Hata umpasa:

“ Ompu Raja dijolo martungkot siala gundi,

Na pinungka ni Ompunta parjolo, si ihuthonon ni na parpudi”

“ Pir Tondi madingin, horas Tondi matogu,

Sude ma hita dipairing-iring Amanta Debata jala dipatogu-togu”

ADAT : Alapon Dongan Adopan Tondong

Pinatomu-tomu ni : P. Simatupang (A. Pardamean)

Ginurathon ni : D. Sianturi, ST. (A. Elmore)

Untuk Kalangan Sendiri

TUGAS NI PROTOKOL

1. PROSESI MASUK TU GEDUNG

Pengantin masuk tu Gedung, si Doli di siamun ni si Boru, si Boru di
hambirang ni si Doli. Suhut Bolon nadua belah pihak (Paranak dohot
Parboru) mangudurhon pengantin tu gedung.

Suhut bolon Paranak di siamun ni Pengantin

Suhut bolon Parboru di hambirang ni Pengantin
Laos songon i do nang parhundul nasida di jolo (Podium)

2. INGANAN/HUNDULAN NI UNDANGANNA BE
a) Molo alap jual (di Parboru ulaon)
 Parboru di siamun (jabu bona) masuk tu gedung
Paranak di hambirang (jabu soding) masuk tu gedung

b) Molo taruhon jual (di Paranak ulaon)

Paranak di siamun (jabu bona) masuk tu gedung
Parboru di hambirang (jabu soding) masuk tu gedung

c) Hundulan ni horong ni Hula-hula diatur ma asa denggan parhundulna,

Catt: Nang pe di sihambirang ni suhut parhundul ni tulang – hula-hula
tong do
dijaouhon di siamun/halang ulu, simanjujung)

3. PANJOUON PROTOKOL PARANAK & PARBORU

1. Molo Alap Jual (di Parboru Ulaon) suhut boru dohot suhut paranak
rap udur masuk tu inganan i dohot Pegantin. Protokol ni Parboru do
parjolo manjouhon na niundangna, baru pe muse dilehon ma tingki
tu Protokol ni Paranak manjouhon na niundangna, jala dilehon
Protokol ni Parboru ma inganan ni Paranak i, di sabola nami ma
ingananmu Amang boru, Botima!

2. Molo Taruhon Jual (di Paranak Ulaon) suhut Parboru dohot suhut
Paranak rap udur masuk tu inganan (gedung) dohot Pengantin, alai
mulak do muse parboru i tu luar, lao tomu-tomuon ni Paranak muse.
Protokol ni Paranak parjolo manjouhon asa masuk Raja ni Hula-hula
(Parboru) tu bagasan gedung jala ditomu-tomu suhut bolon ni
Paranak (Paranak dohot boruna). Dung sahat masuk tu gedung,
dijalo ma silua nabinoan ni Parboru i jala dijalangi. Dijouhon
Protokol ni Paranak ma muse, di hamu Raja ni Hula-hula nami
,…………, nunga diparade hami Rajanami inganan muna, disabola
nami ma hamu Rajanami, ima simanjujung nami, Botima, mauliate!
I. IBARATNA ULAON “ALAP JUAL” (Di Parboru Ulaon)

Peran Utama Protokol sian Parboru do, jala ndang ditomu-tomu Paranak
be Parboru i, ai nunga masuk nasida ihut tu Pengantin.

Protokol Ni Parboru

Di hita na mardongan tubu, boru, dongan sahuta dohot ale-ale , masuk ma

hita tu bagas on, asa tapungka ulaon ta Botima, mauliate!

Di hamu Rajani Pamoruon nami, anon di sabola nami ma hamu dohot

uduran mu. Di hamu Rajani Pamoruon nami, hulehon hami ma muse
tingki on tu hamu, Botima,mauliate!

Protokol Ni Paranak

Mauliate ma di hamu hula-hula nami, ala dilehon hamu do inganan dohot

partikkian tu hami. Di hita na mardongan tubu, Boru, Dongan sahuta dohot
Ale-ale, masuk ma hita tu bagas gedung on, asa tamulai ulaonta on,
Botima,mauliate!

Pinasahat ma muse tu hamu Rajani Hula-hula nami……., Botima!

II. PANJOUON TU HORONG NI HULA-HULA

Protokol Ni Parboru
Di hamu Pamoruon nami marga ………., parjolo ma hami manjouhon
horong ni Hula-hula nami, ate?
(Nauli Rajanami, nina Paranak i)

Di hamu horong ni Hula-hula nami:

Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga
……
Hula-hula Anak Manjae : Rajai marga ……,Rajai marga
……
 Rajanami, Rajabolon suang songon i, Inang Soripada!
Dipangido roha nami nian asa sahali manjou ma hami jala sahali manjalo
diharoro mu tu inganan on, beha Rajanami?
(Nauli nina hula-hula i)

Antong asa mangarade ma hamu, asa ro hami manomu-nomu haroro

muna, Botima Rajanami.
Catatan: boi do dua hali manjou : 1. Hula-hula sijalo upa Tulang
2. Tulang dohot masing2 mai na
saparhundul
Hata sian horong ni Hula-hula Parboru di Luar Gedung

Di hita horong ni hula-hula:

Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga
……
Hula-hula Anak Manjae : Rajai marga ……,Rajai marga
……

Nangkin nunga rap mambege hita, dijou-jou ni Pamoruonta, asa

mangarade ma hita asa masuk hita tu bagas Gedung on, boha, nunga
mangarade hita sude? Molo nunga rade be hita, masuk ma hita, Botima!

Protokol Ni Parboru

1. Di hita suhut bolon, dongan tubu nami dohot Boru nami, asa ro ma hita tu
joloon lao manomu-nomu horong ni Hula-hulanta, suang songon i ma
nang di hamu Boru nami, asa mangarade hamu lao manjalo silua na binoan
ni horong ni Hula-hulanta (tandok na marisi si pir ni tondi)
2. Amang parmusik nami, bahen hamu ma jolo musik panomu-nomuon i
(huhut diiringi musik, dung masuk horong ni hula-hula i, masijalangan ma
nasida)
3. Di hamu horong ni Hula-hula nami, nunga diparade hami
inganan/hundulan mu Rajanami, disabola siamun nami ma hamu
Rajanami, Botima!
 4. Di hamu horong ni Hula-hula nami, (dijouhon muse) molo adong dope
hamu na so masuk, masuk ma hamu Rajanami, Botima!
5. Di hamu Raja ni Pamoruon nami marga ………., ala nunga sude masuk
horong ni Hula-hula nami Amang boru, dipasahat hami ma muse
partikkian on tu hamu, Botima!

Protokol Ni Paranak

Mauliate ma di hamu Raja ni Hula-hula nami marga …….., ……, …..

Di hamu horong ni Hula-hula nami:
Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga ……
Hula-hula Anak Manjae : Rajai marga ……,Rajai marga
……

Dipangido roha tu hamu sude horong ni Hula-hula nami asa sahali manjou
ma hami, sahali manomu-nomu di haroromu Rajanami di inganan on, beha
di hamu horong ni Hula-hula nami? (alusna : Nauli Amang boru!)
Antong mangarade ma hamu horong ni Hula-hula nami, asa ro hami
manomu-namu haroro muna, Botima!
Catatan: boi do dua hali manjou : 1. khusus tu hula2 sijalo tintin
marangkup
2. tulang dohot sude naasingna i

Hata sian horong ni Hula-hula Parboru di Luar Gedung

Di hita horong ni Hula-hula ni Pamoruonta/Paranak (dungi dijouhon ma

Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga ……
 Hula-hula Anak Manjae : Rajai marga ……,Rajai marga
……

Nunga tung tangkas di jou-jou ni Pamoruonta tu hita horong ni Hula-hula

asa mangarade ma hita asa masuk hita tu inganan on, Botima!

Protokol Ni Paranak

1. Di hita suhut bolon, dongan tubu nami dohot Boru nami, asa ro ma hita tu
joloon lao manomu-nomu horong ni Hula-hulanta, suang songon i ma
nang di hamu Boru nami, asa mangarade hamu lao manjalo silua na binoan
ni horong ni Hula-hulanta (tandok na marisi si pir ni tondi)
2. Amang parmusik nami, bahen hamu ma jolo musik panomu-nomuon i
(huhut diiringi musik, dung masuk horong ni hula-hula i, masijalangan ma
nasida)
3. Di hamu horong ni Hula-hula nami, nunga diparade hami
inganan/hundulan mu Rajanami, disabola siamun nami ma hamu
Rajanami, Botima!
4. Di hamu horong ni Hula-hula nami, (dijouhon muse) atik adong dope
hamu na so masuk tu Gedung on, asa masuk ma hamu Rajanami, Botima!
5. Antong ala nunga sude masuk horong ni Hula-hulanta nang angka na
manghaholongi hita, dipasahat hami ma muse partingkian on tu hamu Raja
ni Hula-hulanami, Botima!

