Awighram astu,

I
1. sang curamih ayajna ring samara mahyun i hilanganikang parangmuka. lila
kembang ura sekar taji ni kecaning ari pejah ing rannangganna. urnnaning ratu
mati wijanira kunnddanira nagaraning musuh geseng. sahityahuti tennddasing ripu
kapokan i rathanika sucrameng laga.
2. ndah samangkana kastawanira tekeng tri bhuwana winuwus jayeng ranna.
kapwacabda bhattara natha sumusuhnira tekap i huwusnya kagraha. ngka lumra
tineher to paduka bhattara Jayabhaya panenggahing sarat. manggen sampun
inastwaken sujana len dwija wara reshi caiwa sogata.
3. ngka rakwan tumurun bhattara Girinatha lawan amarasanggha len reshi. yatna
cri pamaca mamurshita mangarggha ri sira saha cittanirmmala. yekan tushtta
manah bhattara muwuwus haji Jayabhaya haywa sangcaya. tatan krodha ketaku
yak para sukasunga wara karannanta digjaya.
4. tanggap tosen anugrahangkwa ri wekangku Jayabhaya rengon iking praja.
swastyastu prabhu cakrawarttya kita ring sabhuwana jayacatru ring musuh.
tekwan langgenga satmakanaku lawan kita tulusa bhattaraning jagat. nahan
cabdaniratereh telas inastwakenira reshi-sangha ring langit.
5. sampun mangkana sukshma rehnira bhattara telasira maweh anugraha. tan
dwanut samusuh narecwara padda prannata teka ri Hemabhupati. enak tandelireng
sarat maling aweh layat awedi ri cakti sang prabhu. anghing tan wedi sabsabing
wwang ahajeng teka sumilib i tambwanging wulan.
6. nahan don mpu Seddah makirttya caka-kala ri sanga kuda cuddha candrama.
sang sakshat Harimurtti yan katiga nitya makapalana kecaning musuh. sang lwir
lek pratipada cukla pinalakwan ahuripa wijilnireng ripu. ring prang darppa
Pacuprabhupamanirahyun i kadungulaning parangmuka.
7. byaktacamana pada-pangkaja bhattara Ciwa marang umastawa sira. yogyan
manggalaning miket prangira Pannddawa makalaga Kcurawecwara. ndan duran
kawacahalib kadi sereh pamahugi mahapu susuh geseng. manggeh tan seddepanya
ring waja tuhun palaren amanguna ngresing hati.
8. nguni kala nararyya Kreshnna pinakacrayanira naranatha Pannddawa. sinwikara
kinon lumakwa ddatengeng Kurupati mangaran Suyodhana. tan len
denaniramalakwa ri kapaliha ni pura nararyya Pannddawa. yapwan pasraha tuta
rakwa yadi tan pasunga karannaning prang adbhuta.
9. ndah mangkat sira cighra sangka ri Wiratta dinuluring anama Satyaki. enggal
prapta tekap ni cakti ni turangganira pinndda manglayang. kongang decanikang
Gajahwaya-purahawuk inemuka inghudan riwut. oruk warnnani wannddiranya
kadi coka makemul i paninggaling priya.
10. puncak-puncak i gopuranya hatur anghaddanga ri sira mungwa ring henu.
kadyagya ri teka Janarddana panambay i patapanikangawe katon. warnnanambaha
pangnikang bhujaga-pushpa mageyuhan umimba kanginan. sakshat
lakshmyanikang puri Kuru matakwana ri milu nararyya Pannddawa.
11. ndan bhagnan kari Panndduputra ri Wiratta tekapira nararyya Kecawa. yekan
coka langonikang hawan akunnddah anangis asekel cucurnika. mangka jring
malume ddawuh puddak i pannddan ika makilusu haneng watu. ho hoh
cabdanikang walik taddahasih padda manangis i pangnikang tahen.
12. kapwaca lengenging Gajahwaya ri tan padulurira nararyya Pannddawa. honya
n campaka manglugas kusuma paksha malabuha jurangnikang parung. lampus
tanjung ikangenes layat agantungan panawanging jaring-jaring. tan patma
bhramarakusanangisi laywaning asana manut ryyaking banu.
13. mangka nyasa ni pancuranya padda coka ri tayanira sang Dhananjaya.
hyangnyalek magegeh mulat kapenetan ri kapati ni lumutnikang watu. sangsara ng
karacakecap mulat i mannddaganika ri pipinya tan padon. kares-res ni susuhnya
mati manulad tiwa-tiwa ni mukarjjuneng cila.
14. tan mangka kalangonikang rawa-rawa n masemu lumihat ing wwanging
sabha. tiranyapned arajasa kayu suwarnna welas-arepikagelang kuning. mangka
tunjungikasekar wali pingul-pingulanika paddapajeng pingul. sarwwecchan
pacuring suhun bras ika yan pabanu-banu manganti ring renek.
15. singgih yan maparek purangjrah ahalep-halep anulari rehnikang henu.
bannanyasuragatulis makalasa baritu wunnika sinang rateng. mangka tingkah i
padmaraganika sahya sasekar apajeng-pajeng dadu. tan pacri teka ring petung
gadding ebunya padda tumut apawwahan gadding.
16. lwir tan wruh ring unadhikangalasa pinndda bisu tuli watunya ring jurang.
honya ng kumbang i kembanging rangin adoh wruha ri resep i pushpaning seddah.
anggeng cengga manuknya codda nacad ing syung atuha ri kalangwaning wukir.
tekwan tan kahanan welas-arep ulah ni sepahanika tan lumis mata.

II.
1. lengeng gatinikang hawan sabha-sabhaniking Hastina. samantara tekeng tegal
Kuru nararyya Kreshnnan laku. sira ng Paracurama Kannwa Janakadulur Narada.
kapanggih irikang tegal milu ri karyya sang bhupati.
2. wawang sira nararyya Kreshnnan umareng ngwaning sarathi. sira ng parama
sapta pannddita gumanti munggwing ratha. tuwin sira telas winurshita males
mawedastuti. munagyaken i haywa sang prabhu ya denirangastawa.
3. lengeng halepiradaran pinaka sarathi hyang reshi. teher mucap i donira n lari
mare nrepe Hastina. nda tan ya juga rakwa ghoshttinira sarwwa tatwadhika. lumud
wijil i cabda sang reshi kabeh mawarnnamreta.
4. seddeng hana rikang tegal Kuru nararyya Kreshnna n laku. rika ta Dhretarajya
cighra rumengo ddateng sang prabhu. nimitta ni lebuhnikang pura kinonaken
bhushannan. paddanatara wastra mulya teka ring wanguntur battuk.
5. tuwin padda ghinoshitan sira kabeh kinon sambhrama. tekapnira sang aryya
Bhishma Dhretarashttra motus tintut. kunang sira wihang minge cakuni Karnna
Duryyodhana. apan wruh i manah Janardana sapaksha ring Pannddawa.
6. seddeng masaji bhoga shad rasa samunggu ring jro puri. samantara ddateng to
kecawa hane harepning kutta. lengeng tekapikang garantung amapag humung
ghurnnita. tuwi n rathanirarereh lakunikann ddateng ring sabha.
7. ikang wwang aharep tuminghala ri sang narendra nn ddateng. paddagarawalan
mareng pangungangan wedi n kantuna. hanamahayu keca ta pwa n agelung rusak
ring henu. dudu tang asisig hatur sinaliwahkaton tan tulus.
8. lawan tang alayu manangga ri susunya karwe tangan. bangun sungakeneng
Janardana haturnya n anggyakena. hananak-anakan gadding makilayu mahemban
lengen. tekeng pangungangan kinonika mangakwa rame haji.
9. waneh wahu mapahyasan saha sipatnya munggwing sadak. yayangutus
amahyasanipatane narendrann ddateng. muwah ta ng angiket sekar hana ri hasta
tapwan tulus. sawang kapalajeng makona kusuma n paninjo haji.
10. nihan tang apregi n umiraken i kenya sak ring henu. ri resnika kasepa yan
lumihate halintangnira. kuneng pwa ri saragnya mungguh irikang saganya n tikel.
nda tan dwa kaweddar tikang kadi tutukning atwabwajeng.

III.
1. tanggeh yadi n kahuningan rarasing maninjo. cighra nn ddateng nrepati
Kreshnna rikang kaddatwan. tatan dunung ri Kurunatha sira n teka ngka. ngkane
nararyya Dhretarashttra sira n cumunndduk.
2. ngka Dronna Bhishma Krepa Calya kapanggih aparpat. lawan sang aryya
Widura Dhretarajya Karnna. cighra n sumunakenikang pasajing nararyya.
bhogopabhoga saha mas manni rajayogya.
3. atyanta tushtta ni manah naranatha Kreshnna. yan ton segehnira pararyya
makadi Bhisma. yekann ddateng prabhu ri Hastina sopabhoga. nda tan
tinanggapira Kreshnna haturnya nir don.
4. yekan panantwa Kurunatha ri sang narendra. he sang Janardana hade juga denta
mambek. tan tanggame pasaji nishttura tan pananggap. tan yukti tonenira sang
tuhu sadhu ring rat.
5. na lingnira n Kurupati n pangucap ri Kreshnna. mojar Janardana teher purihing
kinongkon. tan sambhrame panupakara ri tapwaning don. apan mamukti wisha
rakwa nasiddhakaryya.
6. na ling Janardana ri sang reshi-sanggha sukshma. sang Kreshnna mantuk
iniringnira sang sumantri. prapteng grehangusapi jongnira Pannddupatni.
somyabwat atwang i telasnira yan panembah.

