SEJARAH PARTANGIANGAN NABABAN 13 OKTOBER 1955

SIJABUJABU DOHOT PARTANGIANGAN NABABAN 13 OKTOBER

Pinatomutomu ni : Pdt.T.P. Nababan (Ompu Theresa), SN No.18

Dihatihai, molo maralohon manang mamereng hamajuon ni marga naasing tung mansai
dao do hatinggalan hita Pomparan ni Borsak Mangatasi Nababan. Mansai maol do dapot
hamajuon di Nababan, Boru, Bere/Ibebere, baik di bidang ekonomi, sosial, parsingkolaan,
pangkat, nanggo apala gabe sintua pe di gareja dang boi sahat.
Boasa songon i masa tu marga Nababan?
Hatartinggalon ni marga Nababan i sai margurasa di roha ni si Jabujabu, ujungna diboan
ibana ma di partangiangonna tu Debata Jahowa, ala i do dihaporseai ibana na boi jala na
gabe pangalualuanna. Di tingki na martangiang i ibana tu Debata mangalualuhon
hapariron na niae ni marga Nababan, ro ma alus ni Tuhan i tu ibana songon on: Ia
Borsak Mangatasi Nababan sahalak datu bolon do. Ala hadatuonna gabe sihabiaran
ibana, lomolomona tu sude hombar balokna. Ingkon hatana do na saut, na sintong jala
sioloan ala malona manghatai. Pardihutana pe ndada holan sada, tung lomona do
mangalap boru ni halak nang pe naung marhamulian. Tung godang ma ulaon hadosaon
diula ala hadatuonna i. Jala godang halak susa ala utiutian ni hadatuonna na maralo tu
hakristenon. Dosa i ma na mangonai tu pomparanna.
Dung songon i boaboa ni Tondi i tu si Jabujabu di tingki na martangiang i ibana,
dielehelek ibana ma Tuhan i di tangiangna, didok: “Boi dope topotannami dosa ni
ompunami i tu ho Tuhan?” Ro ma ninna alus ni Tuhan i, “Songon on ma baenonmu.
Baen ma boaboa tu sude marga Nababan di sandok portibi on, asa marpungu hamu
rap martangiang di sada tingki, martangiang mangido hasesaan ni dosa ni
ompumuna i asa marpangulahi rohangKu tu hamu marga Nababan, jala molo olo
hamu martoruk ni roha”.
Hombar tu alus ni Tuhan i, dipapungu si Jabujabu ma angka natuatua ni marga Nababan,
sian sandok luat. Dipatangkas ma taringot tu pangalaho ni ompu i na jolo. Dipatorang
angka natuatua i ma taringot tu hadatuon ni ompuna i najolo dohot taringot tu parulanna,
dos songon na nidok ni Tuhan i tu si Jabujabu uju na martangiang i ibana.
Dung sada pangantusion dohot pangarimangion ni sude natuatua i, satahi ma nasida laho
patupahon partangiangan jala dipajongjong ma pengurus laho paradehon na hombar tu
partangiangan i. Dipasahat pengurus na dibentuk di panghataion i ma boaboa tu
sandok marga Nababan di sude luat taringot tu sangkap patupahon partangiangan
i. Hatop do ro alus sian angka marga Nababan di bona pasogit dohot na di
pangarantoan, na satolop di sangkap patupahon partangiangan i.
Dung i borhat ma si Jabujabu mandapothon Ompu i Ephorus HKBP Pdt. Dr. Justin
Sihombing tu Pearaja Tarutung laho paboahon sangkap ni marga Nababan na naeng
patupahon partangiangan i. Dung dipatorang si Jabujabu alus ni Tuhan i na mardomu tu
tangiangna na mangido asa dipasupasu Tuhan i marga Nababan; Martangiang ma Ompu
i Ephorus Pdt. Dr.Justin Sihombing rap dohot Ompu i Ephorus di Pearaja, mangido
panuturion sian Tuhan i taringot tu ari dohot tingki ni partangiangan i.
Mangihuthon na sinurat ni inang si Jabujabu na dijahahon di Partangiangan 13 Oktober
2008, on ma alus ni Tuhan i tu nasida na martangiang i: “Tanggal 13 Oktober 1955 ma
1
bahen hamu ari ni partangiangan i”. Hombar tusi, mangihuthon inang Ompu Poibe br
Sitompul, pardihuta ni Sijabujabu, Debata do na manontuhon ari ni partangiangan i
marhite Ephorus HKBP, Pdt. Dr. Justin Sihombing. Domu tusi ma, ditotophon inganan ni
partangiangan i di Siborongborong ari 13 Oktober 1955.
Marpungu ma sude marga Nababan martangiang di ari 13 Oktober 1955 di lapangan bola
Siborongborong na niuluhon ni Ephorus HKBP Ompu i Pdt. Dr. Justin Sihombing.
Jamita ni Ompu i uju i dienet sian Jesaya 40:31 dohot Jesaya 35:10.
Jesaya 40:31 Alai angka na marhaposan tu Jahowa maruli hagogoon mardapotdapot,
gabe marhabong ni lali laho manaek. Marlojongi nasida ndang olo loja, mardalani nasida
ndang olo mandate.
Jesaya 35:10 Jadi mulak ma sogot halak angka na pinalua ni Jahowa, jala mariaia ro tu
Sion; jala halalas ni roha salelenglelengna di atas ulunasida, dapotan hilas dohot las ni
roha nasida, alai maporus ma anggo arsak dohot hoihoi.
Di Partangiangan i, marpadan sude marga Nababan. Padan i disurathon di Kartu
Kesatuan Keturunan Borsak Mangatasi Nababan, songon on: “Pada tanggal 13/10/1955,
pukul 12 siang WSU bertempat di Siborongborong diadakan pesta perdjamuan
(partangiangan mangido pasupasu), dan seterusnja pada tiap2 tanggal 13 Oktober
saban tahun semua marga Nababan harus mendoakan di tempat masing2 sebagai
memperingati dari hari jang bersedjarah tersebut jang djuga memesankan kepada
keturunan kita masing2.
Nenek mojang kita mulai dari Borsak Mangatasi turun temurun kepada Siantar Djulu,
Siantar Djae, Sisogosogo, O.Domiradja sampai Sandar Nagodang dan Tuan
Sirumonggur adalah jang gagah perkasa, datubolon, Radja Parhata, Parhata Oloan jang
berani. Djikalau sekiranja ada dosa jang diperbuatnja jang mungkin mengakibatkan
penanggungan kepada keturunannja, makanja kita mengadakan pendoaan sambil
menghapuskan dosa satu sama lain diantara kita marga Nababan.
I do umbahen marpungu marga Nababan ganup ari 13 Oktober, laho parataratahon
padan panopotion ni dosa i. Tona ni Partangiangan 13 Oktober 1955 i do na taingot,
na taulahon, molo tapatupa Partangiangan 13 Oktober, ganup taon. Parpunguanta
ganup taon, 13 Oktober, ndang ulang taon ni marga Nababan i. Ndang adat i, ingkon disi
hulahula molo tapatupa Partangiangan 13 Oktober. Ndang ingkon mangan-mangan,
marbagi jambar molo tapatupa partangiangan 13 Oktober, na martangiang do hita;
partangiangan do sintuhu ni parpunguanta 13 Oktober.
Mangihuthon panghilalaan ni marga Nababan, dung dipatupa Partangiangan i masa ma
haimbaruon di parngoluon ni marga Nababan, lam torop ma na marsingkola di Perguruan
Tinggi. Adong ma dua marga Nababan dipabangkit gabe Pandita HKBP, di taon 1956, ima
Pdt.Dr. SA.E. Nababan, dohot Pdt. N.J. Nababan.
Ima alana umbahen sai marpungu marga Nababan di 13 Oktober laho mangarataratai
padan panolsolion ni dosa tu Debata, dohot manaringoti denggan basa ni Debata tu
marga Nababan. Alani i Partangiangan 13 Oktober, ndang adat, ndang ulang taon ni
marga Nababan, na martangiang do laho marningot denggan basa ni Debata, dohot
manopoti dosa. Ndang sala molo nidok, di marga Nababan, ari 13 Oktober i ma ari
pertobatan, manang ari hamubaon ni roha.