Protokol Ni Parboru

Antong ala nunga masuk sude angka na manghaholongi hita Amang boru,
beha, nunga boi ra tamulai ulaonta ate!

III. PASAHATHON TUDU-TUDU NI SAIPANGANON

Protokol Ni Paranak

Nauli Rajanami, antong ro ma hami Raja ni Pamoruon muna marga …….,

pasahathon tudu-tudu ni sapanganon tu jolo muna Raja ni Hula-hula nami
marga ……, asa mangarade ma hamu, Botima!
 Protokol Ni Parboru

Nauli Raja ni Pamoruon nami, di hita hasuhuton tarlumobi ma di hamu

Suhut Bolon nami, asa ro ma hita tu jolo on lao manjalo tudu-tudu ni
sipanganon ni Pamoruonta marga …….

Protokol Ni Paranak

Di tikki on, di ari naung binuhul di bulan na martanggal on, ro do hami

Raja ni Pamoruon muna marga ……, ima pasahathon tudu-tudu
sipanganon na tabo, na marsaudara, na marala ma i Rajanami di ulaonta,
ala naung manjalo pamasu-masuon paruma tanggaon anak nami dohot
boru ni Raja i nangkin sian bagas joro ni Tuhanta, asa, Rajanami, Raja ni
Hula-hula nami. Di ari na uli, di ari na denggan on, di parnangkok ni
mataniari on, di tingki naung tabuhul on, ro do hami Raja ni Pamoruon
muna marga ……, ima pasahathon tudu-tudu ni sipanganon na tabo, ima
juhut na marsaudara, ima di siala ulaonta sadari on, asa dohonon nami ma
antong songon hata ni umpasa:

Bagot na marhalto, diagatan di robean

Horas ma hamu Hula-hula nami na manjalo,
Ba tu tambana ma di hami, Raja Pamoruon muna na
mangalean.
Sahat-sahat ni solu, sahat tu bortean,
Nunga hupasahat hami tu hamu tudu-tudu sipanganon na
tabo,
Sai sahat ma hita tu parhorasan, sahat ma tu panggabean,
Botima!

IV. PASAHAT DENGKE SIMUDUR-UDUR

Protokol Ni Parboru

Di hita pe tapasahat ma dekke simudur-udur tu Raja ni Pamoruonta.

Di hamu Raja ni Pamoruon nami marga ………..

Nangkin nunga dipasahat hamu tu hami tudu-tudu sipanganon na tabo,
nuaeng pe pasahaton nami ma muse tu hamu Raja ni Pamoruon nami,
dekke simudur-udur, dekke sitio-tio, dekke sahat:
 - sai anggai ma antong rap udur hamu Rajani Pamoruon nami tu dolok tu
toruan
- sai tio ma parhorasan, tio nang panggabean
- dekke sahat, sai sahat ma pasu-pasu ni Amanta Debata tu hamu sude Raja
ni Pamoruon nami

Asa napuran tano-tano gatap gatip di pardembanan

Horas ma hamu Rajani Pamoruon nami marga …….., na manjalo, ba, tu
tambana ma di hami hula-hula muna na mangalean.

Sahat-sahat ni solu sahat tu tiga ras,

Nunga dipasahat hami tu hamu dekke simudur-udur, sahat ma hita horas-
horas!
(laos masijalangan ma)

V. MARSIPANGANON

Protokol Ni Parboru
Ala hamu do Amang boru na patupahon sipanganon, sian hamu ma
sibahen tangiang mangan.

Protokol Ni Paranak

(Na mambahen tangiang molo adong do Pangula ni Huria ni Paranak ma,

boi do tong Protokol i mambahen)

1. Antong martangiang ma hita, …………………………….

Amen
2. Sitip-tip msa si gompa, golang-golang pangarahutna

Tung songon on pe Rajanami sipanganon na tupa di jolonta

Sai godang ma pinasuna, Marjomt ma hita!

3. ro ma muse Paranak pasahathon sulang-sulang tu Parboru

(juhut doi sebagian sian sosar i), On ma Rajanami, Raja ni
Hula-hula, sulang-sulang na tabo, hupasahat hami Raja ni
Pamoruon muna, tu hamu Rajani Hula-hula nami, Botima!
 Laos di tingki on ma muse dipasahat paranak/parboru pinggan panganan tu
horong ni Hula-hulana be (juhut doi sebagian sian sosar i)

4. Di pajambarhon ma muse dengke na jinalo sian Hula-hula i:

a. on ma dekke di hita na mardongan tubu

b. on ma dekke di dongan sahuta
c. on ma dekke tu boru nami, dll

5. Dekke siuk, laos dijouhon do silehon dekke siuk, umpama na:

Ta jalo do dekke siuk sian Raja i ……., dst

Protokol Ni Parboru

Dekke siuk, laos dijouhon do silehon dekke siuk, umpama na:

Ta jalo do dekke siuk sian Raja i ……., dst

Catt: 1. Ro do suhut bolon nadua pihak (Paranak/Parboru) mandapoti na

niundang na be, di tingki na mangan didok ma hatan: siallang na tupa ma
hita Amang/Inang
2. Nunga singkop marsipanganon, disungkun Protokol ni Parbaru i ma
taringot tu tudu-tudu ni sipanganon i.

VI. MAMBAGI TUDU-TUDU NI SIPANGANON

Protokol Ni Parboru

Di hamu Raja ni Pamoruon nami, marga ……….

Nunga tangkas dipashat hamu nangkin tudu-tudu ni sipanganon na tabo tu
hami Raja ni Hula-hula mu marga ………., nuaeng pa Amang boru,
songon nidok ni natua-tua, andorang so diseat raut asa jolo diseat hata, tar
beha ma partording ni tudu-tudu ni sipanganon naung pinasahat muna on,
marsiajaran ma hita Amang boru!

Protokol Ni Paranak

Mauliate ma Rajanami!
Taringot tu tudu-tudu ni sipanganon naung hupasahat hami tu hamu Raja
ni Hula-hula nami, laos hamu ma Rajanami na mangaturhon, Botima
Rajanami!
 Protokol Ni Parboru

Mauliate ma Amang boru di pandohan muna i, alai marsiajaran ma hita ate

Amang boru! Tarsongon on ma nian parjambaran Ulu dekke mulak ma tu
hamu Pamoruon nami:

1. Parsanggulan parhambirang
2. Aliang-aliang ½ (satonga)
3. Somba-somba ½ (satonga)
4. Soit 2 (dua) , tambana molo adong sasar na

Na tinggal di hami Raja ni Hula-hula muna:

1. Parsanggulan parsiamun
2. Aliang-aliang ½ (satonga)
3. Somba-somba ½ (satonga)
4. Soit 2 (dua)
5. Osang-osang hippal
6. Panuppak himpal (ihur-ihur) tambana molo adong sasar
Beha di hamu Raja ni Pamoruon nami, nunga satolop hamu disi?

Protokol ni Paranak

Nunga uli nian Rajanami, alai adong pangidoan nami tu Raja i; asa di hami
nian osang na lao pasahaton nami anon tu hula-hula nami (tulang ni anak
nami). Beha Rajanami?

Protokol ni Parboru

Di ahmu Amang boru nami, tangkas songon na bobotomu, ia boru

nami/parumaen muna, alap jual do, jadi pasahaton nami do osang-osang tu
hula-hula nami (tulang ni boru nami) anon. jadi sidapot solup ma hamu
Amang boru, Botima!

Protokol ni Paranak

Mauliate ma molo songon i do Rajanami.

Protokol ni Parboru
 Attong on ma jambar ulu ni dekke mulak tu hamu Raja ni pamoruon nami.
Catt: ianggo taringot tu parjambaran juhut, nunga haru tangkas i nian
dihatai uju parhusipon, asa unang adong be perdebatan di tonga ni
mangajana taringot tu jambar mulak (ulu ni dekke)

VII. MANJALO TUPPAK PARANAK

Prototkol ni Paranak

“Dung sae dipasahat jambar ulu ni dekke mulak tu paranak, mangido

partikkian ma muse Paranak lao manjalo tuppak sian undanganna”
Di hamu Raja ni Hula-hula nami, mangido partikkian jo hami Raja ni
pamoruon muna tu hamu Raja ni Hula-hula nami, asa manjalo tuppak
hami sian na niundang nami nian. Beha Rajanami?

