PARTORDING NI ULAON

NA HOHOM
(IBADAH PERENUNGAN
KEMATIAN YESUS KRISTUS)

Jumat, 30 Maret 2018

HKBP ARGA MAKMUR RESSORT BENGKULU DISTRIK XV SUMBAGSEL

Marende Huria B.E No. 449 : 1 – 2
“Sai Solhot Tu SilangMi” BL. 300
 B.E No. 449 : 1 – 2
“Sai Solhot Tu SilangMi” BL. 300

1. Sai solhot tu silangMi Jesus

ingananhu. Mual na mabaor disi,
ima inumonhu. SilangMi Tuhanhi,
ima pujionhu. Paima sogot sahat
au, i endehononhu.
... Jongjong ...
2. Lao ma au tu silangMi, i
haporusanhu. Sai asi ma rohaMi,
unang tulak ahu. SilangMi Tuhanhi,
ima pujionhu. Paima sogot sahat
au, i endehononhu.
VOTUM – INTROITUS – TANGIANG
Hata Ni Debata Sian :
ROM 6 : 3 – 5
• Na so diboto hamu do on: Sude hita, nasa
naung tardidi tubagasan Kristus Jesus,
tubagasan hamateanNa do hita tardidi?
• Antong, naung tartanom do hita rap dohot
Ibana marhitehite pandidion i tubagasan
hamatean, asa marparange hita di bagasan
ngolu na imbaru, songon Kristus naung hehe
sian angka naung mate hinorhon ni
hasangapon ni AmaNa.
• Ai anggo nunga sanghambona hita dohot
Ibana, di na rap mate hita dohot Ibana i, suang
songon i ma hita nang taringot tu haheheon.
Amen!
Marende Huria B.E No. 84 : 1
“Aut Na Ginorga” BL. 195
 B.E No. 84 : 1
“Aut Na Ginorga” BL. 195
• Aut na ginorga tu rohangku, bohiM
di na lao mate Ho. Aut na huingot o
Tuhanku, tongtong pangkophopMi
di au. Ai Ho do paluahon ahu,
dosangku do pinorsanMi. Didaoni
Ho parsahitonku, martua au
binahen nii.
GORGA MA TU ROHAM
• Gorga ma tu roham ale angka ama
parsinuantunas. Uhirhon ma tu
tondim ale angka pasinuanbeu,
panghilalahon ma ale siadosan
parpangarudok na togos.
• Ida ma Tuhanta i si rajaibot, nunga
gantung Ibana di silang i. Begema
simarimbun, nunga dipangiar Jesus
soarana.
• Tangihon ma sibijaon, unga
marsoara na gogo Ibana mandok,
Eloi, Eloi Lama Sabachtanei – Ale
Debatangku – Debatangku, boasa
tung tadinghononmu au?
• Debata ditadinghon Debata?
ditadinghon? Nunga ditadinghon
jolma Ibana, nunga ditadingkon
angka siseanNa, gari mataniari
nunga naeng manilu manadingkon
Ibana.
• ida hamu ma jolma i ninna si Latus
na sangap i. Beha ia ho,
tadinghononmu doi? Dohononta
ma, patut ma antong
parmudarhononhu na tinaon ni
Tuhanki asa marpanghorhon i di
ngolungki.
• Ala ni i, hupaunduk nama
simanjujunghu, hupatungki ma
panailingku. Hupahusorhusor ma na
tinaon ni Jesus i anggiat jumpangan
tua ahu, anggiat dapotan ngolu ahu
sian siaginon ni Tuhanki.
• Asa hisar tondingku siala
parsilungunonnai. Ndang tarbahen
so marsinunuton ahu ganup ari di
siulubalangari on molo
hupahebaheba ngolungku dohot
sileapon ni Tuhanki.
• Amang, bege ma tardok hira na tolu
hata do na manghamham
partinaonan ni Tuhanta ro di
hamamatena i sogon batu
mardalihan na so tarsirang. Patut
ma tapeop i.
• Manghuling ma Ho Tuhan sian
silangmi, mananginangi do hami na
dangol on, na hundul pualpualon na
tindang pangalelaon on ala ni dosa i.
Ia sitolu hata na ginoaran ondeng,
angka on ma a gabe hata mutiha ni
sitaonon ni Tuhanta i.
1. GABBATA
Hata Heber doi na mandok, patar
batu na nilapisan dohot marmer,
habangsa paruhuman na jinuguhon
ni si Latus laho mandabu uhum tu
Jesus i ninna si Johannes.
