LITURGI TUTUP TAHUN 2022 & BUKA TAHUN 2023

GBKP KLASIS BINJAI LANGKAT

Tema: Dibata Temanta
Nats: Roma 8:31-39
Sub Tema: Keleng Ate Dibata Tetap Nemani Kegeluhen Anak-
anakNa Ibas Mengketi Tahun Simbaru

I. Persikapen
- Mpepayo Liturgi, nikapken si ertugas ras perlengkapen kebaktin.
- Kebaktin ibenaken 30 menit sope pergantin tahun.
- PK = Peminpin Kebaktin, banci Bapa, Nande, anak tah anggota keluarga sihadir si enggo
itetapken; KS = Keluarga Sipulung.
- Adi serayan ( Pdt,Pt/Dk) si jadi Pemimpin Kebaktin maka ipake Votum/Salam bagepe
Pemasu-masun.Tapi adi lalit serayan emaka i lewatken saja..
- Renungen si enggo isikapken banci itambahi/ ikembangken rikutken penggejapen rikutken
nats sienggo isikapken.

II. Kebaktin
* Kata Penaruh (ibabai Bapa/Nande)
Puji-pujin ras bujur sisehken man Dibata perban enggo itaruhkenNa kita ku bas
pengujung tahun 2022 enda janah ersikap kita mengketi tahun si mbaru i bas
erkiniteken ras erpengarapen man Kristus. I bas tahun 2022 enda banci jadi melala
pengalamen geluh si la bagi ukurta si mpeturah kebiaren ras aru ate. Tapi tetap
sigejapken penemani Tuhan singarak-ngarak kegeluhenta seh paksa enda. Guna
ngalo-ngalo tahun si mbaru, turahlah pengarapen maka tahun si mbaru lebih mehuli
asa tahun sienggo lewat. Ipegegehi Tuhan kita guna bengket ku bas tahun 2023,
terkhusus alu Sasaren Program bas gerejanta GBKP eme “Jemaat Menjadi Pelaku
Aktif Pelayanan”. Sipindo gegeh man baNa gelah tetap kita ibereNa kepentaren jadi
rarasenNa guna mpekena-kena doni enda bagepe meritaken Berita Simeriah.

* Ertoto
* Rende KEE 374:1 & 2 “Yesus ulu kegeluhenku”
Yesus ulu kegeluhenku, Kam me ngenca pengendesenku
 Lalap tedeh ate pusuhku, kupehaga Kam bas geluhku
Ref: O Tuhan pernehen pusuhku, si ertedeh ate man baNdu
Kugelem pedah ras padanNdu, kusembah Kam i bas geluhku
Kusembah Tuhan Penebusku, si mereken kekelengenNa
Alu tutus reh aku Tuhan, ras kerina isi jabungku Ref: …..
* Votum/Salam
PK : Kebaktin nutup ras mbuka tahun enda ibenaken ibas gelar Dibata Bapa sinepa
wari-wari, ibas gelar AnakNa Jesus Kristus simereken kegeluhen si mbaru, ras ibas
gelar Kesah Si Badia sinemani perdalanen geluh manusia.
Keleng ate Dibata si la rsibar, tetap ngarak-ngarak kegeluhennta (ndu), ikawaliNa
kita (kam) subuk suari ras berngi. Ia kap si mada kuasa seh rasa lalap. Amin..
KS : Amin.... Amin... Amin.. ( iendeken)
* Invocatio “Janah ingetlah! Aku tetap kap ras kam seh ku kedungen jaman” (Mat.
28:20b).
* Rende KEE 181:1&4 “Segedang-gedang Geluhku”
Segedang-gedang geluhku itemani Penebus
Labo kai pe lit si kurang, adi tanNa negu t’rus
Dame surga lit bas aku, iusekenNa bangku
Kegeluhen jadi senang, kai pe la lit si kurang (2x)

Segedang gedang geluhku, Ia singkawalisa

Amin kai pe reh man bangku, aku ijagaiNa
IteguNa tetap tanku, i bas keleng ateNa
Segedang-gedang geluhku, kuikutken me Ia (2x)
* Responsoria “Ende-enden pujin (Masmur 100)
PK : Ersuraklah man Tuhan o pertibi kerina, nembahlah man Tuhan
alu ukur meriah, dahilah ku adep-adepenNa janah rende meriah
KS : Ngendeken Ref. KEE 308
Haleluya, haleluya puji gelarNa. Haleluya, haleluya puji
gelarNa
PK : Ola lupa maka Tuhan kap Dibata, Ia sinepa kita, emaka
sikerajangenNa nge kita,kita kap bangsaNa, kita kap rarasenNa.
KS : Ngendeken Ref. KEE 308
 Haleluya, haleluya puji gelarNa. Haleluya, haleluya puji
gelarNa
PK : Bengketlah ku bas pintu gerbangNa alu ende-enden pengataken
bujur, ku bas kesainNa alu puji-pujin. Katakenlah bujur man
baNa dingen pujilah Ia.
KS : Ngendeken Ref. KEE 308 Haleluya, haleluya puji gelarNa.
Haleluya, haleluya puji gelarNa
PK : Sabab Tuhan mehuli kap dingen tetap Ia erkeleng ate, Ia setia,
tetap rasa lalap.
KS : Ngendeken Ref. KEE 308 Haleluya, haleluya puji gelarNa.
Haleluya, haleluya puji gelarNa
* Rende KEE 468:1 & 2 “Tuhan Demi Salu KataNdu”
Tuhan demi aku salu KesahNdu, Tuhan demi aku salu KesahNdu
Pusuhku bagi tambe ku baba ku pancurNdu,
Tuhan demi aku salu KesahNdu
Tuhan demi aku salu kataNdu, Tuhan demi aku salu kataNdu
Pusuhku bagi tambe kubaba ku pancurNdu,
Tuhan demi aku salu kataNdu.
* Renungen → DIBATA TEMANTA : Roma 8:31-32 (Ertoto sope & kenca renungen)

