Pengangat global

Pengangat global tauka global warming nya reti iya tikas pengangat tauka suhu enggau paras ai tasik
dunya tu ke majak niki ari selama. Pengangat global balat amat mai empas ti negatif ngagai pengidup
enggau pengelikun rampa menua. Gaya hari udu amat udah jauh berubah enti dibanding enggau
dulu menya.

Peninggi tikas ai tasik nya fenomena ti balat amai ngirauka ati mensia ba dunya kemaya hari tu.
Mayuh bandar raya dunya ke dulu kelia dibuka sereta digaga ba endur ke bisi ai sereta ba emperan.
Bandar raya baka New York, New Delhi, Tokyo enggau London nya entara endur ti berisiko tinggi lalu
bisi maya tau tenggelam jemah ila.

Nitihka pansik, 30 peratus endur ba serata dunya tu deka tenggelam. Mayuh genturung pendiau
deka ampuh bah. Penusah tu tau ngujungka bejuta-juta mensia nadai agi endur diau sereta dipejal
pindah ngagai endur ke tinggi agi.

Besenutuk enggau nya, mega suhu tauka tikas pengangat deka niki lalu tikas ai tasik mega deka
ngubahka atur ekosistem nyadi enda setimbang. Lebuh tikas pengangat niki ngagai 1.0° celsius dia 30
peratus spesis flora enggau fauna deka pupus ari dunya tu. Enti tikas pengangat niki ngagai 4.0°
celsius dia semua utai idup ba dunya tu deka pupus.

Kelimpah ari nya, pengangat global mega tau ngasuh gaya hari berubah ari selama. Enti tikas
pengangat niki dia iya ngubahka atur pejalai angin enggau mua hari. Tu tau ngujungka ribut, taufan
sereta bah ketegal ujan bangat nyadi enda disangka-sangka.

Beserimbai enggau nya mega, tikas pengerai mensia majak kurang. Pekara ti terus nyadi ketegal gas
rumah gadung nya baka penanggul enseput sereta penyakit baka kurang pemakai mega nyadi.
Penusah tasah ketegal ampuh bah mega mai penyakit vektor baka penyakit muang ai, denggi enggau
malaria.

Nya alai ketegal pengangat global tu ke balat ngirauka ati, chara-chara mutarka penanggul tu patut
diperatika semua komuniti antarabansa.