• Pasada ma roham mangihutihut
Tuhanta saleleng diparuhuman i,
ima naeng soarahonon ni Gabbata
on. Paihutihut ma sude hata,
linsinglinsing dohot reherehe nang
tijur pe na masa di Gabbata on.
2. VIA DOLOROSA
Tu hata Latin do on na mandok,
dalan sitaonon, lapang haberniton,
manang dihata andung didok ma on
padang haroburon,
• i ma dalan na binolus ni Tuhanta
mamungka dung ampe tu
tangkuhuk manang tu situmalha ni
Tuhanta i hau pinarsilang na dokdok
i tu sitangkingon ni rajanta i sahat tu
hapapajalna. Paihutihut ma nasa na
masa disi asa lam paltak holong ni
roha ni Tuhanta i.
3. GOLGATA
Na ro do hata i sian Golgoleth di
hata Heber manang didok Gulgutha
di hata Aramn mandok
partangkurahan, inaganan
hapajalan ni Tuhanta i.
• Disi ma Tuhanta paujunghon ulaon
panghophoponna i. Paihutihut ma
na masa disi anggiat lam gomal tu
roham hasesaan ni dosa pinatupana
i.
Marende Huria B.E No. 76 : 2
“Sada Nama Sangkap Ni
Rohangku” BL. 195
 B.E No. 76 : 2 “Sada Nama Sangkap Ni
Rohangku” BL. 195
• Ingkon sai Ibana ingotonku, uju na
tarpajal i. Tu hau pinarsilang
ginantungkon, Sai mabaor
mudarNai. Ai humophop au ditaon
uasNa asa dohot au muse upaNa. Ai
di tatap do au on di pandokNa :
“Nunga sun.”
IDA MA NUNGA DIBOAN BE TUHANTA SIAN
PORLAK GETSEMANE
• Ida ma nunga diboanbe Tuhan ta
sian porlak Getsemane jala
dipasahat tu tangan ni angka
panguhum. Nunga sahat ibana tu
Gabbata, ima pantarbatu
paruhuman ni si Latus i.
• Pulutnai rohana manjanghon
Tuhanta i, naung tinali jala tinogu ni
sintua ni malim rapdohot sintua ni
bangsoi marhite torop halak angka
na marpodang jala
marlombutlombut.
• Aha ma so dohonon ni Tuhan i : hira
na dompak panamun do hamu hehe
marpodang jala marlombutlombut
manangkup ahu.
• Nunga dipareso si Hannas, si
Kayafas pe olo hatinggalan,
dipatolon do Jesus tu Debata
Siparngolu i, pola diribakhon ibana
paheanna ala ni rimasna tu Jesus i.
• Di tijuri nasida do bohiNa, na deba
manompuk jala na debanari
mangalinsingi. Siboto surat dohot
natorop i pe pauruuru Jesus i.
• Aha upam di roham ale panguhum
molo degeon ni Tuhanki pantar
batum na marlapislapis i. Songon na
martatasuping ho paidaida Tuhanki
na tinogu tu jolomi.
• Diama ulim molo pola jongjong
Tuhanki di jolom ale Latus? Si Latus
na holongan di pangkat, na mabiar
mida kesar jala na tagi mambuat
roha ni na torop i.
• Boasa paloasonmu sintua ni malim
dohot na torop i pagiar soarana be
martuhashon na so tuhas tu Jesus
na balik bangso do Tuhan i. Na
debanari muse mandok na diorai
Jesus do mangalehon guguan tu
Kesar.
• Adong muse mandok na nidok Jesus
do Ibana Raja jala sipanggunturi do
Ibana marhite pagajaraionna. Ndang
boi be pahohomonmu sude
pamangan ni angka panuhasi na
sumalin on?
 Marende Huria B.E No. 81 : 1
“Jesus Mual Ni Ngolungku” BL. 185
 B.E No. 81 : 1
“Jesus Mual Ni Ngolungku” BL. 185

• Jesus mual ni ngolungku, Sipangolu

tondingki. Ai dibunu Ho musungku,
ima hamatean i. Ho manaoni
hamagoan, patupahon hangoluan.
Ala nii hupuji Ho tung maribu hali
do.
ALE TUHAN! BOASA MA POLA
PALOASONMU
• Ale Tuhan! Boasa ma pola paloasonMu be si
Latus na bisuk i marsuru Tuhanki asa diboan
tu na hinosoman i rohana ima si Herodes
parjahat i? Holan ala dibege ho do Latus na
sian Galilea Jesuski mangajari hape gabe
pintor tarsingot roham tu si Herodes na
hinosomanmi na topet ro mardalan tu
Jerusalem na ribur i.
