ITI BRAHMA RAHASYAM PRETAMAH PATALAH

1a. Awighnamastu, Sasanggraha kari simo wus, ling nira Pranamya sirasa dewa, wakyamuni rama natha, dewa-dewa, mahadewa, parameswara sangkara.
Sri muni Bhargawa, sira mahyun tumakwanaken ikang pada Nirbana ring Bhatara, mangkana pwa bhiprayanira, manambah ta sira ring Bhatara, sirasa,
maka karana hulunira sira, ri telas nira manambah, mojar ta sira. He, Dewa dewa, kita dewaning dewata kabeh, he Mahadewa, kita Bhatara Mahadewa
ngaranta, he Maheswara, kita Bhatara Maheswara ngaranta, he Sangkara, kita Bhatara Sangkara ngaranta. Sunyasca nirbanadhika, siwangga twe
riniksyate, kutah tad wakyama tulam, srutwa dewo watista. Nahan takwanaknani nghulun ri Bhatara, hana ya pada Sunya, ya sinangguh kamoksan,
nga, wisesa ya, ya Siwa ngaranya. Nariksyate, katon pwa ya de Sang Yogiswara, katah desa, ndi teka desa katon ira, sajna Bhatara, an mangkana
kotta-/

2a. -/maning wuwus sang resi, yata karengo de Bhatara. Dewa uwaca. Mojar Bhatara, ling nira. Swa sarire mahayogi, pasyate hredayantare, wakyante
paramesanam, suryya yutama maprabham. Nihan wuwus ni nghulun I kita Sang Mahayogi, sira tumon Bhatara Parameswara, sateja lawan teja ning
aditya sayuta, ngka ri sarira nira mwang ri hati nira. Hredistam sarwwa bhutanam, pasyate jala cakra wat, anadi madhyani dhanam, siwanggadhya
namo mretam. Lwir Bbhatara Siwa, sira humunggu ring hati ning sarwwa mawak, tarpadi, tar pamadhya, tar panta, langgeng hana nira, kadi jala cakra
rupanira, sira ta katon de sang Yogiswara. Manasya darsyate wira, amibhute na caksuso, hredi sthanela dewi, murddhanta ri niriksyate, Ika tang
pada mangkana, yata katon denta, maka karana manahta, mwang jnananta jitendriya, ngka ri tumpuk ing hati, ring rahi tengah ning hulu, mangkana
wuwus inghulun ikitang wira.
2b. Yottra-yotre samuddhiksya, kotra-kotre walabhyate, padma kudala sang sthanam, tri konasya samiranam. Katon pwa kang pada mangkana de Sang
Yogiswara, kapangguh taya ngkana denira, mwang hana ta tri kona munggw ing pucak ning padma, malilang taya wih. Adho muka kucantare, hredaye
kala dehinam, darsanam apinapinam, mulaleta dwi labhinam. Lwir ning sarwwa mawak, sumungsang ya, munggwi pantaraning susu kalih, pratyaksa pinaka
wit ning desa napi, wisesa ya, tumayuk lwirnya. Kucantaro mahanapi, krsna maha mretam, sahredanta carobhinna, nilanjana sama prabham. Ikang
maha napi, munggwing hati, mahireng malit ya, mahamreta ya, padha tejanya lawan nilanjana, yata dudug tekeng hulu, an sake hati. Kasya, pasyati,
dewesa, siwa sunya nirindriyah, nirwikaro mahatmanam, bhutanan jiwa ewaca. Ngakana ring napi, mungguh ta Bhatara Siwa, sira

3a. ta tinut ing dewata kabeh sunya sira, nir indriya, kinatayan tan sira dening soddasa wikara, uttama sira, tatar keneng wikara, sira pinaka jiwa ning
dadi kabeh. Acalancalayet sarwwam, jagat sthawara jangganam, wyapi hityam bhawo wira, durjne yojna na warjjitah. Lwir Bhatara Siwa hane ri ya,
wyapaka nitya, menget sira tan cala, meweh sira kawruhana dening nina jnana, sira tamar cala irikang jagat kabeh, sthawara janggamawaknya.
Jnanawadi mahadewah, hredayanta ri sang sthitah, nitya dresto maha sangkyam, dehi twam anta rikswawat. Bhatara Mahadewa, sira ta nityo-
mungguh I tumpukaning hati, ngkaneng sarwwa mawak, tar katahnan, kadyakasa lwirnira, sira ta katon de sang wruh ring jnana. Dasa napyarka
karasya, hredayan dhani nismretam, sarire witatah sarwwe, jagatyarkasya rasmiwat. Ika tang pada napi, yata aliwat sangkari hati ning maarira, penuh
ing rat kabeh, kadi teja ning aditya lwirnya.
3b. Malati nama napica, asta satanic reruhe, tiryage wesanan bhyawa, datya tusti maheswarah. Hana ta napi Malati, nga, walungatus agengnya sangkeng
rambut tekeng tumpukaning hati, maka hinghan ing nabhi, ika tang napi mangkana, ya tamar suka Bhatara Parameswara. Nalare taka sang jnasca, napi
tresna hima pranah, dwi widhata pramanasyat, hredaye murddha bhinnatah. Mwang hana ta napi waneh, nalaretaka, nga, kadi teja ning mega hireng
tejanya, rwang kilan kalimhkingan dawanya, ya ta tekeng kapala, an sangkeng hati. Purastat samprawaksyami, napi namiti mulatam, aitesam dwija
rajendra, tabhyam sarwwa masesatah. Nihan warahakna rumuhun I kita Dwijendra, tar pasesa den kwamarahaken ike. Idhanam samprawaksyami,
hredayante widhanakam, prayatna dwija rajendra, srenu garbbham hredi sthitam. Hana ta yukti gamayakna sang pandhita, ya ta wara-/

4a. -/hakna mangke Bhatara pinakesini hatinta prayatna ta kata dwija rajendra. Hredante sumire wira, panca warnnama tah prabham, rakta tri warnna
masitam, diptam spaika sannibham. Hana warnna lima kwehnya, atisaya tejanya, munggwi tumpukning hati, malyang taya, lwirnya ikang rakta, Aghora,
ikang tri warnna, bang, putih, kresna ya Tatpurusa, ikang hireng padha lawan nilanjana, ya Sadya, ikang kadi teja ning aditya, ya Bamadewa, ikang
kadi manic spatika, ya Isana, nahan kramanya, ka wruhana ta kitang wira. Swaccham suksmam param sunyam, siwangkewalya macyutam, anamaya
manidhanam, hanadi madhyamantikam. Hana ta pada Sunya, malilang ta ya, wisesa ika, malit ya parama suksma, ya Kewalya, nga, tar pakahilangan, tan
padi, tar pamadhya, tan panta, ya karana ning dadi kabeh, ya kalinanya. Niranjanam nirakaram, nir gatrewam winisretam, astra siwasya nir malyam,
parannirbana mawyayam.
4b. Tan kareketan mala, tan palwir, tan pagatra, wyapaka, yoggwan Sanghyang Asta Sowa, tar pacala, wisesa ya. Etat parama nirbanam, aitat kewala
santikam, paratma maha dewam, parameswara sang jnakam. Ikang pada mangkana, ya Parama Nirbana, ya Kewalya pada, ya Paratma, ya Mahadewa,
ya Parameswara ngaranira. Siwa param brahma munih, proktotttamakya tallabhet, dhyatwa maha prayatneka, hredanteca lalataka. Hana ta Siwapada,
nga, Param Brahma, nga, ya tangent-angen sang wiku, maka karana ng manah nira, pinangguh nira pwaya, ngka ri tumpuk ning hati, yatna ta sira.
Murddhini mewapi munih, prawiset siwa muttamam, pranasta kramate wira, yatnatah sampratistati. Ngkana ryunggwanirangen-angenenira ya, mati
pwa sang wiku, mantuk ta sira ri pada Bhatara Siwa, sayojya ta sira lawan Bhatara Siwa, maka nimittang yatna nira mangkana wuwuskw I kita ng wira.
Wiswastharuna ta prabham, padma ra-/