IV
1. salihatira bhattari Kunti Kreshnna wahu ddateng. kadi sinekar ikang twas mar
harshapuhara sekel. atutur i nrepasunu lwir sang Pannddawa ddatenga. karananira
tekangnol tenggek sang teka mararem.
2. teher awarah i gongning duhkangannddehi ri sira. saha wuwusira masret de
ning luh lagi pinnegeng. kita tiki bapa tambangku n maryyangregepa lara.
sawulata saguyu mwang sang Pannddwatmaja saweka.
3. na wuwusira sudewi Kunti Kreshnna saha tangis. sang inojaranirojar tan cobha
nrepa mahishi. sakaharepa bhattari manggeh ngwang wekasanika. lingira teher
umantuk ri kwan sang wara Widura.
4. henengaken kamantyan sang Kreshnna n seddeng iniwo. tekapira Widurapan
ramyatut samanahira. nda t-ucapa Kurunathan karyyaca sinalahasa. sapasajinira
heman de sang Kreshnna tan aharep.
5. karannanira n ahom-hom mwang Duccasana cakuni. makamuka nrepa
Karnnatyanteng dushtta mangapuyi. lingira mapa to hetwantaweha ng pura
satengah. apan iki nrepa Kreshnna byakta Pannddawa sasisih.
6. nihan iki tekapanya n sampayke pasaji haji. tarimanen iki haywangong
wairamitukaraken. syapa karika musuh sang nathawas gati rasika. lingira teher
umantuk mwang Duccasana cakuni.
7. ndah i mulihira kapwangungsir wecmanira huwus. Kurupati kari coka
ngkaneng gwan wara mahishi. t-ucapen iki sawang sang dewi ng antyaning
ahajeng. Ratih ajapena wungwa mwang hyangning jaiadhi madhu.
8. saddatengira ri dewi tan warnnan henengakena. lawan i wangit i citta cri
Duryyodhana n asuma. lalu diwasa kalunghatis-tis we kiranna matis. riris adulur
angin mar mmamwat gandhaning asana.
9. rawi mangayat i rnuksha ngkaneng lod masilurupa. ndan asemu kamatreshnna n
ton rumning para ri dalem. karannanira n anolih moruk pinndda kamadelen. hela-
hela lumihat ring stri ri jro mahawu-hawu.
10. manuk amilih i kaywan ring taman pakulemana. kadi wayuh amagantyaken
kasih kalulutana. madhukara humung angnreng mar munggwing wiwaranika.
sawuwus ing angamer stri mahyun manglukarana ken.
11. sekar i kamuruganyamom gandhangasepi gelung. kadi wangini pupurning stri
karyya hyun arekana. cangak umuni n umantuk mor ngkaneng langit alango.
sapangadduhing asambat rennan wahu rinabhasa.
12. awicarita surupning we lumranglimut araras. gagana kadi sekar mas
kembanging wayu warangen. urutan adawa tawor digdahanarana langit. kadi
rudhira sumanglok ring ken jingga katitihan.
13. wulan umetu tumanggal tan cobhanisih araras. kadi mukaning aninjo ring
dwaranglayani hineb. gaddung awangi suminjang sak de ning priya mameddar.
menur anuduh i wintang lwir kaptyamutih i kakung.
14. ghattika ddumawuh anggyat ngkane hengni puranira. kadi wasiting anginte
stri ratnan hanangakena. curing umuni gumencang byaktan ratna piniddudduk.
asemu gela ng atangkis lot kegu tekaping akung.

V
1. leng-leng ramyanikang cacangka kumenar mangrengga rumning puri. mangkin
tan pasiring halepikang umah mas lwir murub ring langit. tekwan sarwwa mannik
tawingnya sinawang sakshat sekarning suji. unggwan Bhanumati yan amrem
alango mwang natha Duryyoadana.
2. kilyan sangka rika to taman arepat rehnyabale kancana. cobhabhra mahening
pawal natarikarok mutyaharararas. waiduryyamaranila bapra ni pager tunjungnya
manten lumong. muntab hinten i gopuranya macawinten suryyakantojwala.
3 ngka tang retna-wadhu paddasrang amajang lek n ton lengonging wulan. singgih
wwang ri dalem kaddatwan araras lwir bhasha munggwing teto. solah sengerikin
tekamuhara kung kingking kebek ring manis. lwir manggishtta minadhumasa
kinalacyan ketaki sok ttika
4. lila rehnya hanawisik wija-wijah marmme pajangning wulan. meghang stri
kena raga rakwa pinakampunyamangun harshaja. ngka cetyagati raga margga
sumilib mangso macabdhaamer. lecyanya n pawisik-wisik misikaken sambatning
oneng makung.
5. len tang stri majajar paddatitimahan ramya n pagantyangagem. ngka molih
parihara tapwa ri hiddepnya stri smining kung lulut. ndan ring sadhya n iki n dudu
timahika sangkerikang stri waneh. lila lecyan aweh timah tiki n asung running
wilapararas.
6. wwanten stri wahu kcuratan Madana-bannangdohi soring wungu. mamrem-
mrem tekaping kakanginakaken sambyamijet jong rapuh. tekwan wruh sumilib
maninnddyaken i rum-rum sang maweh kung lango. nahan hetunira n tenuh kadi
geddah rempuh ddawuh ring cila.
7. tan tunggal kalangonya len tang agamel harshe pajangning wulan. ndan
meghang wulan andamar pinaddeman de ning maling kung lulut. lumran ratri
peteng hatur jineming acru mukti rumning rimang. ngning wintang kumeddap
bangun mataning oghalek telas tan raras.
8. mangkin cunya tengah kulem lengeng arum hung-kura sang bhrahmanna. tan
pendah swaraning madhubrata manut kembang rarabning rimang. kryangning
ghanntta marum asanggha jaya ghannttangungkung angde lango. lwir genndding
curing ing rajaswala rare lenjep tekapning kaka.
9. ndah lunghang wengi sabeking wwang amegat sih tan panolih priya. wintang
nalikaning maling turida kung mawas wijilnyararas. kennttongning palu pinndda
wangsit ing atunggwing raga yan tan mura. angjrah cabdanikang satan pakukuyu
lwir sambating stri rimang.

VI
1. meh rahinasemu bang hyang Arunna kadi netraning ogha rapuh. cabdani kokila
ring kanigara saketerni kidungning akung. lwir wuwusing wini panca papetaking
ayam wana ring pagagan. mrak anguhuh bhramarangrabhasa kusuma ring
parahyasan arum.
2. gandhaning jangga menurnika ng alayalata mrik angumkuma mar. lot linawadni
kukusning angusuma ri wimba bhattara ganna. molih-ulih wangining sulasih acaru
candana gulgula mar. crigadding ing harepan wilaja mangalasa manegeh-negehi.
3. wwang nagarasemu dhurtta lekasing angin harddha parek ri muka. irshyya
ddateng mawarah ri mekaring asaneng taman lengengi. nica harep mulateng
susupana je jepen tuwi tut wanginen. hyunya manona sinempala ciri turidan
winawe gelungan.
4 mangkin awas lumarap manniki gupuraning pura kapwa katon. mari tinarkka
wayang kayunika tekaping mangebun gelungan. wahu katon mayaning camara
mangesah ing wengi lot karengo. waspada tubanika mangumek-umek apinndda
mahom tinaha.
5. byakta pangungguli Meru n ika kadi maroka lawan gagana. lagi paran-paraning
kiranna manuluhi haleping Himawan. lwir mulateng wekasing langit angapa kasor
giri Meru leyep. ring mamannik masuwarnna mamirah adukula cako caweli.
6. ndah kumenar marang arkka salattining amom smita ring kalulut. yekana
ngimbuhi lenglengi racananikang greha ratna lengo. towi tawing niki pahyasan
inucap anungkagaken bhramara. yan lumihat ri wayang-wayangani sekaring
kamuning ri hiring.
7. tekwan wanakala rereb-rereb adulur angin saha gandha sumar. ramya
tekangrahupi haleping alaya nira katon ahulap. lwir papikat jaladanglih araras i
wittangkaniki n kumelab. pinndda limungsungan ing cacadhara kawekas ri
halintangira.
8. tan huningan rahinawa t-ucapa Kurunatha mijil ri yawa. sampun acoca
mabhushanna salekasireng lagi polahira. karyya lumakwa n umundanga narapati
Kreshnna ri sang Widura. mwang prawararyya Yuyutsu Krepa Cakuni Karnna
sahayanira.
9. cighra wawang teka sang nrepati katemu Kreshnna lawan Widura. ngka sira
ramya padopacama mawacana n mijileng pasabhan. ring tadanantara mangkat
adulur ahalep tekaping mangiring. tekwan ikang cubha manggala gumuruh akon
mijileng wwang arum.