• Nda marsalisi do hamu na sailaonna
on? Tuani ma adong Jesus ate Latus
asa adong pasurusuruonmu
mambuat rohani si Herodes i.
Boasa?
• Idama nunga diparengkelengkeli si
Herodes Tuhan i, ai las situtu do
rohana ai nunga nania lelengna
naeng idaonna Jesus jala idaonna
nian tanda sipatupaonna songon na
binegena na sailaonna.
• Godanggodang disunghunhon si
Herodes i, hape na pasombu tagas na
do, alani ido umbahen naso dialusi Jesus
ibana nanggo sanghababa. Las roham
ale Herodes manjalo haroro ni Jesus na
tinali i, alani aha do? Alani ribur ni
Jerusalem ido? Alani aha? Paboa ma.
• Oh, ala na naeng berengonmu do
tanda sipatupaonna ala naung
dibege ho baritana. Idama i. Amang
dangol nai, ingkon paluaonmu ma
hape Herodes Tuhanki puaspais
pahaepahulu,
• paulaulaonmu Ibana songon na
dipasangap ho hape na mangaleai,
na mangarehei do ho. Dipaulaula ho
mangalehon abit na uli, hape na
pauruuruhon do ho.
• Amang, dangolnai, ponjot so
nabolon, sungkot so na ginjang
Tuhanki dibahen ho Herodes, tu aha
pe so tampil tudia pe so langku.
Ahama pola alithononmuabit na
arga i, na bontar i tu Tuhanki?
• Ndang na mangaleai ho disi? Inang,
ida ma, nunga dipajantar si Herodes
Tuhanki rap dohot soridaluna i
songon raja bolon mulak tu si Latus
parsipitulili i. Songon i ma hape
dibahen ho ale Herodes asa longkang
hosom naung leleng i tu si Latus.
• O Latus, latus – Ua bahen ma uhum na
sintong tu Tuhanki! Pola
pabengkuhonmu na tigor i? Sian ise ho
marsiajar ale Latus? Pasombuonmu sala
na so marpipot i? Tung barani pulut ma
roham manogu Jesuski huhut
mangalinsingisa?
• Ndang digerekhon ho ale Latus
pambahenan ni soldadu i – idama
nunga di dandani nasida sunsang
duri jala dipaula dipartumpalhon tu
Jesuski. Baju dapdap i pe dialithon
do tu dagingna, nda hinagok ni
palnagaleaion do i?
• O Latus, Latus – tailihon ma, nda
nunga ro ompuapi parsinonduk
bolonmi, nunga donok
pardihutanami, idama nunga sahat
tu pantar paruhumanmi
tungganeborum si Claudia Procula,
na sai busisaon dilambungmi.
• Nda dihusiphon do tu ho, didok
“sotung dihahua ho halak partigor i,
ai mansai susa situtu do ahu na
borngin ala Ibana”ninna do. Boasa
paula so begeonmu i Latus? Tarhona
dope dipaluhut ho angka sintua ni
malim ro di natorop i.
• Tarhona dope dope ho marsijuguhon?
Nunga didok ho nian na sintong, ai
diparhatopot ho do pola ro di tolu hali
mandok : “ndang adong dapot ahu sala
ni halak on”. Diulakhon ho muse
mandok “ndang adong parulaanna
mambahen Ibana marutang hosa”.
• Salpu i, ndang sombu dope roham gabe
didok ho ma muse : “ai aha do na jat
dibahen halak on. Ndang jumpang au di
ibana na tau gabe marutang hosa”. O
Latus, ndang barani ho
manghajongjonghon na sintong?
Matanggak mida rupa ho tahutan mida
bohi?
• Pir ni roham i paloashon angka
soara na marsuraksurak i. Idama
nunga ro ma nosaknosak angka na
torop i, natuatua dohot angka
naposo pe. Bege soara i, oruk nai,
gari soara ni si tengsrdibanua ndang
pola songon i.
• Ronggur nama na maniala. Hape,
hape, soara ni angka jolma doi.
Tangihon ma, nda didok do :
Parsilangkon ma, parsilangkon ma :
padao, padao ma, pusa, pusa ma.
Marende Huria B.E No. 81 : 2 “Jesus
Mual Ni Ngolungku” BL. 185
 B.E No. 81 : 2
“Jesus Mual Ni Ngolungku” BL. 185
• Haleaon, insakinsak, reherehe, tijur
pe. Tali dohot pastap pastap tung
ditaonon Ho sude. Paluahon au na
pogos sian tangan ni sibolis. Ala nii
hupuji Ho tung maribu hali do.
