Cherita Pandak : WONG NABAU

Dikarang:Hillary

Diseruri:Jeniffer"P"

(cherita tempa aja nadai sangkut paut enggau urang ke udah mati tau ke agi idup) (nama Wong Nabau
tu sigi gaga aku empu nadai ngambi ari menua siti-siti tau ke ari cherita urang bukai)

"Berani amat kita lepak ditu jang,aku selalu ninga urang madah meda antu jengka jengka ba simpang
tiga tu jang ku apai tuai siku mansa sida ngena motorsikal.

Sida lima enda ibuh ke jaku apai tuai nya majak kediri main telipun ba tisi jalai laban ngulih ke line
internet laban ke main games Mobile Legends Bang Bang.

Chapuh sida lima nya ke main ba tisi jalai jam maya nya kira ke udah pukul 11:47 sida lima nya majak
main games.

"Lan bisi nyium utai bau but dek Lan ku Ujau nanya Jilan.

"Nya mih Jau bau mat utai tu sium aku nyau bau bangkai ke udah mati tujuh ari ku Malung dulu nyaut
Ujau.

Rinchat gining-gining ngiga ari ni utai ke bau but nya bendar iya ngiga nadai ga meda bangkai utai ba
sebelah nya.

"Lung uji dek meda ngagai ujung jalai nyin nama utai ke jengka jengka ba ujung jalai nyin, ku Simon
sereta nunjuk ke utai jengka jengka datai ari jalai Semingan.

"Mon urang madah bisi pendam melayu ba jalai Semingan nya ku urang tuai,pendam lama bansa melayu
ku Ujau madah ke Simon.

Sida pan lalu alah main laban Malung, Simon Ujau, Rinchat ke ati meda utai ke jengka jengka nya pedis
ati tudah Jilan iya lalu angkat ari penuduk iya lalu ngambi kayu kira bisi mesai lengan anak mit mih panjai
kira ke bisi dua kaki.

Jilan pan lalu bejalai nuju utai ke jengka jengka nya datai ba utai nya dia iya lalu maluk utai nya ngena
kayu ke bai iya nya.

"Mua baka dek tu ke selalu ngachau urang ba jalai tu ditu mua baka antu, Ku Jilan udah iya ke maluk
antu jengka jengka nya dia iya lalu numpuk antu nya ngagai parit.

Nyau lakak lakak antu nya ba parit ka angkat enda ga ulih laban ke balut urang ngena kain burak nyau
kual-kual tudah antu pocong nya laban Jilan, Jilan pan lalu mulai ke diri ngagai sida empat nya mulut
enda ngetu nyumpah penyumpah.

Sida empat nyau enda bepesap meda ulah Jilan ke nyamah antu pocong nya, amat berani dek Lan
nyamah antu jengka jengka nya. "Ku Simon bejaku enggau Jilan.
"Nadai guna antu nya nyau turun Ranking aku laban antu nya kitai ka mati-mati ka niki ke Ranking iya
enggai enda ayan dia ku Jilan bejaku ati Jilan enda ibuh sebut agi naka pemedis laban mimit da gi ka
menang tadi.

Sida lima pan lalu pulai ke rumah tumu pagi nya dia dah sida Budat sebilik begau meda mua Budat ke
nyau biru kin kia tubuh Budat nyau madai baka ke udah kena palu urang.

Chapuh sida serumah meda pendiau Budat ke baka nya tubuh abis biru mata kembai sepiak baka ke
kena bukut urang kening nyau mengkul mesai lengkuan anak mit.

"Kini ke dek demalam dah Budat..?ku tuai rumah Ginga nanya Budat.

"Nya mih tuai aku demalam baru pulai ari pasar tang enda memukai dia dah bisi urang tiga iku kemari ba
simpang tiga dia ngipa aku lalu minta duit ba aku, aku madah nadai duit nya mih aku kena jamah sida
nya nasib ga aku bisi belajai kuntau ba niang Aki Jaban suba enti enda pia mati aku laban sida tiga nya iya
ga besai tubuh iya. Ku Budat sereta iya merening ngagai Jilan

Sida Jilan, Simon Ranchat, Ujau, Malung ke duduk ba ruai sida Simon,nyadi Simon tu anak tuai rumah
Ginga, sida lima nya tuchum lalu malik ke tisi enggai ke berupai peda Budat tuchum ke iya.

