Bahan Sermon PA Moria 05-11 Juni 2022

Ogen: Ulangen 24:7

Tema: Ngergai Teman
Tujun: Gelah Moria
 Meteh maka trafficking lit ibas undang-undang Israel
 Ula jadi pelaku trafficking ibas kegeluhen

Ulangen 24:7 Ise si nculik temanna sapih-sapih bangsa Israel, jenari ijadikenna budakna, ntah
idayakenna jadi budak la banci la iukum mate. Alu bage ibersihkenndu me kejahaten si bagenda

I. Kata Penaruh
Salah sada kebutuhen dasar manusia eme iergai, ihormati. Ibas ngergaken kalak sideban,
kita nggo nampati ia guna ngidah keberadaanna simeherga ilebe-lebe Dibata. Megati pe
mbue kalak mengalami perubahen hidup erkiteken igejapkenna ia iergai ras ihormati.
Kerina manusia meherga ilebe-lebe Dibata Jesaya 43:4 Perban meherga kal Kuakap
kam; medolat, janah keleng ateKu kam,… emaka kita pe isuruhNa harus ngergaken
kalak sideban alu dem kiniteruken ukur, erkiteken manusia itepa segambar ras sentudu
tempas Dibata (bd. Kej. 1:26). Realita kegeluhen nai nari seh gundari erbage praktik
kegeluhen siterjadi lanai ngergaken harkat ras martabat manusia selaku tinepa Dibata
simerherga. Sue ras bahan PA Moria minggu enda eme praktek human trafficking
(perdagangan manusia), Pustaka Sibadia pe lit nuriken ras ngungkapken praktik
trafficking siterjadi ibas kegeluhen bangsaNa. Piga-piga contoh, Jusuf idayaken senina-
seninana (Kej. 37:27), Judas Iskariot ndayaken Tuhan Yesus alu 30 keping duit pirak (Mat.
26:15), Praktik perbudaken, kekerasen rsd, perbahanen enda la ngena ate Dibata janah
kalak singaloken bage ngaloken hukumen ibas Dibata nari. Peran geraja khususna Moria
GBKP sangat penting ibas menolak praktik human trafficking erkiteken kelompok
sirentan jadi target enda eme diberu ras anak-anak. Moria GBKP hadir ras ikut bergumul
ibas persoalen kemanusian, semakin peka ras peduli nangdangi kalak sitertindas,
terbuang, menderita alu membangun sikap ngergaken teman manusia (Tema)

II. Mpebagesi bahan ogen Ulangen 24:7

Kitab Ulangen eme kumpulen pidato ntahpe khotbah Musa guna mpersingeti
perbahanen Dibata simbelin nangdangi bangsaNa sanga bangsa Israel ipulahi ibas
perbudaken Mesir nari. Musa mpersingeti bangsa Israel segelah tetap erkemalangen
man Dibata, iulihi Musa nuriken kerna undang-undang sijadi gelemen bangsa e ibas
geluhna pagin ibas negeri Kanaan si nggo ipadanken Dibata segelah ndatken kegeluhen
ras pasu-pasu bagepe jadi pasu-pasu ibas kegeluhenna alu mewujudnyataken keadilen
ras keleng ate Dibata si nggo alokenna.
Lit 2 kali isingetken ibas Ulangen 24 kerna status bangsa Israel, Inget maka budak
kap kam nai i Mesir, janah TUHAN Dibatandu si mbebasken kam; e me sabapna maka
kubereken man bandu perentah enda (Ul. 24:18, 22). Enda isingetken segelah bangsa
Israel ngasup ngataken bujur ibas pembebasen si bereken Dibata bagepe mendorong
segelah patuh man undang-undang Tuhan. Salah sada aturen si itekanken ibas priokop
enda eme undang-undang kerna ngergaken manusia, nampati kalak sideban alu la
erbahan ate kalak mesui, menderita. (Penting nginget ise kita ilebe-lebe Dibata,
keselamaten bagepe pasu-pasu sibereken Tuhan)
Ayat 7, aturen kerna litna jaminen keselamaten nggeluh kalak sideban, ngergaken
kelegeluhen kalak sideban, Ise si nculik temanna sapih-sapih bangsa Israel, jenari
ijadikenna budakna, ntah idayakenna jadi budak la banci la iukum mate… Nculik eme
sada perbahanen pemaksan, tindaken kekerasen guna ndatken untung ibas jelma si
culikna (trafficking), la banci la iukum Dibata kalak singelakokenca.
Arah aturen enda nuriken maka Dibata erkeleng ate nangdangi kerina manusia, Dibata
emperdiateken kiniseran bangsaNa, setiap manusia labanci erkuasa nangdangi manusia
sideban, tapi harus ngergaken temanna manusia.
Ibas kegeluhen bangsa Israel ibreken Tuhan aturen/pedoman uga ngergaken budak,
sebab ibas paksa sie megati lit kalak alu sukarela ndayaken dirina jadi budak guna
ngelunasi utang, praktik enda guna memulihken kondisi sulit secara ekonomi bagepe
 gelah ola lit kalak sikelihen erkiteken la man. Sekalak tuan labanci ngelakoken tindak
kekerasen nangdangi budakna (Kel. 21:26-27), iperlakukan bagi sekalak upahen (Im.
25:39-46), banci itebusi bagepe ngaloken kebebasen ( Im. 25:10, Ul.15:12).