SOMBU MA ANTONG ROHAM
ALE LATUS
• Sombu ma antong roham ale Latus
mambuat aek mamuri tanganmu ala na
so tarbege ho bee suraksurak ni natorop
i, ai lam ganda do goarna. Anggo hurang
dope di ho Latus aek laho mamuri
tanganmi, bidang dope laut dohot tao
ingananna. Dirimpu do ias ho sian na
masa i binahen ni aek i?
• Ah, dangol nai, porsuk nai. Agan pe
diuji ho ale Latus mandok : “lias do
ahu sian mudar ni On, hamu do na
sari disi” anggo dinatorop i mura do
alusnai, nda didok ho, “marsapata
tu hami dohot ianakhonnami ma
mudarnai”.
• Nunga humitir iba managam aha ma
puas ulaning sian pamanganmi ale
Latus? Amang on do hape : Boan
hamu ma Ibana, parsilanghon hamu
ma, ai ndang jumpang ahu salana.
• Pulut ma roham ale Latus
paborhathon Tuhan ki tu silang i,
nunga dilinsingi ho Ibana, hape
linsinglinsing mangonjar jala
pataruhon tu silang i do dibahen ho
i nang pe so jumpang ho salana?
• Boasama so dianturehon roham, so
nanggo diambureshon ho
mamereng soldadu na ro manahopi
Tuhanki? Porsuknai, ida ma nunga
dilinsingi Tuhanku na so olo
mangalo i.
• Pamanat ma tanggurung simardopi
nai, nunga tung marlilitlilit bogas ni
samboksamboknai? Linsinglinsing
na marpalait i nunga hona,
samboksambok na marmata holiholi
martanggurung hulinghuling i,
• nunga marsasak dilibashon tu
tanggurung ni Tuhanki. Idama nunga
mabugang be. O manusia na
disiulubalang nda patut
endehononmu.
 Marende Huria B.E No. 81 : 3
“Jesus Mual Ni Ngolungku” BL. 185
 B.E No. 81 : 3
“Jesus Mual Ni Ngolungku” BL. 185
• Bugang sada tanggurungMu di na
hona linsing i. Hamamalum ni
buganghu na di rohangki do i. Ho do
gabe binuraan au dapotan
hangoluan. Ala nii hupuji Ho tung
maribu hali do.
DIPAULA SO DIIDA HO DO
TUHANKI
 Dipaula so diida ho do Tuhanki,
nunga dilasahi! Tajomtajomnai suga
ni sungsang i. Amang, ima hape
gabe tumpalmu ale Tuhanku?
Amang dangolnai, tung tolong,
sanggar na marbarutu i ma gabe
tungkotmu?
• Nunga disoro tolong i, nunga
dilasakhon tu sungsang duri i na di
simajujungna i. Ah dangolnai, nunga
manirisi jala manetehi songon aek
na sian jenggar, mudar sian
simajujung ni Tuhanki.
• Pareso ma nunga marhimpalhimpal
be simanarup nai, ai marbirsahan do
tu si mudarna i. Patut ma hape
diendehon angka na porseai.
• Sungsang duri ditumpalhon
panginsahi i tu Ho. Ima ditaonhon
Ho Tuhanku alani hajungkatonhu,
ala ni hupuji ho Tung marribu hali
do.
 O Latus, o sintua ni malim,
tumagon ma di ho si Barabbas
sipartudos i sibunu jolma
panggunturi i? Anggo tu si songon
na nidok ho do, muli ma damang,
topot ma jabum di na nidokmu
“tagonan si Barabbas dipalua”.
• Pardosa na sumalin i dihasiholi ho?
Hape anggo Jesus na so marpipot i
ingkon soroonmu jala tijuranmu?
Ingkon insahanmu? Ingkon
leaanmu?
• Ingkon pasiaksiahonmu? Aha
tagamon rugim ale, dibahen
Jesuski? Nda holan laba dohot
pasupasu do na so sian Tuhanki?
Giahan ho di na tama ale sintua ni
malim?
 O Jesus, tu dia tagamon mabaor
sude mudarMi? Anggo tung tu
sunge do, nda magopo ma i? Nunga
sap mudar simajujung ni Tuhanki,
aha ma bahenonhu mangapusi i?
• Tung pinapungupungu pe sandok
saputangan ni manisia, ndang tuk
be anggo mangapusi i. Rohangku,
roham nama na boi mangapusi i.