"Iya nya ke nyadi antu jengka jengka ba simpang tiga nya neh sepi asai dek kena belasah Roger demalam
ku Simon bejaku enggau sida empat nya.

"Kumbai iya Roger enti udah level 15 ku Ujau nambah ke jaku Simon. Sida lima pan lalu ketawa semina
ke enda dinga urang bukai sida lima nya ke berandau.

"Ila sepi asai kita lima enti aku malas ila lebih agi dek Jilan bedau dek nemu aku anak murit Aki Jaban aku
tu bedau kita lima bedau nemu aku, sapa ku Budat bejaku dalam ati chukup pedis ati tudah tuai laban ke
udah di tumpu Jilan ngagai parit demalam.

"Dat bansa nama urang ke nyamah dek demalam Dat uji padah ngagai kami lima bedau sida tiga nya
bedau ngelala Simon tu sida iya, Rimbo pan takut ke aku lebuh kami ke serang bala Jipun suba, ku Simon
lalu ketawa ke siku nya.

"Nya mih Mon aku enggau sida niang aki Entelaban suba lebuh ke ngayau ngagai menua munsuh nyau
pambar bala munsuh lari ke aku, ku Ranchat enggai alah laban Simon.

"Enti ka becherita anang kelalu bula uchu bedau kita ninga cherita kami ke tuai tu lebuh aku agi bujang
kelia, maya nya aku enggau niang apai kami Ligun nginti ba pala Wong Nabau dulu dia pemuas kami duai
apai nginti,dia dah enda memukai ular Nabau siku pansut ari ai Wong nya lalu enda chechamang tak lalu
ka nagup aku uchu.tang laban maya nya aku agi kering uchu tak ruyah ke aku nyawa ular nabau nya
peda nyau belah dua nyawa ular nabau nya, nya mih nyau sekayuh menua kitai ditu bisi mih ampit
makai mangkai ular nabau nya uchu.ku Aki Unchau becherita laban ke enggai alah laban Simon enggau
Ranchat.

Bala urang ke bisi ba ruai dia nyau chapuh madah ke Aki Unchau bula, enda lama pansut Aki Unkil tau ke
Aki Manang Unkil.

"Enti dek enda nemu cherita Wong Nabau nya, anang nempa cherita ngapa dek akih.enti dek ka nemu
cherita Wong Nabau nya lagi aku becherita ke kita.ku aki Manang Unkli ke baru datai sereta ka duduk.

"Cherita ke dia mih aki. Ku Simon nyaut aki Unkil

bala sida serumah pan lalu duduk sema Aki Unkil tuai rumah Ginga pan lalu enggau bala rayat ita ninga
ka cherita aki Unkil, nadai memuyi agi semina ukoi enggau bala manuk ke bisi bemunyi laban sida ke
deka ninga ke cherita aki Unkil, Aki Unkil pan lalu ngatur penuduk iya manah.

"Munyi tu ku cherita nya kelia uchu lebuh maya nya urang ba menua kitai tu bisi tujuh buah rumah
panjai nguam menua kitai tu ditu maya nya sida ke diau ba menua tu agi ngena perau uchu ukai baka
kitai ke diatu udah datai Jalai. Ku aki Unkil.

*********
Cherita Aki Unkil

"Nyadi dulu kelia ba menua tu bisi tujuh buah rumah panjai nguan menua tu ditu sida ke betuai Sibat,
Mandau, Nanan, Julung, Kambau, Changat, Balan nyadi sida tu diri menyadi lalu Balan tu menyadi tuai
sida lalu megai menua nya lebuh menua ke agi siga bala menyadi enam iku nya mega sigi urang ke
beberita jelai nama.

