BHAKTI MARGA PINAKA JALARAN NYUJUR JAGADHITA

Om Swastiastu
Om Anobadrah Krtavoyantu visvatah
(Dumogi pikayunan luwih rauh saking sakancan genah)
Inggih, suksma aturang titiang majeng ugrawakya inggian galah sane sampun katiba ring
padewekan titiang.
Para angga dyaksa panureksa sane dahat kusumayang titiang,
Para pamilet wimbakara sane tresna asihin titiang.
Asapunika taler ida dane sinareng sami sane nenten prasida ojah titiang saka siki sane dahat
wangiang titiang.
Maka purwaning atur, lugrayang titiang ngaturang rasa angayu bagia miwah puja pangastuti
mantuka Ida Sang Hyang Widi Wasa duaning pasuecan Ida prasida titiang asapunika taler ida
dane mapadu wedana ring kahanan kenak, rahayu turmaning prasida ngamiletin wimbakara
dharma wacana puniki, sane mapaiketan ring PORSENIJAR Klungkung warsane mangkin.
Titiang pamilet no. undi… jagi ngaturang Dharma Wacana sane mamurda “Bhakti Marga
Pinaka Jalaran Nyujur Jagadhita”

Inggih ida dane para semeton titiang sane tresna asihin titiang, mungguing titian taler ida
dane sinareng sami sampun prasida tatas sauning indik pakibeh jagate sane mangkin inggih
punika awaor tan pawates ri sajeroning malaksana, akeh pakibeh luir nyane : sex bebas,
maroko, narkoba, nerobos lampu barak taler minum-inuman sane ngawinang punyah raris
ical manahnyane sane waras, lali ring padewekan, lipia ring angga tan madalem jiwa
pramana. Asapunapi antuk nepasin pakibeh punika?, to ngudiang akeh pertak janane keni
pakibeh kadi asapunika?
Inggih Ida dane sareng sami sane dahat wangiang titiang, akeh sastra agama sane pinaka
anggen dasar nepasin awor tan pewates sekadi iwawu silih tunggil wenten sane kabaos
ajaran catur marga. Maosang indik catur marga, yening selehin ring pikenohnyane catur
marga punika silih sinunggil tetuek sastra, sane mungguh ring pustaka suci Veda, yening
baosang artos nyane wantah papat pamargi sane prasida ngantehang manusa nyujur jagadhita,
miwah nyujur Ida Sang Huang Widhi Wasa. Yening wilangin titiang saka siki daging catur
marga punika :
1. Bhakti marga, wantah utsaha nyujur jagadhita lan moksa malarapan antuk bhakti
majeng Ida Sang Hyang Parama Kawi, Sane patut kalaksanayang ngaturang bakti ring
Ida Sang Hyang Widhi Wasa minakadi ngaturang bakti ka pura, bakti ring guru
susrusa turmaning bakti ring guru rupaka.
2. Karma marga, wantah utsaha nyujur jagatdhita lan moksa malarapan antuk
parilaksana, sane nenten mapaiketan ring phala utawi parilaksana sane tulus iklas.
 Sane patut kalaksanayang antuk makarya sane mautama minakadi ngruruh
pangupajiwa mangda iraga manemu bagia lan santih, masedana, madana punia, maka
miwah sane lianan
3. Jnana marga, wantah utsaha nyujur jagatdhita lan moksa melarapan antuk jnana utawi
ilmu pengetahuan. Sane patut kalaksanayang antuk widya kaweruhan sangkaning
manah nuek lan lascarya minakadi malajah sane seleg, madwijati, maka miwah sane
lianan
4. Raja marga, wantah utsaha nyujur jagatdhita lan moksa melarapan pengendalian diri
utawi meditasi. Sane patut kalaksanayang antuk meditasi ngruruh kalanggengan ring
jagat luire tapa, brata, upawasa, turmaning semadi
Yening baosang utsaha sane pinih becik, patut margiang ring aab jagate, ring aab jagat kali
yuga. Inggih punika wantah bhakti marga. Iriki Ida Sang Hyang Widhi nirgamayang sakadi
Sang Nataratu sane dahat asih ring sarwa prani ring jagate. Yening manut ring Bhakti Marga
Ida Sang Hyang Widhi Wasa wantah, Ida dahat nampek, akeh sane tresna mejeng Ida. Manut
sakadi sloka Bhagavdgita (IV.11) inggih punika :
Ye Yatha mam prapadyante
Tams tathaiva bhajami aham
Mama vartmanuvartante
Manusyah partha sarvasah
Sane tegesnyane :
Sapunapika utsaha I manusa nampekin “Titiang” pastika titiang terima. He Arjuna. I manusa
wantah mituutin utsaha titiang sinamian.
Inggih ida dane sinareng sami sane dahat wangiang titiang, bhakti punika wantah wit
yening maosang indik Agama. Utsaha bakti punika, wantah utsaha sane pinih dangan yening
sandingan ring utsaha sane lianan. Ring bhakti marga punika, nenten wenten pamargin sane
abot. Unteng bhakti marga punika wantah lascarya turmaning rasa tresna ring Ida Sang
Hyang Widhi Wasa.
Yening rerehan titiang ring satua. Indik cerita Rama Awatara. Rama Awatara punika
wantah pawijilan Ida Sang Hyang Wisnu ring jagate sane ngambil rupa makueh manusa sane
maparab Sang Rama, taler Ida Sang Rama punika wantah pinaka Natta Ratu : kacarita.
Sapamargin Ida Sang Hyang Rama kalawan bhakta nyane sane maaran Sabari. Sabari punika
wantah anak istri, saking sudra wangsa sane madue pikayun mangda prasida mikolihang
pasuecan Sang Rama, taler kacunduk sareng Ida Sang Rama. Sabari madue pondok genah
ipun masayuban ring tengah alas. Sabari ring salantang yusane, pangaptine mangda kacunduk
sareng Ida Sang Rama. Ring sajeroning pemargin sarahina-hina sabari setata mupula
minakadi woh-wohan, sane jagi katurang majeng Ida Sang Rama, sane setata kaapti. Punika
nemonin duasa sane becik napi sane setata kaapti oleh Sabari mangda prasida kecunduk
sareng Ida Sang Rama prasida kedagingin. Rikala punika Ida Sang Rama prasida ngiunin
minakadi napi sane sampun katurang olih Sabari. Irika raris Sabari mapi-mapi runtuh mangda
prasida ngaturang sembah bhakti ring linggih Ida Sang Rama. Irika raris wenten atur Isabari
majeng linggih Ida Sang Rama. “Uduh Ida, Ida Sang Rama, pinaka prewardin Widhine ring
jagat, kewentenan dewek titiang wantah nista lan papa. Sakemaon titiang meled ngaturang
bhakti ring Ida. Tambet titiang kalintang wenten pinunas titiang sapunapi indik sapatutnya
jalan antuk titiang ngaturang bhakti ring Ida. Raris irika Ida Sang Rama nyawis atur Sabari.
“Uduh Sabari yening maosang jalan bhakti majeng Ida, punika lempas nenten kaikat ring
artha brana, kawibawaan, sakemaon wantah manah lascarya ring Ida punika”.
Inggih Ida dane sane dahat wangiang titiang maosang jalan bhakti punika, akehnyane
wenten sia sane loktah kesengguh Nawa Widha Bhakti (Bhagavanta Purana VIII.5.23)
inggih punika :
Sravanam, kirtanam, visnohsmaranam,
Padasevanam, vandanam, arcanam, dasyam,
Sakhyam, atmanivedanam.