Protokol ni Parboru

Nauli Amang boru!

Prototkol ni Paranak

Mauliate ma Rajanami!
Di hamu na pinarsangapan, na huundang hami, amatta Raja, dohot Inanta
Soripada, ala nunga dapot tikkina nalaho pasahatton sinamot tu Raja ni
hula-hulanta, laos di tingki on ma nian dipangido roha nami tu hamu
napinarsangapan, Raja ni Dongan Tubu, Raja ni Boru, Raja ni Dongan
Sahuta dohot Ale-ale, laho pasahathon tuppak tu hami. Tangkas songon na
binoto muna dang tartuhuk sahalak pandingdingan. Umbahen na barani pe
hami mambahen ulaon on, hamu do na hupangasahon hami tarlumobi ma
Raja ni Boru nami, asa ro ma hamu pasahatton tuppak tu jolo on, Botima!
Catt: Tarsomal do didok Protokol i dohot tu tulangna dijouhon atik pen
dang ro
tulang manuppaki, alsanna; dangka dulpang, damamng do tulang,
amak do
rere, anak do nang bere

VIII. JAMBAR TU HORONGNA BE (DITORDAI SADA-SADA)

 A. Parjambaran Di Horong Ni Parboru
1. Osang-osang tu Hula-hula (tulang ni boru muli)
2. Aliang dohot somba-somba (diseati) tu sude horang ni Hula-hula dohot tu
Huria
3. Soit 2 (dua): 3.a. Tu dongan sahuta
3.b. Tu dongan saparpadanan
3.c. tu dongan ale-ale
3.d. tu dongan pariban
4. Parsanggulan (pipi) parsiamun tu boru/bere/ibebere
5. Panumpak di potong 2: ½ dipotong tolu bagian muse, dua bagian tu donag
tubu, sada bagian nai tu tulang ni hela.
6. Ihur-ihur satonga nai tu Suhut Bolon (tampukna)

B. Parjambaran Di Horong Ni Paranak

1. Aliang dohot somba-somba (diseati) tu sude horong ni Hula-hula dohot
Huria
2. Soit 2 (dua): 2.a. Tu dongan sahuta
2.b. tu dongan saparpadanan
2.c. tu dongan tubu
2.d. tu dongan ale-ale
3. Parsanggulan (pipi) parhambirang tu boru/bere/ibebere
4. Dekke suhut bolon
Catt: Molo dipasahat somba-somba tu Hula-hula laos didok ma; On ma
jambar tu hamu hula-hula nang osang ma tu Rajanami!

Protokol ni Parboru

Di hamu napinarsangapan, molo adong dope na so tarjou hami hamu di

parjambaran, rade do hami laho pasahathon tu hamu, alai molo so adong
be, mauliate ma di hamu, Botima!

Protokol ni Parboru

Nang di hamu pe napinarsangapan, atik adong dope na so tarjou hami di

parjambaran, rade do hami lao pasahathon tu hamu, alai molo so adong be
Rajanami ba mauliate godang ma di hamu, Botima!

IX. HATA HAMULIATEON TU SILEHON TUPPAK

 Protokol ni Paranak

Hamu na pinarsangapan, Rajani dongan tubu, Rajani bpru, Rajani dongan

sahuta dohot Rajani ale-ale, mauliate godang ma di hamu na
pinarsangapan disiala tuppak naung pinasahat mu tu hami, sude akka
pambahenan muna i, na denggan i sian Tuhanta ma dapot hamu balosna
marlipat ganda, holan hata hamauliateon do naboi tarpasahat hami tu hamu
na pinarsangapan, mauliate godang ma di hamu, Botima!

Laos diuduti, Parumaen mambuat Rumah Tondi sian Tumpak na ro i.

X. PASAHAT PAKKATAION TU RAJA PARHATA

Protokol ni Parboru

Di hamu Rajani pamoruon nami marga ……, ala nunga dapot tingkina na
laho marsitariparan hata hita anon, ba, lehon hamu majolo tingki di hami
Rajani Hula-hula muna marga ……., asa mardos ni roha hami dohot
uduran nami.

Protokol ni Paranak

Na uli na denggan ma Raja nami!

Protokol ni Parboru

Jadi di hamu horong ni Hula-hula nami:

Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga ……
Hula-hula Anak Manjae : Rajai marga ……,Rajai marga
……

Beha di hamu horong ni Hula-hula nami, nunga denggan parhundulmu?

Di hamu boru nami asa padenggan hamu jolo hundulan ni Hula-hulanta.

 Di hamu horong ni Hula-hula nami, ala naeng pungkaonta ma muse
manghatai, asa rade ma hamu anon na laho manuturi hami pamoruon mu,
Botima!

Di hita Pomparan ni Ompunta Sianturi Mangihut Raja, haha doli dohot

anggi doli, adong hata ni natua-tua mandok:
Tinallik huling-huling, tarida sibuk-sibuk
Tinallik sibuk-sibku i, tarida holi-holi
Molo marulaon hahana, angina panomboli
Molo marulaon anggi doli, haha doli panomboli

Tolu do hita na marhaha-maranggi, pomparan ni Ompunta Sianturi

Mangihut Raja na sian Dolok Sanggul, siangkangan ma: Amani
Mangaraja, Sipaitonga ma Ompu Mangunjun, jala Siampudanma Ompu
Raja Gani.

On pe di hami ma nuaeng Bona Hasuhuton ima si nomor 2 (dua), ise ma

sian hamu haha doli dohot anggi doli na gabe panomboli di ulaonta on?
Hamu ma na mardos ni roha!

Sian Haha Doli (Sahalak sian pomparan ni Ompu Mangaraja)

Mauliate ma tutu, saonari ta tontuhon ma na gabe Raja Parhata, ise ma sian
hita tutu, dos ma rohanta, Botima!

Sian Anggi Doli (Sahalak sian pomparan ni Ompu Raja Gani)

Mauliate ma di hamu haha doli namai, molo hata sian hami na mandok,
molo dos rohanta Amani ……… ma na gabe panomboli/ Raja Panungkun
sian hita, Botima mauliate!

XI. HATA NI PANOMBOLI NI PARBORU

1. Antong mauliate ma di hamu haha doli dohot anggi doli nami, molo au pe
nuaeng didok hamu panomboli ni ulaonta di tikkion, na rap manomboli ma
hita dison.
2. nang di hamu pe horong ni Hula-hula nami (dijaouhon ma muse horong ni
Hula-hula songon panjouon ni Protokol) beha Rajanami, nunga denggan
parhundulmu? Asa tapukka ulaonta jala asa mangarade hamu anon laho
manuturi hami Raja ni pamoruon muna, Botima!
3. di hamu Raja ni pamoruon nami marga ……, ala nunga mardos ni roha
hami Rajani Hula-hula muna marga ……, dilehon hami ma muse
partikkion on tu hamu, Botima!
Catt: nunga tangkas di hita hian i di tonggo raja, manang na ise raja
parhata, holan na pajojorhon nama it u jolma torop, asa raja jala sangap
ulaon i.

Protokol ni Paranak

Mauliate ma di hamu Raja ni Hula-hula nami na mangalehon tikki di hami

Raja ni Pamoruon muna. Antong mangido tingki muse hami tu hamu Raja
ni Hula-hula nami asa mardos ni roha hami Raja ni pamoruon muna na
laho mangalusi sukkun-sukkun ni Raja i anon, Botima!

Di hamu horong ni hula-hula nami:

Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga ……
Hula-hula Anak Manjae : Rajai marga ……,Rajai marga
……

Di hamu horong ni hula-hula nami, nunga denggan hundulmu Rajanami?

Di hamu boru nami asa padenggan hamu jolo hundulan ni Hula-hulanta.
Di hamu horong ni hula-hula nami ala naeng pungkaonta ma muse
manghatai asa rade hamu anon na laho manuturi hami Pamoruon muna
laho mangalusi sukkun-sukkun ni Raja ni Hula-hula nami marga …….,
Botima, mauliate!

Di hita na mardongan tubu, haha doli dohot anggi doli nami,

Pinalu taganing, mangkuling dohot ogung
Mangkuling ogung i, mangkuling muse dohot sarune
Molo marulaon haha doli, anggi doli ma na gabe panomboli
Molo marulaon anggi doli, haha doli ma muse na gabe panomboli

On pe di hami ma haha doli mu bona ni hasuhuton, ise ma sian hamu

anggi doli nami na gabe panomboli/pangalusi sukkun-sukkun ni Rajai,
mardosni roha ma hamu anggi doli nami, Botima!
 Sian Anggi Doli

Antong mauliate ma di hamu haha doli nami, nuaeng pe tutu mardosni

roha ma hita anggi doli na laho mangalusi anon sungkun-sungkun ni Raja
i, Amanami…….. panomboli, dos ma rohanta disi.

