ANGSA TEKEN EMPAS

Kacerita ada Empas,lua muani nongos di telagane. Ditu ada

bungan tunjung magenepan, tur suba nedeng mabunga. Lega
pesan keneh Empase ditu wireh tuara kuangan amah. Kacerita ditu
masih ada Angsa ajak dadua lua muani. Lega pesan kenehne
manjus di telagane ento. Makelo – kelo ditu,dadi I angsa
makekasihan ngajak I empas. Ditu Ia pada kapepekan amah, tur
malali – lali ngulurin kalegan. I empas mapaguruan teken I angsa.
Makelo – kelo masan panas banteng, dadi enyat yeh telagane ento.
Dening keto I angsa lua muani lakar matinggal uli telagane ento.
Ditu Ia ngomong teken I empas, ngorahang lakar magedi uli ditu.
Dening Ia tusing dadi kuangan teken yeh. Ditu I empas sedih, lantas
nagih milu, dening Ia masih tusing dadi kuangan yeh. I angsa
madalem I empas, lantas Ia ngomong :” Yen keto idep caine, ne ada
daya melah. Ne kayu atugel dangal tengahane. Sabilang tanggu
deweke lakar nangal ajak dadua, lakar kakeberang. Selantang jalan
eda pesan cai nyai mamunyi, apitu wiada anak matakon, eda pesan
sautina. I ngetang pesan ento eda engsapina. Yen tusing nuutang,
sing ja buungan cai nyai mati.
Gelising satua I empas jani suba keberanga baan I angsa.
Kacerita di tegale ada cicing lua muani, maembon di batan kayune.
Mara ane lua nulengek, iwasine ada Angsa ngeberang I empas.
Ngon pesan Ia lantas ngomong :” Ih nanang ceninge, tingalin ja
Angsane ngeberang Empas”. Masaut ane muani : “ Ah dong ja
Empas buka munyin nyaine. Ento tain sampi tuh ane keberange
baan Angsane. Bakutise di tain sampine, mula amah- amahan
Angsa. Mara dingeha baan I empas omongan cicinge keto, dewekne
orange tain sampi tuh, tan perah gedeg basangne. Ia lakar nyander
I cicing, bungutne enggang lakar masaut. Dadi Ia ulung maglebug di
tegale. Kala ditu dengele baan I cicing. Lega pesan kenehne, betek
basangne ngamah Empas. Payu mati I empas tanpa puara, dening
tusing nuutang pituture ane melah. Buina to tuah gedege makerana
sengkala.-