Pupuh Durma : XII

1. Sang Subudi kenyem tur masawur getar, duh kaki sang yaksa sakti,
sangkan cucune teka, mai nyadya maingetang, ban kaki nyakitin gumi, nah
dumadak, kaki nyidayang nyalinin.
2. Wireh tonden ngenteg dijatinin tingkah, ane madan sila yukti, dening,
kadroponan, awakin momo angkara, sangkan mamahak mamaling,
mangawas, sahasa mamati-mati.
3. Twara pesan ngelah angen miwah sayang, ngulahang suka padidi, nah
juwa suudang, iraksasa gelis nimbal, nunas pangampura rihin, antuk
pekak, kadi congah manimpalin.
4. Kadi banget ngawe tengkejut dimanah, mirib sanget tungkalik, ne tindihin
pekak, melah pekak manuturang, ane mula kasungkemin, cucu nimbang,
ne iwang pacang kutangin.
5. Kehangkaran dadi dasar sasungkeman, ditu Hyang Hurip kaastiti, reh ento
wisesa, ngodagang saluwir ada, yan ento pada tidongin, tan wurungan,
bangkrut sasar jroning hurip.
6. Wireh hyang angkara tanja liyan, ne ngrike gumine sami, uli ditu medal,
kema masih pemulihnya, krana patut nto baktinin, peteng lemah, tur
apang yatna dihati.
7. Yaning pageh bakti ring Hyangkara, sinah sida asing kapti, nanging tan
sabarang, anake pacang nyidayang, nindakin bakti astiti, ring hyangkara,
apan godane tan gigis.
8. Kama Arta Kawiryan lan Kakasuban, ento wekasing utami, anggon
pangabaktyan, Hyangkara mangda suka, yan ento pada tidongin, sinah
menggah, iraga kapongor sedih.
9. Nto rana ne patpat patut limbakang, apang da katunan bukti, mangda
trepti suka, Hyangkara malingga, ring angga sarira mukti, Kama Arta,
Wirya Kakasuban malih.
10. Mangden gampang makatang ento maka patpat, artane ungsi pangrihin,
ento saksat telaga, Kama Wirya Kakasuban, mawak ulam katak patis,
sinah teka, tan buwat ya kanti alih.
11. Nanging sinah Arta ne nto kadat bakat, yaning twara dasarin, bahan
tingkahe patpat, Pursa lan Parikosa, Nastika muwah Kasaktin, reh punika,
patut agem jroning hurip.
12. Ane madan purusa nto jani artyang, banine twara mamilih, bani ngrampas
arta, ane mula twara gelah, bani ring sang manindihin, tur mihalang,
dastu karebut tan jerih.
13. Miwah ane madan kaparikosan, twara angen twara sedih, teken sang
karampas, teka lagas ngampok ninjak, ngaplukin bahan ngagitik, nusuk
munggal, apan tan sayang dihati.
14. Sapuniki sane mawastan Nastika, tan nyak pati gugonin, mingkin ane nu
samar, kadi kecaping agama, kocap pacang nraka panggih, yen manyorah,
Hyang Yama kocap nyakitin.
15. Sang Nastika tan ngugu swarga nraka, mingkin karmapala malih, wireh
kapastyang, ento tutur anak mokak, anak bes lebihan jahil, suba bangka,
bakat bannya majehin.
16. Kasaktyane nto buwin tegesang, kuwat ditengah disisi, luput ring senjata,
bayu pramanane kuwat, sabda lan hidepe sidi, nggih punike, ne mule
sungkemin kaki.
17. Ento krana kaki twara jangkayan, mamahak mamegal mamaling, ngalih
rajabrana, makadi muwatang pangan, asing ane kacumponin, tan
sangsaya, nyambal jadma nyeret getih.
18. Yan kasidan nto jatinin kautaman, jaba jero manggih luwih, basang wareg
lega, keneh lan pangrasa suka, apane buwin itungin, dening pragat, suka
bungah wareg sahi.
19. Yan sang getap takut mamahak mamegal, dulurin hatine ganjih, jejh
manyahasa, mamungal nyempal mangalanjak, aduk sayang gagang giging,
kanti duga, magawe tuyuh mauntit.
20. Megoh apus deweke akwang swarga, rambangang ragragan lengit, kendel
ngamah kocap, pacang swarga yan tan nyorah, miwah tan mamati-mati,
bes gugwan, awake tulus ngadesit.
21. Bane gerap duwag madalihan ngendah, dalih pelih sang mamaling, baane
takut katara, kimud adanine dusta, runtag yan ngelempagin, sang
ngelahang, sakit ketuge mabalik.
22. Kaki tatas teken kawruhan pandita, mula demen makente sering, banne
bes resepan, teken tutur samah kocap, asing angkuhang madan pelih,
sarwa nraka, dikaditwan kocap panggih.
