Naskah Lakon

1. Sumbang Bajalan
2. Sumbang Bagaua
3. Sumbang Kurenah
4. Sumbang Duduak

Tokoh utama 2

1. Aminah
2. Dahlan

Tokoh Pembantu :

1. Saida
2. Erizal
3. Mandeh
4. Abak

Watak Protagonis dan Antagonis

Judul :

Pada suatu hari, di Nagari Sungai Pua, ado keluarga kayo yang di hormati banyak urang. Mereka
hiduik makmur dan tentram. Dirumah itu, ado sapasang suami istri yang punyo 2 anak gadih, yang
cantik nan elok.

Yang Suluang Aminah namonyo . Elok parangainyo, Rancak mukonyo, banyak urang yang sanang jo
inyo. Yang Bungsu namonyo Saida . Rancak mukonyo tapi Buruak parangainyo. Tapi kakak baradiak ko
sabana dakek ndak ado masalah.

Suatu hari, Aminah habis dari pasa bali samba untuak makan beko malam. Aminah jalan surang,
dibelakangnyo ado pancilok yang nio maambiak tas-nyo.

Aminah : Tolong! Ado pancilok!

Laki-laki yang lewat dakek situ langsuang manolong Aminah, diagiahnyo baliak tas Aminah.

Aminah : Ndeh, Makasih yo da. Kok ndak ado uda, ndak ka baliah tas Aminah do

Laki-laki : Samo-samo, sia namo adiak?

Aminah : Aminah da, namo uda sia?

Laki-laki : Namo ambo Dahlan. Dima Aminah tingga?

Aminah : Rumah di ujuang jalan tuh da

Dahlan : Oh bia lah Uda antakan

Sumbang Bajalan ( Jalan ka rumah ujuang)

Aminah : Makasih yo da, kok indak ado Uda indak ka baliak dompet ko do

Dahlan : Samo-samo diak, bisuak elok-elok yo. Di pasa tuh bayak pancilok

Aminah : Jadi da, Uda Kasinggah santa?

Dahlan : Lanjuik lah diak. Uda ka baliak dulu yoo

Aminah : Elok-elok yo da

Dahlan : Iyo diak

Dahlan pun pai dari rumah Aminah. Malamnyo, Aminah carito tentang Laki-laki yang inyo tamui
dijalan ka keluarga nyo.

Aminah : Abak, Mandeh, Tadi tas Aminah hampia di cilok

Mandeh : Iyo nak?, Aminah lai ndak baa-baa kan?

Aminah : Indak Mandeh . Tapi tadi ado laki-laki yang manolong Aminah

Abak : Sia tuh nak?, Bia Abak Kawinkan kalian beko. Bantuaknyo suko Aminah samo Inyo.

Aminah : Namonyo Dahlan , Abak.

Abak : Dahlan? Yang preman pasa tuh? Manga Aminah basobok inyo?!

Aminah : Kan Dahlan yang manolong Aminah, tuh basobok kami bak

Abak : Indak ka tuju Abak jo inyo do. Cari urang lain, banyak anak bujang urang yang sasuai jo
Aminah

Aminah : Tapi Aminah nio sama Dahlan bak

Saida : Alah tuh ni. Manuruik se lah Uni jo Abak

Aminah : Indak bisa do Saida. Uni sanang samo inyo

Abak : Inyo elok di muko se nyo, dibalakang inyo pancilok. Aminah caliak lah di pasa tuh ha, manga
karajonyo

Aminah : Mukonyo se yang bantuak itu nyo Abak, tapi Parangainyo Elok. Awak kan indak buliah
basangko buruak ka urang

Abak : Kalau Abak kecek indak, yo indak. Bisuak abak carikan Laki-laki yang elok

Mandeh : Tarimo se yo nak, iko untuak Aminah juo nanti. Abak cuman indak nio anak gadihnyo
marasai jadi istri urang yang salah

Aminah diam indak mambantah. Inyo pasrah samo keputusan urang tuonyo. Bisuaknyo, Aminah ka
Pasa baliak untuak balanjo. Dek barek bana tasnyo, ndak talok inyo mambaok lai.

Laki-laki : Eh diak. Manga ko?

Aminah : Iko da, tas ambo barek bana. Ndak talok wak mambaoknyo do

Laki-laki : Bia lah uda tolong mambaokkan. Dima adiak tingga?

Aminah : Rumah diujuang jalan da

Laki-laki : Oh, rumah juragan bareh tuh?

Aminah : Iyo da, kok uda tau?

Laki-laki : Iyo, Uda karajo ditampek juragan tuh

Sumbang Bajalan (Pai dari pasa)

Laki-laki : Sia namo diak?

