LITURGI I (RAMOTKON MA NA TINOMPA) VISUAL DI AKHIR

Prolog : jenges do tanoh on itompa naibata bani mungkahni. Alam semesta

pasirsirhon hagoluhan bani haganup pangianni. Ibere do homa kuasa hubani jolma ase
manramotkon ganup tinompa in. Tapi anggo ipardiatei hita nuan on, mubah do ganup
hinajengesni tanoh on. Harangan ripas, dolog-dolog pe lang be maratah. Pangkorhonni
ai, hotop ma masa bencana alam.

1. Hita hasoman, sonaha do anggo bani sada panorang holi lang dong be bah? Tontu
gabe terancam ma goluh i tanoh o; lang boi maridi, manussi ronsi horja na legan pe
gabe lumpuh ma. Tubuh ma naborit na marujung hu bani hamateian. Majangin
tumang! Halani ai ramotkon hita ma bah, ulang iparbois-bois.
2. Sonaha do anggo bani sada panorang lang ddong be hayu ? Milas ma tanoh on lang
tartarongkon, dob ai lang be martambah oksigen mambahen boi be tartoruskon
hagoluhan. Lang be tubuh poyon-poyon sipanganonni pinahan. Tanoh pe horah janah
siltag ma. Halani ai ramotkon hita ma suan-suanan pakon hayu na i harangan.
3. Sonaha do anggo bani sada panorang holi lang dong be hombun. Meningkat ma suhu
udara gabe lang tartaronkon be milasni. Suan-suanan pe lang dong na boi manggoluh.
Aha ma na gabe sipanganon ni jolma in ? ujungni gabe hamateian do tong. Halani ai
ramotkon hita ma a tinompa in ase ulang maseda pardalanan ni hagoluhan na i tanoh
on.
4. Sonaha do anggo bani sada panorang holi langa adong be minak pakon bahan bakar
na legan, lang dong be masin na manggoluh janah sotto ma buei horja na mamakei
listrik. Lumpuh ma hagoluhan na i tanoh on, ai ganup do hita jolma manggunahon
energi na marasal hunbani tanoh on. Halani ai ramotkon hita ma ganup na tinompa in,
jimot ma bahen hita. Dingat hita ma ginomparta magira na mamorluhon haganupan
in.
5. Hita na tinompani Naibata, lang dong ubahta hubani tinompa na legan na adong i atas
tanoh on. Maningon marsihaholongan janah marsitogu-toguan do hita songon na
marsanina, ai dos do hita ilobei ni Tuhan in. Ulang ma hita marsipaetekan, ulang
adong na manganggap dirini gijangan tapi Tuhanta Sipanompa in ma pagijang hita.
(parliturgi turun, janah salpu ai ase tampil ma visual pasal panompaon)
LITURGI II : GOSPEL ( INJIL KESELAMATAN)
LITURGI III (TUGAH-TUGAH PARTUBUH NI JESUS)
Narator 1 : Marratus-ratus tahun dokahni paima partubuh ni Kristus, domma ibagahkon
Naibata pasal parroh ni Mesias in marhitei hata ni nabi-nabi.
Nabi Mika : Tapi anggo ho, ale betlehem Efrata, age pe etek ho i tongah-tongah ni marga
juda, humbam do roh bangku na gabe panggomgom bani israel, anjaha
harorohanni humbani na hinan, humbani ari na basaia. Hatahon ma hubani
boru sion, tonggor ma na roh ma Sipaluah ho mamboban damei.
Narataor 2 : salpu onom bulan isuruh Naibata ma ,malekat gabriel hu sada huta i tanoh
Galilea, na margoran Nasaret, marayak sada anak boru, tunangan ni sada
 dalahi, na margoran si Josep, humbani ginompar ni si Daut; si Maria do
goranni. Masuk ma malekat ai Marayaksi, anjaha nini ma:
Malekat : Tabi ma bamu, ale na niidopan! Ihasomani Tuhan do ham !
Narator 1 : Tapi tarsonggot do ia pasal hata ai, anjaha iparuhurhon do, atap aha do arti ni
hata tabi ai.
Malekat : Ulang ma mabiar ham Maria, ai dapotan idop ni uhur do ham humbani
Naibta. Tonggor ma, boratan rumah ma ham anjaha tubuhan anak; bahenma
goranni Jesus. Banggal do ia use, goranon do ia Anak ni Sitimbulan in; bereon
ni Naibata do Bani paratas ni si Daud, bapani ai. Rajaani do ginompar ni si
Jakob sadokah ni dokahni, anjaha seng dong ujungn ni harajaonni ai.
Maria : Sonaha ma parjadi ni ai, ai seng dong hutanda dalahi ?
Malekat : Sogopan ni Tonduy na pansing ma ham, anjaha linggoman ni hagogohan ni
Sitimbulan in; halani ai; Na pansing do goranon na sihol tubuh in, Anak ni
Naibata. Anjaha tonggor ma, si Elisabet pe, sindohormu ai, na dob targoran
lambang, domma boratan rumah, paonom bulankon ma nuan. Ai seng boi na
so boi bani Naibata.
Maria : Tonggor ma, jabolonni Tuhan in do ahu. Sai saud ma hubangku songon na
hinahatahonmu in ! Nuan mandoding ma au bani Tuhan in; Ipatimbul uhurhu
do Tuhan in ! Marmegah-megah do tonduyhu mangidah Naibata, Sipaluah au.
Ai itatap do haetekon ni jabolonni on. Tonggor ma, ai olat ni on parhatuahon
ni sagala sundut ma ahu. Ai banggal do na binahen ni pargogoh in bangku. Na
pansing do goranni ai.
Narataor 2 : ia si Josep, paramanganni ai, paruhur na pintor do, anjaha seng sihol uhurni
laho pabadorhonsi, gabe tubuh ma uhurni manirangkonsi sipsip.
Josep : Au pe, hubotoh do pasal ajongjonganku dompak si Maria. Na so boi
pasaudonku ganup in. Sidearan ma hutadingkon si Maria. Ia sandiri ma
manjalo habadoron na sihol roh bani.
Malekat : Tapi sanggah sonai ope sura-sura ni uhurni ,idah ma ibagas nipini malekat ni
Tuhan in,na mangkatahon hubani: O Josep, anak ni si Daud, ulang ma mabiar
ho mangalop si Maria gabe parinangonmu, ai na adong bani ai, ai ma na
humbani Tonduy Na pansing.
Narator 1 : Jadi ro ma ijia parentah humbani kaesar Agustus, ase isurathon sagala jolma
na ibagas gomgomanni. Panuraton na parlobei ma ai, sanggah si Kerenius
manggommi tanoh Siria. Jadi misir ma haganup, ase isuratkon, ganup hu huta
hasusuranni bei. Misir ma homa si Josep hun Galilea, hun huta Nasaret, laho
hu Judea, hu huta ni si Daud, na margoran Betlehem, halani hun marga ampa
humbani ginompar ni raja Daud ia. Laho ma pasuratkon dirini rap pakon si
Maria, tunanganni ai, na dob boratan rumah ai.
Maria&Josep : (Mardalan ma sidea manuju huta Betlehem, ai ijin do huta hasusuran ni
sidea.)
 Narator : Halani holongni ni uhurni Naibata hubani dunia on, ibere do anak-Ni gabe
jolma, roh marhitei dalan hahirion. Haganupan in aima ase jumpahan hita bani
goluh anjaha maluah humbani rahut-rahut ni sibolis.

