PASAHAT DEKKE TU BERE/IBEBERE.

Dihamu Bere nadua

Dison do hami tulangmu/Nantulangmu, rap dohot oppungmu
Patuduhon Tudu-tudu ni las ni rohanami di pesta Pamasu-masuon
Parbogasanmuna.
Tagiang nami sian Tulang/Nantulangmu, nang dohot sian angka
Oppungmu, Asa sada ma hamu tu joloan on songon daion aek,Marpinompar
dianak dohot boru pasu-pasuon ni tuhanta Pardenggan Basa i.
Songon tomu-tomu ni las ni roha nami, Huboan hami do dison Dekke
na laho Panganon ni hamu nadua, asa Dekke sahat ma on di hamu, Sahat ma
nadenggan Dekke Simudur-mudur maon asa udur ma Parhorason, udur ma
nang Panggabean.
Asa Dekke Tio maon dihamu, asa tio ma angka ari, Tio nang ma
Pancairan dihamu Pasu-pau on ni Tuhanta Debata.

Dohonon nami ma dihamu Berenami,songon ni dok ni Natua-tua :

1. Tangan do na manjalo, Marbinege ma Sipareon

Gabe jala Horasma Berenami na manjalo,
Suangono hami Tulang/Nantulangmu namangalehon.

2. Asa Sititikma Sihoppa, Hotangma Pangaruhutna

Otik Sosadia Dekke na hupasahatnami
Sai Tuhanta Debatama, Napasahat Pasu-pasuna
Botima.
 PASAHAT ULOS TU BERE- IBEBERE.

Dihamu Berenami Nadua, suang songoni nang dihalak Lae dohot Ito.

Dison do hami Tulang,Nantulangni Bere namion Marga Pasaribu,

Pasahathon Parbue ni Holong namarnamboru, dohot na marbere.

Adong do Hata ni Natua-tua namandok.

1. Tappang Tallihon Tobu, Tutur songon sabion eme
Holong roha tu boru, holongan roha tu bere
Ido haroro nami nuaeng di tingkion,pasahathon ulos holong tu hamu
nadua Bere nani angkupni Tangiang Sipingadoan nami tu Amanta
Debata.
2. Onpe Maulite ma di Tuhanta napatulushon sangkapmuna, ai nungga
sada do keluarga hamu di huria ni Tuhanta, jala sada keluarga di
tonga-tonga marga Siringo-ringo.
Pasahat nami ma Ulos Holongan tu hamu nadua,marpangidoan tu
Tuhanta, asa marpinompar hamu tu joloan on Pasu-pasu onni Tuhanta
i, Tiur-tiur pancarian muna, jala lam tu ramosna parbue ni naniula
muna di huta nang dibalian pe.
Jdi, Sian nami Tulangmu dohon on nami dihamu berenami songon
nidok ni Natua-tua.

1. Mangareap ma sitapi-tapi
Songgop ma tu Punsu ni Tandiang
Tubuan Anak ma ho, Anak Sipangajani
dohot Boru Sipartangiang.

2. Eme Piniar-piar nanijomur di Pardegean

Tubuon Anak ma hamu, anak angka napistar
Dihot boru na boi Pangunsandean.

3. Suangsongoni ma nang dihamu lae dohot ibotonami

Songon ni dohot ibotonami
Songon ni dok ni Umpasa ma dohonan nami.

1. Tio aek disumur, doras aek di bondar.

Anggiat ma hamu Lae,Ito siganjang umur
Laos huhut sitorop Pinompar.

Antong di hamu berenami,nang le,iboto nami dohonon nami ma

Palti ma bulung Siala
Lamot bulung ni ompu-ompu
Tuhanta Debata do silehon Tua
Saluhutma na hamu di pasu-pasu.
Botima
 UMPASA NAMARPARDOMUAN TU
1. NAMARDONGAN TUBU.
2. NAMADONGAN SAHUTA BONA PASOGIT.
3. PARSAHUTAON / LINGKUNGAN.

1. Diginjang Parbubuan, Ditouan Partanggalan

Pinukka Parpunguan, asa adong ihutonon ni Pomparan.

