ukuran harta benda, bukan seberat timbangan emas, bukan, bukan itu!!. tapi ukuran
kayo yang sebenarnyo adalah berado di dalam batin, di jiwa yang tenang dibatin
yang lapang di pikiran yang selesai. Ado pun tando-tando orang kayo adalah: kalau
nyo berjalan idak tersundak, kok melenggang idak tapampeh, gelak lpeh, kepalo
tegak, muko cerah kening mengkilat, makannyo batambuh, tidurnyo mengkroh,
bakato lasoh, idak parusoh, mengambik acoh, memberi sungguh. Bilo kan basuo
keadaan model itu nak?, ketiko awak idak berhutang, tapi kalau hutang lah di buat
hati nan idak tenang lagi, basuo orang nak menghidar raso di kejar bayang-bayang,
nyampang kok berhutang harto bendo bisalah kito membayar mengansurkan, tapi
kalaulah berhutang budi musim po bilo ka lansainyo, entah di gungguang masuk
kubur. Intinyo nak orang kayo adalah orang yang tidak punya hutang, induk semang
membeli mobil secara kredit adalah orang bansat, sedang kan anak buah membeli
sepeda motor secara kontan itulah tando orang kayo yang sebenarnyo.

Yang ketujuh : Nak alus asah lah baso, yang dimaksud dengan asah baso adalah manih mulut,
pandai batuto, idak pangieh dan panyindir, tau menenggang hati orang, marahnyo
idak dikesan, cemehnyo idak kelihatan, walau orang berniat buruk namun nyo
berbuat baik jugo, basuo dengan bak pantun-pantun orang:

Anak si amuk dalam padiy
Cuko di dalam pemerasan
Kok beramuk didalam hati
Di muko jangan kelihatan

Kok itu yang terpaikai di amalkan nak, kamu bernamo orang arif bijak sana, hiasan
wanita alam lulo.

Ke delapan : Nak Ilok baik kan sanko, kok kasa hitungan orang, senjang terdengar bunyi
rundingannyo, atau janggal sumbang karinah, umpamo mencari-cari lawan, tarimo
suko bae lah dulu entah kok ilok maksudnyo, usah lekeh pencamburuan, jangan
pandorong salah sangko. Karno awak pamburuk sangko belut di pengang di sangko
ular, belum hanyut lah lah kedinginan, belum jatuh lah gamang dulu. Cubo lah lihat
tukang cukur umpamonyo lah nyato pisau di genggammannyo tajam yang bukan
alang-alang, tapi dek sangko baik percayo datang, leher sebatang di serahkan, aman-
aman saja. Tapi sebaliknyo baru melihat uhang gilo membawa parang idak
bersarung, orang sekampung lah kalang kabut, sebab apo? Sebab dek awak buruk
sangko, niat beliau hanyalah ke sungai nak mencari batu asahan awak lah mati
ketakutan, itu lah dek sebab awak buruk sangko.


(bersambung NASEHAT UNTUK ANAK BATINO EPESODE 8)


NASEHAT UNTUK ANAK BATINO EPISODE 8
___________________________________
*Sifat Perempuan*
Oi nak kadung badan dek ayah, mari-kamari nak duduk lah, ado kato nak ayah curah curaikan.
Sekarang dengar lah surah berikutnyo, kini beralih kepado tabiat, gaya karakter bahasa canggih nyo.
Ado pun perempuan menurut orang cerdik pandai di alam lulo itu nak ada 5 sifatnyo, empat sifat
yang buruk, satu sifatlah yang boleh dipakai, mano lah macan yang limo itu nak?

Yang Pertamo :Perempuan Barau-barau
Yang Kaduo :Perempuan Layang-layang
Yang Ketigo :Perempuan Lawah-lawah
Yang Keempat :Perempuan Anai-anai
Yang Kelimo :Perempuan ramo-ramo

Tersebut Perempuan barau-barau, ilir nguta mudik menggunjing, mangicek asal tangango,
barundiang bunyi peluru, gelaknyo terkekeh-kekeh. Ado kalo nyo idak tahu ujung
dan pangkal, orang tersinggung idak di agak, manan mulut bak rapat piuh, manan
takalek biji mato, bertegangan urat lehernyo, itu tabiat idak terpuji tu nak, jangan!!!.
Buruk sifat sumbang karenah, calako dek anak perempuan. Kok nak sopan di
pandang orang, supel, anggun, keibuan, feminim bahso kalian. Bakatolah dengan
lemah lembut, banyakkan senyum dari gelak, sebut sekedar yang berguno,
barudiang usah berebut, mangicek berganti-ganti, dengarkan dulu tuto uhang lah
tumbuh baru disiang, tapi kalok dak perlu nian ilok lah diam tunak sajo, sebab dek
lidah idak bertulang dek mulut idak berpagar, banyak kicek banyak nan sesat banyak
kato banyak lah duto, kalau lah minyak tumpah di ateh batu dapat di raup di
tampungkan nak, tapi kalaulah lah mulut yang terserak di bao angin idak terpilih-
pilih lagi, bicara itu perak diam itu emas begitu petuah orang pandai.

