Pupuh Ginada : VI

1. Beli bagus Sang Sucita, tityang I Sugata tangkil, ngaturin beli ngajengang,
wireh sampun wengi langkung, bawose ngiring sapihang, mangda polih,
nyangig taji mangawitang.
2. Bin pidan manggih wentenang, kaklecan malih kawitin, nanging tityang
mangahapang, ayam tityang dyastu buruh, wireh ipiyanne rusak, ampeh
angin, campakan tityang ical.
3. Nangingke sampunang duhka, tityang demen guyu beli, I Sucita raris
nimbal, aduh adi sang abagus, jai beli iwang pisan, ngarihin, beli matur
ring iraka.
4. Wantah adi smpun sinah, tan wenten pacang ndukain, wireh tasakin
kadarman, twara santulin ban unduk, nangingke ne madan iwang,
manggeh pelih, dyastu ja tan kapiduhkan.
5. Pamuput nunas ampura, reh durung nunas ring adi, kedusan kayune
galang, ngawinang beli tan santul, kalu indrya mingungang, krana beli, lali
matur mapinunas.
6. I Sugata matur nimbal, sampunang beli manjangin, wireh sampun sami
galang, kayunne manampi kayun, pacang napi rawos ragrag, ne tan parti,
yan dasare twara suka.
7. Malih tityang manguningang, manah tityange sujati, bedak tityang
maduwe ipah, ne wikan tur darma sadu, agenan tityang malajah,
mangden sering, tityang ngiring mangonjakan.
8. Bilih Ida ajin tityang, ugi tan lyan kaapti, wantah mantune utama, wruhing
sastra gama iku, tepeting sila gunawan, twara ngingsir, manggeh bakti
ring Hyang Titah.
9. Sami telebe ring sastra, miwah penampene tunggil, panujune ugi tunggal,
punike panegulan kukuh, tingkahe maipah matwa, apnan tunggil, jiwane
nyelir sarire.
10. Nika ngawinang tan belas, jiwane sahi manunggil, kadi pacampuh akasa,
tan dadi pegat satuwuk, yadin sarirane belas, tileh nyiki, wireh
pangrasane tunggal.
11. Wantah kaweruhe tunggal, ngawetwang rasa tunggil, rasane tunggil
 ngawinang, sarirane sering mapunduh, yaning kaweruhe tungkas, sinah
sulit, pacang ngatepang sarire.
12. Masih muwuh manekekang, yan anteng saling unyain, mingkin tangeh
teken goda, tahu ring kesakten unduk, sane kuwat mamalasang, nto
kabasmi, bahan tatase ring tatwa.
13. Sayan kuwat manekekang, maipah mamatwa wyakti, tuwin manyama
braya, masawitra maji ibu, yan bares maweh ampure, ring sang pelih,
mingkin twara ngawe iwang.
14. Arah tityang ngocoh pisan, sagara bakat tasikin, janjan ngucap tidong
melah, dyastu bawose patut, sweca beli ngampurayang, tityang alit, mula
kirang unadika.
15. I Sucita malih nimbal, rawos adi lintang luwih, muwattigang kautaman,
dasar lantaran panuju, punika patut samyan, tur nukanin, banget beli
nyuksmayang.
16. Jati wantah arang pisan, sang nyidayang kadi adi, patut mula dadi dasar
panujune tuwi rahayu, kalihne kanggen lantaran, ugi becik,
amretasanjiwani saksat.
17. Katah anak kadroponan, ajum ngangken ngardi becik, nanging satak
ngingsak ayam, boncos nulung pitik puwun, tur madasar manah punyah,
dong meludih, ne keto tan nyandang tulad.
18. Sangkan sanget beli ngajumang, sakadi bawos iadi, rawose dahat utama,
adi mangguh pala hayu, beli suka madingehang, mirib adi, paragayan Sang
Hyang Dharma.
19. Sang Sugata sebet nimbal, wantah solahing sang luwih, ne pradnyan
ebeking naya, tan paling ngalih pangajum, teteh pangus ngawe suka, sang
miragi, nyusup ngawe wareg manah.
20. Jiwan tityang rasa ruwat, manuncap swargane luwih, kesah saking weci
desa, lukat bawos beli bagus, ngritis sat tirta utama, nanging jati, tityang
tambet ludin nista.
21. Inggih jwa beli puputang, ngiring marayunan mangkin, sodane alal
ngantosang, dot rayunang beli bagus, wireh sinah pacang lukat, dados
jadmi, yan sang utama ngajengang.
22. Tamyune sami ngajengang, Sang Sugata tansah ngiring, mangan tan
mamona brata, itep sambil ngrawos ditu, bawose marupe endah, pada
wagmi, mapo teleb mapo ica.
23. Sang Sugata manyorongang, kakuluban dawun anti, saha kenyir
manguningang, niki anti wastan ipun, yan niki sering ajengang, kocap
becik, doyan keman ban batara.
24. Yaning piduh rayunang, matah wyadin ratengin, punike kocap ngawinang,
mangentikang kayun luwung, sadu darma kapiwlasan, hea malin,
ngawinang teleb ring tatwa.
25. Yan rayunan tan pauyah, punike kalangkung becik, ngawinang pageh ring
manah, ngawe jenang ikacarum, yan galitik manakonang, tan kidikin,
rayunane ngawe melah.
26. Makadi Ida Sang wikan, teka gampang ngalih luwih, dawun-dawunan
ngawinang, banget nulung ngardi luwung, reh uning milih ajengan, turin
apik, tan sabarang karayunan.
27. Yan kareng ngajengan kakara, kocap tan ngawinang becik, banget ngawe
butak manah, ngejohang cedanging kayun, mangentikang budi tamah,
kirang becik, becik kidikang ngajengang.
28. Sang Subudi raris nimbal, beli banget mamisinggih, saja tuwah ajeng-
ajengan, banget ngawe hala hayu, makrana ragane waras, krana sakit,
rayunan tuwah ngawenang.
29. Yan racun bakat ajengang, awake tan wuung mati, yaning amreta
ajengang, seger waras bakat pupu, yan deeke karusakan, bareng sakit,
kenehe twara buwungang.
30. Dadaharan ane melah, ngawe kenak raga pasti, ragane waras ngawenang,
kayune manadi landuh, saking kalanduhan manah, buwin mabalik,
ngawetwang raga waras.
31. Awinan ida sang pradnyan, marayunan sanget apik, nginganin yogya tan
yogya, nyen sanggup ngajengang racun, mangden tan nyakitin manah, bes
nyejehin, yen ada bani nyanggupang.
32. Jatin nyane madan manah, ganjihan sanget ring angin, kaling tempuh
dadaharan, kudyang mangentegang kayun, bantas sanding sebeng rusak,
suba sedih, magejulan mangogah awak.
33. Ento krana nyandang yatna, pepangananne pilihin, tonden nyandang
mangandelang, ngelah kekuatan kayun, nagih ingerang dimanah, pangda
pelih, degage kaden wisesa.

34. Yan banya api pasaja, ngudyang takut nunjel cetik, nanging yan buka
gadebong, da ja pangkah ngasen teguh, degag nantangin kelewang, tulus
iding, pegat kesampwak sapisan.

35. Apak bisa ngaba awak, ngadungang ring salwir indik, kenken bahan
matindakan, ambul apa sandang suhun, teked dija malu garap, nto
ingenin, apang sukat asedengan.

36. Sedeng becik wus ngajengang, sang tapa sampun manganti, maring bale
petamyuan, sang kalih manangkil sampun, I Sugata twara belas, ugi
ngiring, pedek ring sang pangempwan.