Aminah : Aminah da, namo uda sia?

Erizal : Namo udah Erizal

Aminah : Uda tau Dahlan?

Erizal : Tau, Baa tu?

Aminah : Ambo sadang mancari inyo. Tapi ndak ado basobok do

Erizal : Oo, Jam sagiko nyo masih manggaleh tuh mah

Aminah : Manggaleh aponyo da?

Erizal : Manggaleh ayam

Ndak lamo habis tuh mereka sampai di Rumah Aminah.

Aminah : Uda ndak nio masuak dulu?

Erizal : Indak usah lah diak. Sagan uda. Uda pulang dulu yo.

Aminah : Makasih Yo da

Malamnyo, Aminah carito jo keluarganyo tentang si Erizal.

Aminah : Tadi Aminah basobok jo laki-laki

Abak : Lai ndak si Dahlan lo liak?

Aminah : Indak, Abak. Namonyo Erizal, keceknyo Inyo karajo di tampek Abak

Abak : Oh si Erizal, inyo lai elok tuh. Aminah lai amuah samo Inyo?

Aminah : Aminah nio juo jo si Dahlan, Abak.

Abak : Manga juo jo Inyo lai?!

Aminah : Aminah cinta samo Inyo Abak!

Abak : Ijan jo inyo Juo lai! Bia Abak carikan urang lain. Erizal tuh lai elok haa

Aminah : Untuak apo Aminah jadi istri urang lain tapi Aminah ndak Bahagia samo inyo do, bak?

Mandeh : Aminah nio samo Dahlan? Manarimo sado kakurangan Dahlan?

Aminah : Lai Mandeh. Aminah sabana cinta jo Dahlan

Mandeh : Kalau gitu padiaan se lah Aminah jo Dahlan da. Kalau Aminah bahagia, tuh awak ndak bisa
lo mangukuang do

Abak : Iyo lah, Aminah buliah samo Dahlan.

Aminah yang sanang pun langsuang maagiah tau Dahlan. Mandanga kaba itu, Dahlan langsuang ka
rumah Aminah untuak malamar Aminah. Hingga mereka mangadokan baralek gadang-gadangan.
Habis baralek, Dahlan tingga dirumah Aminah. Inyo maubah tabiat buruaknyo dan barusaho manjadi
labiah elok.

Aminah : Uda

Dahlan : Apo diak?

Aminah : Uda lai ndak tapaso samo Aminah kan?

Dahlan : Uda subananyo cinta samo Aminah mah. Tapi Uda takuik samo Abak, soalnyo Uda punyo
parangai buruak dulu

Aminah : Yang penting Uda kan lah barubah. Abak ndak ado baa-baa do.

Baminggu-minggu pernikahan Aminah jo Dahlan, mereka hiduik rukun dan Makmur. Aminah carito
ka Saida sabahagia apo inyo.

Aminah : Ndeh, sanang bana hati uni haa

Saida : Manga uni sanang?

Aminah : Bisa juo Uni jo da Dahlan

Saida : Baa rasonyo nikah samo da Dahlan, ni?

Aminah : Sanang rasonyo awak bisa samo urang yang awak cinto

Saida : Kalau ado urang yang suko samo da Dahlan baa ni?

Aminah : Uni jambak rambuiknyo beko

Aminah : Tapi Uni malu jo da Dahlan kalau takana iko

Saida : Takana apo Uni?

Aminah : Uni ndak pandai bana masak do. Kok tabanyak maagiah gulo, maagiah garam, baa beko
tuh? Ndak amuah lo da Dahlan makan masakan Uni beko

Saida : Uni baraja lah ka Mandeh baliak, kan lah lamo Uni baraja samo Mandeh

Aminah : Tapi Mandeh sibuk sama arisan, ndak takaja rasonyo kalau Uni minta ajaan ka Mandeh

Saida : Bisa se tuh ni

Akhirnyo Aminah mamasak sup untuak makan malam surang tanpa dibantu Mandeh dan Saida.
Merekapun makan basamo. Baru kaduduak Aminah baru, lah berang Dahlan sambil maampehan
sendoknyo.

Sumbang Kurenah

Dahlan : Baa manih bana sup iko ko?! Ndak pandai Aminah mambedakan gulo samo garam do?!

Aminah : Lai Aminah caliak da, ndak ado Aminah maagiah gulo do

Dahlan : Kok ndak ado manga sa-manih iko?!

Aminah : Ndak ado do da, emang garam Aminah agiahnyo

Dahlan : Cubo lah ko hah!

