SYAIR MADURA TENTANG PERJALANAN PANJANG MANUSIA

Kaule ngarang dek si iran

se aesse parengattan,

ka anggui engak dek pateh

salanjengah mak ngasteteh

2. Ateh sopajeh apangrasah ben tak ngalakonih dusah, sabeb manossah e dunnyah odik sakejjek
zemannah

3. Dek allah wajib abekteh siang malem sampek mateh, qur'an ampon nerrangagi allah se
adebuaghi.

4. Bumih ngolok sabben areh sapolo kaleh sa areh, tak bu ambu lok olokan sabben areh ros
teroosan.

5. Sampek dek areh kiamat ancorrah alam ben ummat, kocaknah bumih makeleng anak adem eleng
eleng.

6. Anak adam ateh ateh tak burung be'nah se mateh, tadek oreng lopot mateh lakoh dusah jek
toroteh.

7. Esang tengga len jelenan e sang tabuk bik dibi'en, tadek oreng tade' beleh delem kobur oloh
dejeh.

8. Esang tengga nga'bunga'an esang tabuk nga'lenga'an, bunga nganggui bennyak artah mon tak
bender bekal kastah.

9. Esang tangga ngakan lemmak esang tabuk ngakan olak, esang tengga ademaran esang tabuk
apettengan.

10. Anak adem koduh ngarteh asareh sangonah pateh, pateh nikoh tak e panggi lajuh deteng tak a
jenjih.

11. Maddeh pabennyak atobet de'ka dusah se kalebet, ocak tengka padeh rassa ajeuih derih dusah.

12. Bebeles oreng derekah e cabbur dekka narakah, sossa pagik tak agunah bileh e potos salanah.

13. Sossa pagik tak agunah bileh e potos salanah, ilmoh syara' nikoh sareh len jelan bileh pon mateh.

BAB PACOBENAH SETAN DE'KA ORENG SAKEK SANGET

1. Bileh nyabeh pon ededeh kastah ampon padeh bedeh, bileh depak ka gerrungan setan asareh
kennengan.

2. Setan nyobeh apah ropah nyopre oreng se noro'ah, bedeh aropah embuk nah bedeh aropah eppak
nah.

3. Acem macem panyobenah ondur deteng cek bennyaknah, bedeh aropah kancanah deteng nyobeh
cek maksanah.

4. Bedeh aropah gurunah sopajeh norok debunah, allah allahu ya allah de' setan nyo'anah raksah.

5. Tak etemmuh padetengngah lajuh bedeh e seddi'anah, kantah oreng cek getengah lemmak manis
pangucaknah.
6. Setan alos patanyanah se sakik e dimmah ennah, marah dulih pas kabele sengkok aberri'eh
tambeh.