* Pengakun Kiniteken
* Nehken Persembahen Pengataken Bujur man Tuhan
Marilah siendesken pengataken bujurta man Tuhan i bas IA enggo ngepkep k’rina
jabunta i bas tahun si lewat guna bengket ku tahun si mbaru. Kata Dibata kerna
persembahen pengataken bujurta: “Geluhndu arus erpalasken keleng ate, bagi
Kristus enggo engkelengi kita dingen ngendesken KesahNa man gunanta, IA enggo
mpersembahken si merim si ngena ate Dibata” (Epesus 5:2).
Rende KEE 471 “Ermengkah Ukurku”
Ermengkah ukurku, ras ngataken bujur Tuhan
Kelengi min aku, Kam Empu geluhku
Enda ngenca Tuhan persembahenku
Kerina geluhku, kesah ras kulangku
La kap lit bas aku erta kebayaken
Si cukup meherga ’lah kupersembahken
 Sada ngenca Tuhan lit pemindonku
Aloken min Tuhan persembahenku
Pakeken geluhku jadi perkakasNdu, segedang geluhku
* Pertoton Persembahen
* Ercakap-cakap / Sharing nimai Jam.00.00--------Tepat Jam 00.00 SISALAM-
SALAMEN ras Rende : KEE 117:1,2,3
Nggo mentas tahun male e, Kam me ku puji Tuhan e.
Jaga kawali Kam tetap, tendingku ras dagingku kap.

O Yesus Kam Penebusku, keleng ateNdu man bangku.

Tahun si mbaru enda pe, taruhken perpulungen e.
Ras kami min kataNdu e, man tendang ukur kami e,
Pedauh min k’rina dosa e, ras percuban si jahat e.
 Doa Syafaat.
(Simehulina ibere lebe kesempaten ertoto secara pribadi 1-2 menit).
- ertoto kerna kejuah-juahen ndalani tahun si mbaru 2023
- ertoto kerna isi jabu gelah kiniteken reh gegehna, kesehatan, pendahin
-Senina turangta si terkena dampak bencana alam
- ertoto kerna Gerejanta, bangsa ras negaranta, rsd
* Tekad guna mengketi Tahun si Mbaru
PK : O Tuhan Dibata si mada kuasa, alu bulat ukurku kukataken bujur
baNdu. Kubengketi tahun si mbaru alu dem pengarapen man
baNdu.
KS : O Tuhan, kerina kami erpengarapen man baNdu, i bas
persadan ras Kam o Tuhan, mejuah-juah kami i bas mengketi
ras ndalani tahun si Mbaru enda.
Kerina : Man Dibata saja kita erpengarapen, IA kap singkawali kita i
bas kerina paksa-paksa kegeluhenta, tetap ukurta perban
Dibata setia nemani kita. Amin.
* Rende KEE 379 : 1-3 “ Tuhan Tetap Nemani Geluhku”
Tuhan tetap nemani geluhku, Dingen mereken dalan man bangku
Ernalem gelah tetap, ras ertoto man baNa
Tuhan tetap nemani geluhku
Tuhan tetap nemani geluhku, Dingen mereken dalan man bangku
Tedeh ate tendingku, ngidah kemulianNdu
Tuhan tetap nemani geluhku
Tuhan tetap nemani geluhku, Dingen mereken dalan man bangku
Enda me keg’luhenku, ku endesken man baNdu
 Tuhan tetap nemani geluhku
* Pertoton Tuhan
* Pengutusen Ras Pasu-Pasu Dibata
PK : KekelengenTuhan bengketilah dingen dalankenlah kegeluhenta ibas tahun si
mbaru i teruh penampat Kesah Si Badia janah alokenlahpasu-
pasu idur Dibata nari :
“ Ipasu-pasu janah ikawali Dibata kita (kam), siang ayo Dibata ersinalsal ibabonta
(ndu), janah melias ateNa ngenehen kita (kam), itatap Dibata
ku kita (kam), janah malem ateta (ndu) ibahanNa. Amin..