III. Pengkenaina
 Ngergaken teman manusia eme wujud ketaatenta man Dibata, teridah arah sikap,
pengerana ras perbahanenta (Bd. Rm. 12:10b “Silebe-lebenlah kam i bas mpehaga
teman.”.
 Mpeteguhi komitmen guna ngergaken teman manusia erkiteken kerina kita meherga
ilebe-lebe Dibata (Pasangen, sierdahin, keluarga, teman ras kalak sideban)
 Moria GBKP la jadi pelaku trafficking, ngergaken kalak sideban alu kiniteruken ukur, la
ngelakoken kekerasen secara fisik ntahpe fsikis, tapi Moria sidem keleng ate ngasup
ngergaken temanna manusia.
 Moria GBKP berani menyuarakan keadilen, bagepe mereken pendampingen man korban
praktik trafficing, tindaken preventif alu mereken informasi sipayo guna pencegahen.

Diskusi
1. Oge mulihi Ulangen 24:7, engkai maka undang-undang enda isehken man bangsa Israel?
Undang-undang si ibereken Tuhan e jadi pedoman ras nampati kegeluhen bangsa Israel. Ibas
kepatuhenna bangsa ndatken pasu-pasu ibas Tuhan (jadi bangsa si iberkati Tuhan),
sebalikna hukumen adi la patuh. Undang-undang sibereken Tuhan ngingetken maka Tuhan
erkeleng ate man bangsana ras Tuhan nge simereken pembebasen (Allah Pembebas).
Aturen enda nuduhken maka kerina manusia meherga ilebe-lebe Dibata, kita pe harus
ngergaken teman manusia.
2. Perdiateken I sekelewetta, lit denga nge kasus trafficking terjadi, mari situriken janah kai
banci silakoken segelah kasus enda reh kurangna?
Mbue kasus siterjadi adi siperdiateken berita media, tapi harus siakui maka praktek
trafficking ilakoken secara tertutup, perdagangen perempuan dan anak, kekerasen TKI,
penindasen pekerja rumah tangga, adopsi ilegal, penjualen organ tubuh rsd. megati terjadi.
Mbue sibanci silakoken kita, Moria menyuaraken melalui media sosial. Mereken pendidikan
penyadaren bahaya trafficking erkiteken ibas daerah terbatas kal pengangkan kerna kasus
enda, mendukung tindaken pemerintah, Moria GBKP la terlibat ibas praktik trafficking.

3. Tulisken ayat Pustaka Sibadia si ngajuk kita ngergai temanta manusia.

Matius 7:12 Bahanlah man kalak si deban bagi ngena atendu ibahanna man bandu. Enda me ertina
Undang-undang si isuratken Musa ras kai si enggo isuratken nabi-nabi."
Roma 12:10 Sikeleng-kelengenlah kam bagi si ersenina. Silebe-lebenlah kam i bas mpehaga teman.
Johanes 13:34-35, Kubereken man bandu pedah si mbaru, e me: Sikeleng-kelengenlah kam. Bagi
Aku enggo engkelengi kam, kam pe min arus sikeleng-kelengen. Adi sikeleng-kelengen kam, kerina
kalak meteh maka kam ajar-ajarKu."
Johanes 15:12-13 Enda me pedahKu: Sikeleng-kelengen min kam bagi Aku engkelengi kam.Labo lit
keleng ate si belinen asangken keleng ate kalak si nggit ngasamken kesahna guna teman-temanna.