7. Tambeh aing cek benningah kapanyaket cek mandinah, aing areah tambenah gerrungan pelkak
rassanah.

8. Libeliyen pangocaknah sambih maksah cek getenah, neng e dintoh kennengennah palang pojur
antaranah.

9. Oreng se palang ocaknah kauleh parengih aingah, kauleh pelkak kauleh lapar arassah kauleh tak
kellar.

10. Setan ngocak aing riah dek beknah pas e begiyeh, asal beknah norok ocak tak burung pas mareh
pelkak.

11. Allah duek benni sittung marah norok makle ontong, alam riah bedeh dibik tadek oreng se nga
andik.

12. Muhammad riah onggunah oreng se lecek ocak nah, ben pole benni utusan coma oreng dujen
ngakan.

13. Reng se palang ben calaka' terros nyambit torok ocak, tak oning jek setan nyobeh sanggu taretan
ben beleh.

14. Setan nyobeh cek bunganah agelle'en ben berrengah, bileh norok dek oca'nah iman lepas ben
gemanah.

15. Sabeb pon anyamah mongker dek allah patenah kaper, e narakah kennengennah kaseksah tadek
ambunah.

16. Oreng se ontong ocaknah dekka setan pangocaknah, beknah riah lecek onggu congocoh tak
gellem ambu.

17. Aing e bueng beddenah serta car kacer katana, setan lajuh nyimpang onggu tak kasa'an sambih
buruh.

18. Genikoh oreng se bejreh tak norok setan se nyobeh, oreng saber dekka cobeh kenengennah e
soargeh.

19. Soargeh nikoh bungkonah reng se begus lalakonah, ya allahu ya robbana ighfir likulli dzambina.

20. Lamon terro salamettah ambu se alakoh dusah, patakok jubek e budih e akherat mak tak rogi.

21. Pole dek beleh tatanggeh jek nganggui ateh sangajeh, anah pole ahli fitnah tak salamet di
budinah.

CARETANAH ORENG MATEH

1. Caretanah oreng mateh sopajeh padeh ngarteh, pateh nikoh dibudinah dek akherat pamolenah.

2. Mayyit pon e pakaluar derih roma dekka langger, belenah ben taretannah akompol se
mandi'ennah.

3. Bedeh se negguk tanangngah bedeh se ngosap kolek nah, bedeh se negguk seranah bedeh se
negguk sokonah.

4. Mayyit acerreng atowat ajem ngiding pas akotak, bileh mareh e pandi'ih e bunduk labun se pote.

5. Terros e tale'eh tellok sokoh cetak sareng tabuk, mayyit ngocak ben tangisseh suaranah cek
mellassah.
6. Jek tale'eh muah buleh ngabesseh anak ben beleh, sabebbeh buleh sanontoh dibudinah bedeh
dintoh.

7. Sanontoh buleh pon depak tapesa beleh ben anak, aduh taretan sadejeh anak potoh jek sangajeh.

8. Nyo'onah pateppak agi mon sala pa enga'agi mon sala pa engak agi, bileh mareh sholat agi
mayyit nangis ngocak pole.

9. Buleh sanontoh pon mateh pon tak bisah odik pole, buleh nyo'onah dek dikah sabben wektonah
jek loppah.

10. Pas bedeh soarah ngocak tengateh beknah lah parak, apesa'ah ben bininah reng tuanah ben
potonah.

11. Marah amit dek potonah jek sengkok la ajelenah, bileh mayyit pon e pekol esabek e lencak
bungkol

12. Mayyit nangis ben ocaknah demmi allah mon sompanah, adu taretan sadejeh sanontoh buleh
mangkateh.

13. Terros amit dek potonah sarengngan dek tatanggenah, tengateh beknah satiah apesa'ah ben reng
tuah.

14. Gen satiah dibudunah sengok atemmoh ben be'nah, tak bisa atemmoh pole saterrossah tak
ningaleh.

15. Bileh ajelen se ngibeh tello kaleh patendeggeh, pas ngocak pole mayyitteh hewennah ngiding
sadejeh.

16. Sambih nangis pangocaknah mellasagi suaranah, aduh anak ben lebeleh pa engak dikah dek
buleh.

17. Sengak kacong jek tokaran sataretan jek rebbu'en, apah se bedeh kembulih jek bedeh se
ngadibi'ih.

18. Jek palebur nompok dunnyah jek loppah dek pangirannah, marah sengkok gebei tandeh andik
dunnyah tak e kebeh.

19. Belik pabennyak du'anah dulih tobetih dusanah, ben pole be'nah jek loppah sabben jum'at
asadekah.

20. Sanajjen nasek sa leper dek sengkok jek sampek ceccer, apah sabben Dinah tantoh sengkok
tambe bunga.

21. Bileh mayyit ampon depak dek penggir kobur e sabek, acerreng mayyit tangiseh mellasagi sanget
sossa.

22. Sambih ngocak duh taretan tatanggeh ben kan ponakan, be'nah kabbih jek paloppah adu'a' ben
asadeka.

23. Sengkok riah dibudunah se ngabes muanah be'nah, pas terros mayyit e sabek delem kobur lobeng
landek.

24. Samarenah e topoeh mayyit jegeh odik pole, lamon ontong parobbunah teppak pole
kenengennah.

25. Sabeb mosteh epareksah derih sadejeh amallah, marenah talqin e becak se mayyit atambe sossa.
26. Pas bedeh malaikat deteng aro'oman ropah genteng, nikah aruman nyamanah sanget alos
patanyanah.