KS : ngendekeken KEE 466

Bujur o Tuhanku, Bujur o Tuhanku
Terpujilah gelarNdu, Bujur o Tuhanku

RENUNGEN
“DIBATA TEMANTA” Roma 8:31-39
Tupung kita tah temanta ngenanami kineseran , perbeben, megati sibegiken
percakapen, maka nina : ndarami ras ndatken teman tawa seh kal sukahna, tapi ndarami
teman ngandung seh kel serena muatsa. Kalimat enda nuduhken maka selaku kita manusia,lit
keterbatasenta. Labo kerina kita ngasup jadi teman man kalak si deban. Sanga meriah e
ngenca kita ngasup jadi teman adi lang jadi imbang. Ibas KEE GBKP No 98 syairna nina : ise
nge ndia temanta sitetap seh rasa lalap e, temanta sithu-tuhu, eme Tuhan Yesus e, entrem gia
kade-kade teman labo kurang kin, krina denggo itadingken di nggo mate kita kin. Tuhannta
Yesus Kristus e, jadi temanta situhu-tuhu, seh kita mate pagi.

Ibas perpulungen Tuhan i Roma ngenanami erbage-bage perbeben ras kiniseran

erkiteken ikutkenNa ajaren Tuhanta Yesus Kristus. Turah erbage-bage pengajaren si papak,
reh ku perpulungen gelah ula iikutkenna Yesus. Rasul Paulus pe melala ngenanami kiniseran,
ntah piga-piga kali ia i penjaraken, icambuk. Situasi e erebanca kerina kalak kristen
menderita. Nandangi perpulungen e, reh Paulus ngapuli ia nina ibas Roma 8:18 :Rikutken
perkiranku, maka kiniseran sini inanami kita genduari labo kai pe, adi ibandingken ras
kemalemen ate si pagin i petangkas Dibata man banta. Ertina Paulus ngarapken gelah
perpulungen tetap mengenggeng . labo sia-sia kiniseran sini alami perpulungen e. Janah nina
Paulus tole maka : ibas kai pe Dibata erdahin guna kiniulin man kalak si erkeleng ate man
bana. Janah kerina kalak si tek e, enggo itetapken Dibata bali ras tempas anakNa Yesus
Kristus, janah Yesus Kristus jadi anak si ntua i tengah seninana si entrem {Roma 8:29}. Guna
ngalaken kiniseran e pe harus i petetap me ukur perpulungen, maka Dibata arah Yesus
Kristus kap temanta si tuhu-tuhu, subuk ibas susah tah senang. Ibreken Dibata AnakNa Yesus
Kristus kudoni enda . Raduken Yesus Kristus e, ibreken Dibata nge kai pe man banta (ay 32).
Yesus enggo mate gunanta, enggo ka nggeluh mulihi, janah enggo merentah ras Dibata guna
kita. Ise pe la ngasup nirangken kita ibas keleng ate Kristus nari. Janah i surga pe pagi, Yesus
si mbela kita, bagi i suratken ibas ayat 34b : Kristus Yesus pagi jadi pembelanta i lebe-lebe
Dibata.

Emaka ibas nutup tahun enda bagi perpulungen i Roma Ndai , banci maka kita ras
temanta si sada kiniteken, melala ngenanami kiniseran entah perbeben, erkiteken kita
erkiniteken man Kristus. Mungkin pernah kita ipersulit ibas karirta, pendahinta, erkiteken kita
kalak Kristen. Bape pe tupung kita ngenanami kiniseran, pinakit, ekonomi, ras sidebanna,
bagi siurak temanta, anakta bage pe kade-kadenta banci jadi dongkel akapna kita. Guna sie
enggo seh kata Dibata wari enda man banta, ulanai morah kai si jadi, sipeturah semangat
kinitekennta. Sebab Yesus Kristus Kap temanta seh rasa lalap. Adi go kada turah semangatta
emaka sia ajuk temanta, keluarganta krina gelah turah semangatna guna ndalani kegeluhenna
ibas tahun simbaru. Adi tahun sidekah kita surut semangatta ibas perbeben e tapi ibas tahun
enda turah semangat siluar biasa. Ula ngadi ibas beritaken Berita Simeriah e, arus sisehken
man kalak. Ija saja kam jumpa ras kalak siputus asa ntah patah semangat, ije kam minter
hadir mereken pergegeh, Yesus kap pembelannta. Yesus Teman situhu-tuhu. Emaka adi kalak
sideban la ia nggit jadi temanta , kita ka lah gia jadi teman man ise pe. Adi jadi teman ateta
kita man kalak sideban, tentu lit pengorbanennta. Misalna, siluangken waktunta, sitelponi ia,
sidahi ia janah mawen sisampati ia alu pemerenta. Bagi Yesus Kristus pe erkorban man
banta, guna nehken keleng ateNa, bage ka me kita, ibas pengorbanenta e, terpuji gelar Tuhan
Dibata. Amin

Segenap Pdt, Pdt Pensiunan, Cl.Pdt,

Detaser, Pegawai ras BPMK
GBKP Klasis Binjai Langkat
Ngataken Man Bandu Kerina Kekelengen Tuhan
Perpulungen se Klasis Binjai-langkat
“Selamat Tahun Baru 2023”
TUHAN MASU-MASU KITA KERINA MEJUAH-JUAH & SALAM
SEHAT