Abak : Alah tuh. Wa ang kalau di masak-an tarimo se lah. Ndak ka diabetes gai ang do!

Dahlan : Ndak bisa lan makan yang manih-manih do bak

Abak : Ndak usah se ang makan, lah diagiah makan ndak basyukur malah mancacek ang!

Suasana aniang diantaro mereka. Akhirnyo Dahlan tapaso makan sup manih yang dibuek Aminah.
Saida yang mancaliak itu tagalak dalam hati, pueh samo apo yang dikarajoannyo.

Bisuak pagi, Saida disuruah ka Pasa samo Mandeh. Aminah lah jadi istri urang, jadi harus inyo yang
masak kini. Apolai Abaknyo ndak nio kajadian bantuak patang tajadi baliak.

Lah banyak yang tabali dek Saida, gadih tu pulang karumah. Dijalan, inyo basobok samo Dahlan yang
nio ka pasa.

Sumbang Tagak

Saida : Eh, nio kama Uda?

Dahlan : Nio ka pasa, ka manggaleh ayam

Saida : Eh, kok bantuak itu rancak wak bali ayam di tampek uda tadi

Dahlan : Eh, ndak usah lah. Uda ndak ka maagiah gratis do

Saida : Sia yang mintak gratis? Kan lai ado Saida baok pitih nyo

Dahlan : Indak do, itu pitih mintuo wak

Saida : Iko pitih Uni mah da

Dahlan : Yo, itu pitih Uda juo nyo. Kan Uda yang maagiah

Saida : Uda bilo maagiah Saida pitih?

Dahlan : Manga Uda agiah lo Saida pitih?

Saida : Yo, kan Uni ndak pandai jadi istri Uda do. Masak se ndak pandai, alun tau lo yang lain pandai
lai. Saida kan lai pandai masak. Uni tuh banyak lo dulu jo anak bujang urang dulu, ndak uda yang
partamo do

Dahlan : Tu Saida ka manga?

Saida : Uda ndak nio samo Saida? Rancak giko ha. Indak pandai masak se do, tapi mambarasiahan
rumah gai

Dahlan terdiam mandanga itu, antaro iyo jo indak. Kalau iyo, inyo takuik mambuek Aminah sakik, tapi
kalau indak, ndak ado gadih yang ka maabehan inyo do

Dahlan : Jadilah, tapi jan sampai Aminah tau kalau awak bantuak iko

Saida : Tanang se lah Uda, Uni tu ndak ka tau gai do. Uni tu kan bodoh

Dahlan : Kalau bodoh, indak mungkin inyo amuah jo Uda yang gagah ko do

Saida : Bararti santiang Saida kan da?

Dahlan : Iyo, santiang Saida

Saida : Iyo lah da, elok-elok yo da

Dahlan : Iyo diak, elok-elok dijalan

Akhirnyo mereka bapisah manuju tampek tujuan masing-masing.

Malam harinyo, mereka makan basamo. Kini Saida yang masak, karano Abak takuik Dahlan kasa jo
Aminah.

Sumbang Kurenah

Dahlan : Iko sia yang masak ko? , lamak bana

Aminah : Saida yang masak da

Dahlan : Ndeh, lamak nyo lai. Cubo Aminah baraja samo Saida, mungkin naiak salero makan uda mah

Aminah : Iyo da?, Kalau gitu bia lah Aminah baraja samo Saida beko

Mandeh : Anak Mandeh lai santiang masak sadalahnyo, ndak ado yang indak pandai masak do

Saida : Sadalahnyo kecek Mandeh?, Uni se masih payah mambedakan gulo samo garam

Mandeh : Apo kecek Saida ko? Uni tu sadang latiah tu mah, sahari patang Uni habis dari Pasa

Saida : Saida kan hari ko dari pasa pulo Mandeh

Mandeh : Tapi jan bantuak itu Saida ka Uni, dulu Uni yang acok mamasak untuak Saida

Saida : Dulu tu Saida masih ketek, masakan Uni indak lamak do. Tapi Saida makan juo dek Uni lah
panek mambuek

Mandeh : Saida!

Aminah : Alah tuh Mandeh, Aminah ndak baa do

Suasana pun Aniang habis itu. Indak ado yang nio mangecek.

Bisuaknyo, Dahlan langsuang ka pasa untuak manggaleh. Lah disiapkannyo kadainyo, lah badabiah
pulo ayam, kini tingga duduak manunggu pambali. Tibo-tibo ado Erizal yang tibo manyapo Dahlan.

