~PA'PASSAKKE - KURREAN SUMANGA'~

Bungkaran Kada Tabe’ lako to urria tannun alukna paturan guntu’; Puang Matua doomai langi’ To
ussambe’ tali kusan pallean na pala’ to galugu, To kaubanan lan mai lisunna Batara. Tabe’ lako taruk
bulawanna lindona bulan, Lolo sumanikna todipaberrana Allo. Sa’buran pe Kapuangan lan Tallu
Lembangna na lako To di Ampulembangngi digente’ Ma’dika Matasak diong mai Padang
Kalambunan Allo, Lembang Kabotoan Kulla’, na lako Balimbing Kalua’, Tipari’tikna Bura – bura.
Tabe’ lako To Sitoe Tokon Petokonna Lembang, To Sikambi’ Pebose tang damma’ lan tumengkana
tondok sa’buran To Ma’parenta. Tangdipasalian rinding lako mintu’ torro to buda, tangdipaleko’na
manangnga banua anggenna tau kamban lan lili’na Tondok Toraya Tiku randanna Tana Matari’ Allo.
Kurre sumanga’na inde padang tuo balok, saba’ parayanna inde liku tumbuku – buku. Kurre
sumanga’na inde padang nabumbun rongko’, saba’ parayanna inde inan ma’lite bumbungan. Te
padang mangka napilei langsa’ nene’ todolo, natonno’ bua kayu allo angi’na.. Kurre sumanga’na
langngan Puang Matua dao tangngana langi’, Puang to kaubanan lan masuanggana batara. Puang to
palullungan dao daun ma’gulung – gulunganna. La rampopa’ metundan to mamma’ te kulla’ di rande
lulangngan anna songlo’pa mellao langi’ situru’ sarira rampan dikapadanganna tu’tun koli – koli
inde’ te inan kaparannuan Tondok Toraya tungka sanganna. Passakkei te To unggaragai te halaman
“TORAJAKU”, rinding pala’i tu to patama pangngampa’na, kulambu tarunoi tu mintu’ tau lante
padang matari’ allo lili’na lepongan bulan. Bura’kan lindo masakke sola nasang, pi’pikki tanda
marendeng tu mintu’ to tama lante Halaman TORAJAKU angki tontong masakke’ mairi’ marudindin
sola nasang. Kurre sumanga’na te allo melo totemo saba’ parayanna te kulla’ dimarassan Kurre
sumanga’na..