Pupuh Kumambang : XVII

1. Pudak petak kumambang makebur tangkil, saksat dewek tityang, matur

rawuh mariki, tampen sapa lawut haras.
2. Gung aksama wangjerone matur bakti, wit teleb nyewake, satuwuk
mangiring beli, sangkan purun matur congah.
3. Sakeng warah yoga turu ituni wengi, kocap beli luwas, ninggal tityang
sareng kalih, sumadya matirtayatra.
4. Keni polih tityang matur mapakeling, nguningayang manah, kenak beli
makayunin, atur tityang igeng goda.
5. Napi luwir watek ne sampun manunggil rusak yan palasang, bilih
mangawinang mati, kadi damar upamyang.
6. Yan iminyak lascarya ninggal agni, sinah pacang rusak, makeplek suwud
mangendih, buwung hidup payu pejah.
7. Sapunika yan tityang tinggalin beli, apan wus manunggal macampuh raket
makilit, keweh pacang mamelasang.
8. Siwa lawan Batari Hyang Giriputri, Saci lawan Indra, Wisnu lawan Sridewa,
yan pasah manadi rusak.
9. Menget lupa yan pasah gumi tan kari, pateh twara bina Sucita lan Ni
Karuni, yan pasah mati dadakan.
10. Niki malih nyandang beli mikayunin, corah ngaraning dewa, tan sweca
ring anak bakti, suwud kawastanin dewa.
11. Tityang cucud sahi bakti mangastiti, nguda beli elas, ninggal tityang jumah
sedih, anak bakti tan kaswecan.
12. Yaning durus elas beli maninggalin, resja tityang ring manah, kapungkur
yan wus marabi, malih beli ngutang tityang.
13. Mangkin katiman jroning gung lulut lalis, kalingke pungkuran, ring sampun
polih ngecapin, ah takut tityang manjangan.
14. Yaning wantah ledang beli pamunguwin, mandeg nirasraya, mahadasraya
sungkemin, da ajum melas-elasan.
15. Napi lali utawi sangkaning lalis, krana las maninggal, tityang reke eman
beli, napi buktine nyanyangang.
16. Kaden cara manah tityang kayun beli, jeg beli ngaraga, ne rumasa jati
luwih, mangasorang sakendrya.
17. Mangkin tityang nguningang manah sujati, yan tityang mabrata, matapa
lan masamadi, kalih madarmasadana.
18. Wantah beli kalinggayang kapatitis, mangden makaronan, suka duhka
tansahsahi, mati hidup tuwin manyadma.
19. Wantah juwa dewek tityang nista sami, adoh yan sawangang, ring becik
alase panggih, yan beli matirtayatra.
20. Boya susun tityange nandingin, gunung halus kembar, mukanne sanget
kapencil, ring tlagane sane jimbar.
21. Matan tityang ring itunjung biru lilih, banget utamayan, ibun gadung
yujuh langit, ring legosan bangkyang tityang.
22. Yadin sampun Ida Hyang Brahma ngapikin, nyipta buntut tityang, rawuh
pupu makakalih, ngapitangne kapingitang.
23. Mirib enu banget teleb kayun beli, nuluh giying mundukan, lawut ngalikuk
ndunin, pangkung mangungsi bulakan.