• Silamotanhu nama na tuk manghois
i. Nunga marsapusapu mudar
simanarup ni Tuhanki. Alani i patut
do ingkon endehononmu :
 B.E No. 78 : 1
“O Ulu Na Sap Mudar” BL. 158
 B.E No. 78 : 1
“O Ulu Na Sap Mudar” BL. 158
• O Ulu na sap mudar binaen ni bugangMi. Na
sian janggarjangar, sisungsang duri! O Ulu
hatongamon hian do tumpalMi, ditaon Ho
haleaon Ho naeng sombaonhi.
IDA MA, TUNG PASOMBUSOMBUONMU
DOPE SOLDADU I?
• Ida ma, tung pasombusombuonmu
dope soldadu i? Nunga loja, nunga
maheu Tuhanki, alai pulut do roham
ale soldadu palaluhon tanganmu na
gintal i tu salop ni Tuhanki.
• Aha manggitik roham umbahen
ingkon pastaponmu simangarudop ni
Tuhanki? Na so adong do habidingan
ni tanganmi? Pasombu tagas ho tu
Tuhanki na so ra mangalo i, na
songon birubiru na sai hohom
maradophon sigustingi ibana?
• O Jesus birubiru ni Debata, laho ma
Ho? O Jesus, diparsipal pe Ho, sai
manaonnaon do Ho, ndang manang
mangkuling pamanganmu.
• Songon birubiru do Ho tinogu tu
pamotongan jala songon anak ni
birubiru na hohom maradophon
jolma sigustingi ibana. Tung na so
dibuha Ho do pamanganmu.
• Ndada na so tarbahen Ho nian tutu
padirihon lobi sian sampuludua loksa
surusuruan laho mandopang angka
panggunturi i, alai manaon do Ho! O
Jesus birubiru ni Debata, borhat ma
Ho? O Jesus na mamorsan dosa ni
hajolmaon i laho ma Ho?
• Patut ma tutu didok angka na porsea
i. Na lao do birubiru i mamorsan
angka dosa, ni nasa hajolmaon i
dibenget ni rohana.
• Diporsan do sahitta i, dilehon do
dirina i tu tangan ni pamunu,
ditaoni do na bernit i ro di na tos
hosaNa i, didok naeng porsanonhu.
Marende Huria B.E No. 81 : 5 “Jesus
Mual Ni Ngolungku” BL. 185
B.E No. 81 : 5 “Jesus Mual Ni Ngolungku” BL.
185
• Tung tanganMu dohot patMu
ditorusi labang i. Jadi tiris ma
mudarMu sian hau pinarsilang i. I
do mual paridian di au jolma na
hansitan. Ala nii hupuji Ho tung
maribu hali do.
NUNGA LAM TU NANGKOKNA
MATA NI ARI
• Nunga lam tu nangkokna mata ni
ari. Idama nunga pukul sia
manogotna. Nunga jongjong be
silang ni Tuhanki, nunga gantung
Jesus Anak ni Debata di hau
pinarsilang.
• Sungkot tu langit, so dais be tu tano,
nunga ditongatonga Ibana. Saut ma
Ibana nuaeng gabe sipadomu jolma
na di rura partangisan on dohot
Debata Amanta parholong na di
surgo hasonangan i.
• Hape ihut dope muse dua nari parjahat
tarsilang mangkaliangisa. Ida ma ribur
nai angka painondur i. Angka sintua ni
malim dohot siboto surat, sintua ni na
torop i rap mangupirupir uluna be huhut
mandok angka hatana be laho
pauruuruhon Jesus mandok :
• Pe Ho, na mangalohai bagas joro i
jala na pajongonghonsa dibagasan
tolu ari. “Palua dirim jala mijur ma
Ho sian hau pinarsilang i”.
• Nang ndung gaung Tuhanki ale
sintua ni malim, ndang sombu dope
roham? Boasa sai babaanmu dope?
Sai pambebeatanmu dope huhut
mandok : “palua dirim, molo tutu
Ho Anak ni Debata, mijur ma Ho
sian hau pinarsilang i?”.
• Angka soldadu i pe dohot
pauruuruhon Ibana.Dibuat do abit
ni Tuhan i, dibagibagi ma, didabu
dope tondungna tu sampesampe i.
Opat do soldadu i, ba, diparopat ma
abitna. Alai tading ma
sampesampeNa. Kituna do goarna.
• Tondung ma dibahen laho
marbagibagi. Ndada ala ni malim
martondung i ale soldadu, ndada ala
ni parenta ni induk i,
• alai tung na pasauthon lomo ni roha
ni Debata do i, ai na tarsurat do
“dibagi do abitna, tondung do
dibahen taringot tu
sampesampena”.