2. Niusung saong lompit, boanon tu Parbaboan

Horas-horas Natua-tua di Bonapasogit, horas hita di pangarantantoan.

3. Timbo Bungkulan ni ruma, Parasaran ni Hatitioran

Tabo namardongan Sahuta, molo tong-tong dibagasan Parsaoran

4. Harbangan dalan tu huta, Balatuk dalan tu jabu

Sada na mardongan sahuta, denggan-denggan ho marhombar jabu

5. Artia bonani ari, Sipaha sada bona ni bulan

Tu sadana ma namarhahana maranggi, tampak dohot boruna masipa
ihut-ihutan

6. Manatap tu Habinsaran, Manaili tu Hasundutan

Dongan na oto ni ajaran, dongan napogos ni urupan.

7. Ancimun siataon, Pisang sitabar sigorengon

Angka namasihol di Hasaoloan, Nahurangi paula sobegeon.

8. Tampulak ni sibaganding, didolok ni Pangiringan

Horas gabe na marhahaanggi, dohot boruna ma si pairing-iringan.

9. Silo Matani ari, Lamo sinondang ni bulN

Nadenggan i ma tajalahi, nahuranggi masianjuan.

10.Togu urat ni bulu, met-met piu on bonang

Monang maralo musu, talu marola dongan.

11.Habang ma siburuk, Songgop ma tu Durame

Unang ma hita holan na muruk, ingkon adong do roha dame.

12.Surak-surak ni porda, Sangar-sangar ni saruna

Ingotma hita dipoda, asa dapot roha dame

13.Hodangdo pahu, Holi-holi sangkalia

Ho do ahu, nagpe hita dang sada ina.

14.Marbunga Ingir-ingir, marpabue tada-tada

Molo tangkas hita marpingkir, tung harugiando na marbada
Alai molo lambas hita marpingkir, sae soada mara.
 UMPASA DIULAON LASNI ROHA.

1. Pirharaton piring, Damar haraton Tobu

Saipir ma tondi mardingin, Saur ma leleng mangolu.

2. Mardakka ma baringin, di mual ni pulo batu

Saipirma tondi mardingin, horas ma tondi matogu.

3. Obuk do jambulan didandan bahen samara

Pasu-pasu ni Hula-hula, parohon parhoras panggabean marsundut-
sundut.

4. Mangula ma pangula, Laos dipasae duhut-duhut

Pasu-pasu ni Hula-hula, Parohon parhoras,Panggabean marsundut-
sundut

5. Manduda ma Panduda, dilosung ni bakkara

Pasu-pasu ni Hula-hula, napogos hian gabe namamora
(Boi do gantian hata/tujuan na)
Manduda ma panduda di losung ni bakkara
Saigabe ma naniula, martamba ma las ni hora.

6. Bogot na marijuk ma, Parasaran ni Ambaroba

Marpinomparma hamu anak na bisuk dohot boru napantas maroha.

7. Mangkuling ma Tataganing, Hau halak do polu-polu na

Tuhan Debata ma mangiring-iring, ditambaima Pasu-pasu na.

8. Jongjong ma diuluan, Manatap-natap dompak Tampahan

Sai jumpang naniluluan, dapotma nijalahan.

9. Pinsur bulung ni salak, Bontar boras ni singkoru

Tibuma mangabing-abing anak, mangihut ma mangabing boru.

10.Marluga ma parsolu, di tao ni silalahi

Gabe jala horas ma Hula-hula dohot boru, sai Tuhanta ma
mangaramoti hita ganup hari.
Pirharaton piring, Damar haraton Tobu
Saipir ma tondi mardingin, Saur ma leleng mangolu.

Mangareap ma sitapi-tapi
Songgop ma tu Punsu ni Tandiang
Tubuan Anak ma ho, Anak Sipangajani
dohot Boru Sipartangiang.

Dalti bulung siala lamot

Bulung ni ompu-ompu
Tuhanta Debata do silean Tua Saluhutna ma hamu dipasu-pasu

Songonima sian hami Hula-hula Sinaga.

Horas ma dihita.