27. Depak dek mayyit makeleng mayyit anyar eleng eleng, marah pas toles amallah jube' becce' jek
pasala.

28. Ajeweb tak andik mangseng copanah kagebei mangsen, ajeweb tak andik kallam onjuknah
kagebei kallam.

29. Mayyit noles cek lerenah sambih ngitek cek takok nah, mayyit noles ampon mareh mon tak sossa
tak reh mareh.

30. Lajuh ngocak malaikat marah bukunah pas eccap, mayyit ajeweb ocak nah tak andik pangeccap
ennah.

31. Jeriah pokoknah be'ah eccapagi ka bukunah, deteng pole duwek oreng benakirun cak nah oreng.

32. Mungkar ben nakir nyamanah sanget nako'eh ropanah, oreng duwek dekka mayyit reng
mancoreng.

33. Berrit onggu abessennah sertah gerimis bulunah, bileh ngocak colok rabek akantah geddeb ben
kelap.

34. Celleng lorek mon robenah tor sanget tanjem siongah, patanyanah cek kerrasah dekka mayyit cek
benggiseh.

35. Mon be'nah sala jewebbah tak burung be'nah e gedeh, sapah be'nah pangirannah ben sapah
be'nah nabbinah.

36. Ben sapah pole imamah ben qiblattah be'anah dimmah, qur'an riah derih sapah marah jeweb jek
pasala.

37. Ajeweb allah robbuna muhammadun nabiyuna, wal qur'anu imamuna baitullahi qiblatuna.

38. Qur'an nikah kalamullah epatoron neng e mekkah, malaikat ngocak pole marah tedung be'nah
mareh.

39. Papadeh be'anah se tedung ben komantan se on laon, mayyit tedung cek bunganah lopot derih
kaseksanah.

40. Tandenah genikoh bejreh e dunnyah ben e kobureh, bileh ontong kobur jember alebbiyen derih
demar.

41. Sabeb terak saterrosah e kobur tak nemmoh sossa, namon sala pangocaknah pas e pettong ben
gedenah.

42. Be'nah riah reng derekah deddih essenah narakah, bileh depak duwek kaleh car kacer tolang se
pote.

43. Tolang deging leddes kabbi e pokol tak e ambuih, tangisseh pon rajeh kenik akantah munyinah
embik.

44. Maddeh buleh tolong agi matah duwek ngantol kabbi, rajah onggu mon gedenah saperteh gunong
rajenah.

45. Mayyit mator ben serronah abeliyeh dek dunnyanah, e to'ah parentanah e jeuennah larangannah.

46. Lajuh ngocak malaikat be'nah riah oreng jahat, oreng cengkal oreng pengko alakoh dusah
maloloh.
47. Arassah kastah satiah bileh kaluar otekkeh, edunnya tak apangrasah jek bekal naremah seksah.

48. Be'nah la depak temponah bebeles kalako ennah, ben be'nah buruh partajeh bileh bedennah e
gedeh.

49. Aduh taretan sadejeh maddeh pabennyak tobeddeh, ajeuih tengka sala di budinah mak tak kastah.

50. Seksah kobur gik tak rajeh e tembeng seksah narakah, ya robbana ighfirlana dunubana
khotoyana.

BEB CARETANAH ROH AMIT DE'KA ALLAH KA ANGGUI NINGALEH

MAYYIT E KOBUR
1. Sa amponah tello areh erroh amit aduh gusteh, nyo'onnah idzin dek kobur ninggueh beden se
ancor.

2. Terros pas mangkat erronah sambih gencang pajelenah, erronah ngabes derih jeu dek beden se
ampon beuh.

3. Elong colok gegger dere erroh nangis e pakajeh, sambih ngocak dek bedennah apah engak dek
dunnyanah.

4. Engak engak beden sengkok ariah kennengan takok, ben pole kennengan sossa padeh bedeh
sossa kastah.

5. Bileh depak lema areh ka kobur pas entar pole, erroh ngabes e jeunah beden pon bennyak
olaknah.

6. Olak ngakan dek degingah beden akareh tolangah, pas nangis pole erronah cek mellaseh
suaranah.

7. Sambih ngocak dek bedennah aduh be'nah mak pas enah, aduh palang aduh palang deging
gemmet kareh tolang.

8. Aph be'nah riah engak e dunnyah beleh ben anak, anak potoh ben taretan tatanggeh ben kan
ponakan.

9. Bileh depak dek wektonah tellasan duwek wektonah, pole e lailatul qodr panaggelen pettolekor.

10. Bulen asyuro' ben rejjeb tengnga malem mareh maghrib, ben malem jum'at salasah erroh deteng
sartah sossa.

11. Terros entar dek bunkonah neng enneng e beng labengah, sambih ngocak dek potonah sengkok
parloh dekka be'nah.

12. Sopajeh bennyak sadekah asadekaeh reng toah, sapah pole se e nga'ah mon potoh se neserrah.

BAB CARETANAH KIAMAT

Bileh marenah kiamat alam rosak klaben ummat, ummat jegeh derih kobur akantah komak e tabur.
1. Tak padeh ropah bedenah acemmacem pajegenah, e paberis sadejenah du belles macem
bernanah.

2. Berisen se nomer sittung sokoh tanang adeh buttong, genikah oreng tandenah se nyangka'an
tatanggenah.

3. Se kapeng duek macemmah ropah motak berisennah, tandenah loppah sholattah enteng rukun
ben sarattah.
4. Bedeh aesseh tabuknah olar kalah cek bennyaknah, panikah macemmah ummat artanah tak e
kazekat.