23. Bes ngliwat palyate joh sangah, ane pahak tan pedasin, bangbang,
manyungklingang, lihate jelap sawatang, ane tong ade pedasin, tulus
bangka, bregugwane ngawinin.
24. Ne idewa masake tan pawikan, sangkan praratune nguni, molih
kakasuban, takutin Tri – Bhuwana, dewa buta rep ajerih, kaling jadma,
makkakeb takut mangili.
25. Masih tumggal manadi madasaring yajnya, twah angkara kastiti,
mayadnya ban yuda, mapuja gregehan jaran, lan swaran gajah padati,
mabajre ban suryake ngebekin gumi.
26. Masekarura ban tumbak panah lan cakra, magan daban rah ngudadi,
sahanan sasocan, ane keles saking busana, ketes tempuh pedang keris,
maka wija, madupa abuke ngliputin.
27. Agni murub nyeleg muwunang nagara, maka padamaran suci, bangke
pajulimpang, macahcah lan saling semp al, nto pinakang banten suci,
madaksina, ban rampasan ratna manik.
28. Apan nista sukane ulih kurenan, madya saking ngipil-ipil, mamacul
ngulak- ngulak, sukane ulyan ngrampas, ngadokan angkaran budi,
marikosa, ento wekasin utami.
29. Yaning darma sahi sangsaya dimanah, megoh ganjih melas hati, jejeh ye
neraka, bangkene patakut goyal, dalih pacang manggih weci, yan
madusta, ngugu munyi tan pabukti.
30. Teka kodag awake kemta bulanan, ban twara ngelah telengis, adanin
mabrata, akwang suka makasan, ne pidan sop dahar jani, daharang
jengah, kocape anggon ngecapin.
31. Kaki masih ngelah anggen miwah sayang, nanging tan salah pangungsi,
sayang teken awak, teked teken ubuhan, pyanak somah minakadi, ento
pyara, reh dadi amongan kaki.
32. Ento krana sangkan kaki mangulahang, ngalih rajabrana sahi, anggon
myara awak, somah pyanak mwah ubuhan, bojog kedis minakadi, reh
amongan, nging tan sabarang olasin.
33. Ada sisa nto anggon sepelan, maka yasa ring icening, apang suka bungah,
suka manahe ngatonang, muwah anggon bekel diuri, kala tuwa, inganan
tan mampuh ngalih.
34. Nguda onya anake tulung sakitang, tong nawang darmane hurip, awake
matyang, anake lawut hidupang, unteng hatine moyanin, sanget
sungsang, kawaruhe nyangkala diri.
35. Pidaging ratu kakine ring idewa, ne jati sungkemin kaki, ngulah suka
sakala, huripe apange suka, tan ngetang kayange mati, reh sang pejah,
bantas bangka teken nengil.
36. Suba mati seken twara ngelah rasa, budi manah twara kari, nguda buwin
dalihang, bisa ngrasa suka duhka, buduh ortane gugonin, ne sakala,
pangguh lawut nto boyanin.
37. Duh sang kalih sok kaki polih nguningang, ne kasimpan jroning hati,
nanging ampurayang, nawi wenten lepit iwang, pamuput kakine mangkin,
nyadya nunas, sabuh wacanan sang kalih.
38. Sang Subudi masawur getar tur banban, tanmari semune manis, duh kaki
sang yaksa, iyang banget mangajumang, ban kaki sengeh dihati, tuhu
prajnyan, kuwat mangitungin indik.
39. Mirib kaki suba manyelehin satwa, sastra Weda wus kagulis, tur suba
mabukta, kaki sampun kretayasa, polih panugrahan luwih, sakewale,
panampine ada lepit.
40. Reh suksma daginging sastra lan agama, tan gampang pacang manampi,
yan tan paguruwang, makadi yan tan kaswecan, antuk Ida Sang Hyang
Widi, bisa sungsang, kawuhe kakden kangin.
41. Kaki ngaden angkarane patut sembah, ulih ditu dasare peleh, wireh
iangkara, mawak tukang pancing prajnyan, mamarenang kasukan gumi,
silib pisan, mapancing ban duhkan hati.
42. Asing anak nyak nyanggem kasukan jagat, ngambah pancing perihati, ring
arta buktyang, duk ngalih kewehe dahat, suba bakat keweh ngemit,
miwah ngaba, jejeh rusak miwah lisik.
43. Dikekene maling teka nyengkale, sang ngraksa bareng ngemasin, yadin
duke telah, ulih saking kapatutan, mingkin momo ngawinang lisik, nyelsel
pisan, dadi sakit jroning hati.
44. Ento krana Ida Sang Maha Pandita, sang uning madalem gumi, maweh
paplajahan, ngatarayang, iangkara, mawak tukang sungglap ririh, singid
pisan, keweh pacang sida uning.
45. Pangrasane ngrasayang ngelah awak, nto angkara kaadanin, nto ne
ngadakang, hala hayu suka duhka, tuwin malinder sahi-sahi, tan
patanggwa, ane kawengku ban sedih.