Part 1 : ( Malekat kasi tau Maria soal Yesus lahir )

Narator 1: PAS DOLO EEEE pas Elisabeth ni su deng badang anam bulang, Allah parenta par
malekat Gabriel pi par Maria yang katong biasa panggel Meri ni di kota Nazareth tu di Propinsi
Galilea. Meri ni parampuang parawang, dia su batunangan deng Yusup yang katong biasa
panggel Ucu tu. Ucu ni to Raja Daud pung ana cucu e.

Malekat : salam Meri, Meri e ale to dapa berkat basar dari Tuhan, Antua ada deng ale”.

Meri : (Meri tacigi pas dengar Malekat bilang bagitu) : “ hi, salam ni akang pung arti apa ee?”.

Malekat : He Meri e jang se taku, ale ni dapa berkat basar dari Allah, ale ni nanti deng badang
dua, abis itu ale pung ana laki-laki satu jadi. ingatang Ale musti kase nama dia Yesus. Dia ni
nanti jadi orang basar deng ada yang bilang kalo dia tu Allah yang paleng tinggi tu pung ana
sudah ni. Tuhan Allah nanti angka dia par jadi Raja sama deng dia pung moyang Raja Daud tu.
Dia jua nanti pegang kuasa par samua ana cucu bangsa Israel tarus-tarus”.

Meri : hi, bagemana akang bisa jadi bagitu ? barang beta balom pernah tidor deng laki-laki”.

Malekat : Tuhan pung Roh nanti datang par ale Meri, tarus Allah yang paleng tinggi dari samua
pung kuasa tuh akang tutu ale. la nanti orang bilang kata dia ni Alah pung ana. Meri Ale pung
sodara Elizabeth yang su tua tuh jua, yang dolo orang bilang dia seng bisa pung ana, mar
sakarang ni dia ada deng badang dua, su anam bulang lai Meri e

Meri : kalo memang musti bagitu macang yang ale bilang, beta tarima sah, barang beta ni Tuhan
pung orang suruh-suruh lai”

Narator 2 : Pas Malekat abis bakudapa Meri tuh, dia pi kas tinggal Meri. Lalu Meri mulai angka
kaki pi cari Elizabeth. Meri pi ka kota satu di Propinsi Yudea. Akang kota tuh ada di gunung-
gunung. Sampe di tampa tuh,

Meri : (Meri maso di Zakharia pung rumah) : Elizabeth…..

Elizabeth : (kaget dengar Meri panggel) Hi, beta ana bagara, Meri e Meri, Tuhan kase berkat par
ale labeh dari samua parampuang. Bagitu jua deng ale pung ana yang ada dalam poro tuh, Beta
tau ale tuh, beta pung Tuhan pung mama, barang pas beta dengar ale pung suara, ana ni (kasi
tunju poro par Meri) dalang beta pung poro ni dia batandang sampe.

Part 3 ( Meri puji Tuhan )

Narasi 1 : Pas bakudapa Elizabeth, Meri paleng sanang ana eee. Meri puji-puji Tuhan

Maria : “Tuhan, beta paleng sanang e, barang Tuhan su kasi salamat beta. Tuhan su inga beta,
Bapa pung orang suruh-suruh yang seng pung arti apapa, dari oras ini jua samua orang yang ada
di dunia ni nanti bilang kata beta ni parampuang yang paleng baruntung, barang Bapa su biking
parkara basar par beta.

Narator 2: oras itu jua Meri seng barenti par Puji Tuhan. Tuhan kasi tunju pung hati bae tarus par
Ontua pung anana cucu yang taru hormat par Ontua, Tuhan tepati Ontua pung janji par katong.
Tuhan pung hati bae par katong tarus. Tuhan su janji par katong pung tete nene moyang Abarang
deng dia pung anana cucu samua”. Abis Meri puji Tuhan, dia tingal deng Elizabeth kurang labeh
tiga bulang. Tarus dia bale kombali ka dia pung rumah di kota Nazareth.

Narrator 1: pas abis itu Meri pi bakudapa ucu par kase tau kabar bae tu par ucu tapi ucu sama
skali seng mau tarima bae.

Meri: ucu, ucu eee

Ucu: Meri mangapa?

Meri: Malekat datang par beta e ucu, malekat tu bilang kata beta ni su deng badang dua. Dalang
beta pung poro ni nanti Bapa tu pung ana lahir.

Ucu: Se gila kapa Maria, beta ni balom biking apa-apa se. tidor deng se jua balom.

Narator 2: Ucu seng mau tarima apa yang Meri bilang. Ucu bingong seng tau mau biking apa lai.
Pas bagini Malekat Tuhan datang par ucu par kase tau kabar bae tu di dalang mimpi.

Malekat: Ucu, Raja Daud pung ana cucu, jang se taku ambel meri par se jadi se maitua. Meri tu
dia mengandung Roh kudus pung ana. Ana tu pas dia su lahir ingatang kasi nama dia Yesus.
Narator 1: ucu kaget bangong lalu dia pi cari Meri deng hati yang paleng basar Ucu tarima yang
Tuhan su ator par Ucu deng Meri pung hidop.

Part 4 ( Yesus lahir )

Narator 2: Waktu raja basar Agustus parentah karajaang Roma, antua kasi kaluar parentah par
kasi maso samua orang pung nama-nama yang ada dalam antua pung karajaang tuh. Dong jua
baru pertama kali biking sensus ni, pas Kirenius jadi Gubernur di daerah Syria, “ kasi tau par
samua orang di dong pung kota par kase maso dong pung nama-nama tuh di kota dong pung
tampa asal.