VII
1. seddeng praptatingkah para ratu lawan crindra ri Kuru. makasya cri
Kreshnnarepat i watangan sang narapati. kapanggih sakweh sang kshitipati
makadi ng Dhretapura. lawan Bhishma Dronnagra majajar aparyyangka mahalep.
2. rika sang Kreshnnan tinghal ing awang-awang n ton reshiganna. teka rep
sangkeng sukshmanira tuhu yan dewa sakala. malih sang Bhishma Dronna
manuduhaken ryyunggwananira. lawan sang cri Duryyodhana wawang anembah
masiddakep.
3. byatitan samparnna kramanira pararyyahem apupul. rika Kreshnnasambodhana
ri Dhretarashttradining ujar. umingsor ing Duryyodhana sira macabdabwat atereh.
rasamintamarwana nagara pakon Pannddutanaya.
4. wawang mojar sang cri nrepati Dhretarashttrangyugalani. ri sojar cri Kreshnnan
karannaning atut alyus asanak. kunang sang cri Duryyodhana sira tikin mogha
humeneng. tunminghal ring Duccasana cakuni Karnnohut umingel.
5. rika sang dewarshi prathita mangaran Ramaparacu. lawan Kanwa mwang
Narada Janaka na lwirnira tumut. paddanghaywani sojarira nrepa Kreshnnahayu
dahat. mara n ramyatut sanak adulura sakwan saparana.
6. muwah sang wipra Dronna makamuka sang Bhishma mawuwus.
tumut ryyujar sang dewareshi rahajong yan pinituhun. nda tan kantun mantri
Widura nguniweh Sanjaya wara. lawan patni sang natha Dhretanagarakon saha
tangis.
7. kuneng sang natha cri Kurupati mene n panghajengana. alah mangken hewujar
asugal anenggah tan ubhaya. tekap sang Karnnakon sumuruda sakeng sthana
watangan. rikan lungha Duryyodhana saha ganasnyambekanira.
8. nda tan lungha samanya hilanganira ng Kreshnna ginunem. wawang
sangrabdha ng sanjata gaja kudatingkah repat. delen caktyaning tunggal idderana
toh wahana wawang. ujar sang Karnna mwang cakuni saha Duccasana tinut.
9. na hetu cri Duryyodhana lagi hinundang Dhretapura. kinon canta de sang
yayahira lawan sang nrepawadhu. makin krodhakas langghana ri sawuwusning
wwang atuha. kedo mahyun muke sira nrepati Kreshnnanghala-hala.
10. samangka yodha Satyaki majar i sang Kreshnna saduga. ri tingkah sang
Duryyodhana harep amatyana ri sira. tuwin sampun rabdhan Yadubala kabeh
sastra nicita. humerajna cri Kreshnna karanna n ikin tan wawa rengo.
 VIII
1. ngka krodha Kreshnna mangadeg saka ring pahoman. mungwing natar sira
wibhuh kadi Kalamretyu. mintonaken kramanira n tuhu Wishnnumurtti. lila
triwikrama makawak ikang triloka.
2.tekwan catur bhuja siran tri cirah trinetra. sakweh bhattara pinakawakirasamuha.
brahmarshi dewa-ganna rakshasa yaksha cura. mwang daitya danawa picaca
manushya cakti.
3. yekan lumangkah asigakrak asingnanada. linnddu tikang kshiti paddolah
angambek-ambek. hyang parwwatagra gumiwang manawang ginanjuh. kombak
wway ing tasik anakra penunya kabwang.
4. tan dwa kawes gatinikang cata Korawares. ddyam tan pacabda mawenes nrepa
Karnnanatha. mangka Suyyodhana Yuyutsu Wikarnna murccha. byaktan geseng
tekapira n harepe hilangnya.
5. ngka Dronna Bhishma nguniweh reshi Naradadi. asrang mangastuti humung
saha puspawarsha. mojar bhattara Hari haywa magong wuyungta. swasthanikang
bhuwana kasihi tolihenta.
6. yadyan kitamejahane Kurunatha bhangga. bhagna pratijna gati sang
prawararyya Bhima. mwang Dropadi bishama tan pagelung gatinya. yan tan
pakadyusa ri rah cata Kcuraweng prang.
7. ndah kantenanya lesunen pwa geleng bhattara. ling sang watek reshi lawan
paramarshi Bhishma. karunnya buddhinira Kreshnna rennan pinuja. rep sakshanan
waluy arupa nararyya Kreshnna.
8. ngka tan tinutnira mulih reshi sanggha sukshma. sang Kreshnna mantuk umare
sira Pannddupatni. cighran tekajar i wihangnira Kcurawendra. kewalya mahyun
irikang ranna matya ring prang.
9. yekan pacabda karunna naranathadewi. bhoh tasyasih warahenta ri
Panndduputra. ngning cura-dharmma ng usiren ya matoha jiwa. swarggangulah
pejah i madhyanikang rannangga.
10. nahan wuwus nrepawadhu ri nararyya Kreshnna. yekan tinutnira n apadgata
sembah amwit. cighran mijil sira teher mahawan rathabhra. sering lawan Widura
Sanjaya len Yuyutsu.
11. sang Karnna rowangira Kreshnna haneng rathakram. sinwi kinonira tumuta ri
Panndduputra.
ndan sang nararyya ri y Awangga kedo sudhira. mahyun makola guna cakti lawan
Kiritti.
12. nahan wuwus nrepati Karnna wihang tan amwas. metweng rannangganna
jugangning ujarniragya. mamwitaneng kalima towi seddeng tumanggal. rapwan
masampuna ni pancadacinya kreshnna.
13. nahan wuwus Rawisutapyak akas rasanya. mamwit lawan Widura Sanjaya len
Yuyutsu. tan warnnanen sira huwus teka ring swawecma. lampah Janardana
makin kalepas kamantyan.
14. ndatitanen nrepati Kreshnna seddeng lumampah. cri Kuntibhojatanayeki
rengon kamantyan. cokan rase wekanira n wijileng rannangga. nguni nn ddateng
Kreshnna matakwan ing de.
15. na doniran para ri sang naranatha Karnna. motus kumona Kurunatha tan
agraheng prang. Konteya lingnira muwah ri sang Arkkaputra. byaktan n anaknira
ri kalaniran sukanya.
16. ndan Karnna langgahana sahadara lot manambah. manghyang ri tan
wurunganing mijileng rannangga. kakshatriyan juga palaywana lingniraswi. apan
kalinnddihan i sihnira Kcurawendra.
17. na hetu Pannddudayita n umulih sacoka. tan warnnanen sira tekeng greha sang
sumantri. lampah Janarddana muwah wuwusen wicata. sering lawan prawara
Satyaki Wreshnniwira.
18. enggal wawang tan ucapen tekaping rathadres. prapteng Wiratta katemu nrepa
Pannddawahom. ngka Kecawajar i wihangnira Hastinendra. mahyun mangungsira
yacatakera n prabhawa.
19. yekan paddanggetem acabda sapanndduputra. Bhimarjjunnaryya Nakulasru
lawan sang anten. tekwann ddengo ri pawekasnira Pannddupatni. motus
mangungsira yace tengahing rannangga.
20. mangka watek ratu sapaksha ri sang narendra. kapwasarag wuwusira n
mijileng rannangga. haywenucap Drupadasunu Wirattaputra. rabdhan umangkata
ri kalanikang prabhata.