Balan tu sigi tuai kayau ti chukup tebilang enti lebuh iya matak serang enda kala pulai puang bala sida tu
semadi,bala munsuh enti ninga nama Changat Biau Balai, Sibat Batu Nyadi, Julung Besi Mansau, Kandau
Antu Gerasi, Mandau Remaong belang, Nanan Bujang Nunang lalu Balan Raja Belalang, sigi takut bala
munsuh.

Enti sida tu nurun ngayau bala antu enggau jelu sigi enda berani mansut ke diri ba mua sida tujuh nya,
laban sida tu enti lebuh nurun ngayau utai idup jelu, antu tau ke mensia nama mansa sida sigi dibunuh
sida magang laban enggai ke ngachau pejalai sida tau ngasuh pejalai sida balang tauka rumbau.

Menua Batang Langir tu sigi tebilang nama laban sida menyadi nya, ku sida niang aki nusui ngagai kami
kelia enti nyema Balan Raja Belalang tu ka ngemai bala ba menua tu matak kayau besai.bala burung
enggau bala jelu babas sigi tiga bulan dulu udah lari laban ke takut kena pansa sida Balan ke nurun
ngayau.

Pun cherita sida wong nabau

Lemai nya Balan Raja Belalang pan lalu ngemai bala menyadi iya enam iku nya baum ba bilik iya empu,
pengudah bala menyadi iya datai magang dia dah Balan lalu ngepun ke randau sida tujuh.

"Nyadi aku ke ngangau nesau kita enam ngagai bilik aku kitu, laban bisi utai ke deka kerandau aku
enggau kita ku Balan ngepun ke randau sida tujuh.

"Padah ke dia mih aka enti dek mai ngayau mulau awak ke kami sedia, enti dek ngemai kami ngasuh
ngambi ke kami bekemas besimpan ke laja bebai ke sumpit enggau sangkuh ngambi ke bisi kena munuh
jelu ku Nanan bejaku nyaut Balan.

"Bakatu ku iya bala menyadi kitai tu sigi tebilang tampa rita jelai nama, amat kering enggau berani kitai
tujuh, enda bula kitai tujuh tu berani enggau kering abis menua munsuh udah alah ke kitai semina
menua sebayan enggau menua petara aja ke bedau kayau kitai laban kitai tu nadai kuasa ajih nya alai
kitai enda ulih ngelaban sida tang enti menua sebayan bedau temu. Ku Balan bejaku enggau sida tujuh
nya.

"Enti munyi nya kira ke deka mai kami ngayau ngagai menua sebayan kin mih dek tu aka, ku Kandau

"Ukai enda aku ngemai kita ngayau ke sekali tu, aku deka ngemai kita belelang ngagai menua Teritik
Ujan Nyala nya menua setangah mensia setengah petara. ku Balan bejaku enggau sida enam.
Ninga nama menua nya menua Teritik Ujan Nyala sida enam nya beperening pangan diri laban menua
nya sigi mayuh bunsu petara ke nguan menua nya.

"Iya nama utai ke deka ambi kitai kin dah aka..? Ku Sibat nanya Balan.

"Enti kita deka nemu ba menua nya bisi indu tujuh iku diri menyadi, ukai semina mensia ke deka ngambi
sida nya ke bini bala bunsu antu bunsu jelu deka ngambi sida nya semadi nyadi ke bini magang.nya alai
aku deka ngemai kita nguji kin engka tak nasib kitai tujuh kini.ku Balan. Madah ke sida enam nya.

"Iya sapa nama sida nya dah aka..?ku Sibat majak nanya laban siku nya semua utai deka temu iya
magang.

"Nama sida nya Lenta, Bulan, Jawai, Milai, Chala, Sawai Bungai enggau Ringi, nyadi semua sida semadi
bisi ngemuan Ajih kediri empu pemajik enda ibuh sebut sigi bajik nama dah setengah mensia setengah
petara nya alai aku deka mai kita nguji ke nasib engka kitai tujuh tu dipilih sida nya semadi ila. Ku Balan
ngapus ke jaku iya.

