Pupuh Sinom : IX

1. Kawikanan mamunahang, pangering tambete sami, sakancan laraning

jagat, yadinmala ngebek gumi, kawikanan nglebur sami, wireh wikane
puniku, panglukatan pabresihan, miwah pangentase jati, iku tuhu, sariran
Sang Hyang wisesa.
2. Jani jumunin makanda, nabdabang raga apikin, tan nyandang jeg
pragatang, reh liyunan tonden panggih, limbakang tudtudang malih, ane
jati madan cukup, pangked bisane bes katah, yan anak mabudi cupit,
cagwah purun, mastiyang ne kari samar.
3. Mrasa cukup mrasa bisa, mrasa nawang cara pasti, mrasa sakti miwah
kuwat, mrasa bagus turin sugih, mrasa tan ada nglangkungin, tur mrasa
dewek pangaruh, nto sanget ngawenang punyah, sipok kenehe
ngungkulin, meh mananjung, yan ada bani mamapas.
4. Kaduk caluh tan nyak ngandap, demen ngawe anak ajrih, nawu
ngabilbilang timpal, bedak mangdenya kapuji, seduk managih kasorin,
edot mangdennya kagugu, jele iri yan ningehang, wreta yan ada
ngalangkungin, dadi limuh, dihatine malulunan.
5. Punike dakine rahat, ngawe gering sang ngamongin, manadi keweh
nyangsara, nutug ngatut kayang mati, nanging yan tangeh sang keni, ajin
teken dadi kewuh, sahat lawut kagedyang, masrana ban ngandap sahi,
suwud ngungkul, ditu tuwah dakine hilang.
6. Yan puruk tan katangehang, deweke maisi gering, geringe buke ituniyan,
pasti tan sida mamargi, nuju katongose luwih, wireh ya nambal rurung,
luwir gunung batu pilah, ngangsel margine seripit, kija laku, tulus
ngatogor bekbekan.
7. Da enggal ngiwang matutang, saluwir unduke panggih, reh gumine suba
wayah, tuture maduk tan kidik, liyu sang katunan budi, bareng ngejotang
pitutur, ngadokang rasa didihan, tan ngadungin linging aji, twara ngitung,
wasanan sang madingehang.
8. Ento krana bagus sayang, gabahe nyandang impasin, reh yan kaduk suba
iwang, tan kidik keweh tandangin, takut miwah lek panggih, sakit hati
sanget imput runtag saha mepangenan, sangkan yan muputng indik,
timbang malu, da muputang pedidihan.
9. Sangkan muruk malokika, tutur kunane pedasin, ne mungguh ring
sastragama, pakardin sang kawi nguni, miwah bawos anak lingsir, ne
prajnyan tur darma sadu, kalih tan loba angkara, tan momo ring anak istri,
ditu luwung, tongos manimbang kakencan.
10. Reh ento mawak lokika, ne nyandang gugu sungkemin, iraga buwin
manimbang, apang marasa dihati, mangda ngilis turin adil, keni pabahane
luwung, eda cara milu bawang, sok bisa ngrambang dibibih, mangden
tuhu, ngarti tur ngrasa dimanah.
11. Keto malu ban makanda, icep anggon dasar budi, ento anggon
mangawasang, sakancan tuture luwih, miwah salwir ane panggih, apang
da bingungang pangus, da enggal meneh pelihang, reh suksma ne madan
jati, liyu lacur, pahid beneh sasunglapan.
12. Ne ada tutur utama, warah Siwa Budha nguni, ne mangge agem Hyang
Titah, karma tan liyan kadanin, krimikan manahe sami, sapolah bawose
metu, saluwir kritipan awak, ento karma kaadanin, ulih ditu, cening nampi
suka duhka.
13. Ento tuwah punyan tingkah, tan wurung mabuwah pasti, ento masih ne
mangalap, manyayangang mangemesin, ento masih ane uning, swarga
nraka ulih ditu, apa lwir ane temokang, uli karma mijil sami, twara tepuk,
yan tan karmane ngadayang.
14. Abesik tong ada ginjal, ne panggih lan ne manggihin, makejang karma
ngadakang, sangkan karmane kadalih, mawak titah dahat sakti, manitah
salwir tumuwuh, nto wates Sang Hyang Suksma, manyayangang
mangamesin, tepet nurut, kilukan karman manusia.