“Ergaken dirita bagepe temanta erkiteken kita meherga ilebe-lebe Dibata”

Pdt. Jeriyonanta Sitepu, S.Th, MM (Helvetia)

 Bahan Sermon PA Moria 12-18 Juni 2022
Ogen: Pilipi 4:10-13
Tema: Ngasup Ngalaken Kerina Keadaan
Tujun: Gelah Moria
 Meteh keadaan Paulus ibas teks
 Meteh Kecibalna paksa gundari, ngasup ngalakenca ras ermalem ate ibas ndalani
kegeluhen

Pilipi 4:10-13
4:10 Mbelin kal keriahen si kugejapken i bas geluhku erkiteken persadanku ras Tuhan. Kenca
bage dekahna, lit ka kesempatenndu sekali nari ncidahken maka iperdiatekenndu kap aku.
4:11 Labo maksudku maka lanai aku iperdiatekenndu, saja lanai kin lit kesempatenndu
ncidahkenca. Janah si enda kukataken labo erkiteken kugejap maka aku lanai iperdiatekenndu;
sabap aku enggo erlajar encukupken alu kai si lit i bas aku.
4:12 Kueteh nge kai ertina nggeluh i bas kekurangen, janah kai ertina nggeluh i bas kelebihen.
Enggo dat aku rahasiana, seh maka i ja gia ntah katawari gia, malem ateku subuk paksa aku
besur bage pe paksa melihe, subuk paksa aku kelebihen bage pe paksa kekurangen.
4:13 Ngasup aku ngalaken kerina keadan erkiteken kuasa si ibereken Kristus man bangku

I. Kata Penaruh
Syair lagu rohani Karo “Sapa Tendingku”, nina: Adi ukuri nggeluh i doni enda, Mesera ras
latih kal kepe, lenga dung sada nggo ka reh siman ukuren, ertindih-tindih megati lanai terbaba. Uga
musilna, uga pe bayakna, kerina simaba beratna, siman ayaken rusuren reh dauhna, uga nge ndia
erbahan simehulina???
Lagu enda ningetken situasi kegeluhenta khususna Moria, erbage-bage perbeben nggeluh sireh
nderpa kegeluhen, mungkin nggo ndekah sakit, relasi ras perbulangen sikurang harmonis, anak sila
bagi ukur ras sura-surata pendidiken pendahin ntahpe perjabunna, sulit secara ekonomi, bagepe
persoalen sideban sibanci erbahan kita putus asa ras bena pengarapenta. Uga kesiapenta ngalaken
kerina keadaan ibas geluhta? Ngasup denga nge kita ngejapken keleng ate Dibata ibas
kebiarenta? Mari erlajar kita arah PA Moria minggu enda, uga Rasul Paulus ngalaken kerina
keadaan kegeluhen ras pelayanenna (Tema).

II. Mpebagesi Bahan Ogen Pilipi 4:10-13

 Perpulungen Pilipi eme perpulungen si pemena ipanteki Paulus i Propinsi Roma, Makedonia.
Surat Pilipi isuratken sanga Paulus ibas penjara erkiteken kiniseran ibas meritaken berita
simeriah. Tujun Surat enda eme:
 Ngataken bujur erkiteken keleng ate/pemere perpulungen
 Pengajuk man perpulungen gelah tetap tek ras pang ngalaken kiniseran
 Isuruhna perpulungen tetap meteruk rukur bali ras Kristus
 Nuriken keriahen ras kemalemen ate ibereken Dibata man kalak singgeluh ibas persadan ras
Kristus
Ibas pendungi suratna isehkenna pengataken bujur, nuriken keriahen ukurna erkiteken persadanna
ras Tuhan bagepe hubungen simehuli ras perpulungen Pilipi.
Meriah ukurna katawari pe aminna lit ibas penjara tapi keriahen ukur/sukacitana la ikut
terpenjara. Keriahen Paulus la itentuken situasi, ibas kekurangen pe tetap ia ermeriah ukur, ngasup
ngalaken kerina keadaan erkiteken igejapna Kuasa siibereken Kristus man bana.

 Ayat 10, Mbelin kal keriahen si kugejapken…Kai nge rahasiana pengakun Paulus enda?
Erkiteken nggo idatna kai erti kegeluhenna eme guna Tuhan, kegeluhenna iarahkenna
secara total guna Kristus. Ibas persadanna ras Tuhan malem atena ibas kerina situasi.
Keriahen simbelin sigejapkenna erkiteken perpulungen mediate/perhatian ras erkeleng ate
man bana sanga ibas kesusahen, fokus Paulus labo saja erkiteken ngaloken pemere ntah
penampat arah perpulungen (ay.17), tapi erkiteken mehuli kal perbahanen perpulungen,
erbuah kiniteken si lit perpulungen guna muat bagin ibas pelayanen bagepe nampati
perpulungen si deban (ay.16).
  Ayat 11, … sabap aku enggo erlajar encukupken alu kai si lit i bas aku. Rasul Paulus erlajar
ncukupken si lit, ngataken bujur ibas kondisi sialamina. Mabai kita pe tetap nggit erlajar
guna ncukupken alu kai si lit bas kita, tentu meriah ukurta ras ngasup ngataken bujur man
Tuhan. Ncukupken ertina maka kegeluhenta enda bergantung man Tuhan. Kalak sila
nggeluhken geluhna ibas Tuhan dirina la erpuas puas, mengeluh, nggit mbandingken dirina
ras kalak sideban silebih asa dirina sierbahanca ia kecewa. Kondisi Paulus ibas penjara tentu
mbue kekurangen, tapi tuhu-tuhu ia erlajar guna ncukupken dirina. Nggo inanamina nggeluh
ibas kekurangen ras kelebihen, Enggo datna rahasiana, katawari gia malem atena (ay.12)