5a. -/ga sama prabham, wyaptinam teja bayunam, antare manasontare. Pradipta-ditya sang kasha, jyoti jwalita pinggalam, mana sewa wijanyat, wiswa
dewam pratistanam. Hana ta padabang, kadi tambagenapi lwirnya, pada tejanya lawan mani padmara ga kadyaditya wahu metu, mwang kadi teja ning
apuy, Wiswadewa hyangnya, munggw I hati, Agnora wija ngkana, Ong Ang namah, yata kawruhana sang wiku, ring akasa, ryantara ning manah, maka
karana ng manah nira. Tadantari tri warnnasya, mahendra dhanu sannibham, matra tangkara ta dwijam, aiwan tatpurusottamam. Hana tri warnna,
bang putih, hireng, Tatpurusa wija ngkana, munggu ri hati, kadi wangkawa lwirnya, mahireng, mabang, maputih, panca tanmatra buddhi, ya tam aka
pada Tatpurusa wija ngkana, Ong Tang namah. Saewam prana uktewa, deham nam brahma mantratam, asita warnna mityuktam, nilanjana sama
prabham. Ika ta winarahanku, ya prana ning sarwwa mawak, ya brahma mantra, mwang hana ta warnna mahireng. Wesnama wija ngkana, Ong Sang
namah, pada lawan nilanjana tejanya. Tadante pari sang
5b. srestah, wisnu waktara mucyate, tasyantare prabha mantram, suryyayuta sama prabhah. Ikang Abyakta Wisnu ya, mijil sangkeng wit ning hati, ri
tengah ning hati hana ta prabha pada lawan suryya sayuta tejanya, Bamadewa wija ngkana, Ong Bang namah. Puruso wai maha brahma, maha dyuti-
ranopamah, aphatikasya maha suksmah, iswara wija sajnakah. Sang Hyang Brahma, Atma sira, atisaya kweh ning tejanira, pada sira lawan teja ning
manic sphatika, Brahma wija ngkana, Ong Ing namah, maha suksma sira, sira Iswara, nga. Param brahma maha suksmam, santam parama nirmmalam,
wayawa matra sanyasya, anggusta parimanatah. Hana ta Param Brahma, nga, sira maha suksma, santa parama nirmmala sira, sawayawa pramana
sangkaring anggusta. Tatra sunyam sadjneyam, siwa nirmmala sang jnikam, tathaksara samarabdham, niraksara manamayam. Lwir ning pada ngkeng
sarira, atyante

6a. wehning kakwruhanya, malilang ta ya, tar pakahilangan ginawe dening aksara, ndan kagrahitanya nir aksara ya, apan kasurudan suka dukha. Wiwidhatwa
mahadewah, dhyatawyah muni sattamah, santa sunya manopamyam, moksam siwa param brajet. Sira ta Bhatara Madewa, sira kawruhana de sang
wiku, samangkana wuwuwsani nghulun I kita ng Wira, wisesangen-angen pwa sira, mantuk pwa sira ring Siwapada lwirnya, sunya santa tan papada ring
wisesa, ya kamoksan, nga. Dine dine maha yogi, swatmaka mupa padyate, sarwwa papan nadehesmin, dahet kastamiwonalah. Deyanira sang yogiswara,
patemwakna jugawaknira lawan Bhatara sari-sari, mangkana pwa sira, ginesenganira ta papanira kabeh, ngkaneng sariranira, kadyangga ning apuy
manggeseng I kayu-kayu. Yadi papa sahasranam, kastamiwagni na dahet, swadehe swayam aga-/
6b. -/clet, wrajen moksan siwatmakam. Sang yogiswara sira tumun ikang papa sewu, kangken kayu ika, maka karanang jnana wisesa, yangken apuy, telas
pwa siran utumunwi ri ya, kapangguh tang keswaryyan de nira, tar pasesa pwa denira, kapangguh tang kamoksan ginawyaken lwir nira. Aiswaryya
wreddhi madhikam, sarwwa bhutawa sangkaram, labhyate muni ratyantam, moksam parama durllabham. Pinangguh sang wiku ikang keswaryyan,
wreddhi ya, wisesa kumawasaken sarwwa bhuta gawayanya, yatyanta kamoksan, nga, atisaya ring meweh. Iti bhuwana saniddhya nama sastram,
brahma rahasyam pretaman patalah. Bhur bhuwah swah iti tatwam, bhoktikam bhuwana trayam, rakta warnnama aghontat, na bhyan nyaset
manisibhih. Nahan tang tri bhuwana, nga, Bhur, Bhuwah, Swah, Indraloka, nga, winarahaken de Bhatara, rakta warnnanira, Aghora wija sira, ya ta
nyasakna sang pandi-/

7a. -/ta ring puser, Ong Ang namah. Brahma prajapati syanam, gayatri sang sthitam bhawat, tri warnna tri ganam jneyam, aitari sanyaset wudhah. I
ruhur nika, hana ta pada Mahaloka, nga, unggwan Sang Yaksa Brajapati, Gayatri wija ngkana, ikang Gayatri tiga warnnanya, bang, putih, hireng, ya tri
gana, nga, Satwa, Rajah, Tamah, kawruhana ika, ya ta nyasakna sang pandita ring weteng, Ong Tang namah. Panca suddha wicaryyante, wesnawi wija
sambhawet, nilanjana prabha tulyam, hredistham sanyaset wudhah. I ruhur ika, hana ta pada Janaloka, nga, unggwan Sanghyang Wisnu, kinahanan ta
ya dening panca suddha swabhawa, lwirnya, asuddha widhya, swabhawa, prakreti, pradhana, abyakta nahan tang Wisnu bheda lima kwehnya, atma ya,
Waisnawi wija ngkana, mahireng kadi nilanjana tejanya, ya ta nyasakna sang pandita ring hati, Ong Sang namah. Nawajne yama karttawyam,
prabhatraya matindriyam, akarmmatwa maha prabham, porusa waksa siswatam. I ruhurnya, hana ta pa-/
7b. -/da Tapaloka, nga, Unggwan Sanghyang Brahma, Bhamadewa wija ngkana, Antaratma kojaranya, prabha matra lwirnya, tan kinawruhan dening indriya,
tan pagawe, tan ginawe, unggwan Sang Purusa ya, ya ta nyasakna sang pandita ring dada, Ong Bang namah. Satyalokan tata rudrah, brahma jiwa
manadhikam, aiswaryyam swaccha paramam, kanta mule nyased wudhah. I ruhur nika, hana ta pada Satyaloka, nga, unggwan Sanghyang Rudram Isana
wijangkanam Paramatma ya, wisesa ya, ya Brahma Kantra pada, ya jiwa anadhika, ya keswaryyan, nga, malilang lwir nya, ya ta nyasakna sang pandita
ring wit ning gulu, Ong Ing namah, Akra nirmmalam guhyam, siwam param manamayam, wyaktan sarwwesu bhutesu, kante siwapura nyaset. I ruhur
nika, hana tapada Siwa Purusa, nga, unggwan Bhatara Siwa, Akara wija ngkana, Niratma kojaranya, alilang sunya, ya Siwa mgaranira, wisesa ya,
kasurudan suka dukha, wyapaka ring sarwwa bhuta, ya ta nyasakna sang pandita ring gulu, Ong Ang namah. A-/