5. Rassa eman dek artanah tak mekkereh dibudinah, sanajjen depak enggennah sanisab nikah
bennyaknah.

6. Bekal possak e tabuknah olar ben kalah seksanah, ummat se palang abe'nah agemanah e porop
dunnyah.

7. Bennyak onggu macem nikoh juel bellih nganggui tepo, loppah dek hokomah allah pokok
senneng makeh dusah.

8. Bennyak pesse bennyak artah tak merker seksah narakah, kapeng lemak berisennah agili dere
coloknah.

9. Sartah acmporan nana ngolpa kaluar jilenah, genikah seksanah kaom ulama' tak norok hokom.

10. Loppah dek jelenah dusah ocak tengka tak eraksah, kapeng ennem berissennah possak ben lokah
bedenah.

11. Kaluar dere ben nana apoi ngellok cek deddinah, genikah macemmah seksah nyakse'eh oreng se
sala.

12. Pokok nga olle sogo'an bereng harom se e kakan, parkarah bender pas salah tak mekker jek
deddih dusah.

13. Kapeng petto berisennah abecengngan mon beunah, sokoh duek e tale'eh dek cetak e birikeddih.

14. E beris sadejenah saberengngan dek bidenah, panikah oreng tandenah norok kareppah napsonah.

15. Kapeng belluk berisennah reng binik beceng farji'nah, serta e selenih tema kaluar dere ben nana.

16. Agili tadek ambunah palang onggu reng azina, seggut norok oreng laen tak taoh rassa akabin.

17. Pokok ningaleh reng lakek genteng sogi kek nyalekek, kapeng sangak berisennah padeh celleng
mon muanah.

18. Cellengah akantah leceng matah duek reng mancoreng, sertah edelem tabuknah esseh apoi cek
bennyak nah.

19. Panikah oreng se dholim ngakan artah anak yatim, berisen kapeng sapolo bedennah lokah
maloloh.

20. Sartah buccok cek becengngah e papolong ben berengngah, panikah oreng tandenah se Bengal
dek reng tuanah.

21. Tak norok dek parentanah apesoan lalakonnah, kapeng sa belles seksanah jile ngolpa gen
tabuknah.

22. Sertah kaluar perroknah lek ngalelet gen gen sokonah, panikah oreng calakak nginoman sajen
ben toak.

23. Sabben areh aminan nopeh soling ben tabbuen, kapeng dubelles berissen aropah patek alas an.

24. Panikah macemmah seksah ngakan ribe saterrosah, kolakoennah maotang serranah ngalak
tambe'en.

25. Se dubelles sadejenah kanarakah pamolenah, kennengennah oreng kastah reng calakak rajeh
dusah.
26. Akibet dusah matenah tak atobet sabellunnah, yaa robbana ighfirlan dunubana khotoyanaa.

