Kuga carana si enda si cidahken i bas kegeluhenta?

Rikutken Roma 12:14-21

maka lit 8 dampar si banci erbahanca kita meriah ras kerina kalak e me:
Sipemena, jadi pasu-pasu, la numpahi
Sipeduaken, meriah ras kalak ermeriah ukur, tangis ras kalak si tangis
Sipeteluken, mperdiateken keperlunna alu la meganjang ukur dingen
mpertemanisa pe
Sipeempatken, la mbalas kejahaten tapi erbahan si mehuli Sipelimaken, asa
ngasup ngusahaken gelah meriah ras kerina kalak Sipeenemken, bere dalan
man Dibata si erbalas
Sipepituken, mere minem ras man imbang si muas melihe
Sipewaluhken, talukenlah si jahat alu perbahanen si mehuli. Kata kunci i bas si
enda e me i bas ayat 18 si jadi bagin tema renungen PJJ nta e me ‘asa
ngasupndu usahakenndulah’.

Penting kel si pebagesi erti kata ‘asa ngasupndu usahakenndulah’ enda maka
meriah ras kerina kalak banci tersehi. Kata enda ngertiken maka asa bancina,
rikutken gegeh kengasupen si ibereken Tuhan man banta. Mehuli pe kata
enda sikawitken ras Ulangen 6:5, “Kelengilah TUHAN Dibatandu asa ukurndu,
asa tendindu, asa gegehndu lit”. Penjemba maka kita ngelakoken sada hal asa
ukur, asa tendi ras asa gegeh e me erkiteken si idahiken kita guna cidahken
keleng ateta nandangi Tuhan Dibata. E maka asa ngasupta siusahaken
nggeluh meriah ras kerina kalak erkiteken enggo sigejapken keleng ate Tuhan
Dibata man banta dingen erkiteken keleng ka ateta nandangi Tuhan Dibata, si
enggo mereken AnakNa si Tonggal lako nebusi kita arah kematenNa.

Kune sikawitken ras komunikasi, maka mehuli pe si antusi ras-ras kerna kata
sekalak ahli teori komunikasi ras sosiologi Amerika nari tergelar Everett M.
Rogers (1931-2004) ngataken maka erti komunikasi e me proses kuga maka
sada buah perukuren (ide) isehken arah sada ulu ku si deban (sada ntah pe
nterem si ngalokenca) alu tujun lako ngobah pengkebet (tingkah laku) kalak si
deban. Alu makeken pengertin enda e maka renungen PJJ nta enda
sendalanen ras tema mabai kita lako nuanken sada buah perukuren si mehuli i
bas kiniersadanta ras kalak si deban. Buah perukuren e e me kata ‘meriah’
janah si ngelakokenca (subjek) na e me kita bage pe kalak si deban kerinana.
Paulus nehken suratna man perpulungen Kristen i Roma lako ngingetkenca
maka kerembakenna ras Tuhan Dibata oratna min mereken ngaruh si mehuli i
bas kerembakenna ras kalak si deban, 
subuk sada kiniteken ntah pe lang janah i je kita nggeluh i bas kekelengen. 
I bas kecibal kegeluhenta genduari enda pe iajuk kita kerina lako meriah ras
kerina kalak sabab enggo reh dewasana kita ngangkai kai ertina kita icibalken
Tuhan ras kalak si deban i sekelewetta.
Si enda sicidahken arah pengerana (komunikasi verbal: ngerana la megang,
sora tangkas dingen la metersa) bage pe perbahanen (komunikasi non verbal:
makeken mata alu mehuli, ayo siang ntah pe cirem). Gendekna, arah
pengerana ras perbahanenta sicidahkenlah keleng ate Tuhan si enggo lit i bas
kita nandangi kalak si deban maka meriah kita ras kerina kalak.

Ulih arah komunikasi si mehuli erbahanca kita erteman ras ise pe, lit
perdamen, tergejap lit kekelengen sabab ngasup kita ncibalken dirinta lako
“tangis ras kalak si tangis, meriah ras kalak si ermeriah ukur”. Kerina enda la
terjeng man Kristen saja si lakoken tapi man kerina kalak. La lit belat-belat kai
pe. Tuhan Jesus si mpengasup kita arah pendahin KesahNa si Badia. Amin