LITURGI IV (PARTUBUH NI TUHAN JESUS KRISTUS)

LITURGI V (REFLEKSI NATAL)

Prolog : Buei do jolma na dob mandihuti Pesta Natal tahun hu tahun, anjaha buei
do cara na binahen ni jolma in bani na mangalo-alo Pesta Natal in.

1. Nasiam hasoman, hutangar do hasaksian ni ganup hasomanta na taringat bani na marnatal on,
anjaha sai hupingkiri porlu tumang do botohonta aha do sabotulni artini ni namarnatal on.
Humbani pangidah diri, gatinan ma Natal on songon na pitah hasomalan tumang.

2. Huidah do deba halak bani panorang Pesta Natal mambahen sada kesempatan laho marsonang-
sonang pakon patuduhkon pakean na baru. Bani na deba, panorang Natal aima panorang laho
manorih passarian na marlobih-lobih. Buei do jolma na menghalalkan segala cara laho
manorihi passarian bani panorang Natal on.

3. Adong do homa na deba jolma, anggo domma dohor panorang Natal, gabe patubuhkon pusok
ni uhur do ai bani. Loja anjaha pusokan uhur do ia manguhuri aha na laho sibahenonni bani
Pesta Natal. Termasuk ma ai bani na pasirsirhon pakean, sipatu na baru. Anggo lang boi iboli
na baru, tarsongon na maila do pangahapni mangidah hasoman.

4. Ai do tongon, au pe sapandapot do pakon ham. Sipata tubuh do pandoleian anggo jumpah ma

panorang Natal, tarlobih homa suan-suanan lang mambere hasil. Ambahni ai bolanja ari-ari pe
homa lambin mangasak, tambah ma homa gugu na laho mandalanhon pesta Natal. Aihh tene,
gabe pusok ni uhur do na jumpah bani panorang Natal on.

5. Ale nasiam hasoman, loja ni in nasiam mamingkiri Pesta Natal in. anggo bani hadirionhu
simbulus ni ai do. Lang pala sai maningon pasirsiron pakean na baru, atap pesta na paboiskon
duit, pingkiran ampa panorang. Ai lang ibasa nasiam barita partubuh ni Jesus nahinan? Ibagas
hasombuhon do Ia tubuh, lang adong Pesta na Banggal. Loja ni in nasiam!!

6. Ahh,, lambin lang huantusi aha do artini ni Pesta Natal na ipadalan hita bani panorang on.
Ganup hita manghatahon hata ni bei, lang jumpah hita hasadaon ni pangarusion bani artini na
Marnatal bani goluhni halak Kristen.
7. Nasiam hasoman, Pesta Natal aima Pesta Pardingatan Partubuh ni Tuhanta Jesus, na mararti
do ai : Naibata gabe jolma, laho paluahkon jolma humbani dosa pakon hamateian. Aima
tandani holongni uhurni Naibata bani ganup jolma i dunia on. Jadi, anggo marpesta Natal hita
bani panorang on, aima laho manghamalaskon anjaha manghatahon tarima kasih bani haganup
pambahenan ni Naibata hubanta jolma pardousa.

8. Bani pangarusion sisonai ma hita tardilo mamakei haganup na dong banta laho manghatahon
hata tarima kasih hubani Naibata, songon parmahan na roh humbani hasombuhonni
marsombah hulobei ni Jesus. Paruhur na hun Hapoltakan ai pe roh do marsombah marhitei
hasangapon, habayakon, hapansingon pakon hapentaran ni sidea ibagas unduk ni uhur hulobei
ni Jesus, na baru tubuh in.