"Enti munyi nya ukai ka setuan dua mih kitai tu ke deka belelang aka, ku Sibat bejaku enggau bala sida
nya.

"Amat ku dek nya adi nya alai aku deka ngemai kita berandau ditu,laban aku deka ngemai kita ngiga
urang ke ulih andal ke kitai tujuh nyadi tuai ke nyaga menua kitai tu semetara kitai tujuh tu belelang. Ku
Balan madah ke sida enam.

"Nyadi aku sigi udah bisi urang ke ulih pechaya ke aku, ku Kandau madah ke Balan.

"Nyadi kita ke bukai dah ku Balan nanya sida Sibat, Mandau, Nanan, Julung, Changat.

Sida empat nya semina nagun ke pala tanda udah bisi urang, semina Mandau aja bedau bisi urang ke
ulih pechaya tambah gi rumah Mandau tu jauh ari sida nya kira ke bisi tiga batang insap daun gentuk
mih pejalai kaki ngagai rumah Mandau ari sida ke bukai.

"Lapa dek enda memunyi dah adi..?ku Sibat nanya Mandau.

"Nya mih aka aku beruding baka ni aku ka ngiga urang ke tau nganti penuduk aku enda lama laban bala
aku nadai ulih karap, bala sida ke tuai nyau ga kelalu tuai sida ke nembiak bedau temu empa. Ku
Mandau bejaku enggau bala menyadi iya ke bukai.

"Anang tusah ati dek adi lusa ngiga bala sida ke nembiak, iya ke ulih andal ke dek anang kelalu mayuh
kira ke bisi lima iku chukup. Ku Balan bejaku enggau Mandau.

"Nama kebuah dah aka..?ku Mandau nanya Balan.

"Kitai tujuh ngemai sida nya ngayau ngagai menua Bukit Telajan kin, din agi mayuh munsuh kitai ke diau
ba menua nya nyadi kitai deka mai sida lima nya ngayau kin.kami enam semina ngemai manuk sabung
kami siku aja enggau kin enggai ke sida lima nya enda telaban ke munsuh din. Ku Balan nyaut Mandau.

"Au mih aka pulai lagi aku milih bala nembiak ke ka bai kitai kin, ku Mandau madah ke sida nya.

Sida pan sama mulai ke diri, Mandau lalu merau kili kin datai iya ba nanga sungai siti dia iya bisi meda
nembiak iya siku ke benung ngabas bubu.

"Ohhh.Jat bisi bulih..?ku Mandau nanya Kujat.

"Bisi ga tuai ikan keli ke mayuh ulih, pia ku Kujat nyaut Mandau.

Kujat tu kira ke baru berangkat bujang diau enggau apai enggau indai iya lalu bisi menyadi indu siku ke
tuai ari iya.

"Jat ka dek enggau aku lusa..?ku Mandau nanya Kujat.

"Kini bai dek tuai..? Kujat nanya Mandau baru.

"Ngayau ngagai menua Bukit Telajan kin kitai enggau sida aka Balan, ku Mandau madah ke Kujat.

"Nadai nya beleman dah tuai pemai dek aja aku tu kini ke bai dek nitih aja aku, ku Kujat nyaut Mandau.

"Au mih Jat lagi dek madah ngagai apai enggau indai dek lagi padah ke aku ngemai ngayau, ku Mandau
ngasuh Kujat madah ngagai apai enggau indai iya.

Mandau pan lalu bekayuh pulai kili kin datai ba rumah panjai dia iya betemu enggau Gelang ke benung
deka mandi ba pendai Mandau pan lalu nanya Gelang baka iya ke nanya Kujat tadi.

Gelang tu baru pulai belelang ari menua Payah Mati nya alai Gelang tu nyau jauh kering ari bala nembiak
bukai ke serumah enggau Mandau dia.

"Kati udah regas dek Lang..? Ku Mandau nanya Gelang.

