ANDI DEPU

Assalamu alikum warahmatullahi wabarakatuh

Tabe tomala’bi iyyanasanna. Iyau Fatima Azalia Rukhyat, dipaillongan Fatimah Raya. Mioro
dikelas lima SDN 006 Pekkabata.
Insya Allah diwattu mariota di te’e die, meloa maccurita kisah perjuanganna Andi Depu,
towaine Barani dilita’ Mandar.
Purai nacata sejarah minjari butti diwattunna masa penjajahan(g) lambi’ lao di
kemerdekaan(g). Mua’ dini di mandar, diang mesa towaine barani mikke’de’ diatonganan.
Barani mattunduang pa’banua, barani toi mambali panjajah. Innaimo di’o? ia mo tu’u Andi
Depu, Ibu Agung, Srikandinna Indonesia topole dini di mandar Sulawesi Barat.
Sebelum uwakkeani tau caritana ibu Agung, macoai kapang mua’ dibacangani dai Alfatihah,
mala’ai minjari butti tarima kasi’ta lao di towainetta Almarhumah Andi Depu,

Alfatihah.....
Tarima kasi’....

Di Tinambung, bulang Agustus 1907 wattu padianganna Andi Depu. Tomauwweng

tommuane to mappadiangi ibu Agung. Ia mo tu’u Arajang Balanipa ke limappulo (50) La’ju
Kanna i Doro sangana. Mara’dia tomate Yudda nagallarangi tau. sittengang toi tomauwweng
towainena pappuangan topole di Mamuju, iya mo disangangani Simaturu anna’ gallar
Mara’dia Kinena.

Di wattunna muda, pendidikanna Andi Depu sangga ingganna Volk scholl (sikola ra’ya). Di
taung 1923, sialai andi depu Tau Pappuangan, iya di sanga Andi Baso pabiseang. Anna 1939,
diakke’i Andi Depu minjari raja ke limappulo mesa (51) Arajang Balanipa Mandar, massalle
Tomauwweng tommuanena.

Tanda kayyang nyawana Andi Depu, manjaga kemerdekaan pole kuasa Balanda,
nadotangani mappelei arajang nasawa meloi siola pa’banua ma’oloi Balanda. Awaranianna
tomo tu’u Andi Depu makkomandoi pa’banua anna’ naangga’i balanda bali kayyang di
mandar.
Andi Depu, iyyamo pahlawan nadotangani mappiwengan(g) nyawa ate anna pikkiranna,
mesa sawa manjaga kemerdekaan.

Di malimang, duappulo arrua oktober 1945, di Tinambung diolona arajang Balanipa, mi’osai
parajuri Balanda, melo mapparawung bandera pusaka pura pasang. Tapi andiangi sempa’
mandu’du tiang bandera pusaka, langsungi tisembur parajuri’ Balanda, sawa’
napia’mateangi pakkawal arajang siola pa’banua mallawai pilli’anganna parajuri’.
Diwattu mallawai mesadi paingaranna pakkawal arajang anna pa’banua, iyyamo
pappasanna Andi Depu, “mau innai, nandiang tau mala mapparawung bandera pusaka”
paunna.

Diammo mesa pakkawal arajang mia’siga mappesitai Andi Depu pas pura massambayang
dhuha, napalambiangi lao, mua’ melo’i mapparawung bandera pusaka parajuri’ balanda.
Tisitta tomori alawena Andi Depu dioronna, maendong lao marra’etti tiang bandera. Mane
makkata’ber, Allahu Akbar... Allahu Akbar... Allahu Akbar... “lumbappai batangngu, muli’ai
pai bakkeu anna lumbango bandera”.

Ma’ ita abaranianna, inggannana pa’banua napasang nasang alawena, minjejer diolona Andi
Depu sipe’oloang balanda. Tipatto nasang dialawena cera’ silolongngi, nyawa siandarang,
nasawa manjaga bandera pusaka. Sire’deang nyawa mambela, Mappengga’garannasammi
sumpana,”INDITIA BATUANNA MARA’DIA, MELO MIMBERE’ DI BAONA LITA’, BASEPA ANNA
TADA’ MATING DIOLONA MARA’DIA”.

Balanda tilewo’tomi pa’banuanna Balanipa. Mesari napotuo pa’banua, manjaga bandera

pusaka dio diparretianna mara’dia, ma’uwangi pe’illonganna “NAPOSIRI MARA’DIA,
NAPOMATE BATUA”.

Awaranianna pa’banua Balanipa mapparondong nyawana Balanda mapparawung bandera,

mundur tomori Balanda, kurru sumanga’na malai, maita bandera pusaka tipasang duapa
diolona arajang Balanipa.

Di bulang annang, tanggal sappulo arruwa, mimbalimi Andi Depu disesena Puang Alla Ta’ala,
dio di Ruma saki’ Pelamonia Ujungpandang Sulawesi selatan, iyatomo allo nalamunna di
Taman Makam Pahlawan Panaikan Ujung pandang, minjejermi pa’banua anna tantara
militer di upacara alamungan, napimping langsung Mayor Jendral TNI (Purn) H. Andi
Mattalatta, iya tau nasolangan maperjuangkan kemerdekaan.

“LUMBANGPAI BATANGNGU, MULI’AIPAI BAKKEU, ANNA LUMBANGO BANDERA”, towaine

barani Lita’ Mandar ibu agung Andi Depu.

Iyamo’ ri’e carita tomauwwetta di lita’ Mandar, Almarhumah Tobarani Andi Depu,
ucaritangani supaya minjari api mappasumanga’ atuowatta.

Wassalamualaikum warahmatullahi Wabarakatuh.