XII. HATA NI PANOMBOLI NI PARANAK

a. Antong mauliate ma di hita na mardongan tbu, ala nunga dos ni rohanta
na gabe Au panomboli ni ulaonta, mauliate ma di hamuna, Botima.
b. Di hamu horong ni Hula-hula nami (dijouhin songon panjouon ni
Protokol)
Nunga denggan parhundul muna, Rajnami?
Di hamu boru nami asa paenggan hamu hundulan ni gorong ni Hula-hula.
c. Di hamu horong ni Hula-hula nami di pangido roha nami asa tuturi hamu
hami pamoruon muna, laho pasahathon dohot manjalo adat napinungka ni
Ompunta sijolo-jolo tubu i, Botima Rajanami!
d. Di hamu Rajani Hula-hula nami marga……., nunga dos roha nami na
laho mangalusi sungkun-sungkun ni Rajai, dipasahat hami ma muse
partikkian on tu hamu Raja ni Hula-hula nami, Botima!
1. PINGGAN PANUNGKUNAN

PARBORU
Manghatai ma hita Amangboru!
Tep-tep do nina mula ni gondang, ser-ser mula nit tor-tor
Sise mula ni uhum, sungkun mula ni hata, asa marsisisean hita, asa
adong dalan manise huhut manungkun hamu Raja ni boru nami;
Artia mula ni ari. Sipaha sada mula ni bulan
Nuaeng tapungka ma manghatai, pasahat hamu ma jolo Amang
boru
pinggan panungkunan

PARANAK
Mauliate ma Rajanami!
Baris-baris ni gaja di rura ni pangaloan
Molo mangido Raja na ikkon do oloan
Ai molo hatop nioloan, hatop ma ro pangomoan
(Di hamu boru nami boan hamu tuson pinggan panungkunan i, laos
pasahat hamu ma muse tu Rajai!)
 PARBORU
Di hamu Amanta Raja dohot Inanta soripada nunga dison pinggan
panungkunan, pinggan pasu, pinggan sitio soara na hot di hundulanna:
a. Sai mamasu-masu ma Amanta Debata di ulaonta, sai tio ma nang angka
parhorasan, tio ma panggabean jala sai hot ma pasu-pasu nai di hita na
marhula-hula dohot na marboru.
b. Na marisi parbue sipir ni tondi, parbue siribur-ribur, parbue sakti. Asa pir
ma tondi bahul-bahul pansalongan, pir ma tondi tu tambana nang angka
pangomoan di hamu pamoruon nami, jala satti ma dingin satti matogu,
torop maribur ma muse pomparanta, uhut matakkang manjuara.
c. Peak di ginjangna demban tiar, napuran rata, napuran sirara uruk,
hasomalan ni angka inanta soripada, asa tiar ma parhorasan tiarma
panggabean, tiarma ngolu-ngolu dapotonta tu joloan on.
d. Adong muse ringgit sitio soara manang rupia na bolak, natinompa ni
pamarentanta, sipalas roha ni natorop, dohot Amanta Rajai sai martamba-
tamba ma di hita antong angka silas ni roha, jala sai bolak ma
pansamotanta dohot parhorasan lehonon ni Amanta Debata tu hita
saluhutna. Asa dohonon nami ma songon umpasa ni sijolo-jolo tubu,
binanga ni sihombing ma binongkak sian tarabunga, tu lobang ma satua, tu
sanggar ma amporik, horas ma pardalan-dalan, mangomo muse ma
partiga-tiga, horas jolma gabe na niula, gok eme di sopo suang songoni
nang di balian, simbur magodang ma poso-poso, sitongka ma i ngali-
ngalian.
Paima so husungkun hamu Raja ni pamoruon nami, jolo hubuat ma jolo
ringgit sipalas roha ni natorop on dohot Amanta Raja on;
- on ma di hamu haha doli nami (1 lembar)
- on ma muse di hamu anggi doli nami (1 lembar)
- alai anggo on upa ni na martonggo ma on natong (1 lembar)
- molo na sada nai on (1 lembar) pasahatonta ma tu Raja ni pamoruonta,
ima na gabe pinggan pangalusi
Dalan tu apnggugunan ingkon boluson ma jambatan bosi, nunga hujalo
hami tangkas pinggan panungkunan, pasahaton nami ma muse on tu Raja
ni boru nami, na gabe Pinggan pangalusi

Di hamu boru nami, pasahat hamu pinggan pangalusi on tu Raja ni

pamoruon nami.

PARANAK
Mauliate ma di hamu Raja ni Hula-hula nami, nunga sahat be pinggan
pangalusi tu hami Raja ni pamoruon muna marga ……., jala nunga rade be
hami laho mangalusi sungkun-sungkun ni Raja i, Botima!

2. HATA SIPANGANON

PARBORU

Manghatai ma hita Amang boru!

Jolo ninang-nang do nina asa ni nung-nung,
Jolo pinangan do asa sinungkun

Ai nunga butong hami mangan indahan n alas, sagat marloppan na tabo,

puas minum aek sitio-tio, na pinatupa munai,
Sai pamurnas ma it u daging, saudara ma it u bohi, sai sipalomak imbulu
ma i, sipaneang holi-holi, huhut sipasindak panaili.

Ba dohonon nami ma Amang boru songon nidok ni situa-tua.

Bagot na marhalto na tubu di robean, horas hami na manjalo dohot na
manganhon, tu tambana ma di hamu na mangalean.

Na manungkun ma hami Amang boru di hata indahan n alas, lompan na

tabo, dohot aek sitio-tio, dia ma lak-lakna, dia ma unokna, dia ma hatana,
dia ma nidokna, dipaboa Raja ni pamoruon nami ma sian i, Botima
Amangboru!

PARANAK

Mauliate ma Rajanami di sungkun-sungkun muna i.

Mauliate godang ma tadok tu Tuhanta di siala pangiring-iringna di hita,
tarlumobi ma di hamu uduran ni Raja ni Hula-hula nami, hipas do hamu
Rajanami, hipas do nang hami pamoruon muna, taringot di sipanganon na
so sadia i, songon nidok ni natua-tua ma dohonon nami Rajanami;
Habang assosoit songgop tu rura-rura, sipanganon na hupasahat hami tu
Raja nami, sipanganon naso sadiai, ndada na mangholit. Sijamaon ni
tangan do Rajanami na humurang, molo tung na mangholit pe i, sai
paadongkon ma i di hami borumuna asa umbalga haduan sisombahonon
nami tu hamu Raja ni hula-hula nami.
Godang sibutong-butong, otik si pir ni tondi
Sai pamurnas ma it u daging, jala saudara ma it u bohi, sipalomak imbulu
ma i, sipaneang holi-holi. Huhut sipasindak panaili.

Bagot na marhalto, na tubu di robean, horas hamu na manjalo, tu gandana

ma di hami na mangalean.
Ianggo hatana Rajanami, ba, parhorasan panggabean do, Botima
Rajanami!

3. SOMBA NI ADAT SOMBA NI UHUM

PARBORU

Mauliate ma di hamu Raja ni pamoruon nami, parhorasan panggabean do

hape nanidokna, sai asi ma antong roha ni Tuhanta, sai lam ditambai ma di
hamuna pasu-pasuNa, pansamotan dohot angka parhorasan i,

Mardabu ma aek puli, sian dolok sitapongan

Sai dapot ma di hamu na uli, martamba-tamba di hamu siadongan

Alai Amang boru, marangkup do na uli, mardongan do na denggan,

siangkup songon na hundul, siudur songon na mardalan, siangkup ni
parhorasan panggabean, tung tangkas ma dipaboa Raja ni pamoruon nami,
sibegeon ni sipareon, sipeopon ni roha, Botima!

PARANAK

Mauliate ma Rajanami/ Tulang, tangkas ma tutu alusan Rajai;

Asa tangkas ma nina uju purba, tangkasan ma uju angkola,

Asa tangkas ma hita maduma, tangkasan ma hita mamora.

Rajanami, tangkas ma tutu paboaon siangkup ni parhorasan panggabean tu

Raja i,

Omputta Raja di jolo martungkot siala gundi,

Adapt na pinungka ni Ompunta na jolo,
Siihuthonon ni parpudi,
Ia molo balga anak pangolihonon,
Ia balga boru pamulion/pahutaon.
Balga bulu godang denggan do i bahenon hite-hite,
Ba molo adong anak magodang, jujuan ma i asa hot ripe

Asa nuaeng pe Rajanami, paboaon ma tu Raja i, siangkup ni parhorasan

panggabean;

Alai parjolo ma hami marsantabi, di jari-jari sampulu pasampulu sadahon

simanjujung tu tua dohot sahala mu, atik adong anon na hurang manang na
lobi di panghataion dohot di pambahenan nami maradophon Raja i, nanget
ma hami ajari hamu, Rajanami.