Erizal : Woi Dahlan! Lah lamo ndak sobok wak

Dahlan : Wa ang kama se? Den disiko se taruih nyo

Erizal : Biaso awak di tampek judi juo nyo

Dahlan : Yo kini den lah hijrah, buliah bisa samo Aminah

Erizal : Kawin ang samo Aminah?

Dahlan : Iyo, inyo nio juo jo den. Tuh kawin se kami lai

Erizal : Lai cinto ang samo inyo?

Dahlan : Inyo indak pandai manga-manga do, maleh den

Erizal : Tu manga ang samo inyo?

Dahlan : Dek inyo rancak se nyo, buliah bisa lo namo den naiak stek. Bilo pulo den ba bini rancak lai?
Erizal : Kok tau Aminah sakik hati inyo tu mah

Dahlan : Indak ka tau bagai inyo do

Pas mereka sadang mangecek, tibo Saida sambil mambaok rantang.

Sumbang Bagaua

Saida : Uda, iko Saida baokkan Samba untuak Uda. Uni habis masak, jadi Mande suruah Saida
maantakan untuak Uda

Erizal : Baa indak Aminah yang maantakan?

Saida : Karajo Uni dirumah banyak, jadi Uni suruah Saidah manggantikan inyo

Dahlan : Lai indak manih bana do? Beko sakik lidah uda beko

Saida : Saida yang maajakan da, indak ka salah bagai Uni tu do

Dahlan : Ndeh, makasih bana yo Saida. Kok indak ado Saida, indak ka makan Bagai Uda do

Saida : Samo-samo da. Kalau gitu Saida baliak dulu yo da

Dahlan : Iyo diak, elok-elok yo

Sadia : Iyo da, Uda elok-elok pulo

(Saida Pai)

Erizal : Manga ang jo Saida?

Dahlan : Apo kecek ang ko? Kami ipar, tu apo kami lai?

Erizal : Bantuak indak ipar kalian do, bantuak laki-bini

Dahlan : Salah caliak ang ma, ang alun mancaliak den jo Aminah do

Erizal : Iyo lah, sukati ang lah. Den pai dulu, nio lanjuik karajo

Dahlan : Iyo, elok-elok ang

(Erizal pai, Dahlan mambukak rantang dan makan)

Dahlan : Ndeh, sabana lamak masakan Saida ko. Nyasa wak kawin samo Aminah. Lah ndak pandai
masak, maurus den se indak pandai lo do

Dahlan : Baa ndak kawin se wak jo Saida dulu yo?, Manga harus wak tarimo lo si Aminah? Manga
wak lamar lo si Aminah?

Dahlan : Kok tau den Saida labiah rancak daripado Aminah, rancak jo Saida se den dari awal lai

Lah habis samba tuh, Dahlan manjua baliak sampai dagangan nyo habis. Lah sudah manutuik kadai,
Dahlan langsuang baliak ka rumah.

Sampai dirumah, nampak dek inyo Aminah sadang mambarasiahan rumah.

Dahlan : Sadang manga Aminah?

Aminah : Iko da, Aminah sapu stek. Kumuah bana lantai ko nampaknyo
Dahlan : Ndeh, santiang bini Uda mah

Aminah : Kok indak santiang Aminah, indak ka amuah gai Uda samo Aminah do

(Tagalak Dahlan)

Dahlan : Iyo, kok indak santiang, indak ka amuah Aminah samo Uda do

Aminah : Uda nio kopi? Bia Aminah buek habis ko

Dahlan : Indak usah lah, Aminah lah panek-panek hari ko

Aminah : Yo lah da, istirahat lah Uda lai

(Dahlan Pai, Aminah masih manyapu)

Malamnyo, mereka bakumpua untuak makan. Masih Saida yang mamasak. Sarupo biaso, Dahlan
memuji masakan Saida.

Dahlan : Ndeh, lamak samba Saida lai

Saida : Iyo da?, makasih yo da

Aminah : Uda cubo lah sayua nyo, itu Aminah yang buek

Dahlan : Indak do, Uda ndak suko jo sayua do

Mandeh : Kok bantuak itu Dahlan mangecek? Aminah lah panek mambuek nyo

Dahlan : Dahlan emang ndak suko sayua do Mandeh

Abak : Pai ang lah, sajak patang mamprotes masakan urang se taruih. Kok bantuak itu masak se ang
surang

(Dahlan aniang)

Tibo-tibo ado yang mangetuk pintu rumah mereka.