• Gari donganna na targantung i tahe,
parjahat na sumalin i, dohot do
mangaleai Ibana. asa nunga tung
sange sude horong manimpalhon
insakinsak tu Ibana. Alai, alai
sangkababa hata pe ndang dibuha
pamanganNa.
• Dipaula so dibege do soara ni na
torop i. Tongtong do hata holong
haruar sian pamanganna. Tuani ma
disi ho ale parjahat na sadanari, ai
muba do roham siala ni silang ni
Tuhanki, tuani ma ho maminsang
donganmu parjahat i.
• Tabo do hatam i mandok : “Ndang
dihabiari ho Debata, atik pe rap
hona uhum hita, o Jesus, ingot ahu
ndung sahat Ho tu harajaonMi”.
• Nian anggo roha mandok, nda
mangontahi ma bugang na i. Hape
anggo Tuhan i tenang do marsoara
sian silang i. Silangi, silangmi, ido
haluaonku.
Marende Huria B.E No. 86 : 1
“Silang Na Badia” BL. 67
 B.E No. 86 : 1
“Silang Na Badia” BL. 67
• Silang na badia i Ho do
lombulombungki. Maralohon dosa i
dohot pandelean i. Di sude sitaonon
i, Ho ma lombulombungki.
BEGE MA NUNGA MANGKULING
JESUS
• Bege ma nunga mangkuling Jesus, on do
hataNa sian silang i : “Ale Amang,
marpamuati ma rohaM mida nasida, ai
ndang diboto nasida na binahen nasida
i”. Ndang dao Debata sian Ibana. Songon
pangkataion ni na paadopadop bohi do
soara i Jesus, didok ma : “Ale Amang,
marpamuati ma roham...”
• Nda na ruar sian mata mual holong
ni roha doi? Ise ma na tuk mandok
songon i? Halak na mangalasahi
Ibana, na manilangkon i, diondihon
dope jala diparamothon.
• Aut ahu songon i Tuhan nunga
dohononku “Ale Amang, sai luluhon
ma pambahenan nasida i tu ahu”.
Dohononku ma, “Ale Debatangku,
parbadahon ma badangku”.
• Hape anggo tung Ho, gok holong do.
Haholongan na badia sian Tuhan
Jesus i, sai songgopi sai bongoti roha
dohot tondingki.
• Ai ndang diboto nasida na binahen
nasida i. Aha be nian na so diboto
sintua ni malim i, alai dipaula so
diboto be do. Hape agan pe songon
i, ndang na marna montok holong ni
roha ni Tuhan Jesus.
• Ai bidang pe taon, umbidang dope
holong nai, bagas pe laut, umbagas
do holong na i, timbo pe langit,
tumimbo do holong nai.
• Situtu do hatangKon tu ho, sadarion
do ho rap dohot Ahu diparadeiso. Tu
parjahat na disiamun nai do nian
hata on. Alai tu ho dohot tu ahu do
deba pangonaina. Nda hata
sipangalambohi tondi doi?
• Aut datu ahu, dohononku ma,
sideang pangulaon ma i, lapatanna :
pangalapan hosa loja. Sian dia ma
tagamon boi puas hata si songon i?
• Holan sian mata mual haluaon i doi.
Ndang olo mansohot mual haluaon i
mamaorhon pasupasu tu na
paubahon rohana.
• Agan pe ditano on tarbege do
soarana, alai anggo isina, nunga
diparadeiso, i do umbahen didok :
“sadarion do ho rap dohot Ahu
diparadeiso”.
• Agan pe dihau i dope ho
gaunggaung ale parjahat, alai ala
dipauba ho roham, alani i nunga
tubu haum diparadeiso ni Debata.
• sonang na i ho, nda patut ma
endehononmu nian : sonang
dilambung Jesus, sonang na ro tu si.
Unang be ho mabiar lao
mandapothon i.
• Tongtong dijuhon Jesus, sai ro ma
ho tu Ahu. Tadinghon haholomon
jala haposi Au.
Marende Huria B.E No. 86 : 5
“Silang Na Badia” BL. 67
 B.E No. 86 : 5
“Silang Na Badia” BL. 67
• Silang na badia i Ho do
lombulombungki. Molo puas
hodokhi, di na suda bohalhi. Di sude
sitaonon i, Ho ma lombulombungki.
NDI MA INANG ANAKMI, NDI
MA INANGMI
• Ndi ma inang anakmi, ndi ma
inangmi. Ndang dipalingkang
inangna si Maria i antong tampuk ni
pusupusuna naung gantung di silang
i. Dipamanat Jesus do i, didok ma :
“ndi ma inang anakmi”. Nda jamita
parsaoran na ro nangkin do i?