Ampapaga dolok nina, ampapaga humbang

Hita do marsogot, laos hita do haduan

Nuaeng pe hatahonon nami ma tu Rajai, di amnogot di buha ni ari, ro do

hami Raja ni pamoruon muna marga …………, mandapothon bagas ni
Rajai, ima na laho mangudurhon anak dohot boru ni Huria ni Tuhanta, na
laho manjalo “PAMASU-MASUON PARSARIPEON” sian joro ni
Tuhanta marhita-hita naposona, jal dohot do hamu Rajanami mangudurhon
jala nung muse dijalo nasida pamasu-masuon nangkin sian joro ni
Tuhanta.

On pe Rajanami, asa dohot ma hamu Rajanami mamasu-masu anaknami,

ima helamuna, boru muna, ima parumaen nami dohot hami sude Rajani
pamoruon muna. Asa anggiat gabe ruma tangga sitiruon nasida di jolonta,
nang di tonga-tonga ni masyarakat, jala sioloi hata ni Tuhanta.

Taringot tu somba ni adat somba ni uhum, pos do roha di Rajai, ndang

ampehonnonmu na soboi tartuhuk hami, mambahen ulaon on ndang na
mangasahon hina adong hami, jala diboto hami do muse Rajai ndang
sigulut sinamot, parbahul-bahul na bolon do Rajai, sihorus na lobi,
sitambai na longa, nang:

Barita ni lampedang, mardangka bulung bira,

Haburjuaon Raja ni Hula-hula nami Raja i ……., marboru,
Nunga tarbarita sahat tu dia.
On pe Rajanami jalo hamu ma elek-elek dohot pangidoan nami i lumobi
ma somba nami tu hamu Rajanami, ima siangkup ni panggabean
parhorasan, Botima Rajanami!

PARBORU

Mauliate ma Raja ni pamoruon nami,

Nunga tangkas dihatahon hamu, patar songon indahan di balanga, sak-sak
songon parbue di palastik. Ima tutu na manjalo pamasu-masuon baru
nami/parumaen muna dohot anak muna/hela nami nangkin sian bagas joro
ni Tuhanta.

Laos di tingkion muse dipangido rohamu, pasahaton mu tu hami Raja ni

Hula-hula muna somba ni adat somba ni uhum, ido antong patutna jala
dioloi hami ma pangidona muna i Amangboru!

Nunga pitu lili nami, paualuhon jugian nami

Nunga uli nipi nami, ai gohan mu ma hajut nami.

Taringot tu sibahenon mu na laho pasangaphon hami Hula-hula muna,

dang tuktukon batu, dakdahan simbora, dang tuturan datu ajaran na
marroha,..
Anak ni Raja do hamu, jala pahompu ni na mora, siboto adat siboto uhum,
jala sigodang boto-botoan.

Nang bulung ni lampedang, mardangka do bulung bira,

Hamoraon ni Rajani pamoruon nami marga ……., tarbarita ro didia.

Sidohonon/pangidoon nami tu hamu Rajani pamoruon nami:

Piga ma hoda sihapas pili, asa pintor tinangkup i mambehen hundul-
hundulan ni Amanta Raja, piga horbona asa sinuru parmahan asa
dipamasuk tu bara, suang songon i piga lombu na asa sinuru naposo
mangalap tu jalangan, sadia godang rantiti mas asa pinasolothon it u
sanggul ni Inanta soripada, jala sadia godang hepeng sitio soara, asa
nisimpan it u pangumbari, nang perak nang sere tahe godang pasahat hamu
Amang boru, Botima!

PARANAK

Mauliate ma muse Rajanami di pangidoan muna i.

 Nian na patut do i jaloon muna sian hami Raja ni pamoruon muna, alani
balga ni sahala mu, tua dohot pamatangmu.
Taringot di hamoraon ni Oppu nami na jolo i, toho do i Rajanami, ndang
parsoadaon i, alai tangkas songon na binotomuna Rajanami, tingki ro
krismon habis do i sude, tinggal holan pasi-pasi nama, ipe ndang
tarhatahon i tu Raja i.

Nian na mandanggur tu dolok do iba mangalehon tu Hula-hula, alai hansit

do tangan mandanggurhon nasoada.

Rajanami Raja bolon:

Elek-elek nami tu Raja i
1. asa tung sangap Rajai di ulaon alap jual dohot ulaon sadari ma pesta unjuk
on.
2. pasahaton nami ma muse tu Raja i somba ni adat somba ni uhum, ima
sinamot ni boru ni Raja i jala sitombol.
3. dipasada hami ma muse pangidoan ni Raja i, di sima lombuna, horbona,
hodana dohot dorbiana suang songoni mas na disima nang ringgitna,
perakna, dohot serana dipasada hami ma i hepeng na tinompa ni
pamarentanta, ima rupiah. Sahali mandok ma hami, sahali mangelek,
sahali manombahon tu Raja i, Botima Raja nami pangidoan nami.

PARBORU

Mauliate ma di hamu Raja ni pamoruon nami!

Alai andorang so dioloi hami pangidoan muna i, lehon hamu jolo

partingkian tu hami Hula-hula muna asa marsisungkunan hami.

PARANAK

Na uli Raja nami!

PARBORU

Di hamu horong ni Hula-hula nami,

Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga ……
Hula-hula Anak Manjae : Rajai marga ……,Rajai marga
……

Rajanami! Raja bolon! Inang soripada, di jolo hamu siaduon, dipudi hamu
sipaimaon, do tonga-tonga hamu Raja panungkunan dohot Raja panuturi.
Nunga dipatangi-tangi hamu hami manghatai dohot Raja ni pamoruonta,
didok pamoruonta pasahaton ni nasida ma tu hita somba ni adat somba ni
uhum ima sinamot nagok jala rambu pinudun dohot ulaon sadari.
Di tingki on pe Rajanami, asa tuturi hamu hami pamoruon muna, Botima
Raj nami, laos hamu ma marsiaturan, Botima mauliate!

4. MANGIDO PANUTURION SIAN HORONG NI HULA-HULA

HORONG NI HULA-HULA NI PARBORU

Mauliate ma di hamu pamoruon nami, na mangido panuturion hamu sian

hami horong ni Hula-hula muna (dijouhon ma horong ni Hula-hula,
songon panjouan ni Protokol ni parboru i) antong ise ma sian hita horong
ni Hula-hula na mandok hata, Dos ma rohanta!

(Olo dos ma rohanta hamu ma mandok hata sian hita)

antong manghatai ma hita:

sidohonon nami tu hamu pamoruon nami:

marsiamin-aminan ma hamu songon lampak ni gaol
marsitungkol-tungkolan songon suhat di robean

Asa dapot antong songon nidok ni umpasa:

Balintang ma pagabe, tumundalhon sitadoan

Ari mu ma gabe na marboru-na mar Hula-hula
Molo olo hamu masipaolo-oloan
Sai na saut ma ulaonta sadari on, dipasu-pasu Tuhanta
Sidok boti ma hami horong ni Hula-hula mu, Botima!
PARBORU

Mauliate ma di hamu horong ni Hula-hula nami, nang di hamu boru nami,

bahen hamu pandapot muna!

BORU NI PARBORU

Mauliate ma di hamu Hula-hula nami na mangalehon tingki di hami

borumuna.

Sidohonon nami tu hamu Hula-hula nami,

Tandok ni hula-hulana do siboanon ni boruna
Pandok ni Hula-hulana do sitolopan ni boruna
Jadi sitolopi nauli ma hami boru muna Rajanami, Botima, Mauliate!

PARBORU

Suang songon i ma nang di hita na mardongan tubu, sisada hata ma hita

songon hata nangkin ate! (alusna: horas jala gabe!)

Di hamu bona ni hasuhuton, didok pamoruonta pasahaton ni nasida ma tu

hita somba ni adapt somba ni uhum dohot sinamot ni borunta, sitombol,
jala sahali mandok, sahali manambahon tu hita Raja ni Hula-hula na.

Lasiak natata binahen tu panutuan,

Hata pa hinata, suhut do sibahen putusan

Lata pe lata i, duhut-duhut do sibut-buton

Hata pe hata ni Amanta Raja, dok ni suhut na gabe haputusan

Nuaeng pe pinasahat ma tingki tu hamu suhut nami!