Dahlan : Bia lah Dahlan yang buka

(Dahlan pai mambuka pintu)

Dahlan : Wa ang kironyo mah, masuak lah dulu

Erizal : Eh, indak do. Den nio pamit se, karajo lah sudah

Dahlan : Masuak bagai lah dulu, tu si Aminah buek sayua ha

Erizal tampak ragu, tapi dek bujukan Dahlan, akhirnyo Erizal masuak untuak makan malam basamo.

Erizal : Ndeh, maaf yo bak, mandeh, Erizal manggaduah

Mandeh : Indak baa do Erizal, Erizal lah panek lo karajo sahari ko

Erizal : Makasih mandeh

(Erizal makan sayua yang dibuek Aminah)

Aminah : Lai lamak da?

Erizal : Lamak diak, tagiah uda makan jadinyo

Dahlan : Kok bantuak itu tambah lah liak, banyak nasi tasiso lai

Erizal : Ndeh, lai ndak baa do?

Dahlan : Indak baa do, tambuah se lah ang

(Erizal tambuah dan makan baliak)

Aminah : Uda ndak nio tambah dagiang do?

Dahlan : Eh indak do. Dagiang tuh untuak Uda.

Aminah : Tu jo apo da Erizal ka makan da?

Dahlan : Lai ado sayua tuh hah? Manga makan dagiang lo baliak?

Abak : Ang kalau pilik ndak usah tingga disiko lai. Sakik talingo den mandanga ang

(Dahlan aniang dan lanjuik makan)

Erizal pun salasai makan, inyo pamit ka keluarga Aminah untuak pulang.

Erizal : Makasih abak, Mandeh. Kanyang paruik Erizal

Mandeh : Samo-samo. Bisuak kok litak, pai se karumah kami. Banyak samba lai

(Erizal tasanyum & pai dari situ)

Aminah : Uda, kok bantuak itu uda samo da Erizal tadi?

Dahlan : Inyo Jaek tu mah

Abak : Jaek? Kecek ang lai. Kawan ang surang bantuak itu kalakuan ang

Saida : Alah tuh bak, da Dahlan panek bana hari ko. Tadi pas Saida maantakan rantang, banyak urang
yang mambali ayam da Dahlan

Abak : Itu kan di pasa. Kini inyo dirumah, dirumah abak. Harus ikuik peraturan siko. Ang lah jadi laki
Aminah, ang manumpang lo disiko. Tau tarimo kasih lah stek

Aminah : Alah tu bak, Aminah indak baa do

Abak : Aminah ciek, kalau tau bantuak iko, indak ka Abak restui kalian do

Aminah : Manga abak mangecek bantuak itu? Aminah ndak baa do, iko kan kahandak Aminah surang

Mandeh : Saida jo Dahlan ndak ado baa do kan?

Saida : Apo maksud Mandeh ko? Bantuak manuduah Saida Mandeh mah

Mandeh : Indak ado Mandeh manuduah Saida do nak. Mandeh binguang se mancaliak kalian, bini si
Dahlan Aminah, tapi Mandeh mancaliaknyo bantuak Saida yang jadi bini Dahlan

(Dahlan & Saida Gugup)

Aminah : Indak mungkin Saida malakukan itu do Mandeh

Saida : Iyo Mandeh, Mandeh ndak buliah manuduah Saida bantuak itu

Mandeh : Yo lah kok bantuak itu, maaf Mande hyo

Lah sudah makan malam tuh, mereka pai ka kamar masing-masing. Aminah mancuci piriang bakeh
makan keluarganyo, lah sudah Aminah cuci piriang, Inyo nio baliak ka kamarnyo. Tapi tadanga dek
inyo suaro Dahlan jo Saida.

Saida : Ndeh, baa ko da? Takuik lo Saida jadinyo

Dahlan : Uda takuik lo, tapi Uda ndak nio malapeh Saida do

Saida : Baa ndak uda lapeh se uni tuh? Habis tu pai wak dari siko. Paniang lo Saida mandanga Abak
berang-berang se tiok hari

Dahlan : Uda nio lo bantuak itu, tapi pitih uda alun ado lai. Beko jo apo awak hiduik?

Saida : Saida lai ado pitih haa, Abak lai maagiah Saida pitih tiok bulan. Tapi Saida ganti jadi ameh

Dahlan : Lah bara gram ameh Saida?

Saida : Lai 5 kg da, soalnyo dari ketek lai

Dahlan : Ndeh, santiang Saida lai. Aminah se ndak ado manabuang do

Saida : Yo tando bodoh uni tuh mah

Dahlan : Ndak salah Uda cinto samo Saida

Saida : Saida cinto lo samo uda

Aminah yang mandanga itu, nio ka manangih rasonyo. Jadi salamo ko Dahlan indak cinto samo inyo?
Kok tau apo yang Abak kecek tu batua, Aminah indak akan kawin samo Dahlan do. Buto bana inyo
samo Dahlan.