BEB CARETANAH ORENG SE BEDEH E DELEM NARAKAH

1. Kacator oreng derekah e cabbur dekka narakah, bedeh masok dek jehennam kaseksan
amacemmacem.

2. Biasah oreng narakah aobe sadejeh ropah, mitorot kalako' ennah wektoh odik neng e dunnyah.

3. Bedeh matanah mancellong tabuknah akantah gentong, seksanah oreng derekah tak the mateh e
narakah.

4. E kekke' olar ben kalah ngakan apoi saterrosah, cetakkah aropah celeng sambih nangis areng
cerreng.

5. Sokoh tanang e pasittong serta e tette e pentong, tak bu ambu siang malem eret eret e panyellem.

6. Ereng cerreng panangiseh tadek oreng se ngangkessah, acerreng tadek parlonah arassah lapar
tabuknah.

7. Lok olokan long tolongan mintah kakan ben inoman, arassa kottong perroknah aesseh apoi tabuk
nah.

8. Gerrungan pelkak rassanah tadek aing e enommah, nyo'on tolong nyareagi aing ngimon pareng
agi.

9. Sanget tak kellar bedenah dek narakah ben seksanah, apoi dunnyah cek cellebbeh etembeng apoi
narakah.

10. Reng narakah nyo'on ojen areng cerreng atangisen, lajuh deteng mon indemmah pas langkep e
attasennah.

11. Ondem kandel cek deddinah akantah aspal cellengah, reng narakah padeh bunga ningaleh ondem
ojenah.

12. Pas deteng pole ondemmah tambe abesennah, reng narakah kaperagen padeh ngocak
saberengngan.

13. Panikak ondem pon petteng tantonah pon parak ojen, lajuh magegger ondemmah ojen olar cek
bennyak nah.

14. Padeh ngikkek cek mandinah sa ebuh taon sakek nah, palang onggu reng narakah les belessa
reng derekah.

15. Norodih hewe nafsonah lakoh jubek e dunnyanah, oreng narakah anyo'on zeman pettong polo
taon.

16. Nyo'on tolong kauleh gusteh sopaje'eh e pamateh, tak kellar kauleh e seksah e narakah cek
panassah.

17. Tadek nyambit sittung oreng dek suarah se acerreng, lajuh deteng kaseddik nah malaikat malik
nyamanah.

18. Engak engak reng narakah apah beknah se e pentah, satiah gik buruh kastah bileh ngarassaeh
seksah.

19. Be'nah riah oreng jahat dek allah tak gellem toat, rassaeh seksah ariah allah nyiksah oreng sala.

20. Lajuh ngocak sadenah sambih takok ka robenah, kauleh pelkak kauleh lapar arassah kauleh tak
kellar.
21. Kakanan pon samacemmah ben inomah sarobennah, aduh gusteh aduh gusteh lapar pelkak tak
reh mareh.

22. Tolang ancor kolek lessa e kakan apoi narakah, pas lajuh e berrik aing aingah narakah jehim.

23. Aingah riah pas kalak mak ambu be'nah se pelkak, jeriah nom inomennah reng narakah
sedejenah.

24. Reng narakah padeh nginom sartah ngakan kajuh zakkum, rassanah sanget paeknah tor adurih
cek tajemmah.

25. Reng narakah sabben areh dek allah anyo'on mateh, sabbeb tak kellar ka seksah enarakah cek
panassah.

26. Aing pon depak ka perrok padeh ancor ateh perrok, reng narakah nangis kabbi acerreng las
mellas agi.

27. Palang onggu reng derekah kennengennah e narakah, yaa robbana ihgfirlana dunubana
khotoyana.

BEB CARETANAH ORENG SE BEDEH E DELEM SOARGEH

1. Kacator oreng se bejreh e pamasok ka soargeh, sanget terak mon muanah lampettah wudlu' e
dunnyah.

2. Malaikat padeh ngapeng dek soargeh padeh ngireng, bebelesseh reng salamet e dunnyah ben e
akherat.

3. E dunnyah ahli atoat siang malem lakoh sholat, lakoh jubek e jeuih lakaoh begus tak e ambuih.

4. Sanget takok ka pangiran sarta atorok utusan, angguyeh oreng suargeh eman berlian sadejeh.

5. Manok burrok tumpak ennah sabben areh cek bunganah, empak polo bidedderih wilden aladin
ben areh.

6. Suargehtak ka korangan nom inoman ben de'eren, sadejenah wek buwe'en padeh bedeh tak
cecceran.

7. Sadejenah wek buwe'en padeh bedeh tak cecceran, yaa robbana ighfirlana dunubana khotoyana.

8. Wahktim lana a'malana bissholihati wardlina, sabbits lana imamuna darossalamitkhullana.

BEB SYARATTAH ORENG ATOBET

1. Kaom muslimin muslimat toreh pabejeng atobet, caranah oreng atobet koduh agenna'ih syarat.

2. Syarattah tobet pak empak sebbutten e bebe gennak, se kapeng sittung syaratteh panikah abe'nah
kastah.

3. Derih sadejeh dusanah se pon kalebet zemannah, se kapeng duek nah syarat abe'nah koduh
ameccat.

4. Dek dusah niat ambueh alakoh jubek jerre'eh, se kapeng tellok nah syarat abe'nah koduh aniat.

5. Tak bekal alakoh pole e zeman se e addebbih, syarat se kapeng empak nah koduh lebberen
abe'nah.

6. Derih haq geh anak adem ben asaporah dulien, se empak syarattah kabbi panikah koduh
genna'ih.
7. Lamon tak nyokopeh syarat tak anyamah reng atobet, yaa robbana ighfirlana dzunubana
khotoyana.

TAMMAT
1. Gen kak dintoh hatam syi'ir tolessennah reng se faker, tor oreng se sanget enah sabebbeh
bennyak dusanah.

2. Se noles syi'ir panikah aminullah mon nyamanah, tarasak nikah bungkonah larangan
kacamatennah.

3. Kauleh nyo'on dek taretan sepadeh maos syi'iran, lamon bedeh kasala'an beca'an sareng tolesan.

4. Obe' agi dek se bender ben kauleh sanget asyokkor, sefat lopot sareng loppah tak ceccer derih
manossah.

KARANGAN ( Almarhum KH. AMINULLAH allahu yarham amin )