8a. Atyanta nirmmalamncunyam, dhruwam siwataran tatha, talu kante niranandam, ukaran sannidha payet. I ruhur nika, hana pada unggwan Bhatara
Siwatara, Ukara wija ngkana, atyanta nirmala sunya, nitya wisesa ya, tan keneng suka duhka, ya ta nyasakna sang pandita ring laklakan, Ong Ung
namah. Acintya manasanggrehya, siwang kewalya madhikam, anadhi maddhya mantasca, lalatane niyojayet. I ruhur nika hana ta pada kewalya, nga,
unggwan Bhatara Parama Siwa, tan padi, tan pamadhya, tan panta, tan kawenang inangen-angening manah, mwang buddhi, Ongkara wija ngkana, ya ta
nyasakna sang pandita ring rahi, Ong Ong namah. paramtyanta mathulam, niscayanca niramayam, siwatamo makarasca, bhrumadhye sannidha payet.
I ruhur nika, hana ta pada unggwan Bhatara Siwatama, Makara wija ngkana, wisesa ya, tan cala tan hanang hyuni riya, tan hanang suka duhka, ya ta
nyasakna sang pandita ring sela ning halis,
8b. Ong Mang namah. Niskalanca niropeksam, kewalyam paramamciwam, agarbbha janma maranam, lalate pari sanyaset. I ruhur nika, hana ta pada
parama kewalya, nga, unggwan Bhatara Parama Siwa, kalih lawan Bhatara Sada Siwa, Ongkara wija ngkana, tan keneng garbbha janma marana, ya ta
nyasakna sang pandita ring hulunira. Ong Ong namah. Siwa matyanta paramam, pade wiswa nyasotanam siwa suksmadhi madhyantam, kapala
byantare sthitam. I ruhur nika, hana ta pada winarahaken, unggwan Bhatara Atyanta Suksma, Ongkara wija ngkana, sada hananya, tan hana adi
madhyanta ngkana, ya ta nyasakna sang pandita ring jro kapala, Ong Ong namah. Siwa nirbana suddhantam, kapala wiware sthitam, kapalantati
wiksepam, para nirhana macyutam.
I ruhur nika, hana ta pada unggwa Bhatara Nirbana Siwa, Ongkara wija ngkana, ya sinangguh Waksewa, ya ta nya-/

9a. -/sakna sang pandita ring lyang ing kapala, Ong Ong namah. Siwa parama nirbanam, sunya sunyati sunyakam, siwa dwaran nyaset wira, Ong karam
sannidhapayet. I ruhur nika, hana ta pada unggwanira Bhatara Parama Nirbana Siwa, Ongkara wija ngkana, ya ta nyasakna sang pandita ring wunwunan,
Ong Ong namah, nahan ta ling Bhatara mujarakna kang pada. Ya ta, na rupam, na rasam, na gandham, na sabdam, na sparsam, anamayam, acintyam,
anadi madhyantam, anamata, asangkirnnam, aracanam, acalitam, nainggita, anacyutam, aksayam, anahata, aspreham, agarbha janma maranam, na
rogam, na wedhadhyayam, na malam, asamam, anaksam, asambatsaratu masa haratra, namuhurta, sandhyawela kasta, puruso, asandhi, wirahitam,
sunyati sunyam, dhurwam, anta paksam, widhitam, na socam, kewalyam, nirasrayam, siwam, Moksam, nirasraddham, na wikalpam,
9b. nirasraddham nakalpam, nirbanam, parambrahma, anantaram, itarebhayam, amretam, iti brahma, isa aisah, dewah, paramarthah, sah parameswarah,
sah paratma, sah srestah, wighatendriyah, tat brahmatam, moksa, nirudam, nirapayam, nirwikaram, aparyadam, anasrawam, esah dewah, wyapinam,
suksmam, aniyam, watanuh, atindriyah, anastritah, suddhah, niskalah, saswatah, saewa, mata, bandu, swajanah, mitrah, guruh, dewah, maharddhikah,
Mahadewa iti. Na rupam, tan parupa sira, nawarnnam, tan pawarnna sira, na rasam, tan parasa sira, na gandham, tar pagandha sira, na sabdam, tan
pasabda sira, asparsam, tan kasparsa sira, anamayam, tar keneng lara sira, acintyam, tar keneng idep, anadi Madhya ntam, tan adi, tanmadhya, tan
atambyan, tan anta, tan apwekasan, amita, tan pahinghanan, asangkirnnam, tan parok, agatram, tar pawak, aracanam,

10a. tan karaktaning rupa warnna, adwityam, tan hana lumewihana sangkeng siran maha wisesa, na calitam, tanm cala, alinggakam, tan hana lingge ri ya,
acyutam, tar pakasurudan, aksayam, tan palwang,anirgatam, tar pagati, aspreham, tar panyun, agarbbha janma maranam, tar kena ring garbbha janma
marana, arogam, tan hana lara risira,asokam, tar keneng kingking,awedhanam, tanm pangidep, lara, sangsaram, tan pangidep sangsara, nirmalam, tan
pamala, na kalam, tan pakala, na kasam, tan pakasa, na samwatsara, retu, masa horatra, tan patahun, tan paretu tan pawulan, tanparahina wengi,
asandhyangsam, tan pasandhyang sa, na muhurta, na wela kastam, tan pawela kastra, nottarayana, tan pettarayana, na daksinayanam, tan
padaksinayana, na waisuwan, tan pawisuwayana, animepyam, tan hana kedap i riya, santi, santa, sunyam, sunya, dhyawam, menget, waram, wise-/
10b. -/sa, satyam, tepet, witam, sunyati sunya, swaccam, malilang, kewalyam, kewalya, nirasrayam, tan pasraya, siwam, ya siwa, nga, Moksam, ya kamoksan,
nirasradham, tar elik, nirbanam, ya kamoktan, parambrahma, sira wisesaning brahma, nirakaram, tan palwir, na bhaya, tar keneng bhaya, amretanm,
tar keneng pati, etam brahmani, nahan ta rupanira Bahma pada, nga, Saesah dewah, sira dewa, sah paramarthah,sira paramartha, sah maheswarah,
sira maheswara, sah paramatma, sira paramatma, sah srestah, sira wisesa, wigata ratindriyah, tan hana ratindriye sira, tad brahmantam, sira
brahmanta tapa, moksam, sira kamoksam, sredam, tan keneng suka duhka, niramayam, tar keneng prihati, paran nirbanam, sira parama nirbanan,
nirwikaram, sira tar, keneng wikara, tar rengat kalinganira, param wisesaning wisesa, padam, sirapada wisesa, a-/

11a. nasrawam, tar ili, esah ewa mahadewah, sira mahadewa, nga, wyapiyam, sira penuh ring rat kabeh, suksmayam, sira wisesaning halit, mahiyam,
siratisayaning raya wastu, witanuh, sira tan pawak, atindriyah, sira lewihingtan katon, hita sadamretah, sira amreta sadasuka, suddhah, sira tan
pateleteh, niskalam, sira niskala, saswatah, sira nitya, saewam mata, sira ibu, sira bapa, sah wandhuh, sira kadang, sira dewa, sah maharddhika, sira
mahardhika, Sira sang mangkana kramanira, Mahadewa iti, sira Bhatara Mahadewa, nga. Tatapitwa mahadewah, wyapi sarwwa garrisu, akasami
wakumbesu, wrejanmoksam anasrayam. Sira sang yogiswara wrih ri Bhatara Mahadewa, wyapaksa ring sarwwa mawak, mangkana ring kumbha makweh,
inadelan ing wulan tunggal, mangkanasimpen ing nora, ulih ning kabeh, tangkes wisesa irikang sadwargga, sira ta mantuk ring kamoksanpadan, tar
pahingan le-/
11b. -/pas nira. Asta dewa tatha sthane, etat sthaneca manuse, panca sthanam ewa tiryyak, siwami kodi tistati. Dewata walu bhedanya, lwirnya : Brahma,
Prajapati, Mahendra,Somya, Gandharwwa, Yaksa, Preta,Pisaca, nahan ta bhedanya manusa tunggal, ndan catur janma wilanganya ; brahmana,
ksatriya,waisya, sudra, nahan tang catur janma, nga. Kunang ikang tiryyak lima bhedanya ; pasu, mrega,paksi, sarisrepa, sthawara, nahan bhedanya,
de Bhatara Siwa, sira tae ka wisesa, umunggw ing rat kabeh. Siwas sarwwagatha suksmah, bhutanam antariksawat, acintya maha grehyante,
naindriyam pari grehyante. Bhatara Siwa sira wyapaka, sira suksma tar keneng angen-angen, kadyangga ning akasa sira, tan kagrehita dening manah,
mwangh indriya. Kaste kasteya tha bahnih, suksmatwam upalabhyate, bhute bhute mahadewah, suksma geni upalabhyate. Sanghyang Ngupay ha-/