Bisuak paginyo, Aminah langsuang ka tampek Erizal. Inyo sadang karajo manjamua bareh.

Aminah : Uda

Erizal : Eh? Manga adiak ka siko? Angek siko

Aminah : Uda lai tau Dahlan jo Saida ado sesuatu?

Erizal : Baa tuh diak?

Aminah : Patang habis Uda pai dari rumah, Aminah ndak sangajo mandanga Saida jo da Dahlan
mangecek tentang pai dari rumah, ka tingga baduo. Tu dikecek dek Saida inyo punyo banyak ameh

Erizal : Eh iyo diak?

Aminah : Iyo da, ndak tau Aminah ka manga lai do. Sakik hati Aminah

Erizal : Yang waktu Saida yang maantakan rantang tuh Aminah yang masak?

Aminah : Hah? Indak lah da, karajo Aminah dirumah banyak. Ndak sempat masak untuak da Dahlan
do

Erizal : Waktu maantakan rantang tuh, Saida mangecek kalo Adiak yang masak. Tuh mandeh
manyuruah inyo maantakan ka pasa dek adiak sibuk. Keceknyo adiak ndak pandai masak, makonyo
diajakannyo
Aminah : Lai pandai aminah masaknyo da, tapi Aminah ndak tau baa bisa samanih itu sup. Padahal
lah Aminah caliak bana kalau Aminah mamasuakkan garam

Erizal : Mungkin se Saida yang mamasuakkan gulo ndak? Inyo kan suko samo Dahlan

Aminah : Yo bana da? Ndeh, kok gitu Aminah yang bodoh maa

Erizal : Eh, jan manangih lo diak. Kok adiak baleh se mereka baa?

Aminah : Baleh baa da? Aminah ndak tau baa caronyo do

Erizal : Kalau Dahlan bisa, manga ndak adiak baleh baliak?

Aminah : Laki-laki maa yang bisa Aminah ajak da? Ma ado anak bujang yang nio samo Aminah lai?

Erizal : Ndak tau adiak kalau Uda lah cinto samo Adiak sajak awak basobok patamo kali? Tapi dek
adiak lah kawin jo Dahlan tu Uda bisa baa lo lai

Aminah : Yo bana uda cinto samo Aminah? Lai indak bantuak da Dahlan do?

Erizal : Bedalah, muko nyo se lah beda. Apo lai parangainyo, inyo kan tukang judi dulu.

Aminah : Iyo da? Tu baa Saida bisuak tuh? Lai ndak ka dicilok nyo ameh Saida beko tuh?

Erizal : Ndak tau lo Uda do diak

Aminah : Jadi baa da? Uda lai nio manolong Aminah

Erizal : Emang adiak nio samo Uda? Uda kan anak buahnyo Abak Aminah se nyo

Aminah : Aminah ndak paduli sia urangnyo, asal inyo elok dan ndak bantuak da Dahlan. Kalau jo Uda,
bia Aminah cubo untuak cinto sama Uda

Erizal : Yo bana ko diak?

Aminah : Iyo da, Aminah nio mancaraikan da Dahlan lo. Lah panek lo Aminah da Dahlan berang-
berang se taruih

Erizal : Lah carai Aminah samo Dahlan, bia Uda ka rumah untuak malamar Aminah

Aminah : Makasih yo da, harusnyo sajak awal Aminah kawin jo Uda se lah.

(Tagalak Erizal)

Aminah : Kalau gitu Aminah baliak dulu yo da, Uda kok panek pai se lah ka rumah. Beko Aminah buek
an teh beko.

Erizal : Jadi diak, elok-elok yoo

Aminah pun baliak ka rumah, rancananyo beko malam ka inyo kecekkan niatnyo beko. Lah malam
hari, sadalahnyo bakumpua di ruang makan. Mereka makan dengan tanang, lah sudah sadalahnyo
makan, mereka bacarito tentang sahari ko.

Dahlan : Banyak yang mambali ayam Dahlan tadi bak?

Abak : Lai habis dagangan ang?

Dahlan : Lai bak, banyak untuang Dahlan

Aminah : Mandeh, Abak, ado yang nio Aminah kecekkan

Abak : Apo tuh?

Aminah : Aminah nio carai samo da Dahlan

Dahlan : Apo yang adiak kecek ko? Kalau panek lalok lah dulu, bia Saida yang mencuci piriang

Aminah : Uda, jujur se lah Uda. Manga se Uda jo Saida? Tadi malam Aminah danga Uda nio pai dari
rumah ko jo Saida. Pitih Uda masih saketek, tapi Saida lai punyo banyak ameh.