Sane tegesnyane :
1. Mirengan minakadi keagungan Ida Sang Hyang Widhi (Sravanam).
2. Nembangan parab-parab Ida Sang Hyang Widhi utawi kidung – kidung suci (Dharma
Gita). Kirtanam Ngelingan turmaning setata ingat ring keagungan Ida Sang Hyang
Widhi (Visnohsmaranam).
3. Ngaturang sembah bhakti ring cokor Ida Sang Hyang Widhi (Padasevanam)
4. Ngewacen pustaka suci utawi Veda (Vandanam)
5. Nganyekalang prewaktekin linggih Ida Sang Hyang Widhi merupa arca (arcanam)
6. Ngaturang ayah majeng Ida Sang Hyang Widhi (dasyam)
7. Mautsaha mangda prasida nampek ring Ida Sang Hyang Widhi (Sakhyam)
8. Lascarya turmaning iklas majeng Ida Sang Hyang Widhi (Atmanivedanam)
Inggih Ida dane sane dahat wangiang titiang, unteng nyane sane baosang titiang, mungguing
bhakti marga pinaka jalarang nyujur jagadhita, inggih pinika. Bhakti sane lascarya punika
pastika muatan rasa lega, turmaning rasa doh saking sengsara. Bhakti marga punika taler
kasujatiane wantah utsaha sane setata madasar jagi ngerereh Ida Sang Hyang Widhi. Ri kala
jatma prasida ngamargiang bhaktine punika, pastika jatma manusa punika prasida
maparisolah asah, asih, asuh ring sakancan maurip ring jagate.
Inggih Ida dane sane dahat wangiang titiang. Wantah asapunika prasida aturang titiang.
Suksma majeng ida dane sampun sida nguratiang saha mirengang tur maning yening prade
wenten atur titiang sane nenten manut anggah angguhing basa Bali, nenten lali titiang
nglungsur geng rena pangampura mungguing ketambetan titiang sane kalintang.
Makawesaning atur puputang titiang antuk parama santih
Om Santi, Santi, Santi Om