12a. -/ne rikang kayu-kayu, ndatan katon, maka nimitta suksmanira, yatha, kadyangga ning akasa, mangkana ta Bhatara Mahadewa, an hana ring sarwwa
mawak, ndatara kapangguh sira, maka nimittang suksmanira. Harinimam manopaye, loka bhawati pawakah, janan yogas tatopaye, dwayameke
maheswarah. Inupaya pwekang kayu, anguswan, umijil tekang apuy, ngke loka, samangkana ta Bhatarareswara, an kahidep, maka nimitta jnana nira,
yoga pangupayanta juga. Jnnanatwam anasi dewasca, nirmalam sarwwa dehisu, pretyaksam iwa dhiptagnim,prapnoti paramanggatam. Sang yogiswara,
umangen angen Bhatara, ngaken manah nira, lwirnya, nirmala pratyaksa hana ring sarwwa mawak, kadyangga ning teja ning apuy, dumilah rupanira,
hinangen angensang ogiswra pwa bhatara mantuk ta sira ring kamoksan. Iti brahma rahasya nama sa-/
12b. -/stram dwityah patalah. Siwatma nirmmalo rudrah, ksanto jiwati niskalah, tatah purusa ewasit, bharupedam, kala prabhuh. Bhatara Rudra samya
kalawan Bhatara Siwa, nirmmala sira, sira ati niskala, sangkari Bahtaari Rudra, mijil tang Purusa, Brahma katatwanira, kadi teja ning aditya, sira ta
prabhu. Awyaktang kresnam ewasit, suksma nityam atindriyah, acintya durlabhe jneya, tamo bhutam acetanam. Sangke Sang Purusa, mijil tang
Awyakta, Wisnu tatwanira, tankawenang ginrahya dening indriya, tan kawenang hinangen-angen meweh kawruhanira, tamo bhuta sira, tan pacettana
sira. Awyakta buddhi rewasit, gori satwam atah param, tats tejam idam asit, rakta warnna rajo mayam. Sangkaring Awyakta, mijil tang Buddhi,
kuning warnnanira, satwa pinaka swabhawanira, wisesa sira, Sangkaring Buddhi, mijil tang Aha-/

13a. -/ngkara, bang warnnanira rajah pinaka swabhawanira. Tatat tejas saewasit, kresna warnna tamo mayam, sangkalpatmana ewasit, cintat manggana
sambhawam. Sangkeng Ahangkara, mijil tang Pnaca Tanmatra, hireng warnnanira, tamah pinaka swabhawanya, Saking Panca Tanmatra, mijil tang
manah, sangkalpa gawenya, manah kalpa, nga mamilang mangen-angen swabhawanya, nahan dadinya, sangkalpa wikalpa. Tatha akasam ewasit, wyam
sabdam alaksanam, tatha bayur iti sparsam, sabda sparsa gunatmakam. Sangkeng manah metuh akasa, wahya ya, sabda gunanya. Sangkeng akasa
metu bayu, sabda sparsa gunanya. Baywagnis sambhatam manah, sabda sparsa wirupawan, rasa rupa sabda sparsa, sabda wak salilatmakah. Sangkeng
bayu, metung agni, sabda rupa gunanya, Sangkeng agni metung apah, sabda sparsa rupa rasa gunanya. Sabda sparsa wirupakya, rasa gandhawati mahi,
etad ut-/
13b. -/patti na menam, dwa dasakyantu pancadha. Sangkaring apah, metu pretiwi, sabdha sparsa rupa rasa gandha gunanya, nahan tang tatwa rwa welas
kwehnya ; Rudra, Purusa, Awyakta, Budhi, Ahangkara, Panca Tanmatra, Manah, Akasa, Sayu, Agni, Apah, Pretiwi, nahan ta lwir nikang tatwa, Sa, BA,
Ta, A, I, wijanya. Etesam abhiyogatwam, jagat deho bhijayate, tartra tatrasi na bhutah, saeko siwa tistati. Ika ta kapasangan ikang tatwa Rudradhi,
ya ta pinaka sarira ning jagat kabeh, kunang Bhatara Siwa, sira ta wyapaka ring rat, sira ta wyapaka ring art, sira wisesa, sira mungguh ring tatawa
kabeh. Prettiwya sarwwa ekayam, salile bhawa sang smretah, hageno pasupati jneyam, bayo ikanam ewaca. Nihan wibhaga Bhatara munggw irikang
tatwa kabeh, sarwajna ngaranira yan andeling prethiwi, bhawa ngaranira yan andel ing toya, Pasupati ngaranira yan andel ing Sang Hyang Agni, Isana
ngarani-/

14a. -/ra yan umandeling bayu. Akase bhagawan bhamah, mahadewopi manasi, tanmatra stheca ugreyah, tejase rudra ucyate. Bhima ngaranira yan haneng
akasa, kinahanan ta sira dening asta guna, Mahadewa ngaranira yan haneng manah, tan pawak, Ugra ngaranira yan haneng panca tanmatra, Rudra
ngaranira yan haneng teja, makawak Ahangkara. Budhistha iswarah jneyak, dhatawyanto mahisthitah, cettanye puruso brahma, karanestha
maheswarah. Nihan kwruhakna, Sang Hyang Iswara maka sthaning budhi, Sang Hyang Brahma sira abyakta, masthanang prethiwi, Sang Hyang Purusa
sira ta bhuta cettananya, Sang Hyang Maheswara ta pinaka karananya, kabeh. Nahan tang tatwa rwa welas ya ta angen-angenira kapangguh tang
kamoksan de niera, sayojya ta sira lawan Bhatara Siwa tan padi, tan pamadhya, tan panta, sira ta Bhatara Parameswara, nga.
14b. Katinah sarwwto bhumih, drawatwam sarwwato jalam, usnatwam sarwwato bahnih calitwam sarwwato nilah. Ikang makas ring sarira, prettiwi ika,
ikang drawa ring sarira, apah ika, ikang molah ring sarira, bayu ika. Samiratwam tatha kasam, sangkalpam sarwwato manah, etat bhutwa sarirakyam,
bhotika nabhi rusyate. Lyang ning sarira abeh, pinaka hawa ning bayu, ya akasa bhuta, nga. Ikang manah sangkalpa ring sarira, manah ika, nahan
tatwani sarira ning panca maha bhuta inajaraken, Aghora wijanya, ring nabhi sthana, On Ang namah. Wijang kurantu tanmatram, tejastha nabhi
manyatah, buddhi radyawasanatwa, gonokang kuksi rucyate. Ikang pnaca tanmatra, takara wijanya, ya prati saraning Ahangkara, ikang mangaku lewih
ya angkara,