Aminah : Uda kecek pulo Aminah indak ado manabuang, lai ado Aminah manabuang da. Aminah
manabuang di balai desa. Tapi Aminah alun nio mamakai pitih itu dek Aminah takuik awak indak
bapitih bisuak, tapi Aminah ndak nyangko Uda ka bantuak iko do

Dahlan : Darima adiak tau? Kalau adiak pandai mangecek indak ado urang yang ka picayo bisuak

Aminah : Mandeh, ado Mandeh suruah Saida maantakan rantang ka pasa untuak da Dahlan?

Mandeh : Bilo Mandeh manyuruah bantuak itu?, Kalau iyo harusnyo Aminah yang maantakan

(Aminah mancaliak Saida yang tampak gugup)

Aminah : Saida kecek lo itu masakan uni, padahal itu Saida yang masak kan?

Saida : Ma lo ado Saida mengecek bantuak itu Uni

Aminah : Erizal yang mangecek, Saida mangecek an lo surang mah, waktu da Dahlan kanai berang
dek Abak, tapi Saida bela da Dahlan. Saida kecek da Dahlan nampak sibuk pas Saida maantakan
rantang

Abak : Yo bana Saida malakukan itu? Kecewa Abak samo Saida. Abak manggadangan Saida indak
untuak jadi urang katigo do, tapi untuak manjadi urang yang elok

Saida : Maaf yo bak, Saida salah

Aminah : Ambiak lah Dahlan dek Saida, Uni lah dapek lo yang labiah rancak lai

Dahlan : Apo yang Aminah kecek ko? Indak ka carai Bagai awak do. Maafkan Uda yoo

Aminah : Habis carai, Aminah nio nikah samo da Erizal yo bak. Batua kecek abak, harusnyo Aminah
mandangakan Abak lai

Dahlan : Aminah, maafkan Uda yo

Abak : Jadi, Abak kawinkan Aminah jo Erizal bisuak

(Abak mancaliak Saida jo Dahlan)

Abak : Kalau bantuak itu, paja baduo ko harus pai dari siko dulu. Ndak pantas mereka tingga disiko lai

Mandeh : Uda, jan balabiah bana. Saburuak apo pun Saida, inyo tetap anak Uda

Abak : Uda indak pernah maaja anak-anak uda bantuak itu do!

Mandeh : Agiah lah Saida kesempatan da.

Saida : Abak, maafkan Saida

(Saida balutuik dikaki Abak, Abak mancaliak Saida bantuak bapikia)

Abak : Abak maafkan, tapi sadalah pitih yang Abak agiah, Abak ambiak baliak. Saida indak buliah lo
tingga di rumah utamo. Tingga di paviliun kiri

Saida : Ndak baa do bak, maafkan Saida yo bak

Dahlan : Aminah, maafkan Uda yoo. Uda tau uda salah

Aminah : Aminah indak nio tau, bisuak awak carai. Malam ko juo, pai Uda dari rumah ko

Dahlan : Aminah, maafkan uda yo. Uda janji indak ka maulang baliak

(Abak tagak dan menyeret Dahlan kalua dari rumah)

Abak : Jan baliak ang lai. Kok Nampak dek den muko ang, den ancuakan muko ang tu beko

(Abak manutuik pintu)

Abak : Lalok lah Aminah lai, bisuak bia Abak urus surek carai kalian

Aminah : Makasih yo bak

Bisuaknyo, Abak langsuang maurus surek carai Aminah jo Dahlan. Habis tuh, rami urang yang
marayokannyo. Sanang hati mereka dek masih bisa kawin jo Aminah. Dahlan yang mandanga kaba itu
langsuang ka tampek karajo Erizal.

Dahlan : Ang pangaan bini den hah?!

Erizal : Manga den? Salah ang mah, lah diagiah bini rancak, yang elok parangainyo, tapi ang padiakan
se bantuak itu

Dahlan : Dek ang masuak ka rumah tangga den mah, makonyo goyah hati Aminah

(Erizal tagalak)

Erizal : Dek den? Aminah tuh cinto bana samo ang, ang se yang manyio-nyiokannyo. Bisuak kalau
den kawin jo Aminah, den ndak ka bantuak ang do. Amuah ang main balakang dek padusi bantuak
Saida, lah jaleh wataknyo buruak.