IX
1. ryyangkat sang Pannddawenjing saka ri kuttanikang rajyadhani Wiratta. tan
pendah suryya sangkeng Udayagiri mijil mahyun angdipana ng rat. lumra wra sok
penuh lwir jalanidhi mangalih mwang wukir guntur agra. cihnanya n wah
tekaning gaja turaga ratharengga ratna pradipta.
2. ngka lumrang pushpawarsheng ghana sinawuraken sang watek siddha-sanggha.
lawan hung-kara mantrajaya-jaya ri jaya cri maha Panndduputra. matra ng
warshararab manggalani lakunirapangruhun seddung adres. apan sang hyang
Surendradulur in awang-awang mastwaken yan jayeng prang.
3. panghanjurning lumampah sang inucap angaran Bhima curanggakara. wwang
momo ring carira wwang imul-imul amuk tan hiddep caktining len. tekwan tan
sanggraheng wahana lumaku juga mwang gadagong inunndda. apan darppahawan
sagara giri gahanamet gajah singha barwang.
4. towi n krodhalawas matta kadi gajah alas gong galak tan panampar. nguni n
mahyun lumakwa prihawak amapagering ri tangguh narendra. mangken kotus
lumumpat kawigaran anguhuh wibhramasinghanada. limpad ring bhur bhuwah
swah swaranira hibekan sok anengko triloka.
5. ngkaneng wuntat nardryydrjjunna maratha mannik sarwwa warnnapajeng mas.
muntab lwir parwwatapuy lari gumesengane Hastina mwang ratunya. kumlab
tunggulnira ngwanara mangap adulur cabdaning megha makrak. lumra ring dik
widik mwang kilat awetu gelap byakta mangde jayeng prang.
6. wuntat sang Phalgunna ngkaryya Nakula Sahadewarathajong bangun jring.
endah lwir Kama kembar lumaku rumabhasa stri puri Hastinendra. leng-leng
tunggulnirapinndda jalada mahudan sarining ketakamrik. wagyutpatagelap tan
prakatta kadi keterning hrenging satpadawu.
7. leng-leng sangke siraryyottara masiringa ri Cweta munggwing rathabhra.
mwang Dhreshttadyumna Iawan Drupada padda tumut mwang Cikannddi tan
imba. pasrangning syandana mwang gaja kuda madulu ring hawan syuh penuh
sok. lwir mineng lod manungsung jawuh ahulap ulah sang huwus wreddha ring
prang.
8. ndah ngka sang Dropadi lampah araras ahawan ddampa hemapajeng mrak. lwir
dewi hyang-hyanging reka kanaka mangure ring mahanten katampwan. mawyang
kecanawang megha mangajarakene lannddunganya n hudan rah. byaktan rahning
musuh rakwa karamasanira n mempenekang gelung sak.
9. lila cri Dharmmasunumiringaken i siranunggang ing matta hasti.
sarwwecchajong kuning pustaka winawaniranabhi ratna pradipta. singgih yan
Dharmmamurttyaharep i repehaning Calya Duryyodhaneng prang. yapwan tan
pinnddahanggong galakirika tikang pustakadadya bajra.
10. sampun mangka tumut Kreshnna saha ratha suwarnnapajeng cweta
warnna.lilaningkah ri lampah para ratu pinatih sang watek Parthiwakweh. cakra
mwang Cangka tan sah mareki sira padabhra matengran kagendra. yekanghrik
ghurnniteng ambara siniringan i jrahni hungning mredangga.
11. wuntat sang Kreshnna Parthatmaja sira mangiring sang manamabhimanyu.
sangkep ring sanjatamkgga ratha mannimayangunndda cakra pradipta. lawan sang
Satyaki mwang Yadu bala mahawan matta matangga makweh.
sampurnnabhushannabhra makawaca kanakangde hulapning tuminghal.
12. munggwing wuntat watek Pannddawasuta mangaran Pancawaladwitiya.
kapwekabhra n umunggwing ratha mapapatehan rengga ratnarawis mas. sangkep
ring bhusannawastra caweli linaka mlek penuh kasturi mrik. sarwecchajong
helarning madhukara mahulap katrangan suryya teja.
13. akweh tingkah watek wira yan angucapakena a lampah agya tekeng don. ndah
ngka prapteng Kurukshetra sira telas atingkah kuttatyanta durgga. sampurnna
mwang kaddatwan rika to sira maha Pannddupatni hinundang. cighra prapteniring
sang Widura sira huwus manjing ing jro kaddatwan.
14. sampun mangka mulih sang Widura tan ucapen ramya munggwing
swawecma. warnnan sang natha-dewi padda suka mapupul mwang watek
Panndduputra. kapwahom-hom silih pajar i laranira yan sah mangungsir wanadri.
mangke n ramyaguwug yawetu suka dadi luh ndan ayas harsha hetu.
15. tangeh yan warnnanen tushttani manahira sang Pannddupatni haneng jro.
cighrahom sang watek Pannddawa makamuka sang Kreshnna len Parthiwakweh.
rehning senadhipa ring samara ya ginunem sang wruh ing byuha durgga. tan man-
man pannddengen saktinira saha bala yogya tanggwana ring prang.
16. ling sang Dharmmatmajajar hinajenganira sang Kreshnna len Parthiwakweh.
sapta kweh sang ginantang wenanga ri kawawa sang watek wira ring prang.
rapwan manggeh subaddhan bala-ganna pitu n akshohini kwehnya cakti. ngka san
Cwetan pinuja wruha ri gelarani ng cura yodheng rannangga.

X
1. seddeng mangabhisheka bhretyapati sang watek Pannddawa. ulah nrepati
Kcurawecwara n ahom pirengwakena. telas wruh i ddateng ni catrunira ring
Kurukshetra sok. tekap ni pawarah sang aryya Widurann ddateng manglawad.
2. rika prabhu Gajahwayan laku lawan watek Parthiwa. saKorawa marampak atri
gumuruh bangun sagara. akaryya kutta durggame tegal ikang pradeceng Kuru.
wawang huwus apan sira n nrepati cakrawartti sarat.
3. samangkana sang aryya Bhishma pinakagrasenapati. katon inabhisheka sampun
asekar sirabhushana. penuh paseluring prawira masurak masanggharuhan. lawan
paddahi bheri cangka tinulup humung ring langit.
4. tuwi pwa n iniwo watek ratu kabeh pinajakrama. tekeng bala samuha yodha
padda purnna ring wahana. pinannddeng atarung wilangnya sawelas
gannanyayuta. ya karanna niki n penuh wek i tekeng wukir mwang wana.
5. samangkana pareng mijil saka rikang tegal paprangan. mangulwan
angawuryyaken kutta watek nrepe Hastina. tekeng pagelaran paddasrang anulup
sungu jrah pareng. ya hetuni girangnikang bala kabeh paddagyapranga.
6. tuwin padda telas makaryya bhisuweng tegal paprangan. rawan ngaran ikang
tawur nrepati Pannddawamurwwani. kunang tawur i sang nrepeng Kuru ya kari
lud brahmanna. rikan sira cinapa sang dwija sagotra matyalaga.
7. ri mangkana nika nda tocapa to sang watek Pannddawa. telas metu sakeng
dalem kutta samipaning Pancaka. lumampah angawetan angharepaken gelar
Korawa. paddasrang anguhuh mangunndda winawanya kapwangadeg.
8. rikan padda ghumoshanan i sawateknya sowang pareng. sinantwa sinilan ri
sangmukani sang prawireng ranna. ri tan hananing amrangamawa mredangga
tunggul kunang. lawan gatinikang katon niawusananggego sanjata.
9. ri sampunika mangkana nda mapareng maso sahasa. humung swaranikang
gajah kuda lawan gubar mwang surak. samanta n atighurnniteng langit amuntwani
dik widik. gumenter i lemahnikang ranna-sabha ketugnyaselur.
10. sira n prawara Bhishma cighra magelar wukir-sagara. watek ratu haneng
gajacwa karannanya durggaruhur. pamah gununganing balamuk angalun tutanub
musuh. ya banwanika guntur anggulunganeng cilamarwwata.
11. kuneng prawara Pannddawanggelar i bajra-tikshnnalungid. Dhananjaya lawan
Wrekodara tumut cikannddi harep. Wirattasuta Satyaki Drupadasunu waktre wuri.
Yudhishtthira lawan watek ratu kabeh manganti tengah.
12. mulat mara sang Arjjunnasemu kamanushan kasrepan. ri tingkah i musuhniran
padda kadang taya wwang waneh. hana pwa n anaking yayah mwang ibu len
uwanggeh paman. makadi nrepa calya Bhishma sira sang dwijanggeh guru.
13. ya karannaniran pacabda ri nararyya Kreshnna teher. aminta wurunga ng
lagapan awelas tumon Korawa. kuneng sira Janardanasekung akon sarosapranga.
apan hila-hilan kshinatriya surud ya ning paprangan.
14. katon pwa sira Dharmmaputra manenes rika tan tumut. mare sira sang aryya
Bhishma Krepa Calya len sang dwija. macoca ri sukuniran inabhiwada de sang
prabu. apan purihing anglawan guru mapurwwa pujan harep.
15. kunang sahuri sang kinaryya pinakagra cuddamanni. bapangku laki haywa
sangcaya huripku talap huwus. kitanaku javeng rannanggana teher madrewyang
pura. sira ng nrepati Kreshnna sakshya yadiyan mresha ring wuwus.
16. ri sampunira mangkana ndan umaluy mareng paprangan. kshanna krama n
umunggah ing ratha padangregep sanjata. saharsha manulup ri cangkanira sowang
ahya humung. pareng mwang unining gubar saragi kotti-kottyanguhuh.
17. wawang pamukikang balasrang aselur mawantah jemur. rathaika sapuluh
gajahnya gaja tunggal acwadaca. kudaika sapuluh padatinika cura matteng laga.
kenohnya hana padarakshaka yadin wicirnnan winuk.
18. aneka tekaping wibhaga hana yan sasenadulur. hana n saka sapatti len
sapretana sagulmenaso. dudu ng macatur angga wira sacamu mwang akshohinni.
ya karannanikang prang adbhuta magenturan sok pejah.
19. pirang dina kuneng lawas kurukulalawan Pannddawa. nda tan dwa hana cura
mati weka sang Wirattecwara. prakaca wara Cangka namanira mati de sang dwija.
dyah Uttara paratra de nrepati Calya cureng ranna.