15a. ikang buddhi madwa wisaya gawenya, Gonika wijanya, Uda ri sthana, Ong Tang namah. Upanyantam tad awyaktam, wesnawi hredi sang sthitam,
bharupam itawakyanam, cettanyam manusam padam. Ikang Awyakta ya pinaka Pradhana, Wenawi wijanya, ring hati sthana, Ong Sang namah. Purusam
ati kewalyan, aditya iwa iswarah, asang kreto maha tejah, porusa wwaksasi sthitam. Ikang Purusa ya Ati Kewalya, nga. Kadi tejaning aditya tejanya,
ri dhadha sthana, Ong Bang namah. Wijasya karanam sambhuh, niskalam siwam aksaram, brahmadi paramesanam, suddham suksma sanan rasrawan.
Bhatara Sambhu sira ngkaneng hurip, kunang iakng aksara brahma sira niskala, malilang sira, sira Parameswara, nga, suddha suksma langgeng sira
ring gulu nunggu, Ong Ing namah. Etat panca padam proktam, bhuwanasya pramanatah, sarirasya pramana-/
15b. -/twam, tatwam sariranam brajet. Nahan ta tatwa panca pada, nga, Ong, Ang Tang Sang Bang Ing. Ya ta wyaktinya winarahaken tekap sang pandita,
pinaka prana ning bhuwana, kunang sang wruh prana ning sariranira, sira ta mantuk ring Bhatara Siwa. Bhedan yayan tawedhrete, tatwa wataya sang
kirnnam, wita wijaksaram suksmam, rohan tat witangguram. Nihan ta wija ning ambulu, atyanta litnya, tatan hana bhedanyan ika, bhedanika, nga, ika
witnya, pangnya, rwanya, tan kinawruhan ika kabeh, i wekasan pwaya metu tang lunggah, sangke wiji ning ambulu, winerak ning hangin. Hana ta loka,
nga, sapta dwipa, sapta sagara, sapta parwata, i tengah ning sagara nunggu. Anta dwipam samudrasca, anta parwata sanggamah, rasa-tala gatas
saptah, bhuh lokam iti sangjnikah. Hana samudara ri tengah ing dwipa, hana ta parwata sanggama ri tengah, hana ta patala

16a. pitu, ika ta kabeh, bhuh loka, nga. Suryya candro tatha bhomah, wudhah suraguruh bhreguh, sanenscaras tatha rauh, Dhuma-ketustathe wace.
Sanghyang Aditya, mwang Sanghyang Candra, Hyang Anggara, Hyang Budha, Hyang Wrehaspati, Hyang Sukra, Hyang Saniscara, Hyang Rau, Hyang
Dhumaketu. Naksatra dasopendrah, mahendro dasa ewaca, tri widham sakra mandhalam, tetrayantam mani pina. Sanghyang Dasendra, Sanghyang
Dasopendra, nahan tang Sakra mandala, tiga kwehnya, winarahaken sang pandita. Dasendrasca dasopendrah, mahendro dasa ewaca, tri widham sakra
mandhalam, tetrayantam mani pina. Sanghyang Dasendra, Sanghyang Dasopendra, nahan tang Sakra mandala, tiga kwehnya, winarahaken sang pandita.
Sakra nama prawaksyamam, sang ksepa bhregu sattamah, maya kutam itascewa, ratri nirmala mewa-/
16b. -/ca. Kunang nama ning Sakra mandala, ya ta pajaraknangkwe kita, sangksepanya dengkun awarah ri kita Bhregu tanaya, hana ta danawa maya, nga,
hana ta kutamita, nga, hana ta ratri, kapwa nirmala. Wara wacyate kanistam, wrehaspala, maha tapah, sudarsana ta pancewa, yecanye diwya bhoginah.
Hana wara wacya kanista, nga, Hana ta dewa len sangke rika, diwya bhoganya. Sang krama wacanam sarwwam, ewa madhye purandharah, tasya
sahasranekasya, nawa bhoga samasritah. Sira ta Sang Hyang Indra kabeh, nahan tadinira, kapwa mahyun irikang sathana, ya pinakonggwanira, haneka
sahasra kweh nira, kapwa makweh bhoganira. Airawano wimanastah, sahasrasca mahar dhikah, yadetad mandalam sakrah, bhotikanti widhiyate. Ka-
/

17a. -/pwa ta sira manunggang ring airawana, pada sewu matanira, pada mahardhika, nahan ta kramanira, indraloka ginawe nunggw i ya, Bhotika wijanya,
Ong Ang namah. Anta saram prawaksyami, prajapating guna layam, indralokam parancordham, ksayam sadhara kancubham. I wekasan pwa ya,
warahaknang loka kaprajapatyan, ta sthana ning tri guna, satwa, rajah, tamah, ya teka sthana i ruhur ika wisesa ya, sodasa wikara hane ri ya
niralambha ya. Manaso medi dewatah panca tanmatra jayate, ista nistabhi sangkalpam, wisayanca prati prati. Sangkeng panca tanmatra, metu tang
manah, i wekasan sakala ya, Sang Hyang Mahadewa hyangnya, manah sangkalpa hayunya, mwang elik wisayanya. Sabda tanmatra towyomah, srotam
sokyam aji janam, dhisastroktam dine wakyam, srotawyam wisayam pra-/
17b. -/ti. Ikang akasa, sabda tanmatra gunanya, ya maweh srotendriya, mwang suka, yuktyaning mangrengo wisaya nika. Sparsa tanmatra tobayu, satwak
mukam aji janam, sresta dhyam abhi bhutanca, akasam adi dewatam. Ikang bayu sparsa tanmatra gunanya, ya gumawe kulit mwang muka sparsa, Sang
Hyang Akasa hyangnya. Rupa tanmatra to bahnih, caksuh karmma aji janam, waktre suryyadi dewatah, drestasyadi haramaret. Ikang bahni rupa
tanmatra gunanya, ya magawe mata mwang muka, Sang Hyang Aditya hyangnya, mulatanang yukti wisayanya. Rasa tanmatra tah toyam, jiwa mukam
aji janat, barunas tatra dewatah, bhogam atsaya sad rasah. Ikang apah, rasa tanmatra gunanya, ikil mwang muka ginawenya, Baruna hyangnya,
mangrasani bhoga wisayanya. Gandha tanmatra to bhumih, grana mukam upadayet,

18a. prethiwi dewatah tasya, pretiwya mabhi bhutakam. Ikang lemah, gandha tanmatra gunanya, ya gumawe irung mwang muka, Sanghyang Prethiwi
hyangnya, mangabung wisayanya. Buddhindriyoni pancamyam, proktani paramarsinah, karmendriyani pancate, prawaksyamyanu purwwakah. Ikang tang
buddhindriya, winarahaken Bhatara Kapila, an lima lwirnya, ndya ta nihan; srote, twak, caksuh, jihwa, grana, ya buddhindriya, nga. Kunang ikang
karmmendriya, lima kwehnya, ya ta waraha knang kwi kita. Panca buddhindriyani ewam, satwikanta wijayante, tamo rajah mano weda, panca
karmmendriyanite. Ndah sakwehta kita kabeh, kawruhanta tekang panca buddhindriya, satwa swabhawanya, kunang ikang karmmendriya, tamah
mwang rajah swabhawanya. Wacanam sabda tanmatra, iswara dewatah smretah, waktawyam abhi bhutanca, dewo dewa-/
18b. -/sya sambhawah. Ikang wacana, sabda tanmatra ika, pinaka temahanya, muwusaknang yukti wisayanya, Sanghyang Iswara hyangnya. Sparsa tanmatra
to jatah, panindriyadi dewatah, grahyaman abhi bhutanca, bayu dewas sanasanah. Ikang tangansparsa tanmatra gawenya, Sanghyang Indra hyangnya,
mangalap wisayanya, Bayu hyangnya waneh. Rupa tanmatra to payuh, mertri dewam adi kramam, utsarggam abhi bhutanca, bahni rupa twam acaret.
Ikang payu rupa tanmatra ya, Sanghyang metri hyangnya ngkeng sarira, mangentut angising wisayanya, Sang Hyang Agni sira narira. Rasa tanmatra
to ciri, prajapati rato cyate, anandatmyatawo pastat, reta mutra wisarjjanah. Ikang upasta rasa tanmatra ya, Sanghyang Parajapti hyangnya ngkeng
sarira, mamukti suka wisayanya, ya metwaken reta mwang mutra, mangkana wuwusangkwi kitang