Erizal : Oh yo, watak kalian kan samo-samo buruak

Dahlan : Kurang aja muncuang ang mah

(Erizal & Dahlan bacakak, sampai akhirnyo Dahlan mati dek kanai kerisnyo surang)

Saida : Uda!

(Saida balari mandakek sambil manangih tersedu-sedu)

Saida : Baa da Erizal jaek?! Da Dahlan ndak ado manga-manga do

Erizal : Inyo yang maajak bacakak mah. Buliah uda indak mati, tuh Uda lawan inyo

(Saida manangih maratok Dahlan yang lah mati)

Masyarakat tibo dek mandanga suaro bisiang, mereka takajuik mancaliak Dahlan yang mati di
tampek mantan mintuo nyo.
Warga A : Untuang se inyo mati, kok indak diciloknyo taruih pitih wak

Warga B : Iyo kan? Kok masih hiduik nyo, dicilok nyo se pitih jo barang-barang wak

Warga C : Karma tuh mah, inyo kan preman pasa dulu. Dek kawin samo Aminah se nyo barubah nyo

Hari itu juo Dahlan dikubuakan. Malamnyo, Aminah sadang basikek di kamarnyo. Minggu iko juo inyo
akan kawin jo Erizal. Tibo-tibo Saida masuak ka kamarnyo. Mato Saida bangkak dek manangih sahari
ko.

Aminah : Manga Saida ka siko?

(Saida aniang mancaliak Aminah, matonyo sinis mancaliak Aminah)

Aminah : Kok ndak ado manga-manga, kalua dari kamar Uni

Saida : Sombong uni kini yoo, mantang-mantang ka kawin jo da Erizal. Saida ndak bisa kawin, tu dek
da Erizal nyo

Aminah : Tadi kan da Dahlan yang maajak bacakak, bantuak se preman tapi bacakak indak pandai

(Saida tagalak, Aminah binguang mancaliak Saida)

Saida : Masih bisa jo Uni sombong kini?

Aminah : Apo kecek Saida ko?

(Saida mangaluakan pisau dari baliak badannyo dan bajalan mandakek ka Aminah)

Aminah : Saida, buang pisau tuh

Saida : Kalau Saida indak bisa kawin jo da Dahlan, harusnyo Uni ndak bisa juo kawin jo da Erizal

Saida : Saida indak akan bisa manang malawan da Erizal, jadi kok Uni se yang Saida bunuah baa?

Aminah : Saida!

Saida : Dek uni, Saida indak bisa kawin jo da Dahlan do. Dek calon Uni tu, da Dahlan mati di
pamalukan

Aminah : Saida, mambana Uni. Jatuahan pisau tuh

Saida : Kok tau bantuak iko, Saida indak akan pernah amuah jadi Adiak Uni. Nyasa Saida jadi Adiak
Uni

Aminah : Saida, jan bantuak itu. Jatuahan pisaunyo, luko awak beko.

Saida : Talambek Uni minta maaf, harusnyo sejak awal lai

Aminah : Saida!

(Saida & Aminah bacakak bantuak padusi, tapi akhirnyo Aminah mati dek Saida)

Saida : Maaf yo Uni, Uni harus mati hari ko. Saida bado’a semoga Uni indak basobok jo da Dahlan
bisuak

Tibo-tibo Mandeh masuak untuak mancari Aminah.

Mandeh : Aminah, dimungko ado E- Aminah!!

Mandeh balari dan mamaluak Aminah yang lah mati.

Mandeh : Baa Saida bantuak iko nak? Apo salah Uni ka Saida?

Saida : Salah Uni banyak Mandeh, ndak tahan Saida manampuangnyo Lai

Abak jo Erizal masuak dan takajuik mancaliak Aminah yang panuah dek darah.

Erizal : Aminah!!

(Erizal mandakek dan manangih kareh)

Erizal : Aminah, baa Aminah pai sabalum awak kawin?

Erizal : Kini jo sia Uda ka malabuahkan hati ko lai? Indak ado anak gadih di siko yang sabana
sampurna bantuak Aminah do

(Abak mancaliak Saida yang indak maraso basalah samo sakali)

Abak : Pai kau dari rumah ko! Ndak usah baliak!. Mulai kini, anak den Aminah surangnyo.

Saida : Sajak dulu Abak kan cuman sayang samo Uni se nyo, Saida ma pernah Abak sayang

(Mandeh tagak dan manampa Saida)

Mandeh : Mandeh ndak pernah maaja Saida bantuak iko, dari ma Saida dapek parangai bantuak iko?

Kemungkinan Cast

Dahlan : Bastian

Aminah :

Erizal : Wafi

Saida : Hanip

Amak : Awik

Abak : Abri