"Udah ga tuai nyau nyamai mimit isi enda baka ke baru datai suba.ku Gelang nyaut Mandau.

Lebuh siku nya ke benung melakang ke iya dia dah Mandau nyintak ilang iya ka agi tangkin iya ari tadi,
enda nganti lama Mandau lalu mantap ke ilang iya ngagai Gelang.

Ninga utai tak semiup datai ari belakang dia dah Gelang lalu engkechit nyilat pantap Mandau, baru deka
nanya nama kebuah siku nya mantap iya peda mata ilang Mandau udah sema endar ari rekung Gelang
silat siku nya baru.

Meda Mandau ke majak nyerang iya dia dah Gelang engkechit ngagai pun kayu engkabang ke sema
tebing ai nya dia, kira ke mesai pala mih pun engkabang nya.Mandau pan lalu nitih ke Gelang ngagai pun
engkabang nya pan lalu dipupung Mandau.

Pun engkabang nya putus Gelang pan lalu labuh ba tanah, laban bai iya engkechit nyilat pantap
Mandau.meda siku nya udah tingkap ba tanah Mandau pan lalu mantap ke ilang iya ngagai Gelang dinga
ku munyi ilang Mandau lebuh ke terengka ba belakang Gelang nyau munyi mantap tekang batu nyau
perechi ilang Mandau laban belakang Gelang.

"Sigi dek ka ngelelak ke diri deka lari tadi Lang, dah nya angkat gi nadai aku tu ka munuh dek semina
deka nguji dek aja aku tu tadi.ku Mandau lalu narit jaku siku nya.

"Akai kesal aku tadi kumbai aku amat deka munuh aku mih dek tadi, ku Gelang sereta murus tubuh iya
laban ke balut daun mati ba tanah dia tadi.

"Lang lusa dek ka enggau kami sida aka ngayau ngagai menua Bukit Telajan kin enti dek ka enggau padah
ngagai sida apai dek lagi laban malam pagila aku deka ngemai kita ngintu pengaruh enggau ubat kitai
awak ke bisa agi ku Mandau bejaku enggau Gelang.
"Ka aku tuai seraya ke nguji Nyabur Tujing Kijang aku nya, ulih aku belelang ba menua payah mati suba
lalu bedau diuji ke aku Nyabur Tujing Kijang nya ku Gelang nyaut Mandau.

"Udah tembu makai lagi ngagai bilik aku dek lagi Lang laban bisi utai deka kerandau aku enggau kita.

Bala sida serumah pan datai magang laban ke deka ninga sida tuai rumah Mandau ke deka ngayau
ngagai menua munsuh, tuai biak indu lelaki datai magang ngagai ruai Mandau.

Bala ke dipilih Mandau iya nya Kujat, Gelang, Rimung, Chungat enggau Japar, nyadi sida tu sigi bedau
kala enggau urang basah jari laban ke benung berangkat kediri bujang kelebih agi Japar, Kujat enggau
Chungat tu sigi enda kala mindah jauh ari menua sida.

Gelang enggau Rimung udah kala belelang ngagai menua bukai baka Gelang udah belelang ngagai
menua Payah Mati, Rimung udah kala belalang ngagai menua Batang Begilik dia iya bulih kebar enggau
puchau Gayung, nyadi puchau Gayung tu enti udah dibacha dia dah sebarang utai ke kena bukut sigi
mati tekala nya enda milih pun kayu tau ke jelu enggau mensia sigi mati.

Malam nya sida baum besai bai Mandau laban ke deka ngayau, tang tu kayau mit enda mai bala mayuh
semina lima iku aja bai Mandau ari pan nyau majak jauh malam.

Tetak pandak cherita sida ke ngintu kereban ke ka kena ngayau enda ulih dirintai ke ditu leka sampi sida
ke ngintu ubat gembal tubuh enda ulih diengkebang leka biau sida manang ke miau bala bujang berani
ke deka nurun bebunuh.