19a. wira. Gandha tanmatra to pado, gamana gamanat matah, wisnu dewas tato bayuh, dharane nati padyate. Ikang suku karwa gandha tanmatra ya, lumaku
mangher wisayanya, ammancal, manandhung gawenya, Hyang Wisnu hyangnya, ya ta dharanan de sang pandita. Buddhindriyam panca bhutam, maha
bhutam sukam bhawet, etat yuktancari rakyam, bhokta tatwabhi diyate. Ikang karmma buddhindriya lima kwehnya, pinaka muka Sanghyang Panca
Mahabhuta, nahan tang tatwa pinaka sariraning sarwwa mawak, inajaraken Agroha wijanya, ling sang pandita, Ong Ang namah. Prethiwi salilanca gni,
bayur akasakam manah, dasendriyani wahyani, wikarastopi sodhasah. Prethiwi, apah, teja, bayu, akasa, manah, mwang dasensriya, ri heng ika kabeh,
ya sodhasa wikara, nga. Ma-/
19b. -/ngsasthi snayu pittanca, kesaro mana kastatha, hredaya dyascawai sarwwam, prethiwi pancadha smretah. Nahan wuwusangkwi waneh, ikang daging
mwang tahulan, oto, rambut, wulu, suku, mwang kresna, wunsilan, para paru, pusuh pusuh, hati, limpa, ika ta kabeh, kaharan prethiwi ngkeng awak,
makadi kulit, kawruhana yan dadi ning panca mahabhuta. Rudhira mutra retani, sweda slesma yatha srawah, amjja medhanca pittadyah, panca dasa
silam smretam. Ikang rah, mutra, aringet, hidu, sumsum, hutek, srawa jatinya ika kabeh, ya apah ring sarira, dadi sangkeng panca mahabhuta ika.
Muke maha dapi yognih, garhaspatyas tathe dare, hredaye daksinagnisca, sambarta pittake sthitam. Sanghyang Mahadagni ri muka, sanghyang
garhaspatyagni ri weteng, Sanghyang Daksinagni ri hati, Sanghyang Sambarttaka-/

20a. -/gni ring ampru sira nunggu. Payu psate suciriti, caksusagni ri hocyate, agnistu pancadha jneyah, sariresu saririnam. Sanghyang Asucyagni ring payu
pasta, Sanghyang Caksupagni ring mata, nahan ta krama Sanghyang Agni panca mahabhuta, munggwing sarira kajaring aji. Pancaste abyu wojneyah,
jnatawyah panditerapi, pranopana samananca, udana byanam ewaca. Sanghyang bayu lima kwehnya, kawruhana de sang pandita, lwirnya; Prana, apana,
samana, udana, byana. Baywah sarwwa sariresmin, ekatma pancadha gatih, muke pranopyadhopanah, samane hredi sang sthitah. Ikang bayu munggwing
sarira ning dadi kabeh, tunggal, ya ta lima kwehnya, kramanya nihan; ikang bayu prana ri muka, ikang apana ring payu, ikang samana ring hati. Udana
mastake jneyah, byana sarwwangga sandhisu. Uda-/
20b. -/na ring hulu, byana ring sarwwa sandhining sarira. Srote caksuh muke tasmin, hredaye aidare tatha, payu paste sthito sarwwam, akase pancadha
smretam. Kapo, hirung, hati, payu, upasta, tahulan, ika ta kabeh, akasa ika, panca mahabhuta wisesa ya. Ete panca wisesayet, mahabhutani sang
jnasca, ete sarwwa sariratyam, sandhi bhuta nawedita. Nahn ta lwirnya, pada lima palenanya ya, panca mahabhuta, nga, ika ta kabeh, panakawak ning
dadi kabeh, kinahanan dening atibhotika duhka, mwang ikang ati dewika duhka. Esam ewa wibhagana, ngka thayisyapi tatwatah, yamo tatha
samutpannam, tatra tatradi gacchati. Kunang wibhaganya kabeh, nyan kramannyan pinasangaken, sawilangnya, saparanya. Granan treptyanti gandhesu,
prethiwi tretyanti bhojanam, jihwa rasetu tretya-/

21a. -/nti, barunan treptyate sada. Ikang hirung trepti ya ring gandha, Hyang Prethiwi sira suka yan mangkana. Ikang ilat trepti ya ring surasaning pangan
kinum, apah pinakawaknya, Sanghyang baruna sira suka yan mangkana, sada kala suka. Caksuh treptyanti rupesu, suryya treptih sanityasah, twaci
treptyanti we sparsah, marutascabhi treptyate. Ikang mata trepti ya manon ing rupa warnna, Sanghyang Aditya suka sada yan mangkana. Ikang kulit
trepti ya ring sparsa, Sang Hyang bayu sira suka sada yan mangkana. Srotan treptyanti sabdesu, bhimah treptyanta waidisi, gamana gamane padah,
wisnu ricchanti treptyate. Ikang talinga trepti ya ring sabdhatisaya menak rinengo, trepti Bhatara Bhima ring desa yan mangkana. Iakng suku kalih
trepti ya ring lumaku lawan angher, Bhatara Wisnu iclha sira yan mangkana.
21b. Ananda wisaye treptih, tatrop-astah prajapatih, utsargga wisaye payuh, metri dewo bhi treptyati. Ikang upasta trepti ya ring ananda wisaya, ya
pwan adi ngkana, Sanghyang Prajapati sira suka sada. Ikang payu, trepti ya ring mangentut mangising, Sanghyang Metri sira trepti yang mangkana.
Grahane wisaye cewa, panindra pyabhi treptyate, wak treptyate swawisaye, wakye weswanaropica. Ikang tangan, trepti ya ring mangalap alap,
Sanghyang Indra suka sira yan mangkana. Ikang sabdha trepti ya ring wakya wisaya, Sanghyang Weswanara sira suka yan mangkana. Wahyendriyani
sarwwani, mano treptyang kathayami, sangkalpaneh mano wira, somam treptyanti nityasah. Nihan tang wahyendriya kabeh, mangkana tang manah,
aneka kramanya, nahanta wuwusan I nghulun ri kita wira, ikang manah trepti ya ring manah sa-/

22a. -/ngkalpa, Sanghyang Soma trepti yan mangkana. Wibhaga twewa tanmatra, ugra dewodi treptyate, abhomanopya angkarah, rudro treptyanti
tadgunam. Ikang panca tanmatra, trepti ya ring mawibhaga, Bhatara Rudra sira suka yan mangkana, ikang ahangkara trepti ya ring mangaku, Bhatara
Rudra sira suka yan mangkana, maka nimitang gunanira. Budhiradih wisayate, iswaro brahma sang jnakah, abyaktan tad upadano, wisnoh treptyadiko
bhawet. Ikang budhi pwa ya trepti ring adhyatma wisaya, Sanghyang Iswara maka wija brahma mantra, sira trepti irikang abyakta, trepti ya ring
upadhna, Sanghyang Wisnu sira gumawe trepti yan mangkana. Cetanacetanam treptyah, purusa wwani gadyate, adidewo mahadewah, karanatwedi
treptyate. Sanghyang Purusa sira trepti ring cetana mwang acettana, Sanghyang Bra-/
22b. -/hma sira suka yan mangkana, kuneng Bhatara Mahadewa, sira ta suka karana twa. Swe swe wisaya sannidho, tapayanti swa dewatah, wisaye pwapi
sarwwesah, swa sudewapi sarwwatah. Ikang wisaya tan madoh ring awak, swabhawanya, ya ta gesengana sahananya kabeh, I sedengnyanggeseng ikang
sarwwa wisaya, irika ta yan inaran sarira suddha swabhawa, nga, yata sinangguh makawak dewata kita yan mangkana. He dewa maha suksmaca,
waktastradi dewatah, sarwwa tawesu wisayam, siwa dewodi gacchati. Nahanta karma nikang tatwa kabeh, kapwa pada suka ring swawisayanya,
kunang Bhatara Siwa, sira wisesa, sira wyapaka ring sarwwa dew kabeh, lawan wisayanya, sira ta munggw ing sarwwa bhuta. Romani resayascewa,
rudhirani maharnnawah, mangsani prethiwi jneyah, sanadis nayawah sretah. Ikang wulu