Bangai mano pula Perempuan Layang-Layang, lah jelas dek burung layang-layang belum lagi terbit
mato hari, belum tentu hari kan siang inyo bergegas keluar sarang, rayap-merayap
di udaro, layang-melayang hilir mudik, membubung maliuk-liuk pacu-memacu samo
gedang, pueh membubung masuk awan inyo manukik terjun rendah, simba suap
lalah kakida lah senjo baru nyo pulang, itulah lambang perempuan dan simbol
perempuan yang suko keluar rumah, hobi nyo berhura-hura. Sesudah pulang
sekolah inyo singgah dulu di pasa, lihat situ tanyo kamari, rabo situ tanyo kamari
tanyo hargo satu-satu membeli sebuah haram. Asal lah ado keramaian, biar ba bend
atau bertanding apolagi layar tancap nyo lah datang duluan, petang-petang senjo
kan tibo nyo barkempul di simpang-simpang bacarito takekeh-kekeh mejeng istilah
betawi nyo, padahal drumah banyak kerjo terbengkalai, kaih kumuh lah terendam,
nasi lah patut di jerangkan, laman semak sarap bertabur, PR belum di kerjokan.
Maka tepat lah bak istilah-istilah orang mau melihat keperibadian seorang gadis
maka lihat lah rumahnya, mau melihat kebersihan perempuan lihatlah kamar
mandinyo.

Nah ini perempuan Lawah-lawah, kalau perempuan layang-layang suko malala, Mako perempuan
lawah-lawah jinak dirumah, setapak idak kalua selangkah haram beranjak gilo tegak
di jenjang tanggo manunggu tamu sesat tibo, di buat sarang sekeliling benang
bergetah bakal penjerat, wujudnya jaring terkembang memasang jerat di nan
lengang, bentuknyo cado ka matey malangkah terhonyong-honyong, berat badan tali
bakisah tapi niat salah panginam sumbang, paham jaet maksud buruk. siapo yang
nempoh tiap terpekik, tiap yang singgah jadi bangkai, di makan darah dan daging di
hisap sampai ke benak, lah habis ditinggal kannyo. Kok subok sifat itu dengan
manusio, itulah gadis pangeretan mato duitan namonyo, mulut mahih di buat-buat,
ramah-tamah bahajan-hajan,wujudnya cari perhatian nak tadayo uhang dek awak
baru lah niat dilaksanakan. memberi di kato-kato, tiap memintak tiap hilang, tiap
meminjam idak babalik. Di tagih orang dimusuhi, di burukkan di dalam kampung, di
fitnah di pergunjingkan, aib di buka-buka, hinggo orang segan menolong nyo. Begito
jugo kalau dalam rumah tanggo, uncang uhang tuo di galedah, dompet suami di
pariso, kok konon pacar tunangan nyo lah kering di tinggal kan cari pacar baru,
jangan lah dilakukan itu nak!! Ayah dak suko mendegarnyo.

Dengan lah pulo carito Perempuan bergelar Anai-anai, sifat buruk pado anai-anai mudah tergada
dek rayuan gilo bergedang hati bae. belum di use nyo lah gelak, belum di gabit nyo
lah tibo, idak ta ingat mudaratnyo. Cobo lah dengan nian jeleh-jeleh, ambil kan
iktibar dan teladan. Siang terbenam dalam saung idak melihat matohari lah malam
baru kalua, dari jauh nampak cahayo lalu berkejar ke dekat lampu bermain bersuko-
suko, kurang hampir bertambah hampir lah dekat berniat hinggap, hangat taraso
sekeliling menyinar ke batang tubuh, tipi kareno jarang melihat cahayo di sangko
tembus kesebelah kironyo api yang di hadang, badan hangus sayap membaro
terbangkai jatuh kebawah, dek rombongan yang baru tibo lah nyato manyat
berlimpangan merapak mati terbakar, berbodong jugo masok lampu main dengan
api yang teragak akhirnyo sansaro pulo. Itulah sifat yang sio-sio nak, idak mencontoh
sekeliling enggan berguru pado alam, hati gedang yang berturutkan. Dek sebab
karno itu nak, jangan lah tergoda oleh kilat nyo, bao pariso nan lah sudah-sudah, bao
bapike dalam-dalam, seringlah kejadian nak senang nyo lah yang terpikir lah keno
baru menyesal, sesal yang tiado baguno lagi, itulah amanah orang tuo ayah
menyampai mengingatkan.

Ado pun yang penghabisan yaitu Perempuan Ramo-ramo, itulah yang harus ditiru di contoh di
telandani lambang anak gadih Alam Lulo, awak cantik bulu baminyak sayap babungi
balik mrah, jinak nyo raso ka ta jangkau lia nyo Alloh ya robbi orang lah mati
marindukan. Hinggap nyo ba sikok-sikok terbang nyo bakawan-kawan, bakatiko
waktu kalua, basamo barunyo nampak, bermain bukan sembarang main tetapi
bermain ke helai bungo bertandang ke benang sari. Dek arif padai bertenggang halus
lunak bawaan badan, mako daun pengarang idak bergoyang putik sari idak nyo
gugur, tangkai nan mintak di hinggapi begitu budi ramo-ramo. Kalok awak anak
berbudi nak!! , bertertib dalam rumah, sopan santun kalau di luar pandai bersolek
dan berdandan, kemano pergi harus lah tentu, sa izin boleh berjalan, jleh tujuan dan
maksud bukan malala idak karuan. Pergauli yang samo gedang, perapat samo yang
tuo-tuo, cari yang panjang pengalaman biar bertokok tambah ilmu awak, kalau lah
membeli keperluan sesuaikan dengan kebutuhan, ukur tanago ekonomi sepanjang
tubuh bayang-bayang, sebab melebihi ilok-ilok mengurangi sio-sio, jauhkan ungeh
dengan terkebur. Kalaulah awak burung pipit ulek daun kan jatah awak, biji rumput
bateh rejeki jangan di cito makanan enggang, sok kato orang kota, sombong kato
uhang kampung, overdosis kato pak doktor badan kaulah yang menanggungkan.


(bersambung NASEHAT UNTUK ANAK BATINO EPESODE 9)