PJJ GBKP TGL. 11 - 17 MAR.

2018
Pdt. Larena br. Sinuhadji (Nd. Rey Tarigan)
Tema : PANG NURIKEN SI PAYO (Lukas 12:1-3)
Ogenta sendah nuriken kerna pengajaren Yesus man ajar-ajarNa, nina “Metengetlah
kam nandangi ragi kalak Parisi biakna si perkulah-kulah. Ragi i jenda maksudna “pengaruh”
la mehuli si banci ncedai ajar-ajar Yesus e me perkulah-kulah entah pe munafik. Kerina hal
perkulah-kulah si ilakoken kalak Parisi ipetangkas Dibata i bas waktuna, ertina la lit kai pe
si banci ibuniken i lebe-lebe Dibata. Si benar tetap benar i lebe-lebe Dibata amin pe i bas
doni si benar ndai ianggap salah, janah si salah i lebe-lebe Dibata amin pe enggo ibuniken
tetap salah.

Tema si seh man banta “Pang nuriken si payo” masih denga i bas rangka pembahasen
kerna politik. Adi rikutken budaya politik i bas negaranta tentuna banci siidah maka
kinipangen nuriken si payo labo pilihen si menguntungken. Nen saja umpamana kai si
nialami mantan gubernur DKI Jakarta si gundari sangana ipenjara. Perban kinipangenna
nuriken ras ngelakoken si payo makana melala kalak si la senang nandangi ia, janah
puncakna ia jadi korban politik identitas ras politik agama. I bas geluhta si tep-tep wari pe
melala kita si la pang nuriken si payo erkiteken konsekuensina labo menguntungken. Lit
kuan-kuan si ngatakenca “tidak ada kebenaran yang manis, kebenaran itu pahit”, ertina
kenca enggo ituriken si benar mis pagit i bas pusuhta, mela kita erkiteken si la benar si
enggo ilakoken kita ibukaken ras iteh kalak. I bas budayanta pe nuriken si payo akap kami
labo semal ilakoken. Lit kuan-kuan si ngatakenca “ula kataken si tuhu, tapi katakenlah si
teng-teng”. Hal si deban umpamana perasaan mehamat nandangi kalimbubu rusur
menghambat kita guna ngataken si payo. Piah dungna si payo ndai sibuniken saja.

Tapi Kata Dibata i bas paksa sendah ngajuk kita gelah memperjuangken kebenaran
sue ras peraten Dibata kai pe resikona, subuk i bas pengerananta, perukurenta, bage pe i
bas perbahanenta. Karakter perkulah-kulah (munafik) arus siambekken ras sibeneken i
bas geluhta. Erkiteken bahan PJJ-nta sendah lit kaitenna ras dunia politik praktis, emaka
man banta anggota GBKP si aktif terlibat i bas dunia politik praktis iajuk kita gelah pang
nuriken si payo, berani memperjuangkan kebenaran apapun resikonya, bukan hanya
berdasarkan hukum yang berlaku tetapi lebih dari itu berdasarkan kehendak Allah di
dalam Yesus Kristus. Jika tidak berani menanggung resiko maka sebaiknya kita mundur
dari dunia politik praktis daripada menghancurkan kemuliaan Tuhan dalam hidup kita.

Man banta si la terlibat i bas politik praktis, mari radu ras kita erlajar pang nuriken si
payo i bas kegeluhenta, labo hanya i bas pengerananta tapi i bas perukuren ras
perbahanenta i japa pe kita. Enda tentuna labo hal si murah, perlu kiniteken si paguh man
Dibata, janah perlu kinipangen i bas kita ngaloken kai pe resikona. Tapi tek kita Dibata la
pernah nadingken anak-anakNa si memperjuangken si payo sue ras peratenNa (bdk. Mat.
5:6,10; Mat. 6:33; Mat. 25:46; rsd.). Emaka mari radu ras kita mindo gegeh man Dibata arah
pertotonta gelah ipegegehiNa kita nuriken si payo sue ras peraten Dibata.