• Asa marpartalian hasadaon ganup
na porsea di Ibana, nirahut ni silang
i. Nunga mandaodao jongjong angka
na mananda Jesus i, songon i muse
nang angka parompuan na
mangihuthon Ibana sian Galilea.
• Beha ma tahe, ndada tiala roha, ai
gari si Petrus pe, pola do
dipambuburahon dirina paboa na so
ditanda Jesus i. Masihaishon api
sian gurunggurungna do ninna
rohana be.
• Alai, ianggo si Maria inana i, rap
dohot paribanna si Maria ni si
Kleopas dohot si Maria Magdalena,
jongjong do dilambung Jesus na
disilang i.
• Ndang tarpaberengbereng Jesus be
ina pangintubuna i, songon i muse
nang inana si Maria, ndang
tarpaidaida be anak sinuan beu na i.
• Disi dilibashon soldadu i lasaklasak nai
tu Jesus, disi do songon na ditutuphon
ulos nai tu simajujungna unang
dipaidaida i. Holan disi dipadonok
soldadu i tu Jesus anakna i, nunga
mallobok tarontokna mandok : “aha ma
tagamon na naeng bahenonna?”
• ua dompon ma roham inang aut
ndang adong anakmu na songon
sagak ni panabian laho ne tu toru ni
situmandok, nda ingkon maheu ho
paidaidahonsa?
• Ndang tarurupi si Maria be, holan
ilunai nama diporo pola hira na
mahiang pariluiluanna. Mamereng i
ma Jesus, gabe marsoara mandok,
ndi ma inang anakmi, pos ma
roham, pir ma tondim.
Mauas Ahu
• Di jolo ni on dilehon do nian siinumon, alai
ndang dijalo hape nuaeng nunga dipangido.
Nda saut do songon na tarsurat dipadan na
robi hian taringot tu Ibana di na nidok ni par
Psalm i “Merus do gogongku songon
ngarngar, jala lohot do dilangku dilangitlangit
ni pamanganhu jala tu orbuk ni hamatean
dipapodom Ho ahu”.
• Jesus mual hangoluan ni boru
Samaria, nuaeng gabe mauas.
Songon na dipurun dihilala,
mamiltak mataniari, mangontahi ma
bugang i. Modar di hilala. Songon na
sungkot nama dihilala sialap
ingkauna.
• Ala ni mohopna gabe dijouhon Jesus
ma “mauas Ahu”. Asa saut do
sombu uashu ia mauas pe Jesus i.
Ndang pola be dohot ahu muse
manjouhon di ujung ni langkaku
“mauas Ahu”.
• Tutu godang do na huhauashon
diportibi na mangilas on, alai
nuaeng gabe sombu ma sudena i ala
naung diporsan Jesus disilangna
huhut mandok “mauas Ahu”.
Eloi, eloi lama sabachtanei
• Ale Debatangku, Debatangku, boasa
tung tadinghononMu Ahu? Nunga
songon halakhalak na tarpunjung,
songon tandiang na hapuloan Jesus
di silang i.
• Nunga tudia ho ale Petrus? Nda
didok ho do na so tupa
tadinghononmu Ibana? Nunga tudia
ho ale Lazarus?
• Nunga tudia ho ale angka na bosur
siala roti sisaotik na sian Jesuski?
Tudia ho ale manisia?
• Diida ma tu ginjang, songon dipatait
Debata Bohina. Ndung i
mangangguk badar ma Ibana.
Angguk badar na badia do on
mandok : Eloi Eloi Lama Sabctanie.
Ale Debatangku, Debatangku, boasa
tung tadinghononmu ahu?
• Ndada na mamurai, ndada na
mandele manang mamulasi Jesus
dianggukna on. Asa tung paltak do
tahilala bagas ni panghaholongi ni
Debata di panghophopona i dihita,
ai songon i ma bernit ni sitaonon i
alani dosanta.
• Alani i angka dotdot ma ho ale
tondingku angka hitir ma ho umbege
angguk badar na badia i, ai ho hian do
tama manganggukhon i alani
hajahatonmu, hape nunga dijoloani
anak ni jolma manganggukhonsa.
Ale Amang, tubagasan tanganMu ma
hupasahat tondingKu.
• Jesus na burju marama i, Jesus anak
sipangoloi, ndang dung
manghalupahon amana di surgo i.
Sian mula ni ulaonna sahat ro di
ujung ni ngoluna, sai tong do ngolu
na marpandapotan tu Amana i.