XI
1. ngka Cwetan umaso masenghit I pejahni cura kalih pisan. cighran tandang
amah gunung balangambah tekakshohinni. yekan syuh ratha natha Calya pinanah
mwang wira yodhan pejah.
tambis meh sira matya karwa Kretawarmmapan makarwan ratha.
2. ngkan pinrih tinulung tekapnira watek yodha haneng Korawa. Bhishma Dronna
lawan Wrehadbala Jayatsenadulur Magadha. nwang sang Rukmarathatmaja
nrepati Calyanimbangi sang yayah. nda tan dwan kawenang tekapnira sang aryya
Cweta singhottama.
3. dina ng Rukmarathan pejah magulingan ngkane saloning ratha. sang Cwetan
lurugen pamuknira mati ng yodha haneng Korawa. mangkin cirnna luyuk nda tan
hana mulat kapwakukud yatakut. tekwan wira Ghattotkaca Drupadaputra mwang
Kirittyatmaja.
4. yekangso reshi Bhishma cighra mapulih wuk-wuk watek Pannddawa. sang
Cwetan dinunungniran pamanahing diwyastra tikshnnasusun. ndah tan pamyat i
mangkin ujwala panah sang Cweta senapati. lud sang Bhishma
Dhananjayanulungi ring hru lwir hudan ring langit.
5. ngkan mangso Kurunatha cighra pinapag de Bhima ring sayaka. kanggek
mundur angunggut-unggut alayu munggwing kadohan kawes. anghing Bhishma
linaksha pinrih inirup wirangadeg ring ratha. dhira krodha ri sang
Wirattatanayangde cirnnaning Korawa.
6. mangkin garjjita sang Wirattasuta sena-natha ring Pannddawa. mangduk ring
wara tomare sang angaran Cantanawagreng Kuru. ngkan pinrih pinanah seddeng
niki n umur lwir naga rotanglayang. ndah tan dwan papitu ndan eka tumibanyuh
bahu Dewabrata.
7. ndah yekan tumeddun Wirattatanayanambut gada bhishanna. pakshamalwa
wehang surabrata rikan lumpat maharshing lemah. syuh tekang ratha kelu
sarathinika lawan kudanyangrepa. mwang matangga pirang puluh kunang
ikamatyadulur parthiwa.
8. kepwan sang wara Bhishma paksha murudares n ton Wirattatmaja. ngka
cabdeng langitajare teka ni patya Cweta de sang reshi. nahan hetunirahebang-
hebang anambut sing ratha mwang panah. pranna Cweta tikang minushttinira ring
bhramastra tikshnnalungid.
9. tan dwa trus ddadda sang Wirattasuta mar murcchan tiba ring lemah. yekan
coka sapannddawalara tumon sang Cweta matyalaga. bheda mwang cata
Korawasurak awu harshe pejahning musuh. sang Duccasana tushtta matta
mangigel yan ton Wirattatmaja.
10. ngka cri natha Wiratta cighra mapulih n ton bhrashttaning swatmaja. nirbhitan
umaso maharshi pinanah ring hru susun tan pegat. mangka sang nrepa
Pannddawarddha gumulung lwir cakrani syandana. mangka sang nrepa
Pannddawarddha gumulung lwir cakrani prabhu.
11. yekan sak caturangga bhretya reshi Bhishmawreg rusak tan pagap. lwir glana
n kari kesisan ri palajengning wwang saduryyodhana. moghan ratri ddateng kadi
pwa manapih warnnangutus mantuka. nahan hetunirapasah padda mulih ramyan
pangungsir kutta.

XII
1. atha seddengira mantuk sang curalaga ring ayun. t-ucapa haji Wirattan
kayyacanangisi weka. pinahajengira laywan sang putrenalap iniwo. padda litu
hajeng anwam lwir Kandarppa pinatelu.
2. lalu laranira nacasambat putranira pejah. laki bi sira sumungkem ring putraluru
kinusa. ginamelira ginantikang laywan lagi ginugah. inutusira macabda kapwajara
bibi haji.
3. anak aleheng i kasih yan tunggal kita pejaha. kita tiki katigalyus ndyanung
panglipura lara. syapa tiki palarengkwamuktyang rajya sumiliha. ri hilangi
tanayangkwaddu ngwang yenaka pejaha.
4. na wuwusira masambat karwa stryapega malume. inariwuwu tekap sang cri
Pannddwatmaja malara. pinahayu kinabehan sampun purnna rinuruban. hinanjut i
pajanging lek munggwing Panjcaka gineseng.
5. nda henenga kena putra cri MatsyAdhipa hinanut. muwah ucapen ulah sang
yodheng Pthinddawa magunem. gumunnita risang aryya Dhreshttadyumna
sumiliha. gelaren angajengaprang senapatya ring alaga.
6. ri huwusira pinuja de sang wira sira kabeh. kshanna rahina kamantyan mangkat
sang Drupadasuta. teka marepat atingkah byuhanung bhaya bhishama. ngarani
gelarirewoh kyating wira kagapati.
7. Drupada pinaka tennddas tan len Partha sira patuk. para ratu sira preshtta cri
Dharmmatmaja pinuji. helar i tengeniking sang Dhreshttadyumna saha bala. kiwa
Pawanasutakas kocap Satyaki ri wugat.
8. yata tiniru tekap sang cri Duryyodhana pinaddan. cakuni pinaka tennddas
manggeh Calya sira patuk. dwi ri kiwa ri tengen sang Bhishma Dronna panalinga.
Kurupati sira preshtta dyah Duccasana ri wugat.
9. ri telasira matingkah ngka Ganggasuta n umaso. rumusak i pakekesning
byuheng Pannddawa pinanah. dinaca-gunna tekap sang Parthalaksha mamanahi.
linud inurak inambah de sang Bhima kasulayah.
10. karannanika rusak syuh ncurapaksha mapuliha. pira ta kunang atusnya ng
yodhagalak mati pinanah, Kurupati Krepa Calya mwang Duccasana Cakuni.
padda malajeng umungsi Bhima Dronna pinaka toh.
11. tuwi sira nrepa Kreshnnanindyasarathi n umarep. aparimita rumakshe sang
Partha n seddeng alaga. syapa to Kurukulangheratanggwa ri pamukira. rinasa. n
asemu kala krodhangentyakena jagat.
12. niyata laruta sakwehning yodha sakurukula. yata n angutusa sang cri Bhishma
Dronna sumuruda. tuwi peteng i walekning rennwangde lewu wulangun. wekasan
awa tekapni rah lumramaddeti lebu.
13. ri marinika peteng tang rah lwir sagara mangebek. makalatuha rawisning wira
n mati mapupuhan. gaja kuda karanganya hrwanjrah pannddana n ika sok. aracana
makakawyang cura tan wedi maputih.
14. irika sira maharshi n karyyamuk tan ilu murud. pinanah inirup endah mangkin
garjjita masiga. hana n asemu katon ring dik lawan widik angeddap. kadi gila kadi
maya lalitya n paratha-rathan.
15. karannanira n umangso cri Duryyodhana Cakuni. makamuka Krepa Calya
Dronna mwang sakurukula. padda mulat i kacuran sang Bhishmaticaya dahat. cara
waranira sar sok lumra ring tawang awilet.
16. lewu marika kacaktin sang Parthapana-panahan. kacatagunna kakottyan
dening hru parama reshi. pinarawaca tinanggul de sang Phalgunna tinahen. makin
asusun atambeh lwir warshangibeki langit.
17. irika n asemu kepwan sang Partharddha kaparihan. lumihat i paranathakweh
mating ratha karunna. nya sang Irawan anak sang Parthawas lawan Ulupuy. pejah
alaga lawan sang Crenggi rakshasa nipunna.
18. ya karannanira sang cri Kreshnnan laghawa tumeddun. saka ri ratha sang
anten mungwing bhumi yan umaso. sahasa wawang amushtti ng cakrabhra
sumeng i ddadda. umarah-arah i tenggek sang Bhismambekira huwus.
19. irika to reshi Bhishmaharshakon mareka muwah. lingira laki sabhagya n
maskwamatyana ri kami. nghing atiki laki cakrantasopanawara dahat. mara n
umulih umungsir swargganteng Haribhawana.
20. nahan ujarira sang cri Bhishmacabda tan asuwe. jhattiti tumeddun enggal sang
Parthanggemengi tangan. muhut iri sira Kreshnnamatyana prawara reshi.
karannanira n umannddeg wandhyanakra reshiwara.