23a. Resi hyangnya, ikang rah Tasik hyangnya, ikang otot Lwah hyangnya. Asthini parwwato jneyah, wretadya himawan smretah, antra nagastu wijneyah,
sapta dwipancamang sakah. Ikang tahulan gunung hyangnya, ikang wungsilan, ya ta himawan hyangnya, ikang usus naga hyangnya, ikang daging sapta
dwipa hyangnya, ya ta kawruhana hyangnya. Parswa dwayos tatha proktah parwwata sanggamah, ewam panca widha sarwwe, maha bhuta mayam
smretam. Ikang lambung kalih, parwwata sanggama hyangnya, winarahakni sang pandita ika kabeh, an panca mahabhutawaknya, ling mahamuni. Tesu
sarwwesu satwesu, siwa ekodi tistati, yana treptyantite sarwwe, siwa ekodi treptyate. Kuneng Bhatara Siwa, sira trepti rikang satwa kabeh,
kalinganya, yan suka ika kabeh, Bhatara Siwa tunggal suka sira yan mangkana. Sarwwe satwe sariranam, siwajnatwadi sarwwatah, tesu-tesu
23b. samisrakam, tat karanam iti smretam. Matangyan mangkana, apan ikang satwa kabeh lingning tatwa, sangkeng Bhatara Siwa sangkanya, sira pinaka
sarira tatwaning satwa kabeh, apan sira karananing dadi kabeh, yata katuturana de sang weruh ring tatwa. Tatwam tistantite sarwwe, tatwam
wahyantite punah, yawah utpatti bhaghawan, tatwam tistanti nityasah. Sakweh nikang tatwa kabeh, munggw ing Bhatar Siwa, I wekasan mijil sangkeng
sira, apa matangnyan mangkana, ri denyan paka sarira Bhatara Siwa, langgeng hanan ikang sarwwa tatwa. Tatwani sangharet bhuyah, liyante tatwake
punah, salilan eka tat sarwwe, drestopi wudwudhah yatha. Mangkana pwa Bhatara Siwa, irikang tatwa kabeh, ri wekasan lina ri sira muwah, nihan
drestopamanya, kadyangganing wereh makweh wijilnya, tunggal ya sakeng wway. Tatwam tistatite sar-/

24a. wwe, tatwam liyatite punah, ewam asta guneh rudrah, siwas sarwwo gato wibhuh. Mijil pwayomunngw irika ng wway sangkanya, wekasan lina ta ya
rikang wway, kadyanggan ika, iwa mangkana ta Bhatara Rudra, sira ta kahanan dening asta gun, sira Siwa, sira wyapaka, sira wibhuh. Tawad raksati
tat sarwwam, tawat tistati nityasah, pascat sanghare bhuysh, sarwwa tatwewa gacchati. Sira Bhatara Rudra, nga, sira ta rumaksa ikang rat kabeh,
yawat ri kalamiran pangraksa, tawat irika ta ya hananya nitya, anglinaken pwa sira wekasan, umantuk ta ya kabeh ri sira juga. Na ajanati yatha
sanggah, swasta murtih prakampitam, mretarthan kurute rudrah, dresto pindrajalam mayam. Mangkana ta Bhatara Rudra, kadyangganing parigel,
inyasakenya ring sabha, donya
24b. hyunnya mangigela, ri huwusnya mangkana, pinintonakenya tang maya indrajala, yatha pada nikang rat keneng wisaya sangga, tan weruh yan keneng
mayendrajala. Ewam asta gunam atma, tayo kretwa na warjjanam, brahma wisnwiswarah saha, eko ewa trayi bhawet. Iwa mangkana ta Sang Hyang
Atma, haneng asta guna sira gina wenira tiga waknira, Brahma Wisnwiswara, matut sira katiga, nahan paramarthanira tiga. Atma wasontaratmaca,
paramatma niratmakah, atma catur wwidhan loke, eko ewan caturthi bhih. Nahan ta bheda Sanghyang Atma; Atma, Antaratma, Paramatma, Niratma,
pat bhedanya, irikang loka, sira pawibhaganya, ndah tunggal paramarthanira. Atma wisnu riti jneyah, antaratma pitamahah, paramat mahadewa,

25a. niratma siwa ucyate. Sanghyang Wisnu sira Atma, Brahma sira Antaratna, Mahadewa sira Paratma, Bhatara Siwa sira niratma, ikang inajaraken sang
pandita. Brahma sreg jayate lokam, wisnawe palaja stitam, rudra twe sang haras cewam, tri murttih nama ewaca. Lwir Bhatara Siwa magawe jagat,
Brahma rupa siran panresti jagat, Wisnu rupa siran pangraksa jagat, Rudra rupa sira mralayaken rat, nahan tawak nira tiga, bheda nama. Sarwwesam
ewa bhutanam, wisnur atma sthitam, sarwwo dewa mano sthanam, antaratma pitamahah. Bhatara Wisnu sira Atma, munggwing manah ning rat kabeh,
ike Bhatara Brahma siromungguh ri mahan ning dewata kabeh. Paramatma stha suksmesu, param stha parameswarah, durwijne-/
25b. -/yastu sunyaste, siwam ewa niratmakah. Bhatara Parameswara munggwing dewa suksma, Paramatma sira, Bhatara Siwa sira Niratma, meweh
kasthananira, apan suksma sunya sira. Maya matram idham rupam, jagat sthawara janggamam, siwatma bhawate sarwwe, siwqa tatwa wwaliyate.
Ikang jagat kabeh, sthawara janggamawaknya, maya swabhawanya, rupa Bhatara Siwa sahananya, ikang rat kabeh, I wekasan lina mare sira.
Yatottamam iti sarwwe, jagat tatwa wwaliyate, yatha sambhawate sarwwam, tatra bhawati liyate. Sakweh ning jagat kabeh, mijil sangkeng Bhatara
Siwa ika, lima ring Bhatara Siwa ya. Iti Brahma Rahasya nama sastram, tretiyah patalah. Bhu linam salilanggacchet, salila wwahnim awiset, sah
bohenir bayur li-/

26a. -/yate, bayur akasam awiset. Ikang prethiwi lina ring apah, apah lina ring agni, agni lina ring bayu, bayu lina ring akasa. Akasantu mano gacchet, bhoti
wija widhanakam, etat bhuta sarirakyam, sarira nistha rucyate. Akasa lina ring manah, nahan tatwa nem, iakan gawenya, maka sthanang sarira,
anajaraken Bhotika wijanya, On Ang namah. Ike tang tatwa sarira ning panca mahabhutam winarahaken sang pandita. Manswam matra mayatwam,
tanmatran teja sanggatam, tejasah budhi mayatwa, gonikam suksma dehakam. Ikang manah lina ring panca tanmatra, panca tanmatra lina ring
ahangkara, ahangkara lina ring buddhi, naha tang tatwa suksmawaknya, Gonika wijanya, Ong Tang namah. Etan dewa sariranam, sada sadatha
26b. laksanam, buddhir abyakta mayatwam, tamodhikam atindriyam. Nahan tang tatwa, pinaka sarira ning dewata rakwa, nihan lwirnya, Ikang buddhi lina
ya ring abyakta, tamah pinaka swabhawanya, malit ta ya. Acintyam ati durjneyah, wesnawi wija mucyate, abyaktam purusang gacchet, wyoma nirmmala
sannibham. Tar kawenang inangen-angen, kadyakasa nirmmala, meweh kakaweuhanira, Wesnawi wijanya, Ong sang namah. Ikang abyakta lina ring
purusa, Ong Bang namah, wija ngkana. Bha rupam sunyam atyantam, brahma purusa rucyate, purusa paramanggatwam, niskalah prabhu rucyate.
Bhatara Brahma sira purusa, ngan kadyanggan ing ujwala ning aditya rupanira, atyanta sunyanira, winarahaken sang pandita, Sanghyang Purusa, lina
ring Bhatara