SUHUT BOLON NI PARBORU

Mauliate ma di hamu haha/anggi doli

Tandokku do tandokmu, Pandokmu do pandokku

Molo i nama pandohan ni pamoruonta, ba, tajalo ma i mardongan
mauliate, Botima!
PARBORU

Mauliate ma di hamu sude uduran nami di angka pandohan mana i sude,

jadi di hamu Raja ni pamoruon nami marga ……., satolop ma hami Raja
ni Hula-hula muna di pangidoan muna i. Alai taringot tu suhi ni ampang
na opat dohot pandonganina, ingkon tangkas do i atupan mu Amang boru!

Nuaeng pe hatahon hamu ma muse sinamot ni baru nami na sadia godang

pasahaton muna tu hami Rajani Hula-hula muna, Botima!

PARANAK

Mauliate godang ma di hamu sude Rajani Hula-hula nami, nunga tung

lambok pusu hami Raja nami, ai dioloi hamu do muse pangidoan nami.

Raja nami, paima so huhatahon muse tu Raja i, lehon hamu ma jolo

partingkian tu hami, asa dijalo hami panuturion sian horong ni Hula-hula
nami, Botima!

PARBORU

Nauli Amang boru!

PARANAK

Mauliate ma muse Rajanami, ala dilehon hamu muse tingki on tu hami,

asa mardos ni roha hami dohot horong ni Hula-hula nami.

Di hamu horong ni Hula-hula nami,

Hula-hula : Rajai marga ……………….
Tulang : Rajai marga ……………….
Tulang Rorobot : Rajai marga ……………….
Bona Tulang : Rajai marga ……………….
Bona ni Ari : Rajai marga ……………….
Hula2 Na Marhaha Maranggi : Rajai marga ……,Rajai marga ……
Hula-hula Anak Manjae : Rajai marga ……,Rajai marga
……
Di jolo hamu siaduon, dipudi hamu sipaimaon, do tonga-tonga hamu Raja
panungkunan dohot Raja panuturi.

Ala nunga dapot tingki asa tuturi hamu hami laho pasahathon somba nia
adapt somba ni uhum tu Hula-hula nami Rajai marga ……., hupasahat
hami ma tingki on tu hamu asa hamu ma marsiaturan, Botima, Mauliate!

HORONG NI HULA-HULA NI PARANAK

Mauliate ma di hamu pamoruon nami, na mangido panuturion hamu sian

hami horong ni Hula-hula muna. Di hita pe horong ni Hula-hula, sahat ma
tu hita panghataion Ilaos dijouhon ma muse horong ni hula-hula songon
panjouon ni protocol ni paranak i) antong ise ma sian hita horong ni Hula-
hula mandok hata, Laos hamu ma nina.

Di hamu pamoruon nami, sidohonon nami tu hamu: somba ma hamu tu

Hula-hula mu, elek marboru jala manta mardongan tubu, asa dapot pasu-
pasu hamu sian Tuhan jala marsiamin-aminan songon lampak ni gaol,
marsitungkol-tungkolan songon suhat di robean, jala dapot ma di hamu
dos ni roha di nalaho pasahathon dohot manjalo, jadi sidok botima hami
horong ni Hula-hula mu, Botima, mauliate!

PARANAK

Mauliate ma di hamu horong ni Hula-hula nami, nuaeng pe pinasahat ma

muse tu boru nami, asa urupi hamu hami Hula-hula muna!

BORU NI PARANAK

Di hita boru! Sahat ma tu hita panghataion. Molo hami boru muna

Rajanami songon hotang sinarat do manang songon dia ulina di hamu
Hula-hula nami, nunga uli i di hami, sidohonon nami tu hamu, hata muna i
do na laho tumpahan nami, manang songon dia hatamu tu Raja ni Hula-
hulanta ido na laho tolopan nami borumuna, songon i ma hata nami,
mauliate, Botima!

PARANAK

Mauliate di hamu boru nami.

 Di hit ape na mardongan tubu tong ma sisada hata hita (alusna: horas jala
gabe!)

Nuaeng pe raja ni Hula-hula, nunga dos roha nami, pasahaton nami ma

sinamot ni boru ni Raja i godangna Rp, …….., sitombol di si ma lombuna,
horbona, hodana dohot ringgitna, perakna, masna dohot sere na. taringot tu
suhi ni ampang na opat dohot angka pandonganina pos rohamu Raja nami,
denggan do i atupan nami, Botima Rajanami!

5. PASAHAT SINAMOT

PARBORU

NUAENG PE ALA NUNGA DOS TAHI MU Amang boru, saonari pe

pasahat hamu ma sinamot nag ok.

PARANAK

Mauliate Rajanami, di hamu suhut bolon nami, boan hamu ma sinamot nag
ok tu joloon (diboan ma sinamot di bagas ni pinggan parbue napir dohot
napuran dohot hepeng sinamot), dilehon ma parjolo tu Raja parhata nasida
asa dipariksa, baru muse diboan ma tu Raja hata ni parboru i asa dipariksa
jala dipasahat ma tu suhut bolon ni parboru i.

Catt: nuaeng nunga somal di nalaho pasahathon sinamot i paranak tu

parboru, nunga sai ditor-torhon marhite musik, haru pe ndang pola
ganjang musik na i.

PARBORU

1. Pasahat hamu ma muse Amang boru tu suhi ni ampang na opat (dijou

sada-sada)
a. Pamarai
b. Simolohon
c. PAriban
d. Upa tulang ni boru muli
 (Rap dohot suhut bolon na dua pihak pasahathon tu tulang ni boru muli,
jala di tikkion muse dipasahat parboru piso-piso tu horong ni Hula-hula)
2. Pasahat hamu ma muse panandaion 17 (dijouhon sada-sada). Boi do
godang ni panandaion +/- 50 amplop asa dapot sude naginokkon, alai boi
ma utusan-utusan manjalo.
3. Patudu hamu ma muse tu dongan parhundul nami ima sijalo tintin
marangkup tulang ni hela (laos rap do suhut nadua pihak pasahathon tintin
marangkup, alai molo pariban tangkas/boru ni tulang tangkas dang adong
tintin marangkup, jala di tingki on do muse dipasahat paranak piso-piso tu
horong ni hula-hulana)

HATA NI SUHUT PARBORU TU TULANG NI HELA

Di hamu Ampara, nunga dijalo hami sinamot sian pamoruonta, ima

sinamot nagok, pasahaton nami do sebagian tu hamu ai nunga sisada boru
hita di borunta on. Molo tung so sadia pen a hupasahat hami on las ma
rohamu Ampara, Botima!

HATA NI TULANG NI HELA TU SUHUT PARBORU

Mauliate ma Ampara, ai dipaigilhon hamu do hami jala ido patutna. Jala

nunga tutu hita sisada boru di borunta on, ido umbahen didok natua-tua,
hotpa jabu i, sai tong do i margulang-gulang, manang sian dia pe bere i
mangalap boru, sai tong do i boru ni tulang.

On pe Ampara, sai satahi saoloan ma hita di borunta on, molo hamu pe di

jolo, hami ma di pudi mu, molo hami di jolo muse, hamu ma antong di
pudi.

Sai tibu ma antong borunta on mangabing-abing dohot manogmpa-ompa,

Tubu ma tambisu di dolok ni purba tua,
Sai tubuan anak dohot boru na bisuk ma borunta on, donganmu sari matua,
Mauliate godang ma di hamu Ampara, Botima!

HATA NI TULANG ANAK TU LAENA/IBOTONA

Mauliate ma lae dohot ho ito, nunga hujalo hami tintin marangkup sian
berekkon, sai anggiat ma jumpang naniluluanmu dapot najinalahanmu,
hatop nasida mangabing-abing tu joloan on, sai tubuan laklak ma berekki,
 tubuan singkoru, tubuan anak, tubuan boru donganmu sari matua, mauliate
ma, Botima!

PARBORU

4. Pasahat hamu ma muse Amang boru pinggan panganan. (Amplop marisi

hepeng songon pangganupi di sude na ginokkon ala ndang apala sude boi
dapot jambar be sian paranak i).

PARANAK

Mauliate ma Rajanami! Di hamu boru nami boan hamu tuson pinggan

panganan i ( martukkar).

Di hamu Rajani Hula-hula nami, tung so sadia pe pinggan panganan on,

las ma roha muna manjalo, Botima!

PARBORU

Nuaeng pe Amang boru, nunga dijalo hami sinamot nagok sian hamu
pamoruon nami, sai anggiat ma gabe sinamot pangararaton on di hami
Hula-hula muna tu joloan on jala na tau hasangapon.

Amporik mallipik, tu onggang marbabang,

Gabe do parboil na otik, gabe do nang parboil na godang.

