MINGGU, 31 MARET 2024

PASKAH

1. Marende : BE No. 24 : 1 – 2 “TATAP HAMI ON NA PUNGU DISON”

2. Votum : A. IX. B - D. VII. 26
3. Epistel : Jesaya 25 : 6 – 9
4. Marende : BE No. 92 : 1 – 2 “PUJI MA NA MANALUHON:
5. Jamita : Markus 16 : 1 – 9

LAM BARANI MANGHATINDANGKON TUHAN JESUS NA HEHE I

Huria na hinaholongan ni Tuhanta Jesus Kristus ! Peristiwa hamamate ni Jesus di dolok

Golgata manghorhon biar di roha ni angka siseanNa, ido umbahen sai martabuni nasida di
angka bagas nasida. Alai nang pe songon i situasina, borhat do si Maria Magdalena, Maria ni si
Jakobus dohot si Salome tu tanoman ni Jesus mansai manogot di ari parjolo dung sabbat i
mamboan ragamragam ni na hushus laho mamiahi bangke ni Jesus ala ni holong ni roha nasida.
Ai mangihuthon adat pananoman ni halak Jahudi, somal do dipatupa mamiahi bangke ni naung
mate asa unang bau jala asa unang hatop busuk.
Hinorhon ni biar ni roha ni angka sisean dohot angka parompuan i gabe lupa do nasida di
pandohan ni Jesus andorang so marsitaonon dope Ibana mandok na ingkon hehe Ibana di ari
patoluhon. Ndang naeng marnida haheheon ni Jesus sian tanoman i angka parompuan i, alai lao
mamiahi bangke ni Jesus do. Nang pe digohi roha biar jala borat dipingkiri nasida ala ni
keterbatasan ni gogo nasida lao manggulang batu na bolon panutup ni tanoman i, alai tong do
borhat nasida tusi. Ndang dipasombu Debata angka na manghaholongi Ibana lalap didondoni
biar dohot parungkilon ai sai patuduonNa do dalan lao mangurupi nasida. Di turpuk on dipaboa:
dung sahat angka parompuan i tu tanoman i jumpang nasida do alus dohot dalan na denggan di
na borat na piningkiran nasida, i ma; Naparjolo; Naung gulang batu na balga i sian baba ni
tanoman ni Jesus. Napaduahon; Dung masuk nasida tu tanoman i, di ida nasida ma sahalak
dolidoli parulos na marlinanglinang (surusuruan) hundul tungkan siamun ni tanoman i mandok
tu nasida: “Unang ma hamu mabiar!” ala nunga hehe Jesus i, ai nunga kosong be inganan
hapeahan ni bangkeNa (kubur sudah kosong). Napatoluhon; Pajumpang do parompuan i dohot
Jesus naung hehe i, ala joloanNa do nasida tu Galilea. Nangpe so pajumpang dope angka
parompuan i dohot Jesus naung hehe i, nunga disuru surusuruan i nasida mamaritahon haheheon
ni Jesus i tu siseanNa.
Marnida na masa i dohot umbege barita haheheon ni Jesus i, gabe angkadotdot do
parompuan i jala tarmali jala gabe ndang adong dipaboa tu agia ise haheheon ni Jesus i, sae ma

1
holan tu angka sisean i. Alai ala dipataridahon Jesus naung hehhe i do diriNa tu angka siseanNa
dohot tu angka na mangihuthon Ibana gabe lam sar barita haheheonNa i.
Huria na hinaholongan ni Tuhanta Jesus Kristus ! Ari Minggu on i ma ari parningotan
haheheon ni Tuhan Jesus sian hamatean manang ari Paskah. Tutu do naung hehe Jesus i sian
hamatean, ndang holan hata-hata manang barita sambing i. Ai nunga bungka jala rumar
tanomanNa. Nunga ditaluhon sorot ni dosa dohot hamatean i marhite haheheonNa i. Angka
naung porsea jala angka naung pajumpang dohot Jesus na hehe i do manghatindangkonsa.
Heheon ni Jesus i mamboan pardamean di hita jolma pardosa on dompak Debata. Hita naung
mardosa na so tama hian be angka na porsea di Tuhan Jesus naung hehe i sahat ro di ujung ni
ngolunta, ndang tu hamatean salelengna be jambarta alai dapotan haluan salelengna. Haheheon
ni Jesus i naeng mangkorhon habaranion di hita lao manghatindanghon hasintongan paboa Jesus
Kristus do sipalua portibi on; lam barani manghajongjongkon hatigoran, hasintongan dohot
hadameon.
Tapataridahon ma holong ni rohanta dohot haporseaonta tu Tuhan Jesus. Unang be biar
ni roha i mandondoni ngolunta mambahen lupa hita di hata, parenta ni Debata dohot padan ni
Debata naung sahat tu hita. Asa unang moru las ni rohanta di ngolunta, asa unang sumurut
semangatta gabe gale manang mandele hita uju mangadopi angka hamaolon, parungkilon dohot
sitaonon alai hehe jala hobas ma hita tongtong manghalaputi dohot patupahon angka na denggan
di sude inganan. Aha pe na masa, manang songondia pe borat ni sitaonon na taadopi ndang boi
mandele manang sumurut haporseaon dohot hasationta tu Tuhan Jesus. Molo taparhatopot do
sude hahurangan dohot hagaleonta mangadopi saluhutna i tu Tuhan i jala tapangasahon asi ni
rohaNa dohot pangurupionNa, ndang pasombuonna hita, ai urupanNa jala pargogoanNa do hita
disi. Tuhan Jesus na satia tu AmaNa monang do mangadopi parungkilon i jala hita angka na
hinaholonganNa na manghaholongi Ibana jala satia saleleng ngolunta tong do pamonangonNa.
Amen.

Diskusi :
a. Boha do hita mangadopi masalah manang parungkilon na bolon na ro tu hita ?
b. Songondia ma carana bahenonta asa lam barani hita manghatindangkon Tuhan Jesus i di
ngolunta ?

6. Marende : BE No. 785 : 1 – 2 “ALO PANGUNJUNAN"

7. Tangiang : sian ruas na ro
8. Marende : BE No. 94 : 1 “ALE TONDINGKU NAUNG HEHE”
9. Tangiang : sian na manjabui
10. Marende : BE No. 715 : 1 ... “BALGA DO HOLONGMI” (Pelean)
11. Tangiang Pelean – Tangiang Ale Amanami – Pasupasu.
Pdt. Rolina Boangmanalu, S.Th, MM
(Pendeta HKBP Resort Aek Pamienke)