2
Partangiangan 13 Oktober boi dohonon ima “Ari Parpadanon” (Hari Kebulatan Tekad)
laho mangoloi Jahowa. I do na pinasahat ni Hata ni Debata na gabe jamita ni Ephorus
Pdt. Dr. Justin Sihombing di ari 13 Oktober 1955, na mandok, “Alai angka namarhaposan
tu Jahowa maruli hagogoon mardapotdapot, marlojong ndang olo loja, mardalani ndang
olo mandate”.
Tudos do Partangiangan 13 Oktober 1955 tu parpunguan ni bangso Israel na jolo uju
dipaluhut nasida laho patupahon kebulatan tekad na holan Jahowa sioloan nasida. Laho
mamongoti tano Kanaan, tano bagabaga i, dipaluhut si Josua bangso i, laho
parataratahon padan na niundukhon nasida na jolo, na holan Jahowa sioloan nasida.
Suman tusi do marga Nababan na patupahon partangiangan 13 Oktober, marpungu laho
parataratahon padan ni natorasna na jolo na holan Jahowa do sioloannasida.
Partangiangan 13 Oktober, partangiangan hamubaon ni roha, punguan na
manghangoluhon partangiangon. Marhite Partangiangan 13 Oktober dipaingot marga
Nababan, na holan Jahowa do mual ni hatuaon di sandok jolma, dohot di marga
Nababan.
ON MA SEJARAH PARTANGIANGAN "PERTOBATAN" BORSAK MANGATASI
NABABAN "sai gabe SI PARTANGIANG MA SUDE PINOMPAR NI BORSAK
MANGATASI (NABABAN, BORU, BERE, IBEBERE).”
Horas ma di hita sude. Horas, horas, horas.

Disalin kembali oleh,