Asa napuran tano-tano, gotap gatip ni pardembanan

Horas ma hami Raja ni Hula-hula muna na manjalo,
Ba, tu tambana ma natong di hamu Rajani Pamoruon nami, na
mangalehon.
Tubu ma di hamu singkat nii, marlompit ganda gabe na niula, sinur na
pinahan, horas hajolmaon, maruntung partiga-tiga, maduma parhauma, tu
tambana pangkat ni parkarejo.

Nuaeng pe Amang boru, dos do nangkokna dos do nang tuatna, molo

manjalo nina, ingkon mangalean, Hauma sipaula-ulaon, singkoru sipasae-
saeon, Hula-hula do sisomba-sombaon, boru do sielek-elekon, aha ma
sipangidoan muna sian hami Hula-hula muna?, Botima Amang boru!
 6. PASAHATHON ULOS HERBANG

PARANAK

Mauliate ma Rajanami!, taringot tu pangidoan nami tu hamu Rajani Hula-

hula nami, asa pasu-pasu hamu ma hami sasude pamoruon muna tarlumobi
ma anak nami/hela muna dohot boru muna/parumaen nami, marhite-hite
ulos herbang dohot hata sigabe-gabe, asa gok pasu-pasu hami Rajanami
dung mulak sian inganan on, tumpahan ni Amanta Debata, Botima,
mauliate!

PARBORU

Amang boru, mauliate ma di pangidoan muna i. pos rohamu Amang boru,

ndang ajaran dap-dap marbunga, ndang ajaran Hula-hula mangalehon
pasu-pasu tu boruna,

Aek na tio do hami, riong-riong di pinggan pasu

Hula-hula na burju do hami na ringgas mamasu-masu

Nuaeng pe Amang boru, pasahaton nami ma tu hamu ulos herbang 17

lembar dohot ulos tinonun sadari. Ba, tu ise ma parjolo pasahaton nami
Amang boru? Botima!

PARANAK

a. Mauliate Rajnami, pasahat hamu ma ulos:

1. Passamot ……………………………..1
2. Ulos hela/boru, mandar hela………….1
3. Ulos Pamarai …………………………1
4. Ulos Simanggokhon…………………..1
5. Ulos Sijujung Ampang ……………….1
6. Ulos Tu Na Marhaha maranggi ………1
7. Ulos Tu Na Mardongan Tubu ………...6 (Sianturi Siharinuan)
8. Ulos Boru/Ibotona/Bere/Ibebere ……..2
9. Ulos Punguan …………………………1

b. Pasahat hamu ma muse ulos natinonun sadari (Amplop)

c. Nuaeng pe Rajanami, nunga dijalo hami ulos herbang, dohot ulos tinonun
sadari sian hamu Hula-hula nami, laos di tingki on ma nian pasahat hamu
muse ulos holong mu tu anak nami/helamu, borumu/parumaen nami,
botima Rajnami pangidoan nami muse, Mauliate!

PARBORU

Mauliate ma di hamu Pamoruon nami!

a. Di hita pe bona ni hasuhuton, dongan tubu nami, boru nami, asa ro ma
hita tu joloon laho pasahathon ulos holongta be (marudur ma nasdia
pasahathon ulos holongna be)
b. Nang tu hamu pe dongan sahuta nami, pariban nami, dohot ale-ale, asa ro
ma hamu pasahathon ulos holong mu (marudur ma nasida pasahathon ulos
holongna be)
c. Di hamu horong ni Hula-hula nami dipasahat hami tu hamu horong ni
Hula-hula nami (dijouhon songon panjouon ni Protokol). Dipasahat hami
ma tu hamu partingkian on asa pasahat hamu ulos holong tu boru nami,
hamu ma marsiaturan Rajanami, Botima!

HORONG NI HULA-HULA NI PARBORU

a. mauliate ma Amang boru, di siala tingki na pinasahat muna tu hami

horong ni Hula-hula muna, jadi di hita pe horong ni Hula-hula ro ma hita
tu jolo on, laho pasahathon ulos holongta (dijouhon ma jala diaturhon ise
parjolo sian nasida laos udurma nasida sude).
b. Di hamu pamoruon nami,
Nunga dipasahat hami be ulos holong sian hami horong ni Hula-hula muna
tub ere nami, dipasahat hami ma muse partingkian on tu hamu pamoruon
nami.

PARBORU

1. Mauliate ma di hamu sude horong ni Hula-hula nami na pasahathon ulos

holong muna tu boru nami, sai anggiat ma antong ditambai Tuhanta di
hamu pasu-pasuNa dohot ganjang ni umur di hamu horong ni Hula-hula
nami, din a mulak pe hamu sian inganan on sai Tuhanta ma na
mandongani hamu, Botima, mauliate!
2. Jadi di hamu Raja ni pamoruon nami, nunga singkop be dipasahat hami
hata pasu-pasu, hata pangidoan tu Amanta Debata marhite-hite ulos
herbang, ulos tinonun sadari dohot ulos holong. Tung songon i pe nuaeng
 na tarpasahat hami tu hamu Raja ni pamoruon nami, sai Tuhanta ma na
manggohi, Botima Amang boru, mauliate, dipasahat hami ma muse
partingkian on tu hamu Pamoruon nami.

PARANAK

1. Mauliate ma Raja nami, Raja ni Hula-hula, na ringgas mamasu-masu

hami Raja ni pamoruon muna.
Sai turtu ma nina anduhur, tio ma nina lote.
Hata pasu-pasu na pinasahat muna i Raja nami,
Unang muba unang mose.
Tuak ma i di abara nami, ampe ma i di simanjujung nami, boanon nami ma
i antong tu tonga ni jabu nami.

2. Jadi di hamu horong ni Hula-hula nami (huhut dijouhon horong ni Hula-

hula na tarsurat i)
Raja nami, Raja bolon, di jolo hamu sipareahon, di tonga-tonga hamu
sihaliangan, di pudi hamu sipaimaon dohot Raja panggomgom. Nuaeng pe
Raja nami, atik adong na naeng sipasahaton muna tub ere mu, laos di
tingkion ma pinasahat tu hamu. Hamu ma marsiaturan Raja nami, Botima!

HORONG NI HULA-HULA NI PARANAK

Mauliate ma Amang boru! Ala dilehon hamu partingkian on tu hami

horong ni Hula-hula muna. Di hit ape horong ni Hula-hula sahat ma tingki
on tu hita, ro ma hita tu jolo on (dijouhon ma jala diaturhon ise parjolo
sian nasida laos udurma nasida sude).

Nuaeng pe Amang boru, nunga dipasahat hami ulos holong nami tub ere
nami, tung songon i pe na tboi hupasahat hami tub ere nami, tung las ma
roha muna Pamoruon nami, Botima, mauliate!
PARANAK

1. Maulite godang ma dipasahat roha nami tu sude horong ni Hula-hula

nami, sude angka na uli nabinahen muna i sai sian Tuhanta ma jalo hamu
balosna, mauliate godang ma di hamu, Botima!
2. Nuaeng pe Raja ni Hula-hula!
Ala naung singkop sude pasahat ulos holong dohot hata pangidoan, sian
sude tutur pinasahat ma muse tingki on tu hamu Raja ni Hula-hula nami,
Botima, mauliate!
 7. PAAMPUHON HATA

PARBORU

Mauliate ma muse Amang boru, tarsongon on ma nian tabahen, parjolo ma

sian hami pasahaton paampuhon hata tu hamu Raja ni pamoruon nami.

PARANAK

Mauliate ma Raja nami!

PARBORU

Di hamu Raja ni apmoruon nami!

Parjolo ma tapuji Tuhanta na mandongani hita, boi singkop mardalan
ulaonta sadari on sonang so haribo-riboan.

Tung songon i pe Amang boru na boi tarpasahat hami ulos herbang, ulos
tinonun sadari dohot ulos holong tu hamu Pamoruon nami las ma badan
mu, las ma nang tondi mu, sai parumaen siboan tua ma boru nami i di
hamu dohot siboan las ni roha.

TU HAMU HELA NAMI/BORU NAMI, DOHONON NAMI MA:

Sai dapot ma na niluluan muna, jumping na jinalahan muna, huhut bagas
marurat tu toru, timbo marbulung tu ginjang, mardangka tu siamun,
marranting tu hambirang.
Tubu ma hariara di holang-holang ni huta, sai tubuan anak dohot boru ma
hamu, dongan mu sari matua.
Urat ni nangka, tu urat ni hotang,
Manang tu dia hamu mangalangka, sai tu si ma hamu dapotan pansamotan.