15. Munggwing Ida Hyang Suksma, langgeng degdeg sahi-sahi, satata twara ja
onyah, kewala ngawinang hurip, asing tingkahang dadi hurip, nganutin
karma puniku, twara nagih twara nulak, misara ring sang makardi, nyerah
lemuh, sangkan marupa kadilan.
16. Yaning pelih ban matingkah, pelihe manadi hurip, yening patute kardyang,
patute manadi hurip, yan sedihang dadi sedih, yan sukayang dadi nawu,
yening tingkahe madukan, maduk unduke kepanggih, jeg miturut, ring
agung aliting tingkah.
17. Jani bisayang matingkah, jele melahe pedasin, sakancan tingkahe hala,
keweh kadadennya pasti, sekancan tingkahe becik, manadi suka tan
wurung, tan dadi tagih lan tulak, twara nyidayang ngengkebin, sahi
ngatut, kadyageni lawan teja.
18. Sanget sulit yan tan tatas, teken deweke ne jati, ane bisa amawak katah,
tur bisa mawak abesik, muwah tan paawak uning, ento nyandang tetesin
malu, penawange apang pedas, kenken krana dadi abesik, dadi liyu,
miwah dadi twara ada.
19. Manut warah Sang Hyang Siwa, ring Ida Hyang Umadewi, miwah ring Sang
Hyang Kumara, kinucap gumine sami, tekaning dagingnya sami, nganutin
penampen kayun, yening tampi ngemusuhang, jagate dadi ngatrunin, sahi
nurut, buka twara tahen ginjal.
20. Yening dikayune sayang, gumine nyayangang masih, malih yan rasayang
katah, jagate katah nurutin, yaning rasayang abesik, bareng jagate tan
liyu, yan bakat rasayang tunggal, jagate bareng abesik, tampi suwung,
milu suwung ya ijagat.
21. Ada imba anggon ngawas, yan kenehe misi runtik, asing pehek ngedegin
basang, luhu jelanan lan kursi, bareng numpang ngawe runtik, asing katon
mwah karungu, makejang ngentukin manah, ngawewehin keweh brangti,
muwuh imput, makita onya manuhtah.
22. Yan manahe kaduk selang, jagate jeg manyelangangin, mrasa ngapus
mrasa nujah, mrasa nuba ngencak ngintip, mrasa nyandang neteh nglilig,
manut agung alit kayun, yening kaduk wawadonan, makejang nyak
marupa istri, rasa susu, nyuh ngadinge yadin iyat.
23. Ento tandaning ijagat, nurut manah tuhu jati, malahang nanak
ngirengang, apang saja kanti keni, yan ada kayun nungkasin, kadine sinah
iwawu, buwin balikin itungang, apang maan, sawur padidi, yan tan
pangguh, takonag da jag maboya.
24. Ada keneh ade jagat, jagat saking manah mijil, cingak saking Aji Sangkya,
pratiwi saking apah mijil, apah saking teja mentik, teja saking bayu metu,
bayu endag saking akasa, akasa manah ngawinin, manah pukuh, sangkan
manahe kawasa.
25. Yan dimanah mrasa ada, jagate ada nurutin, yaning manah twara ada,
jagate milu ya tusing, nanging ada unduk sulit, kakwatan kajokan lawut,
apa anggon mangadayang, apa anggon ngawe tusing, twara mampuh,
makrana u8nduke sunsang.
26. Gumine ngadakang manah, sanget ya dadi tungkalik, gumune nyiwanin
manah, krana jiwane tan kidik, jiwa babotoh pamating, jiwa bani jiwa
takut, ento makejang mamrentah, ban tan panggih ne sujati, kanti tuyuh,
prentah jiwa koti laksa.
27. Amonto malu ban bapa, nuturang panampen hati, pamuput bapa
ngaksama, mirib cara mangajahin, jatinya bantas ngortain, kadine
pangguh dikayun, cening jani malih nimbang, ne pelih lawut kutangin, ane
patut, dadi simpen tan larangan.
28. Duh ratu sang pangempwan, wacane kadi langit, bresihne tan kaguleman,
patut tan kaworan pelih, kedas tan maketel daki, nerus mamedah ring
kayun, manah tityang milu galang, lahlahin bawose suci, mugi tumus,
iratu sweca ring tityang.
29. Kaduk sami kapasukan, pangrabdan tatwane luwih, nglantur babawose
katah, sahanan tatwane luwih, sang ngiring lawan kahiring, sami prajnyan
ebek tutur, mawinan timbal tinimbal, bawose atep piragi, nyak sapahut,
lwir wrhaspati lan Indra.