XIII
1. tatkalan nrepa Kreshnna tan tulus anakra ri reshiwara Jahnawisuta. ngka
munggah sira kalihing ratha teher tumihangaken ikang carottama. tan wyarthan
magawe pupug ni gunna sang reshi lesu mari katarojwala. tekwan suh lumihat ri
sang wara cikannddi karannani gupeniralaga.
2. anghing natha Yudhishtthirekang inawenira ri tangan ininggitan wulat. wruh
sang Dharmmasute wulat prawara Bhishma yan asunga huripnire sira. apan nguni
ri purwwaning laga siran sumungaken i nararyya Pannddawa. ndan sang wira
Cikannddi rakwa lingirantakanira lawan aryya Phalguna.
3. nahan karanna sang Yudhishtthira makon mareka lumuruge sang Arjjunna.
lawan wira Cikannddi manglepasane cara nicita ri jahnawisuta. yekan yatna
Cikannddi cighra mamanah ddaddanira tuhun arddha tan tetes. nahan karanna
sang Dhananjaya n amalwani ring isu lawan caranacah.
4. tan wyarthan mamangun tibanira sakeng ratha tuwi cata cirnna n anga mar.
sumyuk tang ruahirapareng lawan urani sekar ira watek reshing langit. lumra tang
jenu hema curnna kadi warsha kanaka saha gandha kasturi. mayawaktra lawan
tanah juga katon kshannika maheli mantra tan mawas.
5. kala cri wara Bhishma bhagna kawenang pinanahira Cikannddi ring cara. yekan
cirnna rusak punah sahana sang Kurukula padda tan hanapulih. cirnna natha pejah
pratipa pinakadinika saha turangga sarathi. de sang Bhima Ghattotkaca Drupada
Phalguna Nakula lawan Sahamara.
6. ngka teka n tumeddun Yudhishtthira sakeng ratha mawusana mushtti sanjata.
praptanghol suku sang maharshi wara Bhishma sira wawang udhani sakshanna.
yekangsonira sang Dhananjaya sang aryya Nakula Sahadewa tan kari. nging sang
Bhima tekangadeg saha gada turung umari galakireng ripu.
7. mangka sang cata Korawanangis asambat i marini musuhnirangusi. kapwasrang
maharep tekamekul i jong reshi wara malume rikang ranna. nda tan manggeh i reh
Wrekodara katon alihangan i gadanirangadeg. sambe natha Yudhishtthiran pinaka
karannanira teka kapwa sambhrama.
8. yekan ramya patut sapanndawa lawan sakurukula ri madhyaning ranna.
sanyasan kalasana darbha sira Phalguna humurup i marggane sira. ngka tekin cara
talpa namani kalasanira pangucaping watek ratu. apan tingkahi sang mahapurusha
wira mati makasilunglunga ng panah.
9. sampun mangkana Pannddawa muhun umura rahayu pangucap mahamuni. sang
Duryyodhanna kari mehi sira sang reshi banju lalu tan sinanmata. nghing sang
Partha kinon malaywana maweha banju ri sira lingnirangutus. cighra prapta
maweh wway uttama rahat ri gatinira masadhana ng panah.
10. lud tan mati siran humeraken ikang rawi diwasa manguttarayanna. tekwan
pwa ng dina saptaming kalima Kreshnna sira yan atidina kasihan. nda dhyayi juga
siddhi tar wawa rengo sira ri panasi caktining panah. nirbhana ginegoniran telas
awak pranawa huwus asari nishkala.
11. tangeh yan huningan maharshi hana ring cara cayana ri madhyaning ranna.
ngkaneng wandhira yan kinaryyaken i sang Kurupati ri pakoniratuta. simbanten
mamituhwa mangkin apanas twasira tekap i cabda sang reshi. nahan
marmmaniranulih mangabhisheka Bala pati ri sang wara dwija.
12. ndan moghanemu durnimitta niyatamangun ulahanireng rannanggana. kala
Dronna n inastwaken wengi hudan rudhira ri kutta Kcurawecwara. mangka tacwa
gajendra mogha katiba sahaja padda lumuh nir antara. cihnaning hilangeng
rannanggana ya rakwa pangucapira sang wruh ing naya.
13. mangkin tan paturu sireng kulem alah prihatin apega tan wring enaka. enjing
mangkat arampak atri gumuruh dwija wara pinakadining laku. prapteng
madhyanikang rannangga magelar katemu bala nararyya Pannddawa. kapwabyuha
gajendra matta sira kalih alaga kadi sagarapagut.
14. tatan dwenak ikang prang adbnuta weteh muwah i bala pati dwijecwara.
kirnnang mati lawan gajah kuda tekarwuda saha ratha pinndda parwwata.
yekangso Bhagadatta sang tulalay ing gaja gelarira sang Suyodhana. mwang sang
Karnna Jayadrathanupama sara pinaka gadding Aryya Korawa.
15. ndah bhagnan pinanah tekapnira sang Indrasuta pinakadanta Pannddawa.
lawan sang prawararyya Bhima sahasangudani cara waradbhutasulam. ngkan
rempak pakekesnikang dwirada matta gelarira watek Suyodhana. anghing Dronna
Jayadratharkkasuta kari mamapag i pamuk sang Arjjunna.
16. ngkan tandang Bhagadatta mangdemakaken gajahira ri turangga Phalguna.
sambyangduk ring amogha cakti teka manrusi hati Suranathaputraka. ngka
murccha sakareng wawang tinulung ing wijayakusuma de Janardana. byakta n
cighra males lumaksha Bhagadatta mati saha gajendra sarathi.
17. kala cri Bhagadatta mati saha sarathi tekapira sang Dhananjaya. kirnnang
yodha sahastinalara tenjuh cinacah i warayang sang Arjjunna. manggeh bhrashtta
n ika tekapira Wrekodara n amupuh animbating gada. yan tan ratryapeteng ya
karannaning aprang apasah akukud mareng kutta.
18. tekwan pwa ng wulan ashttami hireng akon adamara ri pararyya ring kuwu.
ramya ng wira sapannddawanayub aghoshtti pinigajihana ng arames musuh. tan
mangka bala Korawalah apurik mulat i sira Suyodhanalara. tapwan mrem sakulem
tekeng rahina mangkat aruruk umareng rannanggana.
19. dang hyang Dronna sirakumawwata ri Dharmmatanaya tutoring huripnira.
ndan pajarnira yan tayarjjunna Wrekodara tumulara kalaning laga. apan tan hana
wastu durggama tekap n iki sagelaraning musuh bhaya. byaktan cirnna punah
rinempak ika lingnira mangucap i sang Suyodhana.
20. nahan karanna sang Trigarta pati sapta mujar i sira sang Dhananjaya. masyang
mapranga ring pradeca ri samipaning acala kidul sangkeng Kuru. ndan sang
Phalguna cura tar wedi ri sambekaning ari manangtang apranga. nahan
marmmanirata yaprang ing adoh dinulurira nararyya Kecawa.
21. ndan mangka sira sang Wrekodara tinantang apalagana lor sakeng Kuru.
pangdenya ng daca raja putra weka sang Dhretapura saha partthiwacraya. ndan
sang Bayusutanggakara juga tan dadi surud i panangtanging musuh. nahan
hetuniran layat lumaga sang ratu sapuluh amahi wahana.
22. yekan garjjita sang wara dwija harep ri hilanganira Pannddawecwara. nahan
marmmaniragawe gelar anindya wekasing atidurggamarusit. cakra byaha
ngaranya nora wenanga rusaka ri taya Bhishma Phalguna. Karnna Dronna Krepadi
Korawa sukinya makakiping ikang watek ratu.
23. ngka sang Dharmmasutategeg mulat i tingkahi gelarira natha Korawa. apan
tan hana sang Wrekodara Dhahanjjaya. wenanga rumempaka ng gelar. nghing
sang Parthasutabhimanyu makusara rumusaka gelar maha dwija. manggeh wruh
lingirarusak mwang umasuk tuhu i wijilirarddha tan tama.
24. hetu cri nrepa Dharmmasunu mangutus magelara makara byuhadbhuta.
Dhreshttadyumna Ghattotkacagra ni supitnya makatutuka wira Satyaki. sang
Madryatmaja netra Pannddawasutasunguta sang Abhimanyu nasika. cri
Dharmmatmaja tennddas angga walakang para ratu tinata tekeng wugat.
25. sampun mangkana cighra sahasa masuk marawaca ri gelar maha dwija. sang
Parthatmaja cura sara rumusuk sakekesika linanjcaran panah. cirnna ng byuha lila
ng tekap sang Abhimanyu teka ri kahanan Suyodhana. ddang hyang Dronna
Krepapulih karanna sang Kurupati malayu marinusi.
26. yekangsonira sang Jayadratha kipingni pakekes i gelar mahadwija. himper
kori lekasniranghinebi cakti mangeker i nararyya Pannddawa. nda tan dwa rinebut
sang Arjjunnasutenideran inawaghata ring panah. tanj jrih mangkin umangso
manglepasaken cara wara kadi warsha yan tiba.
27. nda tan dwalwang i catru cakti mangaran Kretasuta sawatek Wrehadbala.
mwang Satyacwara cura matta kena tan panguddili pinanah linanjcaran. lawan
wira wicesha putra Kurunatha mati malara kokalan panah. kyati ng Korawa
wangca Lakshmannakumara ngaranika kasih Suyodhana.
28. ngka ta krodha saKorawalana manah panahira lawan acwa sarathi. tan waktan
tang awak tangan suku gigir ddadda wadana linaksha kinrepan. mangkin
Parthasutojwalamurek anjakra makapalaga punggeling laras. dhiramuk mangusir
yyacanggetem aten pejaha makiwuleng Suyodhana.
29. angganyan racane pamuknira natur tarunna seddeng amurwwa kanyaka. tan
pendah ri kedalning astra malungid sinamanira halis rinengwaken. byakta stri
naka panhiddepnira dumeh brannani jajanira n ngihning adyahi. mangka panghrik
i cabdaning gaja rathacwa walingira renbihning adyahi.
30. manggeh lwir asanasekar sapan inaswani luluting arum acangkrama. tingkah
Parthasutabhimanyu rinebut pinarawaca watek Suyodhana. mangkin
mangjrahaken kasinghan aharep humarasa gelunging watek ratu. mangga sempala
matya mon syuha lamun mangusira palupuy haneng kapo.
31. tekwan pwanwam arupa campaka turung besur awiji wilapa ring gelung.
mwang tan lagi rinekaken ri sekaring kanigara kinusa sinungkeman. ndah
mangkin kena margganaluru sawang jenu kanaka tumang winengyaken. byaktan
sak katiban ri danta dadi laywan i tayanira Partha masiha.
32. wetning sucrama darcaniya sinawang madana-madana karyya kamini.
salwirning cara warnna bhushanna teke cirahira humatur susup-susup. mangka hru
raga bhandanasemu sawit sekar i jaja hanasalesale. kalanya n pangene pilis kadi
maha rahira sahidu bang jinenwaken.
33. ndah yan mangkana katicuranira ring laga mamuhara harshaning mulat.
rehning warnna hatal mawor madhu kuneng hiwag amanis amatyani ng musuh.
mangken syuh pinanah tenuh yayan alindi sakapurek emas tibeng heni. hisning
rah mijil ing kanin kadi gula drawa pangisi wuluh gadding remek.
34. ndi n tan syuha ng arupa manmatha turung gremusen ing arejangres ing jinem.
yadyan prangeni tungtunging halis iwon tenuha ni hatining smaratura. kahinyan
padda cura matta sang anembuli ri sang Abhimanyu ring ranna. nahan
marmmaniran hane liddahing adyan angesah alarangajap tawang.
35. mangkin wira maso hatur sawara tawwan aharep i manisnikang madhu. tan
sengeh ri pangumpeting warayang ambhramara humung i tambanging laras. lawan
pringga jurangnikang gaja rathacwa weki cara waramuluh tingas. tambis mati
kagunturan laga tuhun raras i patinirangusir manis.