Di hamu Rajani pamoruon nami marga …….., tapuji ma Tuhanta ai nunga

mardalan ulaonta dohot singkop. Suang songon i nang angka parjambaran
nunga marture be sude, antong sauran nami ma hamu Raja ni pamoruon
nami marhite hata sigabe-gabe, jalo hamu ma:
1. Bintang na rumiris tu ombun na sumorop,
 Anak pe di hamu riri, boru pe tung torop

2. Andor halungkang togu-togu ni lombu sahat tu jolo ni sopo,

Sai saur matua ma hamu patogu-togu pahompu sian boru dohot sian anak

3. Pinantikkon hujur di topi nit apian,

Manang tu dia pe hamu mangalangka, tu si ma dapotan parsaulian

4. Eme sitamba tua parlinggoman ni siborok,

Amanta Debata namartua, luhut ma hamu diparorot

5. Sahat-sahat ni solu, sai sahat ma tu bortean, sahat tu tiga ras,

Leleng ma hita mangolu, sahat tu parhorasan sai sahat ma tu panggabean

Botima dipasahat hami ma muse tu hamu Pamoruon nami.

PARANAK

Mauliate ma Rajanami, ala nunga dipasahat hamu sude ulos herbang, ulos
holong dohot hata sigabe-gabe tu hami Pamoruon muna, tarlumobi ma tu
anak nami/hela muna, boaumuna/parumaen nami.

Turtu ma nina anduhur, tio nidok ni lote

Hata na uli hata pasu-pasu na pinasahat muna, unang muba unang mose

Tuak ma i di abara nami, ampe si simanjujung nami, boanon nami ma i

antong hata pasu-pasu tu tonga ni jabu nami.

Mauliate godang pinasahat tu hamu sude Raja ni Hula-hula nami dohot

uduran ni Raja i, botima, pinasahat ma muse tingki on tu hamu Rajani
Hula-hula nami.

PARBORU

Mauliate ma Amang boru, andorang so sahat tu pangampuon ni suhut

bolon nadua pihak anon (paranak/parboru) parjolo ma nian:
1. Managampu sian suhut bolon parboru
2. Managampu sian suhut bolon paranak dohot pengantin
3. Marende O Tano Batak
4. Manghatahon Olop-olop
5. Marende Huria
6. Tangiang Panutup
7. Ulaon Sadari
a. Maningkir Tangga
b. Paulak Une Paranak tu Jabu ni Parboru

8. Marsijalangan, Horas3X

Beha, nunga satolop hamu disi Amang boru?

PARANAK

Nauli Rajanami, satolop ma hami disi Rajanami.

8. HATA PANGAMPUON

1. HATA PANGAMPUON SIAN SUHUT BOLON PARBORU

Parjolo, mauliate godang dipasahat roha nami tu Amanta Debata, disiala
pangiring-iringna di hita, boi hita marhahipason sahat tu tingki on.

Paduahon, Mauliate godang dipasahat roha nami muse tu hamu dongan

tubu nami, boru nami, dohot horong ni Hula-hula nami, dohot sude tahe
hamu naniundang nami.
Di sude angka tingki, gogo dohot pambahenan muna, ndang tarbalos hami
sude, sai anggiat ma asi roha ni Tuhanta dilean basa-basa na sumurung tu
hita ganup marsada-sada, holan hata mauliate do na boi tardokkon hami tu
hamu napinorsangapan.
Anon dung mulak hita sian inganan on rap udur ma hita muse tu bagas
nami, botima sidohonan nami tu hamu napinorsangapan nami, mauliate!
Patoluhon, Mauliate ma di hamu Raja ni pamoruon nami dohot uduran mu
luhut na, ai renta do hamu sude tu inganan on, sude pambahenan muna i
sai sian asi ni roha ni Tuhanta ma na mangalean basa-basana na sumurung
i tu hita ganup marsada-sada.
Di hamu lae dohot hamu ito, mulai tingki on boru nami i, parumaenmi,
sahat di hamu nama i jala ajari hamu, asa malo ibana marsimatua dohot
marhaha-anggi dohot mareda, jolma naposo do parumaenmi, anju ma ii to.
 Ramba na poso nina na so tubuan lata,
Jolma naposo do parumaen mi, na so umboto hata
Songon i ma sidohonon nami tu hamu Lae dohot Iboto nami, botima,
mauliate!

2. HATA PANGAMPUON SIAN SUHUT BOLON

PARANAK/PENGANTIN
Parjolo, Mauliate godang parjolo dohonon nami tu Amanta Debata, di
siala pangiring-iringna dohot pandonganina di hita sude, boi martupa
ulaonta di bagasan las ni roha.
Paduahon, Mauliate ma muse dohonon nami tu hamu napinorsangapan
Raja ni dongan tubu, hita na marhaha maranggi, Raja ni pamoruon, Raja ni
dongan sahuta, Raja ni ale-ale dohot Raja ni horong ni Hula-hula nami,
Raja ni tulang nami, nang sude tahe hamu na manghaholongi hami. Sude
pambahenan muna i, tenaga, partingkian dohot materi, ndang tarbalos
hami tu hamu, sai anggiat ma Amanta Debata na mangalehon pasu-pasuNa
tu hita ganup, holan hata mauliate ma na boi tarpasahat hami tu hamu na
pinarsangapan, anon rap udur ma hita tu bagas nami, laho mamodai anakta
dohot parumaenta.
Patoluhon, Mauliate godang ma tong dipasahat roha nami tu hamu Raja ni
hula-hula nami dohot uduran muna sude, di siala harentaon muna tu
ulaonta on, sai Tuhanta ma na mambalos angka na denggan na binahen
muna i, mauliate godang ma di hamu saluhutna, botima!
Pengantin, …………………………………………………………………..
........................................................................................................................

3. MARENDE O TANO BATAK

O Tano Batak, ……………………………………………………………
………………………………………………………………………………

4. OLOP – OLOP
Hepeng olop-olop (ditiop Raja Parhata nadua) na manghatahon Raja
Parhata ni Parboru.
Di hamu napinarsangapan Amanta Raja dohot Inanta Soripada naliat na
lolo. Nunga mardalan ulaonta dohot singkop, tadok ma mauliate tu
Tuhanta, Ibana do na mamasu-masu ulaonta, ai dapot songon nidok ni
umpasa:
 Aek siuruk-uruk, tu silam-lam aek toba
Namet-met ndang marungut-ungut,
Na magodang pe marlas ni roha
Nunga hujalo dison hepeng olop-olop sibagihonon tu hita luhutna, iam na
laho mangolophon parbogason ni anak dohot borunta sadari on,
Balintang ma pagabe, tumundalhon sitadoan,
Ingkon saut hita gabe, ai nunga marsiolo-oloan.
Tu anak dohot boru,
Bintang na rumiris, ombun nasumorop.
Anak pe antong riris, boru pe antong torop.
Tu hita saluhutna,
Simbora guk-guk, peak di atas amak.
Horas ma di hita apala luhut, torop ma boru dohot anak
Olop-olop, Olop-olop, Olop-olop!
5. MARENDE HURIA
Sian Paranak na manguluhon

6. TANGIANG PANUTUP
Sian Parboru manguluhon

9. ULAON SADARI

PARBORU
Ro ma parboru maningkir tangga, laos diboan do dengke dohot tandok 3
(tolu) marisi parbue dohot lampet di bahul-bahul
Parboru:
Di hamu Pamoruon nami, ro do hami Hula-hula mu, ima maningkir tangga
ni jabumu, na marbingkas ma i ala naung di paraja hamu boru nami,
nuaeng pe manungkun ma hami di hamu, sehat-sehat do hamu boru nami?
Paranak:
Mauliate ma Rajanami di sungkun-sungkun muna i, sehat-sehat do hami
saluhutna di jabu on Raja nami, tangkas songon nabinerengmu, botima!
- laos dison do muse dilehon paranak amplop tu panaru 5 (lima) amplop -
Parboru:
Antong mulak ma hami tu bagas nami Amang boru, sai horas-horas ma hamu
saluhutna, botima!
 10. PAULAK UNE

PARANAK
Ro ma muse Paranak dohot uduranna paulak une tu Hula-hulana (diboan
do dison sipanganon na martudu-tudu)
Di hamu Raja ni Hula-hula nami, ro do hami tu bagas sibaganding tua on,
na marbingkas ma in a ro hamu Raja nami maningkir tangga ni jabu nami
tingki na salpu, hipas do hami didapothon hamu jala hamu pe hipas-hipas
do sude didapothon hami di tingki on. Antong mauliate ma di Tuhanta sai
tong-tong ma hita sude dibagsan hahipason tu joloan on, botima, mauliate!
Horas,horas,horas!