 Ayat 13, Ngasup aku ngalaken kerina keadan… keadaen uga sinanami Paulus bas
pelayanenna? Simaksudken Paulus labo sekedar kekurangen ntahpe kondisina ibas perjara
tapi pe kiniseran silebih asa sie. Ibas erbage ingan baik kota, gurun, laut mbue ancamen
sinanamina, Irampuk, ibenteri kalak alu batu, iligas rsd (2 Kor. 11:23-26). Ituriken Paulus
maka ibas kerina keadaan Dibata la pernah nadingken ia, Arah apai pe kami itindih, tapi la
kami meripuk. Bingung kami, tapi la seh putus asa. Iayak-ayak musuh kami, tapi la kami
itadingken Dibata. Idampesken kalak kami, tapi la seh getem (2. Kor. 4:8-9). Reh gegehna
pengarapen ras kinitekenna man Kristus ibas kiniseran-kiniseran sidalanina (Pertumbuhan
Rohani)

III. Pengkenaina

 Keadaan sila bagi ukurta megati jadi ibas kegeluhen erbahanca bene keriahen ras sukacita,
Iundang segelah siampeken man Tuhan: “Ampeken kerina kearun atendu man Dibata, sebab
ia kap si mperdiateken kam” 1 Pet. 5:7. Kerina keraun ateta sisehken man Tuhan arah
pertoton sidem pengataken bujur, nginget mbue kiniulin Tuhan sialoken kita. Bersukacita di
dalam Tuhan
 Ungkapen Paulus, Ngasup aku ngalaken kerina keadan erkiteken kuasa si ibereken Kristus
man bangku jadi pergegeh ras inspirirasi ibas kegeluhen Moria tetap fokus man keleng ate
Tuhan, ibas kerina keadaan simehuli isikapken Tuhan.
 Ngasup ncukupken diri ibas kerina keadaan si lit ibas Moria.
 Perbeben lalap lit ibas kegeluhen, langa dung sada nggo ka reh. Moria tetap nggeluh
nggeluh ibas singena ate Tuhan segelah mampu ngalakensa kerina keadaan e alu gegeh ras
kepentaren si ibereken Dibata. Pengarapen man Tuhan la pernah mengecewakan kita, kuga
beratna pe perbeben reh lah ku Tuhan. Ketika kita mengandalkan Tuhan lit serpang pulah.
Emaka meriahlah ateta katawari pe ibas persadanta ras Tuhan. Kuga kita membangun
persadanta ras Tuhan eme melala ertoto, ngoge pustaka sibadia ras nggeluh bagi singena
ate Tuhan.

 Nina Pepatah Kuno Rusia “Palu menghancurkan kaca, tapi palu membentuk baja”, ertina
adi jiwata rapuh bagi kaca kune reh palu persoalen mekpeksa maka nukah kita putus asa,
frustasi, kecewa, merawa, lanai lit keriahen ras semangat ibas dirinta. Adi kita bagi kaca,
rentan kena benturen, nukah tersinggung, kecewa, sakit hati ibahan kalak, sitik saja
benturen nggo ncedai hubungenta ras kalak sideban. Tapi jadilah bagi baja, mental baja eme
mental si ngasup rukur positif, simehuli janah ngasup bersyukur ibas kerina keadaan. Engkai
maka bage? Erkiteken kerina keadaan si nderpa eme proses kegeluhen sinempa ia reh ulina,
lebih baik. Besi baja lebih berguna kenca iproses ras ibentuk alu palu. Adi lit sangana
masalah sila bagi ukurta, ula irespon alu cara si salah, tapi persoalen e njadiken ras
membentuk kita reh ulina. Ayat 13, Ngasup aku ngalaken kerina keadan erkiteken kuasa si
ibereken Kristus man bangku.

Pdt. Jeriyonanta Sitepu, S.Th, MM (Helvetia)