• Nuaeng pe ndang tu hamatean i
diodothon Tondina. Ndang lupa
ibana pasahathon arta na ummarga
i tu Amana.
• Dipagomgomhon do tu Amana na
disurgo i tondina i, didok ma “Ale
Amang, tubagasan tanganMu ma
hupasahat tondingKu”. O hamu
huria ni halak Kristen na badia,
• nunga dijoloani Anak ni Debata
soaram manjouhon asa diingot ho
pagomgomhon ngolum dohot
tondim tu tangan ni amanta na
disurgo i. Sintong do molo
taparhatopot marhite ende ni angka
na porsea i :
Marende Huria B.E No. 383 : 1 “Adong
Do Ama Na Di Surgo i” BL. 383
 B.E No. 383 : 1
“Adong Do Ama Na Di Surgo i” BL. 383
• Adong do Ama na di surgo i, Tuhan
Jahowa Debatanta i. Dijou do au na lao
ma au tu Ama na di surgo i. Lao ma au,
lao ma au tu na di surgo i, lao ma au,
lao ma au tu na di surgo i. Dijou do au
na lao ma au tu Ama na di surgo i.
NUNGA MARUJUNG
• Nunga marujung. Aha do na
marujung? Nunga marujung angka
ulaon dohot paraloanna i. Nunga
marujung nang silangna i. Nunga
marujung sitaononna i.
• Andoran so dipaunduk dope
simajujungnai, nunga mulai
mandele mata ni ari i marsinondang
gabe mangholom ma sandok tano
on. Ndang tarpaidaida mata ni ari
be Tuhanki na sai gantung i.
• Songon na maila mataniari i
marnida bohi ni na sai
marsinondang na sai laon.
Disonggak sinondang ni asi ni roha
ni Jesus i do sinondang ni matani ari
i, ujungna gabe dipahohom mata ni
ari i ma dirina.
• Molo adong sian hamu ale jolma
manisia parhapistaran portibi
mandok : “Gerhana ni matani ari
doi” uji ma paresohon tu tingki na
manang na cocok do i? Jempek do
alus tu si mandok, ndang.
• Molo adong dope sian ho ale portibi
na mangilas mandok, timus ni dolok
marapi na mapultak do i, tangihonon
ma pandok ni parpandebisuk
mandok, ndang. Antong aha doi?
Mangholom mata ni ari i, gabe
mangholom ma sandok tano on.
• Gabe songon na alang so tarida
nama Tuhanta i di silang i. Ale mata
ni ari, boasa so mangkidop be ho?
Tagamon naung ditatap ho do na so
mangkidop be simalolong ni
Tuhanki?
• Nunga mamirong humaliang. Disi
ma dipagogo, dipangiar Jesus
soaraNa mandok : ”nunga
marujung”, jadi tos ma hosaNa.
• Manghuling ma giringgiring 7 hali
lambatlambat jongjong ma sude
dibagasan hahohomon martangiang.
Di na huhut manguling giringgiring,
dipalu ma potimarende mansai
angonangon B. E. No 334 : 1 “Nasa
Jolma Ingkon Mate”
 Marende Huria B.E No. 334 : 1
“Nasa Jolma Ingkon Mate” BL. 186
 B.E No. 334 : 1 “Nasa Jolma Ingkon Mate”
BL. 186
• Nasa jolma ingkon mate, ingkon
mago sibuk i. Na mangolu ingkon
mate, asa tung denggan muse.
Daging on do gabe bangke, jala
ingkon do malangke. Asa sogot
bangkit i, tu hasangaponNa i.
Marende Huria B.E No. 335 : 1 – 2
“Loas Au Asa Lao” BL. 50
 B.E No. 335 : 1 – 2
“Loas Au Asa Lao” BL. 50

1. Loas au, asa lao tu Jesushu tu na

dao; Ai malungun do rohangku
mandapothon Debatangku. Asa di
lambungNa au. Asa di lambungNa
au
2. Jesushi, sondang i, sitorusi ombun
i. O andigan ro tingkingku, asa
borhat ma tondingku. Lao marnida
bohiMi. Lao marnida bohiMi
 Marende Huria B.E No. 338 : 1
“Hehe Do Muse Pamatanghon” BL. 54
 B.E No. 338 : 1
“Hehe Do Muse Pamatanghon” BL. 54
• Hehe do muse pamatanghon sian
tanoman on. Suang mangolu
bahenon ni Tuhanhu: Haleluya,
Heleluya.
TANGIANG ALE AMANAMI –
PASUPASU –
AMEN...AMEN...AMEN...