Enda berasai ari ke dianti bala bujang berani pan datai, ba tengah laman bala sida ke deka nurun ngayau
sigi udah lama nganti tuai rumah Mandau ke pansut ari bilik.enda lama dinga guntur ba langit nyau
meletup ari pan lalu ujan nyala nya mih nanda ke bala tuai kayau ba menua Batang Langir deka nurun
ngayau mulau ngagai menua munsuh.

Bala burung enggau jelu sida udah lama nadai memunyi takut kediri mati lesi enda pulai agi layu sulai
pulai ngagai Batang Mandai, datai Mandau ba mua pintu dia ari ke ujan nyala pan lalu ngetu naka nya
aja baka api ke ditanjah ai.

"Dinga kita bala bujang berani pagitu kitai deka ngayau ngagai menua munsuh enti nyema kita bisi
tepeda ke utai mansa jelu tau ke antu anang enda munuh iya, laban enggai ke ngachau pejalai kitai enti
sida nya enda dibunuh kitai deka lebu ngapa deka asa laban sida nya mih burung rumbau tau ngelebu ke
kitai ke deka bebunuh ngelaban munsuh.ku Mandau bejaku enggau sida lima nya.

Sida enam pan lalu mupuk ngelawa sida Balan ke udah nganti sida ba tinting tusur ke enda jauh ari ai
Wong siti ke bisi ba menua nya, kira ke tiga batang insap mih ngelawa wong nya ngena perau.datai sida
ba ari ili nya dia sida enam nyangkai ke perau sida ba baruh tinting tusur sida enam pan lalu niki ke
tinting kin datai dia sida meda bala sida Balan sigi udah datai ba tinting dia.

"Lama kita udah datai tadi aka..?ku Mandau nanya sida Balan.

"Bedau entu lama iga dah adi, ku Balan nyaut Mandau.

Balan pan lalu ngemai sida nya mupuk, tang enda memukai dia dah Chungat tu bisi meda silui utai warna
chelum laban Chungat ke sigi agi nembiak dia iya lalu ngambi silui ular nya.

"A...akai.!.!ku dinga sida ari belakang sida.

Mandau pan lalu malik ke belakang dia iya meda Chungat nyau ngelingkang ngenat ke diri empu pedis.
"Iya lapa Chungat baka nya dah..?ku Balan ke baru meda Chungat ke baka nya.

Sida pan lalu berumban ngelawa Chungat laban ke deka nulung ngangkat ke siku nya, tang tagang
Mandau laban Mandau ke bisi meda silui ular ke nyelai warna chelum lalu besurik kuning mas.

"Aka anang negu iya aka uji peda dek silui ular ba semak iya nya.ku Mandau nunjuk ke silui ular nya.

Baru badu tudah Mandau ke bejaku dinga ku ai ba wong nyau munyi ke bah, sida pan malik kai kin
magang sereta enggau nya sida meda ai ba tengah lubuk nya bisi pansut bebuli.naka pemesai buli ba
lubuk nya enda lama dia sida meda ular naka pemesai nyau bisi lima sepemerap urang besai tuai.

Ular nya enda nganti lama lalu nyerang sida ke ba tinting tusur nya, tang enda memukai dia dah ular siku
ke datai ari atas sida tak lalu ngelatar sereta nangkap ular ke baru pansut ari lubuk nya tadi.

Ular dua iku nya pan nyau bepulas belaban enggau pangan diri nyadi ular ke pansut ari lubuk nya chelum
abis, nyadi iya ke datai ari atas nya bisi besurik kuning ba tengah belakang sepanjai tubuh iya.

Sida Balan tak ngemata aja ari tinting tusur meda ular dua iku nya belaban,

"Tuai ni Chungat dah tuai..? Nama iya nadai ditu agi, ku Japar nanya Mandau laban iya ke malik ngagai
Chungat ka meda siku nya engka udah badu ngelingkang.

Sida pan lalu malik ngagai alai Chungat tadi amat nadai siku nya, Mandau bisi nyangka ular ke besurik
kuning Chungat.

"Bah ngiga Chungat nya kada enda udah telan ular siku nya tadi kini, ku Gelang bejaku enggau sida ke
dia.