27a. Sangkara, lwirira niskala. Sajjiwa nirmmalancanyam, brahmesana ni gadyate, etad uktam mahawijam, jagat palaka karanam. Bhatareswara ssira sat
jiwa, sira nirmmala, sunya sira, Brahmesani wijanira, Ong Ing namah. Ikang tatwa winarahakenku, ya ta karana ning pralaya ning jagat, mangkana ling
Bhatara. Etat jnatwa mahayogi, twayiti paramam padam, bhur bhuwah swah iti kyatam, pradhanadi ni gadyate. Kunang sang yogiswara, kumawruhi
rikang tatwa, sira ta mantuk ring parama pada, hana ta tri bhuwana, nga, Srota, twak, caksuh, jihwa, grana, wak, sparssa, rupa, rasa, gandha, prethiwi,
apah, teja, bayu, akasa, manah, nahan, ta lwirnya, ri wehang nunggu, Gayatri wija ngkana, winarahakenku, Ong Tang namah. Hana ta pada suddha, nga,
awidhya swa-/
27b. -/bhawanya, pradhana, prakreti, abyakta, nahan ta lina, Wesnawi wijanya, Ong Sang namah. Dewa sajnam param ksanam, porusan dhaksa mucyate,
nimittam parama nandham, brahmaksaranni gadyate. Hana sthana wisesa, ya Brahmaksara, Brahma hyangnya, ring dada sthana, Porusa wija
ngkana, Ong Tang namah. Hana sthana wisesa, Brahma wija ngkana, Brahmapada hyangnya, Brahmadhipati, ya mungguh ring gulu, Ong Ing namah.
Ongkaram atyanta padam, urddhwa-tyurddhwaksatam param, tasamesa calam sunye, srenu sarwwa wisesatah. Ikang Ongkara, atyanta pada sunya,
maruhur sangkeng Isanan pada ya, ika ta kawruhana patunggal tunggalan ikang loka, ya ta warahaknangkwa. Bhur loke manuso jneyah, bhuwah lokanta
ri-/

28a. ksakam, wah lokam sakra mandhalam, tre lokyam iti sangjnikam. Ikang bhuh loka unggwaning manusa ika, ikang bhuwah loka, ya akasa, ikang swah
loka, ya unggwan Sang Hyang Indra ika, nahan tang sinangguh tri bhuwana, nga. Prajapatyam mahalokam, jana lokantu wesnawi, tapo lokam brahma
padam, satya lokantu sangkaram. Ikang Mahaloka, ya Prajapati loka, nga. Ikang Janaloka, ya Wisnu loka, nga, ikang tapoloka, ya Brahma loka, nga
ikang Satyaloka, ya Sangkara loka, nga. Asta siwanca paramam, tad eke tatwam acalam, siwamwa karana cyutan, sunyam satyam anasrawam. Hana ta
sthana wisesa, Ongkara ya, tar pakasurudan, kunang patunggal tunggalaning arannira Sanghyang A-/
28b. -/sta Siwa, nihan ta byaktanya. Srutwa manasi yatnena, dharayitwa pote manah, pretiwyaoah tatha wahnih, bayur akasa kam manah. Warahaknangkwa
patunggalanira Sang Hyang Asta Siwa, gegonta ya ri manahta, yatna ta kita, mangkana ta sang pandota kabeh, yatna sira ring manah nira, ndya ta
nihan. Prethiwi, apah, teja, bayu, akasa, manah. Tri lokyam iweka pranah, nanya kramat sam udbhuwah, bhurapo brahmiti jneyah, mahnir bayuh bhuwah
smretah. Nihan tang tri loka winarahaken sang pandita, wruh pwa kiteka wilanganing loka, ikang lemahlawah lawan wway, tinunggalaken sang pandita,
ya bhuh loka, nga ikang bahni lawan bayu ya bhuwah loka. Akaso manaso weda, swar lokam iti sang jnika, sapta deipa samudranca, mahantan sapta
prawwatah. Ikang akasa mwang manah, ya swah loka, nga. Ewam abyaktakan suksmam, yathacintyan na widyate, tatwa bhutam idam sarwwam, jagat
sthawara jagat sthawara janggamam. Yatha, kadyanggan ika, ewam, samangkana tang abyakta, suksma swabhawanya, tari-/

29a. -/nangen-angen teke rika, mijil tang jagat kabeh, sakaring abyakta, sthawara, sthawara janggamawaknya. Candrakanta dyatha wira, candra jyot
snani sang gemet, tatwantah nisretah toyam, witatwaneka bhogada. Nihan upodgatakna waneh, ikanang wwai mijil sakeng mani candrakanta, maka
nimitta sanggamanya dening tejaning wulan, I wekasan akweh ta hilinya ring lemah. Tadwad awyaktam atyantam, puruse nabhi sanggamet, maya dewiti
tatwantam,suksmam bhawati tatwada. Tat samangkana tekang abyakta, atyanta ring suksma, masanggama pwa lawan purusa, mijil tang tatwa,
buddhyadi, prethiwyanta, meta sangkeng abyakta. satwam rajas tamascewa, te gonyam iti sang jnikam, tesantu wiparitena, jagad abyaktako bhawet.
Satwa, rajah, tamah, yeka tri guna, nga,
29b. wiparita nirguna, ya ta hetuning jagat tan wetu sakaring abyakta, wiparita ngaranya, yan satwa utkata, dadi manusa, yan tamah. Utkata, dadi tiryyak
tika, nahan ta kramanya. wiparyyayah panc widham, asta wingsata saktayah, tustica nawadha jneyah, astadha siddhi rewaca. Hana panca wiparyyaya,
nga, hana asta wingsati sakti, nga, hana nawa tusti, nga, hana asta siddhi, nga. karmma yonistu pancete, panca tapani dehinam, sasti tatwam idan
tantre, kapilasya maharsina. Hana karma yoni, lima kwehnya, hana panca tapa, lima kwehnya, nahan tang tatwa limang puuh, pinakaji Bhagawan Kapila,
ukta sara. prakreteh buddhir utpanam, brahma tatwadi dewatah, darssanyam abhi bhutanca, tat sangkyam sam prakatyate. Sangkaring prakreti,
metu tang buddhi, Brahma hyangnya, wihikan wisa-/

30a. -/yanya, ikang satwa ya pintonakenya. Ahangkarotpanam buddheh, rudrastatradi dewatah, abhimanobhi bhutanca, yawad rajastu rodrakam.
Sangkaring buddhi, metu ta angkara, ikang ambek tan angga sora, Sanghyang Rudra hyangnya, mangaku wisayanya, ya rajah, nga, ika. Samapta
bhuwana kosa. Puput sinurat de Ni Kadek Astasari, saking banjar Basang Tamyang, pra desa adat Kapal, ring dina, ca, u, wara pujut, pang, la, sasih,
5, rah, 1, teng, u, isaka, eka gni lawang prabhu, rikala panumadegan Ida Bupati Badung, Anak Agung Gde Agung. Maka manggala Dinas Kebudayaan,
Ida Bagus Anom Bhasma. Sampurakna wirupaning aksara, ri sang sudya maca. Ong Ang ksama sama purna ya namah swaha.