XIV
1. ri pati sang Abhimanyu ring rannangga. tenjuh araras kadi cewaleng tahas mas.
hanana ngaraga kalaning pajang lek. cinacah alindi sahantimun ginenten.
2. kalalu lara sapanndduputra sena. tinut i luwarnikang aprang asrang angdoh.
padda mulih angusir kuwunya sowang. tuwi wengi lud nawaming kulem
kamantyan.
3. t-ucapa lara nararyya Dharmmaputra. ri patinikang mangaran warabhimanyu.
kimuta bibinirangaran Subhadra. kapati wimurcchita rin lemah makunnddah.
4. kunang iki wekasing sacoka citta. tanaya Wiratta sang Uttari kasangkya.
apituwi sira garbbini wwalung lek. niyatanira n kari tan tumut paratra.
5. kunang iki sang arupa wangca Wreshni. weka Yadu sang Kshitisundari tekasih.
agarawalan adan widangamer hyas. apan iki milwa ri sang telas paratra.
6. ri seddengi panangisnikang sarajya. krama teka teki nararyya Kreshnna Partha.
asemu masamaya mwang aryya Bhima. padda telas asrang amati catru cakti.
7. irika sira sang Arjjunnan wimurccha. winarah i linanikang wekabhimanyu.
angucap amuka wira Panndduputra. awuwus inanjjuraken dumeh paratra.
8. wawang umuhuti sang nararyya Kreshnna. hila-hila lingnira haywa mangka
rakryan. padda malara sapannddawaticoka. wuwusira karanna Phalgunopacanta.
9. marek angucapi pada Dharmmasunu. atanja ri marmmanikang wekan paratra.
sira nrepati Yudhishtthireki mojar. amasuki cakra gelar dwijendra meweh.
10. lalu mara pasekung mami n paddamuk. mamulihaken ri wekanta tan tahen
twas. ndan ika kineker ing Jayadratheng prang. karanna sakorawa mangrebut
wakanta.
11. na wuwusira nararyya Dharmmaputra. wawang angadeg ta sang
Arjjunnapratijnja. alabuha bahni ya tan kasiddha tembe.
12. nahan ujarira Partha kaprakaca. teka ri Jayadratha waspadan dinuta. ya tika
karanna Sindhu raja mamwit. muliha maha dwija mogha makusara.
13. karannanira maren bhramanta citta. mulih aturu ri paddemnikang pradipa.
muwah ucapen ulah nararyya Kreshnna. mangucap-ucap lawan Arjjuneng upaya.
14. lingira mapa naya nararyya Partha. niyata rinaksha Jayadratheng rannangga.
tuwi mara teka rakwa socapanta. katekan i datanikang telas dinuta.
15. nihan iki rathaning hulun wicesha. ngarani kudanya Walahakabhrapushpa.
ikang i wuri Sukanntta senya cakti. anupama tan kataman mahastra diwya.
16. ya ta hawana nararyya Partha tembe. maran alaris patining Jayadratheng
prang. ya ta pahayun i Daruki n samasta. saha cara cakra sacanka panjcajanya.

XV
1. nahan cabdanira Janarddhane nararyya. sambydan marahup akaryya dewapuja.
kapwamehaken udakanjjali bhattara. sampun mangkana sira saprahara yogi.
2. ngkan rakwa kretawara sang nararyya Partha. sang hyang Rudra sira katon
tekacarira. mastwaken pejaha Jayadratheng rannangga. ndan sang hyang Pacupati
castra lingnirastra.
3. sampun mangkana pangucapniranta sakshma. tushttambek prawara
Dhananjjayataharsha. cighrajar ta sira ri sang nararyya Kreshnna. swastyastujarira
Janarddanan pacabda.
4. ling Kreshnnarjjunna mangucap makala ratri. ndah lunhang diwasa caci mijil
tumambwang. waktan sang tumuta mati priyabhimanyu. lwir lilamuhun i sang
Uttari sacoka.
5. hah pamwiting agati Sundari haram dyah. lung angdoha saka ring Uttariki
mangke. ndan haywalara kaka kolaken tangista. apan rehning aniwi cura ta pwa
lina.
6. nghing sihanta yan agesong awungku bhasma. ndanj carwing karas arennik
lawan tanah sor. tan len don ya sangakeneng mango wicesha. konen tangiketa
gatingku len kakanta.
7. ndah rapwan hana Citisundari kathapned. gatran ring kanaka ri leng-lenging
mahanten. ndah tontonta lawe-lawenya bhasa gita. murttyangku n wenanga
sapocapan lawan dyah.
8. mwang tan tinghali ng asanasekar sahasta. sambat ngwang maruruba
mamremeng cilatis. linganteryyaku pasekar ta ko ng mawak rem.
byaktangkwasahura pater du lor maluh truh.
9. lenj janmangku kaka rengon haneng cacangka. byaktanama taddah-asih sukan
pajang lek. mati pwa ng wulan irikan tumut paratra. belapanggila suka yan muwah
tumanggal.
10. yadyan monenga kita ring hulun haram dyah. tinghal ring tulis adulur haneng
puddak mrik. ndan haywasemu wagugen kitangaras ya. byaktan yan labuha
tulisnya dadya waspa. ling sang dyah mamuhuna karanna hyang Agni. lilaminta
binekelan sepah ri cangkem. ndan sang kari winulatan tikin katikshnnan. kasyasih
kadi kahuwan hurip masambat.
12. wina ng maskwibu citisundaringku rakryan. hah lungha pwa kita
makeringabhimanyu. byaktan sakwana kita ramya len kakanta. ngwang
karyyanangis anawak tawang wimurcca.
13. nghing sambatku tekakeneng warabhimanyu. haywasari sira n umundange
kakanta. dyah sugya samunana kabranangkwi santen. mwang tan wwanten
anuruyi gelungku yan sak.
14. lawan tan hana mupihe halisku napwa. rengkaning latti niyatan tayanicip. sis
ncuracapatha pinidku nojarasih. pet siwyan pangusapi luh betah rinengwan.
15. len harshangku ri pangamerniran pamakpak. harshakenta rari ri kala
rakryanamrem. ham-hamku n gereme kinol seddeng keneng sih. ndah yekan
wagusakeneng jinem tekapta.
16. mwang yang mowaha kita janma len kakanta. tontontaku madadi catakanawak
rem. len sambatku kawekase wuluh sinib syuh. ngkane ratna kumuda luhkwanusa
mamwas.
17. mwang yan mamrema kita len sirabhimanyu. karnnantaku dadi cucur tebeng
pajang lek. ngka takwibu katutur ing kinolta masku. tibrangku n kari manangis
pamomaken luh.
18. nahan sambatira sang Uttari sang amwit. ndah lungha sira Citisundari byatitan.
cighra prapta ri cawa sang priyabhimanyu. enggal kapwa padda geseng tekap
hyang Agni.
19. ndatita n gati Citisundari paratra. ndah lunhang diwasa tatas mijil hyang
Arkka. mangkat Phalguna madulur mwang aryya Kreshnna. Dhreshttadyumna
saha Catanika tan imba.
20. ndan sang Pannddawa nguniweh pararyya yodha. mangka makrama kumemit
ri Dharmmaputra. nghing Kreshnnarjjunna teka ring rannangga madhya.
Dhreshttadyumna saha balangga Wreshnniwangca.
21. cighran prapta ri hareping musuh sudhira. yan ton sang Kurukula sok telas
matingkah. cakrabyuha gelarirangga raksha Karnna. lawan Sucimuka makatma
raksha Calya.
22. padmabyuha tengah ikagra sang dwijendra. ngka tonggwan nrepati
Jayadrathan rinaksha. wuntatnyan cakatta gelar mahacwa hasti. sthana cri
Kurupati sok prawira yodha.
23. kwehning wira bala samanta raja cakti. lumrawrangasut asamuha maprameya.
manggeh yan teka daca yojana lebanya. mwang panjjangnya pira kunang to
yojananya.
24. ndah yekan tiniru tekap sang aryya Partha. Dhreshttadyumna sira kinon
rumehanangdan. kwehning wiraganna catanikadicura. lawan Parthiwa ganna
yodha sok masangkya.
25. ndan sang Partha pinaka tenggek anggakara. lwir kalagni harepi bhasmyaning
tri loka. tatan dwan laku gumulung marampak agya. mwang wadwa tiga ng
awaruthinin prawira.
26. tekwan cangkanira humung si Dewadatta. lawan cangka nrepati Kreshnna
Panjcajanya. lumra cabdanika weking digantarala. yande trasa ni hatining musuh
paddares.
27. ndah mangso mara sira Partha sahasamuk. cirnnan byuha makasulik
sakosikawreg. sakwehnya ng kari mati tan pasara sinyuh. sang Windadinika lawan
waranuwinda.
28. lila cittanira nararyya Partha cobha. yan lunghang ripu padda tan pasara yares.
ngka tekan pinanahira n lemah mijil wway. ramyan pangdyusira kudateher
mararyyan.
29. ngka praptang Kurukula sok rnangaladeca. aton Kreshnnarjjunna mangadeg
seddeng salila. cighradan to sira muwah mareng rathagong. sampun purnna
lekasirangreggep warastra.
30. tan dwangso Kurupati cura tan tahen twas. sarwwan sampun akawaca paweh
dwijendra. ngkan wyartha carawara sanjjtaryya Partha. heman tan hane mengene
ri Hastinendra.
31. ngka Kreshnnangutusi nararyya Panndduputra. manglakshe ratha Kurunatha
len turangga. lawan sarathi nguniweh laras tekeng hru. tan dwa n cirnna karanna
sang prabhu n lumumpat.
32. ndah lungha Kurupati dura munggwi wuntat. sang Kreshnnarjjunna maparek ri
Sindhu raja. ngka sang Satyaki tumutur mwang aryya Bhima. kapwanut wuri ng
inutus Yudhishtthiraswi.
33. ndan sang Satyaki sira teki labdhakaryya. molih catru gahananama
Toyasandha. mwang Kamboja wara lawan sang Ambisakya. kirnnang wira mati
lumah ri wahananya.
34. mangka mati tekapi sang nararyya Bhima. Citrayuddha jayasusena Carucitra.
rwekang durjjaya Jayacitra Citrasena. Citraksha sira n Upacitra Citradharmma.
35. mwang catrunjjaya Caramargga Dirgghanetra. len Catrusaha Suwikarnna
Rodrakarmma. lawan Dussaha saha Durwimocanakya. dyah Durmmasana saha
Durmmadaticura.
36. na tang Korawa mati de sang aryya Bhima. lawan sarathi gaja tunggangan
makunnddah. ndah mangka mati tekap aryya Wreshnniwangca. marmanya ng
musuh alilan larut wicata.
37. ngka Buricrawa n umaso masinghanada. tan lyan Satyaki dinununghiran
tumandang. tekwan garwwanira macabda tan panampar. dhik hah Satyaki mati ko
wuwusniracor.
38. bwat Bhuricrawa tija bagya kon kapanggih. ling sang Wreshnnikula mayat
larasniragong. sang Bhuricrawa mamamah telas linaksha. tan dwa syuh rathanira
karwa len turangga.
39. ndah yekan padda tumeddun sakeng rathabhra kapwakrak mamawa gada
mapatrayuddha. heman ddannddanira pareng tikel katanggul. kapwaprep sira
wekasan sarodra tanj jrih.
40. ndan sor Satyaki katiba telas karenggut. de Bhuricrawa dinedel gigirniragrah.
tambis griwanira tibana ca.ndrahasa. nistejan inuman-uman lumud nininda.
41. ngka Kreshnnan wulat ateher makon ri Partha manglakshe tangani lagaryya
Wreshnni rota. ngka Bhuricrawa pinanah tugel ri bahu. de sang Partha karanna
Satyaki ri patanggal.
42. ngka Bhuricrawa cumacad sang Arjjunneng prang. dushttapakrama paracidra
lingnirojar. mojar Phalguna kita Korawa tinutku. nguni linaning Abhimanyu tan
pracura.
43. yekan cighra Cinisutangadeg sarosha. mambil sanjatanira sang
Mangekabhama. tan wyarthan winalesaken ddawuh ri tenggek. ngka Bhuricrawa
karunnan pejah dinina.