Narator 1: pas pengumuman tu su dengar sampe di samua tampa, Ucu deng Meri dong kase
tinggal kota Nazareth di Propinsi Galilea, lalu dong pi ka kota Bethlehem di Propinsi Yudea.
Dong musti kase maso dong nama di dong pung kampong sandiri. Jadi Ucu dengan dia pung
tunangang Meri pi sama-sama la kasi maso dong pung nama.

Meri: Ucu eeee, beta ni seng kuat bajalang bawa badang ni lai. B poro su mulai saki e

Ucu: Meri Meri, sabar dolo jang disini Meri. Tahang sadiki lalu katong pi cari tampa dolo

Narator 1: Ucu deng Meri mulai bajalang cari penginapan, tanya dsini su foll tanya disana su foll
lai. Pas dong tanya di ada yang pung satu penginapan lalu dia kasi tampa par dong

Ucu: se tahang sadiki dolo Meri e.

Ucu: Bapa Salamat malam. Bapa e, katong du ani su bajalang ka samua tampa par cari
penginapan mar samua foll e. mangkali dsini masih ada satu tampa yang kosong k.

Pemilik Penginapan: sio tuang, samua su foll ale. Tapi beta ada satu tampa di balakang. Ini jua su
malam ni. Labe bae dong dua istirahat dolo jua. Tapi ini ni tampa beta pung binatang piara.

Ucu: sengpapa bapa, beta pung maitua ni su deng badang dua, poro jua su saki ni.

Pemilik penginapan: bagitu mari iko beta

Narator 2: pas ucu deng meri sampe di binatang piara pung tampa, akang pung waktu par Meri
pung ana mau lahir. Pas sudah, Meri bungkus ana tuh deng kaeng la kasi tidor dia di dalang
binatang piara pung tampa makang.

Part 5 ( tukang jaga domba dimalang Yesus lahir )

Narator 1: Seng talalu jauh dari tampa Yesus lahir, ada orang jaga dong pung domba sakawang
malang-malang di tanah lapang yang barumpu. Takajo bagini, ada Tuhan pung malekat satu
datang par dong. Tarus, Tuhan pung sinar paleng tarang manyala koliling dong sampe dong
takotang paskali.

Malekat: kamong seng usah taku! Barang, beta ni datang mau kasi tau kabar bae par kamong.
Kabar bae tuh bisa biking samua orang pung hati paleng sanang. Hari ini ni, ada ana kacil satu
yang baru lahir di Daud pung kota lahir, Betlehem. Ana tuh yang nanti kasi salamat manusia dari
dong pung dosa-dosa. Jadi, kamong nanti pi la dapa lia ana kacil satu yang masih merah-merah
tabungkus deng kaeng. Dia ada tidor dalang binatang piara pung tampa makang. Tarus, kamong
bisa tau kalo apa yang beta bilang ni akang batul.

(Malekat keluar)

Gembala 1: bagitu bagara sudah, katong ka Betlehem lia ana merah-merah tu yang Tuhan tadi su
bilang akang.

Gembala 2: mari katong pi lia dia

Gembala 3: Bakira

Narrator 2: La dong samua paparipi par pi cari tampa tuh. Pas dong sampe, dong dapa Meri,
Ucu, deng ana merah-merah tuh. Ana tuh ada tidor di binatangn piara pung tampa makang. Pas
dong dapa lia ana merah-merah tuh, al dong carita malekat pung pasang par rang banya di tampa
tuh soal ana kacil tuh. Samua orang di tampa tuh, dengar orang-orang yang jaga domba pung
carita tuh, la dong herang. Mar maria Cuma simpang samua dalang dia pung hati, la Cuma inga-
inga akang tarus. Tarus, orang-orang yang jaga domba tuh bale kombali. Dong samua puji-puji
Allah, barang samua yang dong dengar deng yang dong lia tuh, akang samua sama macang deng
yang malekat bilang par dong tuh.
Part 6 ( orang-orang majus datang dari Timor )

Narator 1: Pas Yesus lahir di Betlehem di tanah Yudea tuh pada zaman Raja Herodes, lalu ada
orang-orang Majus datang dari Timor ka Yerusalem.

Majus 1: sama Raja Orang Yahudi yang baru lahir ni dia dimana e ?

Majus 2: io, beta dengar-dengar lai

Majus 3: katong su lia dia pung bintang di Timur yang paleng tarang tu lalu katong pi sembah
dia.

Narator 2: Lalu pas Herodes dapa tau dong datang cari Raja Orang Yahudi, dia takajo lalu Raja
Herodes Parentah samua Imam deng ahli Taurat Bangsa Yahudi par minta keterangan tentang
Mesias yang baru lahir dar dong. Lalu dong su jelaskan par Raja Herodes kalo memang batul
nanti ada Mesias yang mo lahir. Lalu tado-tado Herodes Panggel orang-orang majus tuh.

Herodes: He kamong pi ka Bethlehem par cari tau tentang ana yang baru lahir tuh. Kalo kamong
su dapa brita abis itu bale kas kabar par beta, supaya beta jua pigi par sembah dia.

Narrator 1: Akhirnya orang majus dong barangkat pas dalang perjalanan bagini dong lia bintang
di Timor, akang paleng tarang eeeee. tarus dong bajalang iko akang. Akang pung terakhir bagini
dong lalu bakudapa deng ana yang dong cari tuh. Dia itu nama Yesus, Mesias deng Juriselamat.
Pas su dapa akang tampa, dong maso ka dalang binatang piara pung tampa tuh, dong lia ana tuh
ada sama-sama deng Meri deng Ucu, lalu dong sujud, sembah Dia. Dong jua kasi persembahan
par dia yang berupa Emas, Kemenyaan deng Mur.

Barang su dapa parentah dalang mimpi seng boleh bale par Herodes, dong lau pulang ka dong
pung negri lewat jalang laeng.