"Anang kiruh ngiga Chungat kita nyin Chungat ba ai din Chungat ku Mandau madah ke sida nya.

Semua sida nyau tekenyit ninga Mandau ke munyi nya madah ke Chungat ba ai din, tang sida nadai
meda Chungat semina ular dua iku nya ke belaban ba ai nya.

"Pemuas ular dua iku nya ke merekuh ke pangan diri dia dah ular ke chelum iya ke nadai surik nya pan
lalu lemi peda sida tubuh ular nya tadi pan lalu luluh nyadi pasir, mati mih ular ke datai ari dalam ai nya
laban Ular ke besurik kuning.

Pengudah ular warna chelum nya mati dia dah ular ke bisi surik kuning nya nyau ngila diri abis utai dia
laban ular ke bisi surik nya, Mandau enda tan ati meda pemedis ular nya dia iya lalu engkechit nuju ular
nya.

Terengka Mandau ba pala wong dia iya lalu bejalai belubah-lubah nuju ular nya, pegai iya pala ular nya
sereta mulut iya bejelimut macha leka puchau ke enda temu leka.

Enda lama peda ku ular nya pan ngetu ngila diri, Mandau lalu ngubat abi telih ular nya peda lalu suman
abi telih ular surik kuning nya.

"Enda nyangka aku dek tau bulih penusah ke besai bakatu dah akih kati mih aku deka madah ke ngagai
apai enggau indai dek.ku Mandau duduk sema pala ular nabau nya sereta ngendas kuyu iya laban ai
mata tudah tuai.
Sida Balan semadi lalu nitih ke Mandau kebaruh, semina bala manuk sabung enggau bala sida Gelang ke
agi tinggal ba tinting din.datai sida Balan semadi dia sida lalu murus belakang Mandau.

Nabau nya pan lalu ngangkat ke pala iya sereta lalu ngasur ke pala iya nuju Mandau, dia mih Mandau
meda tanduk Nabau nya bechabang dua siti warna kuning emas lalu siti burak baka pirak.

Mandau baka ke nemu Nabau nya deka meri iya entara dua iti tanduk nya, Mandau pan lalu milih entara
siti tanduk nya pereti iya enggau manah tanduk dua iti nya.Mandau pan lalu matah ke tanduk warna
perak.

"terima kasih Chungat laban udah meri aku tanduk dek tu, ku Mandau bejaku enggau Ular Nabau nya.

Ular Nabau nya pan lalu terejun ngagai lubuk nya ai pan lalu bebuli nyadi naka pemesai, nadai
pengelama dia dah tubuh Ular Nabau nya nadai agi peda.nya baru bala sida ke agi tinggal ba tinting din
tadi nurun laban Nabau nya udah pulai ke lubuk.

"Nyadi bepun ari sari tu Wong tu deka kangau ke kitai ngena nama Wong Nabau, laban Wong tu nanda
ke Chungat udah bebali nyadi Nabau iya deka nguan Wong tu Sampai ke iya mati lalu ganti Ular Nabau
ke bukai.ku Mandau madah ke sida.

"Adi kati ke pejalai kitai tu ke deka Ngayau dah nyadi tau ke enda..?ku Balan nanya Mandau.

"Nyadi aka enda tau pulai puang kitai laban sigi udah sumpah petara suba kitai tujuh enti udah nurun
ngayau enda tau nikal pulai taja bisi penanggul, sekali pan kitai sigi enda tau nikal pulai.ku Mandau nyaut
jaku Balan.

"Nyadi kita enti deka pulai tau pulai kala ke bedau jauh tang anang guai madah nama utai ke udah nyadi
ba Chungat, laban aku empu deka niri ke gawai besai ba Wong Nabau tu ila ku Mandau madah ke bala
sida ke bisi dia.

**********
"munyi nya cherita Wong Nabau nya uchu, ngetu dulu aku uchu deka meri utai makai dulu.ila aku
nyambung baru enti bisi awak ku aki Unkil..