XVI
1. atha ri pejahni sang prawara Somadattatanaya n tekap Cinisuta. makin aparek
Jayadratha tekap sang Arjjunna Wrekodarangurak amuk. irika saKorawangrebut
angembuli cara ware sang Arjjunna n aso. makamuka sang dwijendra Krepa Calya
Karnna Guruputra len Kurukula.
2. padda teka sahasanghudanaken warastra para yodha ring Kurukula. makahulu
sang Crutayudha pejah ddinanndda ri gada Wrekodara n aso. mapulih ikang
Crutayu lawan Ayutayu Niyutayu dirggha ring ayu. ya ta dinuman warastra padda
mati denira sang Arjjunnan pamanahi.
3. makin asusun matambeh i harep tikang Kurukulasulung-sulung amuk.
sapinasuking Gajahwaya sahaya Korawa nrepangrebut mangideri. gaja kuda kotti-
kotti ratu mati de prawara Bhima Phalguna jemur. nda tan iniwo tekap Kurukulan
tekangrubung amahi wahana waca.
4. hatur apeseh sang Arjjunna Wrekodaramejahi catru cura sategal. karanna
nararyya Kreshnna rumegep ri cakranira sakshannasemu sulap. kenarira sang
hyang Arkka ya tiki cinakranira mahli megha sumaput. ya ta magawe peteng kadi
pasileming rawi ri madhyaning jalanidhi.
5. irika n awe tikang sabala Korawanuraki sang Dhananjaya n aso. waling iki ratri
karannanika makon alabuhagni ring nrepasuta. ndah irika yan katon gunna
Janarddanangrapaken acwa mur kadi kilat. ddateng i harep Jayadratha
kadindrajala haliwat sakeng ripu kabeh.
6. karanna nararyya Kreshnna mangucap makon mamanaheng Jayadratha ripu.
inarah-arah ta tenggek ika de sang Arjjunna ri tungtunging carawara. kshanna
lumepas tikang Pacupatishu cunndduk i gulu Jayadratha tugel. sinusunan ing
carottama pakon Janarddana wawan mare sira bapa.
7. t-ucapa ta sang yayahnira seddeng mayoga matapeng gihacala madoh. kumenep
i rehaning weka yadin kapokana madadya satus ing ayun. malesa mamokane
laganika teher marawace musuhnya punaha. teka mara yekisapwani bapanya
kagyat atemah cirah juga katon.
8. atha ri paratra Sindhu pati sang hyang Arkka kumenar muwah masemu bang.
mangayat i tunggang adrya wahu manda tejanira kala Kreshnna dacami. t-ucapa ta
sang Suyodhana siraticoka manangis mareng dwijawara. awarah i kirnnaning mati
makadi Sindhu pati Somadattatanaya.
9. panesel i sang Suyodhana ri sang dwijanayuti Sindhu natha muliha. taha pi
balik pwa rakshanen I kalaning laga huripnya kunnddan ameren. kalalu tiki n
linumbar inatita tan pinulih tekap dwijawara. na wuwus i sang Suyodhana lawan
sang Arkkasuta Calyanatha Cakuni.
10. irika tan sang mahadwija macabda tekwan asugal wijilnikang ujar. syapa
karika wenang lawananing Dhananjaya ri sihnikang hyang iri ya. syapa tuduhenta
yodha lawanangkwa yan Drupada sang Wiratta nrepati. tuhun irika limang siki
pakon waneh wuwus i sang dwijalara n aso.
11. ya karanna sang Suyodhana mapinta kasih i sang Arkkaputra malaga. mapaga
ri wuk Dhananjaya makola cakti gunna len prabhawa ring ayun. wawang angadeg
ta sang nrepati Karnna sahasa mapag sang Arjjunna mamuk. suka ta manah
Suyodhana marek lawan Cakuni Calya len Kurukula.
12. ri seddengi sang nrepeng Kuru maso paddatri gumuruh tikang bala humung.
gumulung amahi wangkayatumang tikang gaja rathacwa mati matunah. apan iki
sang Dhananjaya Wrekodaragrani pamuk Yudhishtthira n aso.sagila kena
Suyodhana tekap Yudhishtthira n amogha ngarkka sumurup.
13. atha ri hilangnikang rawi tekap peteng mangalimun tikang wwang alaga.
syapa kari ko wuwusnya mapa ko muwah syapa sahurnyaning wwang alaga.
pawarahiki ngaranya ya dumeh wruhe lawan iki n silih prang arurek. padda
mategeg mamannddengi lawanya tan wawang animbat aprang anacah.
14. nda makin akandela ng timira kardamahireng aweh reseng wwang umulat.
irika tikang prawira humawag lawanya hana ng anggayur dulur ika. ana n anuduk
ri rowang ika len tang amrangi kadangnya sing sakaparek. wedi n iki cidranen ya
karannanya yan pati galah-galah pati cacah.
15. jemur ikanang lagarurek aneka mati tekaping peteng magamelan. krama
winangun tikang suluh agong lawan damar aneka ring gaja kuda. nguni-nguni
tang pradipa hana ring rathan anuluh ing sarengga saratu. karannanikawa waspada
katon sang amrang anuduk lawan silih arug.
16. padda masuluh to Korawa lawan watek prawara Pannddawasrang asinang.
makin ahalep patinghalan ikang rannamuwuhi ri prabha para ratu. anawing
inadyute larapi rathabhushana watek prawira n umaso. kinilatan ing warastra
lumepas mareng ripu pirang yutawetu hulap.
17. irika n awantah agra matugur tikang bala mapangharep gaja kuda. masalisiban
mangambah irikang balasurak amuk lawan silih arug. dhwanini laras Dhananjaya
masanggha cangka saha wanaradhwaja humung. muwuhi pasinghanada wara
Bhima makrak amupuh liman kasulayah.
18. irika n aso sasanakira Karnna namanika sang Dhruwa Jayaratha. ya ta pinapag
Marutsuta ddinenndda tan dwa mati karwa tan panguddili. tuwi dinulur pamuknira
tekapni sang Cinisutamanah mamanasi. pira ta kuneng gannanya ngahawis pejah
saha gajahnya mangregung awu.